ტანაკანი - Tanakan 40მგ 90 ტაბლეტი
აღწერა
ტანაკანი®
ტანაკანი 40 მგ, შემოგარსული ტაბლეტი
გინკგო (მშრალი ექსტრაქტი)
|
პრეპარატის გამოყენებამდე ყურადღებით წაიკითხეთ ინსტრუქცია, რადგან ის შეიცავს თქვენთვის საჭირო ინფორმაციას: პრეპარატი უნდა მიიღოთ ყოველთვის ამ ბროშურაში აღწერილი ან ექიმის ან ფარმაცევტის მითითებების შესაბამისად. • შეინახეთ ინსტრუქცია, შესაძლოა კიდევ დაგჭირდეთ მისი გადაკითხვა. • ნებისმიერი რჩევის ან ინფორმაციისთვის მიმართეთ თქვენს ფარმაცევტს. • თუ შეამჩნევთ რაიმე გვერდით მოვლენას, მიმართეთ ექიმს ან ფარმაცევტს. ეს ასევე ეხება ნებისმიერ გვერდით მოვლენას, რომელიც არ არის ნახსენები ამ ინსტრუქციაში. იხილეთ რუბრიკა 4. • თუ ვერ იგრძნობთ ვერანაირ გაუმჯობესებას ან თუ თავს უარესად იგრძნობთ მიმართეთ ექიმს. |
რას შეიცავს ეს ინსტრუქცია?
1. რა არის ტანაკანი 40 მგ, შემოგარსული ტაბლეტი და რა შემთხვევაში გამოიყენება?
2. რა ინფორმაციას უნდა ფლობდეთ ტანაკანი 40 მგ, შემოგარსული ტაბლეტის გამოყენებამდე?
3. როგორ გამოიყენება ტანაკანი 40 მგ, შემოგარსული ტაბლეტი?
4. რა შესაძლო გვერდითი მოვლენები შეიძლება გამოვლინდეს?
5. როგორ შევინახოთ ტანაკანი 40 მგ, შემოგარსული ტაბლეტი?
6. შეფუთვის შემადგენლობა და დამატებითი ინფორმაცია.
1. რა არის ტანაკანი 40 მგ, შემოგარსული ტაბლეტი და რა შემთხვევაში გამოიყენება?
ფარმაკოთერაპიული კლასი: დემენციის სხვა პრეპარატები - ათქ კოდი: N06DX02.
მცენარეულ ბაზაზე დაფუძნებული პრეპარატი გამოიყენება ხანდაზმულებში გარკვეული კოგნიტური დარღვევების სიმპტომური მკურნალობის დროს (განსაკუთრებით >მეხსიერების დარღვევები), გარდა ნებისმიერი ტიპის დადასტურებული დემენციის, მედიკამენტებით გამოწვეული გვერდითი მოვლენების, დეპრესიის ან მეტაბოლური დარღვევების შემთხვევებისა.
2. რა ინფორმაციას უნდა ფლობდეთ ტანაკანი 40 მგ, შემოგარსული ტაბლეტის გამოყენებამდე?
თუ ექიმმა გაცნობათ ზოგიერთი შაქრის მიმართ აუტანლობის შესახებ, პრეპარატის მიღებამდე დაუკავშირდით მას.
არასდროს მიიღოთ ტანაკანი 40 მგ შემოგარსული ტაბლეტი:
• თუ ალერგიული ხართ გინკგოს ან ამ პრეპარატში შემავალი რომელიმე სხვა ინგრედიენტის მიმართ
• თუ ორსულად ხართ.
გაფრთხილება და სიფრთხილის ზომები
ეს პრეპარატი შეიცავს 1 მმოლზე (23 მგ) ნაკლებ ნატრიუმს თითო ტაბლეტზე, ანუ ის არსებითად „ნატრიუმის გარეშეა“.
გინკგოს ბაზაზე წარმოებული პრეპარატების გამოყენებისას სისხლდენის გაზრდის რისკის გამო, შეწყვიტეთ ამ პრეპარატის მიღება ნებისმიერი ქირურგიული ოპერაციის დაწყებამდე 3-4 დღით ადრე.
