სტრომაკი - Stromac 500მგ 3 ტაბლეტი

სტრომაკი

500 მგ აპკიანი გარსით დაფარული ტაბლეტები

აზითრომიცინი

ყურადღებით წაიკითხეთ ყველაფერი ამ ფურცელ–ჩანართში, სანამ დაიწყებთ ამ პრეპარატის  მიღებას, რადგან ის შეიცავს მნიშვნელოვან ინფორმაციას თქვენთვის.

· შეინახეთ ფურცელი-ჩანართი. შესაძლოა თქვენ დაგჭირდეთ მისი ხელახლა წაკითხვა.

· თუ გაქვთ დამატებითი კითხვები, დაუკავშირდით თქვენს ექიმს ან ფარმაცევტს. 

· ეს წამალი დანიშნულია მხოლოდ თქვენთვის. ნუ გადასცემთ მას სხვებს. ამან შეიძლება ზიანი მიაყენოს მათ, მაშინაც კი, თუ დაავადების ნიშნები იგივეა, რაც თქვენი.

· თუ რაიმე გვერდითი ეფექტი გამოგივლინდათ, გაესაუბრეთ თქვენს ექიმს ან ფარმაცევტს. ეს მოიცავს ნებისმიერ შესაძლო გვერდით ეფექტებს, რომლებიც არ არის ჩამოთვლილი ამ ფურცელ-ჩანართში. იხილეთ ნაწილი 4.

რა არის მოცემული ამ ფურცელ-ჩანართში:

1. რა არის სტრომაკი  და რისთვის გამოიყენება

2. რა უნდა იცოდეთ სტრომაკის  გამოყენების წინ

3. როგორ მიიღოთ სტრომაკი

4. შესაძლო გვერდითი ეფექტები

5. როგორ ინახება სტრომაკი 

6. შეფუთვის შემცველობა და სხვა ინფორმაცია

1. რა არის სტრომაკი და რისთვის გამოიყენება 

სტრომაკი შეიცავს აზითრომიცინს, რომელიც შედის ანტიბიოტიკების ერთ-ერთ ჯგუფში, რომელსაც მაკროლიდებს უწოდებენ. იგი გამოიყენება გარკვეული ბაქტერიებით და სხვა მიკროორგანიზმებით გამოწვეული ინფექციების სამკურნალოდ, რომლებიც მოიცავს:

• გულმკერდის, ყელის ან ცხვირის ინფექციები (როგორიცაა ბრონქიტი, პნევმონია, ტონზილიტი, ყელის ტკივილი (ფარინგიტი) და სინუსიტი

• ყურის ინფექციები 

• კანისა და რბილი ქსოვილების ინფექციები (მაგალითად, აბსცესი ან ფურუნკული) 

• სქესობრივი გზით გადამდები დაავადებები, გამოწვეული ორგანიზმებით სახელად ქლამიდია ან გონორეა

თქვენ უნდა გაესაუბროთ ექიმს, თუ თავს უკეთესად არ გრძნობთ ან გრძნობთ უარესად.

2. სტრომაკის მიღების  წინ

·  თუ თქვენ ხართ ალერგიული აზითრომიცინის ან სხვა მაკროლიდული >ანტიბიოტიკის მიმართ, როგორიცაა ერითრომიცინი ან კლარითრომიცინი ან სტრომაკის რომელიმე ინგრედიენტის მიმართ (ჩამოთვლილია მე-6 ნაწილში). ალერგიულმა რეაქციამ შეიძლება გამოიწვიოს გამონაყარი კანზე ან  სუნთქვის გაძნელება.

