ვიბროცილი წვეთები - Vibrocil Drops ცხვირის 15მლ

ვიბროცილი

Vibrocil 

პრეპარატის სავაჭრო დასახელება: ვიბროცილი/Vibrocil

სამკურნალო ფორმა: >ცხვირის წვეთები

შემადგენლობა

1 მლ წვეთები შეიცავს: 

მოქმედი ნივთიერებები: ფენილეფრინი 2.5 მგ/მლ, დიმეტინდენის მალეატი 0.25 მგ/მლ.

დამხმარე ნივთიერებები: დინატრიუმის ფოსფატი უწყლო, ლიმონმჟავას მონოჰიდრატი, სორბიტოლი, ბენზალკონიუმის ქლორიდი, ლავანდის ეთერზეთი, რომელიც არ შეიცავს ტერპენებს, გასუფთავებული წყალი.

აღწერილობა

გამჭვირვალე ხსნარი უფეროდან მკრთალ მოყვითალო ფერამდე, ლავანდის სუსტი სუნით.

ფარმაკოთერაპიული ჯგუფი: დეკონგესტანტები და ადგილობრივი გამოყენების სხვა ნაზალური საშუალებები.

ათქ კოდი: R01AB01.

ფარმაკოლოგიური თვისებები

ფარმაკოდინამიკა

ვიბროცილი არის კომბინირებული პრეპარატი, რომელიც შეიცავს ფენილეფრინს და დიმეტინდენს. 

ფენილეფრინი სიმპატომიმეტური საშუალებაა. ადგილობრივი გამოყენებისას მას აქვს ზომიერი სისხლძარღვთა შემავიწროვებელი მოქმედება (ცხვირის ლორწოვანი გარსის ვენოზურ სისხლძარღვებში განთავსებულ ალფა-1-ადრენორეცეპტორების სტიმულაციის ხარჯზე). იგი ხსნის ცხვირის და  დანამატი წიაღების ლორწოვანი გარსის შეშუპებას. 

დიმეტინდენი არის ალერგიის საწინააღმდეგო საშუალება - ჰისტამინური H1-რეცეპტორების ანტაგონისტი. იგი არ ამცირებს ცხვირის ლორწოვანი გარსის მოციმციმე ეპითელიუმის აქტივობას.

ფარმაკოკინეტიკა

ვიბროცილი განკუთვნილია ადგილობრივი გამოყენებისათვის, და მისი აქტივობა არ არის დამოკიდებული სისხლის პლაზმაში აქტიური ნივთიერების კონცენტრაციაზე.

შემთხვევით პერორალური მიღებისას ფენილეფრინს აქვს დაბალი ბიოშეღწევადობა (დაახლოებით 38%) მეტაბოლიზმის გამო ნაწლავებსა და ღვიძლში პირველადი გავლის შედეგად. ფენილეფრინის ნახევარგამოყოფის პერიოდი დაახლოებით 2.5 სთ-ს შეადგენს. 

დიმეტინდენის სისტემური შეღწევადობა პერორალური ხსნარის გამოყენებისას შეადგენს დაახლოებით 70%-ს. დიმეტინდენის ნახევარგამოყოფის პერიოდი დაახლოებით 6 სთ-ს შეადგენს.

გამოყენების ჩვენებები

პრეპარატი ვიბროცილი გამოიყენება ცხვირის დახშობის და ქავილის მოკლევადიანი სიმპტომური მკურნალობისთვის, მაგალითად, გაცივების, სინუსიტის (ცხვირის დანამატი წიაღების ანთება), თივის ცხელების, არასეზონური ალერგიული რინიტის (ცხვირის ლორწოვანი გარსის ანთება, მაგ., გამოწვეული სახლის მტვერით, ცხოველების ბეწვით, ობით).

ექიმის დანიშნულებით, ვიბროცილი ასევე შეიძლება გამოყენებული იქნას ოპერაციამდე ან ოპერაციის შემდეგ და როგორც დამხმარე საშუალება მწვავე შუა ოტიტის დროს.

