ტიროთრიცინი პროვიტა - Tyrothricin 20 ტაბლეტი

ტიროთრიცინი საწუწნი ტაბლეტები

პრეპარატის გამოყენებამდე ყურადღებით წაიკითხეთ გამოყენების ინსტრუქცია, რადგანაც ის შეიცავს თქვენთვის მნიშვნელოვან ინფორმაციას.

- შეინახეთ გამოყენების ინსტრუქცია. შესაძლოა კიდევ დაგჭირდეთ მისი წაკითხვა.

- დამატებითი ინფორმაციის საჭიროების შემთხვევაში ან კონსულტაციისთვის მიმართეთ ფარმაცევტს.

- ეს პრეპარატი დაგენიშნათ პირადად თქვენ, ნუ გადასცემთ სხვა პირს, იმ შემთხვევაშიც კი თუ თქვენი სიმპტომები მსგავსია, 

- რაიმე სახის გვერდითი მოვლენების გამოვლენის შემთხვევაში მიმართეთ თქვენს  ექიმს, ფარმაცევტს ან მედდას, იმ გვერდითი მოვლენების ჩათვლით რომელიც არ არის მითითებული წინამდებარე გამოყენების ინსტრუქციაში, იხილეთ პუნქტი 4.
რას შეიცავს წინამდებარე გამოყენების ინსტრუქცია 

1. რა არის ტიროთრიცინი საწუწნი ტაბლეტები და რისთვის გამოიყენება.

2. რა უნდა ვიცოდეთ ტიროთრიცინი საწუწნი ტაბლეტების მიღებამდე.

3. ტიროთრიცინი საწუწნი ტაბლეტების მიღების წესი.

4. შესაძლო გვერდითი მოვლენები.

5. ტიროთრიცინი საწუწნი ტაბლეტების შენახვის წესი.

6. შეფუთვის შიგთავსი და დამატებითი ინფორმაცია. 

1.  რა არის ტიროთრიცინი საწუწნი ტაბლეტები და რისთვის გამოიყენება.

ტიროთრიცინი საწუწნი ტაბლეტები შეიცავს ბაქტერიოსტატურ და ბაქტერიციდულ ნივთიერებებს ტიროთრიცინს, ნეომიცინს. ბენზალკონიუმის ქლორიდს, ასევე ბენზოკაინს, რომელიც ამცირებს ტკივილს.

ტიროთრიცინი საწუწნი ტაბლეტები განკუთვნილია ხახის და პირის ღრუს მსუბუქი და საშუალო სიმძიმის ინფექციების სამკურნალოდ (ყელის ტკივილი, პირის ღრუს ლორწოვანი გარსის და ღრძილების ანთება).

2. რა უნდა ვიცოდეთ ტიროთრიცინი საწუწნი ტაბლეტების მიღებამდე.

არ მიიღოთ ტიროთრიცინი საწუწნი ტაბლეტები

- თუ ხართ ალერგიული ტიროთრიცინის, ნეომიცინის, ბენზალკონიუმის ქლორიდის და ბენზოკაინის და პ-ამინობენზომჟავის ტიპის სხვა ადგილობრივი საანესთეზიო საშუალებების, ან მე-6 პუნქტში მითითებული ამ მედიკამენტის სხვა ინგრედიენტების მიმართ;

- თუ გაქვთ მძიმე კარდიოგენური ან ნეფროგენური დარღვევები;

- თუ გქონდათ ვესტიბულური ან კოხლეარული ორგანოს დაზიანება;

-  12 წლამდე ასაკის ბავშვებში;

- პირის ღრუს ან ხახის ღრუში შედარებით დიდი და ახალი ჭრილობების შემთხვევაში;

- რადიომუკოზიტის შემთხვევაში (სხივური თერაპიით გამოწვეული ლორწოვანი გარსის დაზიანება);

ვინაიდან ტიროთრიცინი საწუწნი ტაბლეტები შეიცავს მეთანოლს, მისი მიღება არ შეიძლება ბრონქიალური ასთმის ან სხვა რესპირატორული დაავადებების მქონე პაციენტების მიერ, რაც დაკავშირებულია სასუნთქი გზების მკვეთრად გამოხატულ ჰიპერმგრძნობელობასთან. ტიროთრიცინი საწუწნი ტაბლეტებით ინჰალაციამ შეიძლება გამოიწვიოს ბრონქოკონსტრიქცია.