გაფრთხილებები და სიფრთხილის ზომები 

ესაუბრეთ თქვენს ექიმს ან ფარმაცევტს სტრომაკის მიღებამდე, თუ გაქვთ ან გქონიათ რომელიმე შემდეგი მდგომარეობა:

·  თირკმლის პრობლემები

·  გულის  დაავადებები

·  ღვიძლის პრობლემები: ექიმს შეიძლება დასჭირდეს თქვენი ღვიძლის ფუნქციისმონიტორინგი ან მკურნალობის შეჩერება

·  მიასთენია გრავისი (კუნთების ლოკალიზებული სისუსტე)

·  ან თუ იღებთ ერგოტის წარმოებულებს, როგორიცაა ერგოტამინი (გამოიყენება შაკიკის სამკურნალოდ), რადგან ამ მედიკამენტების მიღება არ შეიძლება სტრომაკთან ერთად.

დაუყოვნებლივ აცნობეთ თქვენს ექიმს:

·  თუ გრძნობთ მკერდში გულისცემას ან გაქვთ პათოლოგიური გულისცემა, თავბრუსხვევა ან გონების დაკარგვა, ან განიცდით კუნთების სისუსტეს სტრომაკის მიღებისას.

·  თუ მკურნალობის დროს ან მის შემდეგ განვითარდა დიარეა ან წყლიანი განავალი,  დაუყოვნებლივ აცნობეთ ექიმს. ნუ მიიღებთ დიარეის სამკურნალოდ  მედიკამენტებს ექიმთან წინასწარი კონსულტაციის გარეშე. თუ დიარეა გაგრძელდა, გთხოვთ, აცნობოთ ექიმს.

·  თუ გრძნობთ, რომ გაქვთ ალერგიული რეაქცია (მაგ. სუნთქვის გაძნელება, თავბრუსხვევა, სახის ან ყელის შეშუპება, გამონაყარი, ბებერები, ბუშტუკები). შეწყვიტეთ ამ მედიკამენტის მიღება და სასწრაფოდ მიმართეთ გადაუდებელი სამედიცინო დახმარებისთვის.

·  თუ განვითარდა ღვიძლის პრობლემების ნიშნები (მაგ. მუქი შარდი, მადის ძლიერი  დაკარგვა ან კანის ან თვალების სკლერის  სიყვითლე). შეწყვიტეთ ამ მედიკამენტის მიღება და სასწრაფოდ მიმართეთ სამედიცინო რჩევას.

·  თუ ამ მედიკამენტს აძლევთ ჩვილ ბავშვს (6 კვირაზე ნაკლები ასაკის) და მას აქვთ ღებინება ან გაღიზიანებული ხდება საკვების მიღების დროს.

სტრომაკი და სხვა მედიკამენტები

აცნობეთ თქვენს ექიმს ან ფარმაცევტს, თუ იღებთ, ახლახანს მიიღეთ ან შეიძლება მიიღოთ სხვა მედიკამენტები.

კერძოდ, სტრომაკს შეუძლია ურთიერთქმედება ქვემოთ ჩამოთვლილ მედიკამენტებთან:

·  ერგოტი ან ერგოტამინი - იხილეთ ნაწილი „გაფრთხილებები და სიფრთხილის ზომები“ 

·  ვარფარინი ან მსგავსი მედიკამენტი თრომბის თავიდან ასაცილებლად

·  ციკლოსპორინი (გამოიყენება იმუნური სისტემის დასათრგუნად გადანერგილი ორგანოს ან ძვლის ტვინის უარყოფის თავიდან ასაცილებლად და სამკურნალოდ)

·  დიგოქსინი (გამოიყენება გულის უკმარისობის სამკურნალოდ)

·  კოლხიცინი (გამოიყენება პოდაგრის და  ხმელთაშუა ზღვის ოჯახური ცხელების დროს)

·  ტერფენადინი (თივის ცხელების ან კანის ალერგიის დროს)

·  ატორვასტატინი (სისხლში ქოლესტერინის დონის შესამცირებლად)

თუ თქვენ იღებთ ანტაციდებს (საჭმლის მონელების დარღვევის დროს), სტრომაკი უნდა მიიღოთ ანტაციდების მიღებამდე  1 საათით ადრე, ან 2 საათის შემდეგ.