თუ 3 დღის შემდეგ გაუმჯობესება არ აღინიშნება ან სიმპტომები უარესდება, უნდა მიმართოთ ექიმს.

გამოყენების წესი და დოზები

არ გადააჭარბოთ დანიშნულ დოზას და არ გაზარდოთ სამკურნალო პრეპარატის გამოყენების სიხშირე.

უნდა შეირჩეს ეფექტის მისაღწევად საჭირო ყველაზე დაბალი დოზები და გამოყენების მინიმალური ხანგრძლივობა.

2 წლიდან 6 წლამდე ასაკის ბავშვებში (მოზრდილების მეთვალყურეობით) 

1-2 წვეთი თითოეულ ნესტოში 3-4-ჯერ დღეში. 

6 წელზე მეტი ასაკის ბავშვებში (მოზრდილების მეთვალყურეობით) და მოზრდილებში  

3-4 წვეთი თითოეულ ნესტოში 3-4-ჯერ დღეში.  

გამოყენება 2 წლამდე ასაკის ბავშვებში 

ვიბროცილის, ცხვირის წვეთების, გამოყენება 2 წლამდე ასაკის ბავშვებში რეკომენდებული არ არის.

პაციენტების განსაკუთრებული პოპულაციები

ხანდაზმული პაციენტებში (65 წელზე მეტი ასაკის) მონაცემები დოზის კორექციის აუცილებლობის შესახებ არ არსებობს.

გამოყენების წესი

· გამოყენებამდე კარგად გაისუფთავეთ ცხვირის ღრუ (მაგ., კარგად მოიხოცეთ ცხვირი). 

· ჩაწვეთებისას ფრთხილად იყავით, რომ წვეთები არ მოხვდეს თვალში.

· თავი ოდნავ უკან გადახარეთ. ჩაიწვეთეთ წვეთები თითოეულ ნესტოში და შეინარჩუნეთ თავის არსებული მდგომარეობა კიდევ რამდენიმე ხნის განმავლობაში, იმისათვის, რომ ცხვირის წვეთები განაწილდეს.

· გამოყენების შემდეგ საწვეთური გაასუფთავეთ და გააშრეთ. დაახურეთ ფლაკონს თავსახური.

ინფექციის შესაძლო გავრცელების თავიდან ასაცილებლად, არ გადასცეთ პრეპარატი ვიბროცილის, ცხვირის წვეთების, ფლაკონი სხვა პირებს.

გვერდითი მოქმედება

ინფორმაცია გვერდითი ეფექტების შესახებ მოცემულია სისტემებისა და ორგანოების კლასიფიკაციის შესაბამისად და განვითარების სიხშირის მიხედვით. 

განვითარების სიხშირე განისაზღვრებოდა შემდეგი კლასიფიკაციით: ძალიან ხშირი (≥ 1/10), ხშირი (≥ 1/100 - 1/10), არც ისე ხშირი (≥ 1/1000 - <1/100), იშვიათი (≥ 1/10 000 - <1/1000), ძალიან იშვიათი (<1/10000). თითოეულ კატეგორიაში არასასურველი რეაქციების განვითარების სიხშირე მოცემულია მათი სერიოზულობის კლებადობის მიხედვით. 

დარღვევები სასუნთქი გზების მხრივ.

იშვიათად: დისკომფორტი ცხვირის არეში, ცხვირის სიმშრალე, სისხლდენა ცხვირიდან.

რეაქციები გამოყენების ადგილას

იშვიათად: წვის შეგრძნება გამოყენების ადგილას.

შეტყობინება არასასურველი რეაქციების შესახებ 

ნებისმიერი გვერდითი რეაქციის განვითარებისას გაიარეთ კონსულტაცია ექიმთან. ეს რეკომენდაცია ვრცელდება ნებისმიერ შესაძლო არასასურველ რეაქციაზე, მათ შორის, იმ რეაქციებზეც, რომლებიც არ არის ჩამოთვლილი სამედიცინო გამოყენების ინსტრუქციაში.

უკუჩვენებები

· მომატებული მგრძნობელობა პრეპარატის კომპონენტების მიმართ.

