პატარა მარანი, რქაწითელი, ქარვისფერი მშრალი ღვინო, 2022 წ.

დახასიათება

ღვინო არ არის მხოლოდ სასმელი თავისი გამორჩეული ფერით, სუნით თუ არომატებით, ეს არის მთელი წლის მანძილზე, „ადამიანისა და ბუნების უწყვეტი ურთიერთობის საგა“, თავისი დარდითა და სიხარულებით. ის თავად ჰყვება ამბავს: როგორ ექცეოდნენ, ვინაა და/ან როგორია მისი პატრონი. ამიტომაც, ღვინის მოყვარულებო, დაგემოვნებისას წამით ასახეთ ეს ურთიერთობა თქვენ გონებაში და ისიამოვნეთ ჩვენი, ქართული ბუნებრივი ღვინით.

ბრენდის ისტორია

,,პატარა მარანი“ წარმოადგენს საოჯახო ტიპის მარანს. ჯერ კიდევ 2002 წელს მსოფლიო ბანკის მიერ გამოცხადებულ საგრანტო კონკურსში ოჯახმა წარადგინა პროექტი, რომელიც ითვალისწინებდა საქართველოს მთელს ტერიტორიაზე გაშენებული ვაზის ჯიშების, ვენახების, წარმოებული ფერმერული ღვინოების შესწავლას. მიზანი, მევენახე ფერმერული გლეხების. მეურნეობის მოწყობასა და ღვინოების რეალიზაციაში მხარდაჭერა იყო, რათა შენარჩუნებულიყო აქა-იქ შემორჩენილი უნიკალური ქართული ჯიშები და წახალისებულიყო ღვინის დაყენების მრავალსაუკონოვანი    ტრადიციის    აღორძინება;    პირველად, სწორედ ,,პატარა მარნის“ მფლობელი, ქალი მეღვინის - თეა სტურუას პროექტის ფარგლებში მოხდა ფერმერების, ვენახებისა და ღვინოების ლაბორატორიული შემოწმება და სწორედ ამ ფერმერების ღვინოები საქართველოში პირველად ჩამოისხა ბოთლებში, მოხდა მათი ეტიკეტირება და სარეალიზაციოდ გამზადება. 2003 წელს პროექტი დასრულდა საქართველოში პირველი „ქართული ვაზის ფესტივალი“-თ, რომელიც ,,პატარა მარნის“ ღვინის მწარმოებელი მეუღლეების და ოჯახის წევრების მიერ იყო ორგანიზებული. 2006 წელს ვენახის მოვლითა და ღვინის კეთების სურვილით შეპყრობილებმა, აწ უკვე გამოცდილებმა, შეიძინეს პირველი ვენახი და აქედან დაიწყო ყველაფერი. დღეს, „პატარა მარანი“ ფლობს 6 ცალ 1 ტონიან ქვევრს, კარდენახში ახოებში საფერავისა და რქაწითელის და წარაფში რქაწითელის ვენახებს (სულ:1,25ჰა); ოჯახის ყველა წევრი ჩართულია ვაზისა და ღვინის მოვლა-დაყენების პროცესში. მიზნად დასახული აქვთ ბუნებრივი ღვინის ძველი ქართული ტრადიციული მეთოდით დაყენება, რის გამოც ვენახების მოვლა ხდება ორგანული წესით. ღვინო იწარმოება მწარმოებლის საკუთარი ვენახიდან. მევენახეობაში არ არის გამოყენებული ჰერბიციდი, პესტიციდი, სისტემური პრეპარატები და მინერალური საკვები დანამატები. რიგთა შორის სივრცეები გაკორდებულია და ვენახი არ ირწყვება. ღვინის წარმოების პროცესში არ არის გამოყენებული გოგირგი, ტემპერატურის ხელოვნური ცვლილება და ფილტრაცია. ღვინო მზადდება ძველი ქართული ტრადიციული მეთოდით, ქვევრში ჭაჭაზე არანაკლებ 6 თვის დაყოვნებით. ,,პატარა მარანი“ ტრადიციული კახური მეთოდით აწარმოებს მხოლოდ ორი სახეობის ღვინოს: საფერავსა და რქაწითელს. წარმოადგენს ორგანული/ბუნებრივი ღვინის ასოციაციის წევრს და ბიოლოგიურ მეურნეობათა ასოციაცია „ელკანას“ წევრს.