განსაკუთრებული მითითება და სიფრთხილის ზომები

ტიროთრიცინი საწუწნი ტაბლეტების მიღებამდე კონსულტაცია გაიარეთ ექიმთან, ფარმაცევტთან ან მედდასთან.

ცხელების თანხლებით მიმდინარე ჩირქოვანი ტონზილიტის შემთხვევაში, მკურნალი ექიმი მიიღებს გადაწყვეტილებას უნდა მიიღოთ თუ არა ტიროთრიცინი საწუწნი ტაბლეტები პირველადი მკურნალობის სხვა საჭირო ღონისძიებებთან ერთად, როგორიცაა სისტემური ანტიბიოტიკების მიღება.

- ტიროთრიცინი საწუწნმა ტაბლეტებმა შესაძლოა დააზიანოს კბილები (კარიესი). ამიტომ საჭიროა კბილების რეგულარული მოვლა.

ორსულობის შემთხვევაში დაუყოვნებლივ აცნობეთ ექიმს.

სხვა მედიკამენტები და ტიროთრიცინის საწუწნი ტაბლეტები

აცნობეთ ექიმს ან ფარმაცევტს, თუ იღებთ, ბოლო პერიოდში გაქვთ მიღებული ან შეიძლება მიიღოთ სხვა პრეპარატები.

ერთდროულად ორი ან მეტი პრეპარატის მიღების შემთხვევაში, შესაძლებელია მათ გავლენა მოახდინონ ერთმანეთის მოქმედებაზე, რაც ვლინდება ეფექტების და გვერდითი მოვლენების გაძლიერებით ან შემცირებით.

ტიროთრიცინის ცალკეულ აქტიურ ინგრედიენტებთან დაფიქსირდა შემდეგი ურთიერთქმედებები:

ნეომიცინი ხელს უშლის ფენოქსიმეთილ პენიცილინის (ანტიბიოტიკი), დიგოქსინის (გულის ზოგიერთი დაავადების სამკურნალოდ) და მეთოტრექსატის (კიბოს სამკურნალოდ) აბსორბციას და ასუსტებს პერორალური კონტრაცეპტივების მოქმედებას.
ბენზალკონიუმის ქლორიდის ანტიმიკრობულმა მოქმედებამ შესაძლოა მეტ-ნაკლებად შეაფერხოს არა იონოგენური ზედაპირულად აქტიური ნივთიერების (ზედაპირული დაჭიმულობის შესამცირებელი ნივთიერებები, მაგ. კბილის პასტა) მოქმედება.
სადეზინფექციო საშუალება ბენზალკონიუმის ქლორიდის ეფექტურობა შესაძლოა ინაქტივირდეს ცილის, შრატისა და ჩირქის, აგრეთვე ფოსფოლიპიდების და ლიპიდების შემცველი სხვა ნივთიერებების არსებობისას.
ბენზოკაინთან ერთად გამოყენების შემთხვევაში დაფიქსირდა ინფექციური დაავადებების სამკურნალო ზოგიერთი საშუალებების (როგორიცაა დაპსონი, სულფასალაზინი, სულფონამიდები და ტრიმეტოპრიმი სულფონამიდის კომბინაციები) მოქმედების შემცირება.
ორსულობა და ძუძუთი კვება

ორსულობის ან ლაქტაციის პერიოდში ან თუ გაქვთ ეჭვი რომ ხართ ორსულად ან გეგმავთ ბავშვის გაჩენას, ამ პრეპარატის მიღებამდე კონსულტაციისთვის მიმართეთ ექიმს ან ფარმაცევტს.

ორსულობისა და ლაქტაციის პერიოდში ტიროთრიცინი საწუწნი ტაბლეტების გამოყენების შესახებ არასაკმარისი მონაცემების არსებობის გამო, რეკომენდებულია არ გამოიყენოთ ეს პრეპარატი ორსულობის ან ლაქტაციის პერიოდში.

ავტომობილის მართვა და მექანიზმების გამოყენება

ინსტრუქციის მიხედვით გამოყენებისას, ტიროთრიცინი საწუწნი ტაბლეტები არ ახდენს გავლენას ავტომობილის მართვისა და მექანიზმების გამოყენების უნარზე.

ტიროთრიცინი  საწუწნი ტაბლეტები შეიცავს საქაროზას

ტიროთრიცინი საწუწნი ტაბლეტებით მკურნალობის დაწყებამდე გაიარეთ კონსულტაცია ექიმთან, თუ გაწუხებთ შაქრის მალაბსორბცია.

ტიროთრიცინი საწუწნმა ტაბლეტებმა შესაძლოა დააზიანოს კბილები (კარიესი).