სტრომაკი საკვებთან და სასმელთან ერთად

სტრომაკი  უნდა მიიღოთ ჭამამდე 1 საათით ადრე ან ჭამიდან 2 საათის შემდეგ.

ორსულობა, ლაქტაცია და ფერტილობა

თუ ხართ ორსულად  ან  კვებავთ ძუძუთი, ფიქრობთ, რომ ორსულად ხართ ან აპირებთ ბავშვის გაჩენას, ამ წამლის მიღებამდე სთხოვეთ რჩევა  ექიმს ან ფარმაცევტს.

ავტომობილების მართვა და  გამოყენება

სავარაუდოდ, სტრომაკი გავლენას არ ახდენს ავტომობილის მართვის ან მექანიზმების  გამოყენების უნარზე.

სტრომაკი შეიცავს  ნატრიუმს 

სტრომაკი შეიცავს 1 მმოლზე ნაკლებ ნატრიუმს  (23 მგ) თითო ტაბლეტზე, ანუ არსებითად "თავისუფალია ნატრიუმისგან".

3. როგორ მიიღოთ სტრომაკი 

ყოველთვის მიიღეთ ეს პრეპარატი ზუსტად ისე, როგორც ექიმმა გითხრათ. თუ არ ხართ დარწმუნებული, მიმართეთ ექიმს ან ფარმაცევტს. ტაბლეტები უნდა გადაიყლაპოს მთლიანად.

რეკომენდებული დოზა მოზრდილებში და 45 კგ-ზე მეტი წონის ბავშვებში არის 500 მგ (1 ტაბლეტი), დღეში ერთხელ, 3 დღის განმავლობაში.

ზოგიერთი დაავადების დროს, როგორიცაა ქლამიდიოზი, დოზა არის 1 გ (2 ტაბლეტი), მიღებული  ყველა ერთად  მხოლოდ ერთ დღეს.

გონორეის დროს აზითრომიცინის რეკომენდებული დოზაა 2 გ (4 ტაბლეტი) ერთჯერადი პერორალური დოზით 500 მგ ცეფტრიაქსონთან ერთად კუნთში, როგორც ერთჯერადი დოზა.

სტრომაკის აპკიანი გარსით დაფარული ტაბლეტების მიღება არ შეიძლება 45 კგ-ზე ნაკლები წონის ბავშვებისთვის.

ექიმს უნდა შეატყობინოთ თუ გაქვთ თირკმლების ან ღვიძლის პრობლემები, რადგან ექიმს შეიძლება დასჭირდეს ჩვეულებრივი  დოზის შეცვლა.

ექიმები ზოგჯერ ნიშნავენ რეკომენდებულისგან განსხვავებულ დოზას. ეტიკეტი შეფუთვაზე აჩვენებს, თუ რომელი დოზა უნდა მიიღოთ. თუ ჯერ კიდევ არ ხართ დარწმუნებული, ჰკითხეთ ექიმს ან ფარმაცევტს.

ყოველთვის გააგრძელეთ კურსი მაშინაც კი, თუ თავს უკეთესად გრძნობთ. თუ თქვენი ინფექცია გაუარესდა ან რამოდენიმე დღეში ვერ იგრძნობთ თავს უკეთესად ან ახალი ინფექცია განვითარდება, დაუბრუნდით ექიმს.

თუ თქვენ მიიღეთ  მეტი სტრომაკი, ვიდრე საჭიროა

ზედმეტი სტრომაკის მიღების შემთხვევაში შეიძლება თავს ცუდად გრძნობდეთ. აცნობეთ თქვენს ექიმს ან დაუყოვნებლივ დაუკავშირდით უახლოესი საავადმყოფოს  გადაუდებელი დახმარების განყოფილებას.

თუ დაგავიწყდათ სტრომაკის მიღება

თუ დაგავიწყდათ სტრომაკის მიღება, მიიღეთ რაც შეიძლება მალე. შემდეგი დოზა მიიღეთ სწორ დროს. არ მიიღოთ ორმაგი დოზა გამოტოვებული დოზის ასანაზღაურებლად.