ამ პრეპარატის გამოყენება ეფავირენცთან ერთად რეკომენდებული არ არის.
ტანაკანი 40 მგ შემოგარსული ტაბლეტის მიღებამდე მიმართეთ ექიმს ან ფარმაცევტს:
• თუ გაქვთ სისხლდენისადმი მიდრეკილება (ჰემორაგიული მდგომარეობა) და თუ იტარებთ ანტიკოაგულანტულ ან ანტიაგრეგანტულ მკურნალობას.
• თუ გაქვთ ეპილეფსია.
სხვა პრეპარატები და ტანაკანი 40 მგ, შემოგარსული ტაბლეტი
აცნობეთ თქვენს ექიმს ან ფარმაცევტს, თუ იღებთ ან უახლოეს წარსულში იღებდით ან შესაძლოა მიიღოთ სხვა ნებისმიერი მედიკამენტი.
ტანაკანმა შეიძლება შეცვალოს სხვა მედიკამენტების ეფექტი: ანტიკოაგულანტები (ფენკუმარინი, ვარფარინი), ანტიაგრეგანტული პრეპარატები (კლოპიდოგრელი, სალიცილის მჟავა და სხვა არასტეროიდული ანთების საწინააღმდეგო პრეპარატები).
ამ პრეპარატის ვარფარინთან ერთდროული მიღების შემთხვევაში აუცილებელია მონიტორინგი, ამისათვის მიმართეთ ექიმს.
ამ პრეპარატის დაბიგატრან ეტექსილატთან ერთად მიღებამ შეიძლება გააძლიეროს ამ უკანასკნელის ეფექტი, ამიტომ რჩევისათვის მიმართეთ ექიმს.
ამ პრეპარატის ეფავირენცთან ერთად გამოყენება რეკომენდებული არ არის, აღნიშნული პრეპარატის ეფექტურობის შემცირების რისკის გამო.
გინკგომ შეიძლება გაზარდოს ნიფედიპინის კონცენტრაცია. ზოგიერთ ადამიანში ეს ზრდა შეიძლება მნიშვნელოვანი იყოს და გამოიწვიოს თავბრუსხვევა და ალების ინტენსივობის მომატება.
ორსულობა და ძუძუთი კვება
პრეპარატი უკუნაჩვენებია ორსულობის დროს.
ამ პრეპარატის გამოყენება არ არის რეკომენდებული ძუძუთი კვების დროს.
3. როგორ გამოიყენება ტანაკანი 40 მგ, შემოგარსული ტაბლეტი?
მიიღეთ პრეპარატი ყოველთვის ექიმის ან ფარმაცევტის მითითებების შესაბამისად. ნებისმიერი ეჭვის შემთხვევაში მიმართეთ თქვენს ექიმს ან ფარმაცევტს.
ტაბლეტები უნდა მიიღოთ ნახევარ ჭიქა წყალთან ერთად ჭამის დროს.
დოზირება
განკუთვნილია როგორც ზრდასრულების, ასევე ხანდაზმულებისთვის. დღეში 3 ტაბლეტი, გადანაწილებული მთელი დღის განმავლობაში.
მიღების მეთოდი
პერორალური გამოყენების.
მკურნალობის ხანგრძლივობა
მიჰყევით ექიმის რჩევას.
თუ დაგავიწყდათ ტანაკანი 40 მგ შემოგარსული ტაბლეტის მიღება
გამოტოვებული დოზის კომპენსირებისთვის არ მიიღოთ ორმაგი დოზა.
თუ გაქვთ სხვა კითხვები ამ პრეპარატის გამოყენებასთან დაკავშირებით, დამატებითი ინფორმაციისთვის მიმართეთ თქვენს ექიმს ან ფარმაცევტს.
4. რა შესაძლო გვერდითი მოვლენები შეიძლება გამოვლინდეს?
როგორც ყველა სამკურნალო პრეპარატს, ამ პრეპარატსაც აქვს გვერდითი მოვლენები, თუმცა ეს მოვლენები ყველა ადამიანში სისტემატიურად არ იჩენს თავს.
უსაფრთხოების პროფილის შეჯამება
ყველაზე ხშირი გვერდითი მოვლენებია: მუცლის ტკივილი, დიარეა და თავბრუსხვევა.