3. ტიროთრიცინი საწუწნი ტაბლეტების მიღების წესი

ყოველთვის მიიღეთ ეს პრეპარატი ინსტრუქციის ან ექიმის თუ ფარმაცევტის დანიშნულების მიხედვით. თუ არ ხართ დარწმუნებული პრეპარატის მიღების სისწორეში, მიმართეთ თქვენს ექიმს ან ფარმაცევტს.

დოზირება

მოზრდილები: 1-2 ტაბლეტი დღეში რამდენჯერმე, მაქსიმუმ 6 ტაბლეტი დღეში.

ბავშვები და მოზარდები: ტიროთრიცინი საწუწნი ტაბლეტები არ ინიშნება 12 წლამდე ასაკის ბავშვებში. უსაფრთხოებისა და ეფექტურობის შესახებ არასაკმარისი მონაცემების გამო მოზარდებში მიღება არ არის რეკომენდებული.

მიღების წესი და ხანგრძლივობა

მიიღება პერორალურად. ტაბლეტი უნდა გაწუწნოთ ბოლომდე. არ გადაყლაპოთ ან ჩაკბიჩოთ. ტიროთრიცინის მიღებამდე ცოტა ხნით ადრე ან უშუალოდ მიღების შემდეგ არ გაიხეხოთ კბილები, რადგან კბილის პასტა ამცირებს პრეპარატის ეფექტიანობას. დაახლოებით 5 დღეში თუ ვერ იგრძენით გაუმჯობესება ან მდგომარეობა გაუარესდა, მიმართეთ ექიმს. პრეპარატი არ გამოიყენება ხანგრძლივი დროით. 

თუ მიიღეთ საჭიროზე მეტი ტიროთრიცინი საწუწნი ტაბლეტები

რეკომენდებულ დოზებზე ძლიერ გადაჭარბებული დოზების გამოყენება იწვევს შიდა ყურის ფუნქციის ან ვესტიბულური აპარატის ფუნქციურ დარღვევებს, გულის მუშაობის დაქვეითებას, გამტარობის დარღვევას, არითმიებს, მეტალის გემოს შეგრძნებას პირში, ტონურ-კლონურ კრუნჩხვებს (ეპილეფსიური შეტევა) ან შექცევად ნეფროტოქსიკურ ეფექტებს. ბენზოკაინის ტაბლეტების დიდი რაოდენობით მიღებამ შეიძლება გამოიწვიოს მეთემოგლობინემია (სისხლის წითელი უჯრედების ცვლილება ჟანგბადის ნაკლებობის შედეგად).

თუ დაგავიწყდათ ტიროთრიცინი საწუწნი ტაბლეტების მიღება:

არ მიიღოთ ორმაგი დოზა გამოტოვებული დოზის ასანაზღაურებლად. გააგრძელეთ პრეპარატის მიღება დანიშნულების მიხედვით.

ამ მედიკამენტის გამოყენებასთან დაკავშირებით დამატებითი კითხვების არსებობის შემთხვევაში, მიმართეთ თქვენს ექიმს ან ფარმაცევტს.

4. შესაძლო გვერდითი მოვლენები

ყველა სხვა პრეპარატის მსგავსად, ამ პრეპარატმაც შესაძლოა გამოიწვიოს გვერდითი მოვლენები, თუმცა ისინი ყველას არ უვითარდება. 

არასასურველი ეფექტების შეფასება დაფუძნებულია სიხშირის შემდეგ მონაცემებზე:

ძალიან ხშირად (≥ l/10)

ხშირად (≥ 1/100-დან <1/10-მდე) 

ზოგჯერ (≥ 1/1,000-დან <1/100-მდე) 

იშვიათად (≥ 1/10,000-დან

ძალიან იშვიათად (<1/10,000)

არ არის ცნობილი (არსებული მონაცემების საფუძველზე სიხშირე არ არის დადგენილი).

ინფექციები და პარაზიტული დაავადებები

არ არის ცნობილი: სუპერინფექცია (დამატებითი ინფექცია სხვა მიკრობებთან ერთად).

სისხლის და ლიმფური სისტემის დაავადებები

ძალიან იშვიათად: ცვლილება ​​სისხლის ანალიზში (მეთემოგლობინემია, ანემია, ეოზინოფილია, ლეიკოპენია, თრომბოციტოპენია)

იმუნური სისტემის დაავადებები 

შვიათად: ჰიპერმგრძნობელობის რეაქციები.