თუ შეწყვიტეთ სტრომაკის მიღება

თუ სტრომაკის მიღება შეწყვიტეთ ძალიან მალე, ინფექცია შეიძლება შეგიბრუნდეთ. მიიღეთ ტაბლეტები მკურნალობის სრული კურსის განმავლობაში, მაშინაც კი, როდესაც თავს უკეთ იგრძნობთ.

თუ მედიკამენტთან დაკავშირებით დამატებითი შეკითხვები გაქვთ, ჰკითხეთ ექიმს ან ფარმაცევტს.

4. შესაძლო გვერდითი ეფექტები

ყველა მედიკამენტის მსგავსად, ამ მედიკამენტმაც შეიძლება გამოიწვიოს გვერდითი ეფექტები, თუმცა ყველასთან ისინი არ ვლინდება.

დაუყოვნებლივ აცნობეთ ექიმს თუ ამ მედიკამენტის მიღების შემდეგ გამოვლინდა რომელიმე შემდეგი სიმპტომებიდან. მიუხედავად იმისა, რომ ისინი ძალიან იშვიათია, სიმპტომები შეიძლება იყოს მძიმე.

·  მოულოდნელი ხიხინი, სუნთქვის გაძნელება, ქუთუთოების, სახის ან ტუჩების შეშუპება, გამონაყარი ან ქავილი (განსაკუთრებით მთელ სხეულზე)

·  კანის ძლიერი გამონაყარი, რომელიც იწვევს სიწითლეს და აქერცვლას

·  სწრაფი ან არარეგულარული გულისცემა

·  დაბალი წნევა

·  ღებინებამ და დიარეამ იშვიათად შეიძლება გამოიწვიოს დეჰიდრატაცია. მნიშვნელოვანია ბევრი სითხის მიღება, თუ გრძნობთ გულისრევას და / ან გაქვთ დიარეა 

·  დიარეა შეიძლება განვითარდეს ანტიბიოტიკებით მკურნალობის დროს ან დასრულების შემდეგ და ეს შეიძლება იყოს ნაწლავის სერიოზული ანთების ნიშანი.

ქვემოთ ჩამოთვლილია ყველაზე გავრცელებული გვერდითი მოვლენები, რომლებიც ვლინდება სტრომაკის მიღებისას. მკურნალობის დროს ეს შეიძლება გაქრეს, რადგან თქვენი სხეული ეგუება მედიკამენტს. აცნობეთ ექიმს, თუ თქვენ გაწუხებთ რომელიმე გვერდითი მოვლენა.

ძალიან ხშირი (შეიძლება გავლენა იქონიოს 10-დან 1-ზე მეტ ადამიანზე)

·  დიარეა

ხშირი (შეიძლება გავლენა იქონიოს 10-დან 1-ზე ნაკლებ ადამიანზე)

·  თავის ტკივილი

·  შეუძლოდ ყოფნა, გულისრევა 

·  ლიმფოციტების (სისხლის თეთრი სხეულების ტიპი) დაბალი რაოდენობა, ეოზინოფილების მაღალი რაოდენობა (სისხლის თეთრი უჯრედების ტიპი) და სისხლის სხვა ცვლილებები

·  სისხლში ბიკარბონატის დაბალი  დონე

არახშირი (შეიძლება გავლენა იქონიოს  100-დან 1-ზე ნაკლებ ადამიანზე)

• პირის ღრუს და საშოს საფუარიანი ინფექციები (რძიანა)

• სოკოვანი ან ბაქტერიული ინფექციები, როგორიცაა ყელის ძლიერი ტკივილი, გასტროენტერიტი

• სუნთქვის პრობლემები, ცხვირის სისველე, სისხლდენა ცხვირიდან

• ლეიკოციტების დაბალი რაოდენობა (სისხლის თეთრი უჯრედების ტიპი)

• სხვადასხვა სიმძიმის ალერგიული რეაქციები

• ნერვიულობის შეგრძნება

• ძილიანობა ან უძილობა (ინსომნია)