· ატროფიული რინიტი (მათ შორის, ცუდი სუნის მქონე გამონადენით - ოზენა).  

· მაო-ს ინჰიბიტორების გამოყენება (ერთდროულად ან მომდევნო 14 დღის განმავლობაში). 

· დახურულკუთხოვანი გლაუკომა.

·   ტრანსნაზალური ოპერაციის შემდეგ (ქირურგიული ჩარევა ცხვირის მიდამოში, რომლის დროსაც ხდება ტვინის გარსის გაშიშვლება).

ურთიერთქმედება სხვა სამკურნალო საშუალებებთან

ფენილეფრინი უკუნაჩვენებია პაციენტებში, რომლებიც გამოიყენებენ მაო-ს ინჰიბიტორებს ან გამოიყენებდნენ მათ ვიბროცილის წვეთების მიღებამდე 2 კვირის განმავლობაში.

სიფრთხილით გამოიყენება ვაზოკონსტრიქტორები პაციენტებში, რომლებიც იღებენ ტრი- და ტეტრაციკლურ ანტიდეპრესანტებს ან ანტიჰიპერტენზიულ საშუალებებს, როგორიცაა ბეტა-ბლოკატორები, რადგან ერთდროულმა გამოყენებამ შეიძლება გააძლიეროს ფენილეფრინის ჰიპერტენზიული მოქმედება.

უსაფრთხოების ზომები

ვიბროცილის წვეთები სიფრთხილით გამოიყენება პაციენტებში, რომლებსაც აქვთ ჰიპერმგრძნობელობა სიმპატომიმეტური საშუალებების მიმართ, რაც გამოიხატება უძილობით, თავბრუსხვევით, ტრემორით, გულის არითმიებით და არტერიული წნევის მომატებით. 

ვიბროცილი არ უნდა გამოიყენოთ ზედიზედ 3 დღეზე მეტი ხნის განმავლობაში. თუ სიმპტომები ნარჩუნდება ან მდგომარეობა უარესდება, უნდა მიმართოთ ექიმს. პრეპარატის ხანგრძლივი დროით ან მაღალი დოზებით გამოყენებამ შეიძლება გამოიწვიოს ტაქიფილაქსია, ჰიპერემია მოხსნის სინდრომის გამო ან მედიკამენტოზური რინიტი.

სხვა ადგილობრივი გამოყენების ვაზოკონსტრიქტორების მსგავსად, არ გადააჭარბოთ რეკომენდებულ დოზებს. ეს ძირითადად ეხება მცირეწლოვან ბავშვებსა და ხანდაზმულებს, რომლებშიც ძალიან მაღალმა დოზებმა შეიძლება გამოიწვიოს სისტემური ეფექტების განვითარება. ვიბროცილის წვეთები სიფრთხილით უნდა იქნას გამოყენებული პაციენტებში, რომლებსაც აქვთ არტერიული ჰიპერტენზია, გულ-სისხლძარღვთა დაავადებები, ჰიპერთირეოზი, შარდის ბუშტის ყელის ობსტრუქცია (მაგ., წინამდებარე ჯირკვლის ადენომა), შაქრიანი დიაბეტი. ეპილეფსიის მქონე პაციენტებმა სიფრთხილით უნდა გამოიყენონ ვიბროცილის წვეთები, ჰისტამინის H1 რეცეპტორების ანტაგონისტის - დიმეტინდენის მალეატის შემცველობის გამო.

ვიბროცილის წვეთები არ არის რეკომენდებული 2 წლამდე ასაკის ბავშვებში. 2-დან 12 წლამდე ასაკის ბავშვებმა უნდა გამოიყენონ სამკურნალო საშუალება მოზრდილების მეთვალყურეობით.

ბენზალკონიუმის ქლორიდმა, რომელიც პრეპარატის შემადგენელი ნაწილია, შეიძლება გამოიწვიოს ცხვირის ლორწოვანი გარსის გაღიზიანება და შეშუპება, განსაკუთრებით ხანგრძლივი გამოყენებისას.