არ არის ცნობილი: ალერგიული რეაქციები, ანაფილაქსიური რეაქციები. ხშირად თან ახლავს წნევის დაქვეითება, თავბრუსხვევა, გულისრევა, ჰაერის უკმარისობა.

ნერვული სისტემის დაავადებები 

არ არის ცნობილი: ნერვულ-კუნთოვანი ბლოკადა.

ოფთალმოლოგიური დაავადებები 

არ არის ცნობილი: თვალის კუნთების დამბლა.

ყურისა და ლაბირინთის დაავადებები

არ არის ცნობილი: ოტოტოქსიკურობა.

სასუნთქი გზების, გულმკერდის და შუასაყარის დაავადებები

არ არის ცნობილი: ბრონქოკონსტრიქცია, ყნოსვის შეგრძნების დაქვეითება.

კუჭ-ნაწლავის ტრაქტის დაავადებები

არ არის ცნობილი: ღებინება, დიარეა, სტეატორეა, მალაბსორბციის სინდრომი.

ღვიძლისა და ნაღვლის ბუშტის დაავადებები 

არ არის ცნობილი: ღვიძლის უკმარისობა.

კანისა და კანქვეშა უჯრედოვანი ქსოვილის დაავადებები 

არ არის ცნობილი: ჭინჭრის ციება, ქავილი, სტივენს-ჯონსონის სინდრომი.

აქტიურმა ნივთიერებამ ბენზალკონიუმის ქლორიდმა შეიძლება გამოიწვიოს კანის ან ლორწოვანი გარსების გაღიზიანება.

თირკმელებისა და საშარდე გზების დაავადებები 

არ არის ცნობილი: ნეფროტოქსიკურობა, თირკმლის უკმარისობა.

ზოგადი დაავადებები და ადგილობრივად გამოვლენილი სიმპტომები 

არ არის ცნობილი: ცხელება, ჰიპოტენზია.

თქვენ ასევე შეგიძლიათ გვერდითი მოვლენების შესახებ შეტყობინების გაგზავნა პირდაპირ ეროვნული ანგარიშგების სისტემის მეშვეობით.

5. ტიროთრიცინი საწუწნი ტაბლეტების შენახვის წესი

ინახება არაუმეტეს 25ºC ტემპერატურაზე. 

შეინახეთ პრეპარატი ბავშვებისათვის მიუწვდომელ ადგილას. 

ნუ გამოიყენებთ მედიკამენტს, ვარგისიანობის ვადის გასვლის შემდეგ, რაც მითითებულია ეტიკეტზე და მუყაოს კოლოფზე. ვარგისიანობის ვადა ეხება მითითებული თვის ბოლო დღეს. 

არ გადააგდოთ პრეპარატი საკანალიზაციო მილში ან საყოფაცხოვრებო ნარჩენებში.  ჰკითხეთ ფარმაცევტს როგორ გაანადგუროთ მედიკამენტები რომელსაც აღარ მოიხმართ. ეს ზომები ხელს შეუწყობს გარემოს დაცვას. 

6. შეფუთვის შიგთავსი და დამატებითი ინფორმაცია

ტიროთრიცინი საწუწნი ტაბლეტების შემადგენლობა 

აქტიური ნივთიერება არის  ტიროთრიცინი, ნეომიცინის სულფატი, ბენზალკონიუმის ქლორიდი და ბენზოკაინი.

1 საწუწნი ტაბლეტი შეიცავს შემდეგს: 

ტიროთრიცინი 0,50მგ

ნეომიცინის სულფატი   0,83მგ

ბენზალკონიუმის ქლორიდი 0,50მგ

ბენზოკაინი      1,50მგ

დამხმარე ნივთიერებებია: პიტნის ეთერზეთი, ევკალიპტის ეთერზეთი, პოვიდონი, მაგნიუმის სტეარატი, მენთოლი, საქაროზა, ტალკი.

ტიროთრიცინი საწუწნი ტაბლეტების გარეგნული სახე და შეფუთვა:

ტაბლეტი არის თეთრი, მრგვალი ფორმის, წაკვეთილი კიდეებით და მენთოლის არომატით. 

ალუმინი/პვქ ბლისტერულ შეფუთვაში.

შაფუთვაში მოთავსებულია 20 ან 40 საწუწნი ტაბლეტი. გაყიდვაში არ არის ყველა ზომის შეფუთვა.

გაცემის წესი:  ფარმაცევტული პროდუქტის ჯგუფი III, გაიცემა რეცეპტის გარეშე.