თუ გამოგივლინდათ მძიმე ალერგიული რეაქცია (ანგიონევროზული შეშუპება), სახის, ტუჩების, ენის ან ყელის შეშუპებით, დაუყოვნებლივ შეწყვიტეთ ამ პრეპარატის მიღება და სასწრაფოდ მიმართეთ ექიმს.
სხვა შესაძლო გვერდითი მოვლენები:
ხშირი (შეიძლება აღენიშნებოდეს 10-დან 1 ადამიანს):
• ალერგიული რეაქცია
• სუნთქვის გაძნელება
• თავის ტკივილი
• სინკოპე
• საჭმლის მონელების დარღვევა
• გულისრევა
• ეგზემა
• ქავილი
არახშირი (შეიძლება აღენიშნებოდეს 100-დან 1-ს):
• ჭინჭრის ციება
• გამონაყარი კანზე
ინფორმაცია გვერდითი მოვლენების შესახებ
თუ გამოვლინდება რომელიმე გვერდითი მოვლენა, მიმართეთ ექიმს ან ფარმაცევტს. ეს ეხება ასევე ყველა იმ გვერდით მოვლენებს, რომელის აღნიშნული არაა ამ ინსტრუქციაში.
გვერდითი მოვლენების მითითებით, თქვენ მიიღებთ მეტ ინფორმაციას პრეპარატის უსაფრთხოებაზე.
5. როგორ შევინახოთ ტანაკანი 40 მგ, შემოგარსული ტაბლეტი?
შეინახეთ პრეპარატი ბავშვებისათვის შეუმჩნეველ და მიუწვდომელ ადგილას.
არ გამოიყენოთ პრეპარატი შეფუთვაზე მითითებული ვარგისიანობის ვადის გასვლის შემდეგ. ვარგისიანობის ვადის ამოწურვის თარიღად ითვლება მითითებული თვის ბოლო დღე.
ინახება არაუმეტეს 25°C ტემპერატურაზე.
არ ჩაყაროთ არც ერთი პრეპარატი საყოფაცხოვრებო ნარჩენებთან ან საკანალიზაციო სისტემაში. მიიღეთ ფარმაცევტის რჩევა თუ როგორ მოიშოროთ ვადაგასული მედიკამენტი. ასეთი სახის ზომები ხელს შეუშლის გარემოს დაბინძურებას.
6. შეფუთვის შემადგენლობა და დამატებითი ინფორმაცია.
რას შეიცავს ტანაკანი 40 მგ შემოგარსული ტაბლეტი
• აქტიური ნივთიერებაა:
გინკგოს (Ginkgo biloba L. (გინგკო ბილობა)) (რაფინირებული და რაოდენობრივად განსაზღვრული მშრალი ფოთლის ექსტრაქტი) ................................................. 40.00 მგ
რაოდენობრივად განსაზღვრული:
ფლავონოიდები 8.8-დან 10.8 მგ-მდე, გამოხატული ფლავონოიდული გლიკოზიდების სახით
1.1-დან 1.4 მგ-მდე გინკგოლიდები A, B და C
1.0-დან 1.3 მგ-მდე ბილობალიდი
პირველი ექსტრაქციის გამხსნელი: აცეტონი 60 % m/m
პრეპარატის/ექსტრაქტის თანაფარდობა: 35-67:1
ერთი შემოგარსული ტაბლეტისთვის
• სხვა კომპონენტებია:
მიკროკრისტალური ცელულოზა, ნატრიუმის კროსკარმელოზა, მაგნიუმის სტეარატი, ჰიპრომელოზა, მაკროგოლი 6000, წითელი რკინის ოქსიდი.
რა არის ტანაკანი 40 მგ, შემოგარსული ტაბლეტი და გარე შეფუთვის შემადგენლობა?
პრეპარატი წარმოდგენილია შემოგარსული ტაბლეტის სახით. კოლოფში 30, 60, 90 ან 500 ტაბლეტით.
შესაძლოა, ყველა გამოცემა კომერციული გამოყენებისთვის ხელმისაწვდომი არ იყოს.
ასევე, იხილეთ: >ბილობილი - BILOBIL 40მგ 20 კაფსულა