გამოყენება ორსულობის დროს და ძუძუთი კვების პერიოდში

ორსულობა

ორსულობისა და ძუძუთი კვების პერიოდში ფენილეფრინის და დიმეტინდენის მალეატის გამოყენების შემსწავლელი კვლევები არ ჩატარებულა. 

ლაქტაცია

ფენილეფრინი და დიმეტინდენის მალეატი შეიძლება გადავიდნენ დედის რძეში. ამიტომ, სიფრთხილის მიზნით, ვიბროცილის გამოყენება ორსულობის დროს და ძუძუთი კვების პერიოდში არ არის რეკომენდებული.

ზეგავლენა სატრანსპორტო საშუალებების მართვისა და მექანიზმებთან მუშაობის უნარზე

მონაცემები არ მოიპოვება.

ჭარბი დოზირება

ვიბროცილის ჭარბი დოზირებისას შესაძლებელია სიმპატომიმეტური და ანტიქოლინერგული ეფექტების განვითარება, მათ შორის გულისცემის გახშირება,  პარკუჭოვანი ექსტრასისტოლები, მსუბუქი სინუსური ტაქიკარდია, ჰიპერტონია,  თავის ტკივილები კეფის არეში, კანკალი ან ტრემორი, მიდრიაზი, ცნობიერების დაბინდვა, სიფერმკრთალე, აგზნებადობა, ჰალუცინაციები, კრუნჩხვები, უძილობა, ასევე სედაცია, დაღლილობა, კომა, მუცლის ტკივილი, გულისრევა და ღებინება.

შემთხვევით ვიბროცილის პერორალური მიღების შემდეგ მძიმე სიმპტომები არ აღინიშნებოდა. 20 მგ-მდე დიმეტინდენის შემთხვევითი პერორალური გამოყენება არ იწვევდა სერიოზულ სიმპტომებს.

ბავშვებში მთელი ფლაკონი (15 მლ) ვიბროცილის პერორალური მიღების შემთხვევაში სპეციალური ზომების მიღება საჭირო არ არის.

ვინაიდან არ არსებობს მონაცემები 20 მგ-ზე მეტი დიმეტინდენის მიღებასთან დაკავშირებით, საჭიროა სამედიცინო დაკვირვება, ხოლო კლინიკურ ექსპერტთან ან ტოქსიკოლოგიურ საინფორმაციო ცენტრთან კონსულტაციის შემდეგ ნაჩვენებია აქტივირებული ნახშირის ერთჯერადი დოზის მიღება.

აღგზნების და კრუნჩხვების მძიმე შემთხვევების მკურნალობისთვის გამოიყენება  ბენზოდიაზეპინები. ანტიდოტების გამოყენება უნდა მოხდეს კლინიკურ ექსპერტთან ან ტოქსიკოლოგიურ საინფორმაციო ცენტრთან კონსულტაციის შემდეგ: ცენტრალური ანტიქოლინერგული სიმპტომების მკურნალობა შესაძლებელია ფიზოსტიგმინით. პერიფერიული სიმპათომიმეტური სტიმულაციით გამოწვეული ჰიპერტონია, რომელიც არასაკმარისად რეაგირებს ბენზოდიაზეპინებზე, შეიძლება დაექვემდებაროს ალფა-ადრენობლოკატორებით მკურნალობას.

გამოშვების ფორმა

15 მლ მუქი ფერის მინის ფლაკონში ხრახნიანი თავსახური-საწვეთურით. ფლაკონი გამოყენების ინსტრუქციასთან ერთად მოთავსებულია მუყაოს კოლოფში.

შენახვის პირობები

ინახება არა უმეტეს 25°C ტემპერატურაზე.

ინახება ბავშვებისათვის მიუწვდომელ ადგილას. 

ვარგისობის ვადა

3 წელი.

არ გამოიყენოთ პრეპარატი შეფუთვაზე აღნიშნული ვარგისობის ვადის გასვლის შემდეგ.

აფთიაქიდან გაცემის წესი

ფარმაცევტული პროდუქტის ჯგუფი III, გაიცემა რეცეპტის გარეშე.