• მხედველობის დარღვევები

• თავბრუსხვევის შეგრძნება, ყურის პრობლემები, ვერტიგო

• გულისცემა, გულმკერდის ტკივილი

• მადის დაკარგვა, გემოვნების დარღვევა

• ყაბზობა, მეტეორიზმი, ბოყინი, საჭმლის მონელების დარღვევა

• კუჭის ტკივილი, რომელიც ასოცირდება დიარეასთან და ცხელებასთან

• პირის ღრუს წყლულები, პირის სიმშრალე, ყლაპვის გაძნელება, ნერწყვის ჭარბი რაოდენობა

• თირკმლის ტკივილი, ტკივილი შარდვის დროს

• ძალის ზოგადი დაკარგვა, დაღლილობა ან სისუსტე, დაბუჟება ან ჩხვლეტა

• შეშუპება, შესიებული ან მტკივნეული კუნთები, ზურგის ტკივილი, კისრის ტკივილი

• ზოგადი დისკომფორტი

• სისხლის ტესტის არანორმალური მაჩვენებლები

• გამონაყარი, კანის სიწითლე, სიმშრალე ან ქავილი, ან ჭარბი ოფლიანობა

• სისხლდენა ქალებში პერიოდებს შორის

• სათესლე ჯირკვლის ტკივილი მამაკაცებში

• წამოხურება

იშვიათი (შეიძლება გავლენა იქონიოს1,000-დან 1-ზე ნაკლებ ადამიანზე)

• აგზნება

• კანი უფრო მგრძნობიარეა მზის სხივების მიმართ, ვიდრე ჩვეულებრივ

• ღვიძლის ფუნქციის ცვლილებები, კანისა და თვალების სიყვითლე

• კანის გამონაყარი, რომელიც ხასიათდება წითელი ფერის კანის უბნების სწრაფი გამოვლინებით მცირე ზომის პუსტულებით (პატარა ბუშტუკებით, რომლებიც თეთრი / ყვითელი სითხით არის სავსე).

• დაგვიანებული ალერგიული რეაქცია (ექსპოზიციიდან რამდენიმე კვირაში) გამონაყარითა და სხვა შესაძლო სიმპტომებით, როგორიცაა სახის შეშუპება, შესიებული ჯირკვლები და გამოკვლევების პათოლოგიური შედეგები (მაგ., ღვიძლის ტესტები და  სისხლის ზოგიერთი თეთრი უჯრედების დონის მომატება).

არ არის ცნობილი (სიხშირე არ შეიძლება შეფასდეს არსებული მონაცემებით)

• გულყრა, გონების დაკარგვა, კრუნჩხვები

• აგრესია, შფოთვა, დელირიუმი, ჰალუცინაციები, ძილის დარღვევა (მაგ., კოშმარები, ღამის შიშები)

• ჰიპერაქტივობის შეგრძნება

• კუნთების ლოკალიზებული სისუსტე

• მტკივნეული სახსრები

• სიყრუე, სმენის დაქვეითება, ყურებში შუილი

• მძიმე ან გახანგრძლივებული დიარეა, რომელსაც შეიძლება ახლდეს სისხლი ან ლორწო, სტრომაკით მკურნალობის დროს ან მის შემდეგ, რადგან ეს შეიძლება იყოს ნაწლავის სერიოზული ანთების ნიშანი.

• ყნოსვის დაკარგვა ან შეცვლა, გემოვნების დაკარგვა

• ენის ფერის შეცვლა

• კუჭქვეშა ჯირკვლის ანთება (პანკრეატიტი)

• თირკმლის ანთება ან თირკმლის უკმარისობა 

• სისხლჩაქცევები ან ხანგრძლივი სისხლდენა ტრავმის შემდეგ

• სისხლის წითელი უჯრედების შემცირება, რამაც შეიძლება გახადოს კანი ფერმკრთალი და გამოიწვიოს სისუსტე ან ქოშინი

