ფელინის ლოყა

ანოტაცია

ცნობილი კინორეჟისორის, გახმაურებული ფილმების – „ქვევრი“, „ქალაქი ანარა“, „მოცურავე“ – ავტორის, ირაკლი კვირიკაძის ავტობიოგრაფიული წიგნი „ფელი­ნის ლოყა“ ერთმანეთისგან დამოუკიდებელ ნოველებს აერთიანებს. კინოამბის­თვის დამა­ხასიათებელი ჟანრთა სხვადასხვაობა წიგნის დინამიკას კიდევ უფრო აძლიერებს – კომედია, დრამა, თრილერი, ტრაგიკომედია ერთმანეთს ენაცვლება. ამ წიგნში ფედერიკო ფელინის შემთხვევით გადაეყრები. ტონინო გუერა კი გაიძულებს, საოცარი ამბები მოჰყვე საბჭოური ქვეყნის ცხოვრებიდან, სადაც ზღვარი რეალურსა და გამოგონილს შორის ისეთივე მყიფე და იოლად გადასალახია, როგორც ქვეყნებს შორის გავლებული სახელმწიფო საზღვარი, პატარა ღელეს რომ მიუყვება, და ისევე რთულია იმ წარმოსახვითი ხაზის გადალახვა, როგორც საზღვრისა დედა­ბრისთვის, ღელის გადაღმა გარდაცვლილი ძმისთვის ადათით დაწესებული რიტუალის აღსასრულებლად ნახევარი ევროპის შემოვლა რომ უწევს… წიგნის პერსონაჟები მსოფლიო ადამიანები არიან, ამბები კი დაუჯერებელი და შთამბეჭდავია – აინშტაინი ღმერთის ჩამნაცვლებლად მუშაობს და ლუციფერი – ბერიას, სამყაროს მართვის სადავეების ხელში ჩასაგდებად მომართული არსებისთვის ხელის შესაშლელად იბრძვის. ადამიანები წყალქვეშა კასრით ცდილობენ, გააღწიონ კომუნისტური რკინის ფარდის მიღმა, სადაც სტალინის შარდში ამოლუმპული და ამით გაბედნიერებული საბჭოთა ოფიცრების მომდევნო თაობები, ბერლინის კედლის დანგრევის შემდეგ ამერიკაში „კომუნებად” გადაბარგებულნი, იქაური წესრიგის საკუთარით ჩანაცვლებას ესწრაფვიან.