• დაბალი წნევა

• კანის ბუშტუკები, კანის ძლიერი რეაქცია

• პათოლოგიური ელექტროკარდიოგრამა (ეკგ)

შეტყობინება გვერდითი ეფექტების შესახებ 

თუ თქვენ გამოგივლინდათ გვერდითი ეფექტები, მათ შორის ნებისმიერი შესაძლო გვერდითი ეფექტი, რომელიც არ არის აღნიშნული ამ ფურცელ–ჩანართში, გაესაუბრეთ თქვენს ექიმს, ფარმაცევტს ან ექთანს. გვერდითი ეფექტების შეტყობინებით თქვენ შეგიძლიათ ამ პრეპარატის  უსაფრთხოების შესახებ დამატებითი ინფორმაციის მიწოდებაში დახმარების გაწევა.

თუ შენიშნეთ გვერდითი მოვლენები, რომლებიც არ არის მითითებული ამ ფურცელ–ჩანართში, გთხოვთ, აცნობოთ თქვენს ექიმს ან ფარმაცევტს.

5. როგორ ინახება სტრომაკი

შეინახეთ სტრომაკი ბავშვებისთვის უხილავ და მიუწვდომელ ადგილას. შეინახეთ ორიგინალურ შეფუთვაში.

ინახება ოთახის ტემპერატურაზე 25°С ქვემოთ. 

გამოიყენეთ ვარგისობის ვადის შესაბამისად.

არ გამოიყენოთ სტრომაკი შეფუთვაზე მითითებული ვარგისობის ვადის გასვლის შემდეგ.

ვარგისობის ვადა ნიშნავს იმ თვის ბოლო დღეს.

არ გამოიყენოთ სტრომაკი, თუ შეამჩნევთ რაიმე დაზიანებას პროდუქტზე ან/და მის შეფუთვაზე.

ნუ გადააგდებთ მედიკამენტებს ჩამდინარე წყლების ან საყოფაცხოვრებო ნარჩენების საშუალებით. ჰკითხეთ ფარმაცევტს, როგორ გადააგდოთ პრეპარატები, რომლებსაც აღარ იყენებთ. ეს ზომები ხელს შეუწყობს გარემოს დაცვას.

6. დამატებითი ინფორმაცია

რას შეიცავს სტრომაკი

აქტიური ნივთიერება:

აქტიური ნივთიერება არის აზითრომიცინი (დიჰიდრატის სახით). თითოეული ტაბლეტი შეიცავს 500 მგ აქტიურ ნივთიერებას.

სხვა ინგრედიენტები:

უწყლო ორფუძიანი კალციუმის ფოსფატი, ნატრიუმის კარბოქსიმეთილცელულოზა 150 (Nymcel-ZSB16), მიკროკრისტალური ცელულოზა PH 102, ნატრიუმის ლაურილსულფატი, მაგნიუმის სტეარატი

აპკიანი გარსი (Opadry OY-D-7233 white): ჰიპრომელოზა, ტიტანის დიოქსიდი, ტალკი, პოლიეთილენგლიკოლი/მაკროგოლი, ნატრიუმის ლაურილსულფატი

როგორ გამოიყურება სტრომაკი და შეფუთვის შიგთავსი

სტრომაკი არის თეთრი, მოგრძო, ჰომოგენური, უსუნო, აპკიანი გარსით დაფარული ტაბლეტი, ცალ მხარეს  ნაზოლით. სტრომაკი წარმოდგენილია 3 ტაბლეტიან პვდქ/პვქ/ალ ბლისტერულ შეფუთვაში მუყაოს კოლოფში ფურცელ–ჩანართით.

სტრომაკი არის "NOVATOR PHARMA" LLP-ს (დიდი ბრიტანეთი) პროდუქტი და სავაჭრო ნიშანი.

გაცემის წესი:

ფარმაცევტული პროდუქტის ჯგუფი II, გაიცემა ფორმა №3 რეცეპტით

ასევე, იხილეთ: >Azimac - აზიმაკი 500 მგ. 3 კაფსულა