პაიდოკორტი - Paidocort ხსნარი 3მგ/მლ 50მლ

პაიდოკორტი 3 მგ/მლ პერორალური ხსნარი

პრედნიზოლონი

ყურადღებით წაიკითხეთ მთლიანად ეს გამოყენების ინსტრუქცია, სანამ დაიწყებდეთ ამ პრეპარატის მიღებას, რადგანაც ის შეიცავს თქვენთვის მნიშვნელოვან ინფორმაციას.

-  შეინახეთ ეს გამოყენების ინსტრუქცია. შეიძლება დაგჭირდეთ მისი ხელახლა წაკითხვა.

- თუ თქვენ გაქვთ რაიმე დამატებითი შეკითხვები, მიმართეთ თქვენს ექიმს ან ფარმაცევტს.

- ეს პრეპარატი დაგენიშნათ მხოლოდ თქვენ. არ გადასცეთ ის სხვებს. ამან შეიძლება ზიანი მიაყენოს მათ, მაშინაც კი, თუ მათი დაავადების ნიშნები იგივეა, რაც თქვენის.

- თუ თქვენ განგივითარდათ რაიმე გვერდითი ეფექტები, დაელაპარაკეთ თქვენს ექიმს ან ფარმაცევტს. ეს მოიცავს ნებისმიერ შესაძლო გვერდით ეფექტს, რომელიც არ არის ჩამოთვლილი ამ გამოყენების ინსტრუქციაში. იხილეთ მე- 4 პუნქტი.

რა არის მოცემული ამ გამოყენების ინსტრუქციაში.

1. რა არის და რისთვის გამოიყენება პაიდოკორტი

2. რა უნდა იცოდეთ პაიდოკორტის მიღებამდე

3. როგორ მიიღება პაიდოკორტი

4. შესაძლო გვერდითი ეფექტები

 5. როგორ ინახება პაიდოკორტი

6. შეფუთვის შემცველობა და სხვა ინფორმაცია

1. რა არის და რისთვის გამოიყენება პაიდოკორტი

პაიდოკორტი განეკუთვნება >ჰორმონალური პრეპარატების ჯგუფს სახელწოდებით სისტემური კორტიკოსტეროიდები. ის შეიცავს სინთეზურ კორტიკოსტეროიდს სახელწოდებით პრედნიზოლონი, ანთების საწინააღმდეგო (ამცირებს ანთებას) და იმუნოსუპრესორულ (ამცირებს იმუნურ პასუხს) მოქმედებით.

პრედნიზოლონი გამოიყენება შემდეგი დაავადებების სამკურნალოდ:

- ბრონქული ასთმა.

- ალერგიული (ალერგიები) და ანთებითი დარღვევები.

- რევმატოიდული ართრიტი და შემაერთებელი ქსოვილის სხვა დარღვევები.

- დერმატიტი და დერმატოზი (ქვემწვავე და ქრონიკული ეგზემა, ფსორიაზი, პემფიგუსი და ა.შ.).

2. რა უნდა იცოდეთ პაიდოკორტის მიღებამდე

 არ მიიღოთ პაიდოკორტი

-  თუ ხართ ალერგიული პრედნიზოლონის, სხვა გლუკოკორტიკოიდების ან ამ პრეპარატის რომელიმე სხვა ინგრედიენტის მიმართ (ჩამოთვლილია მე-6 პუნქტში),

- თუ გაქვთ კუჭის ან თორმეტგოჯა ნაწლავის წყლული,

-თუ გაწუხებთ მწვავე ან ქრონიკული ბაქტერიული ინფექცია (მაგ. ლატენტური ან აქტიური ტუბერკულოზი), მწვავე ვირუსული ინფექცია (როგორიცაა მარტივი ჰერპესი, ჰერპეს ზოსტერი ან ჩუტყვავილა) ან სოკოვანი ინფექცია, რომელიც გავლენას ახდენს მთელ ორგანიზმზე,

- თუ გაწუხებთ ფსიქიატრიული დაავადება,

- თუ გეგმავთ ან ახლახან ჩაგიტარდათ ვაქცინაცია,

- თუ გაქვთ დახურულკუთხოვანი ან ღიაკუთხოვანი გლაუკომა (თვალის დაავადება),

- თუ გაქვთ ჰერპესული კერატიტი (თვალის დაავადება)

- თუ გაქვთ ლიმფადენოპათია (ჯირკვლების შეშუპება) ტუბერკულოზის ვაქცინაციის შემდეგ,

- თუ გაქვთ პოლიომიელიტი (ზურგის ტვინის დაავადება)

გაფრთხილებები და სიფრთხილის ზომები

გაესაუბრეთ თქვენს ექიმს ან ფარმაცევტს პაიდოკორტის მიღებამდე:

-  თუ გაქვთ ან ბოლოდროს გქონდათ კუჭ-ნაწლავის მხრივი დარღვევები, როგორიცაა გასტრიტი ან ეზოფაგიტი, დივერტიკულიტი (ნაწლავის ანთება), წყლულოვანი კოლიტი (პერფორაციის ან ჩირქოვანი ინფექციის რისკით) ან ბოლოდროს ჩაგიტარდათ ნაწლავზე ანასტომოზის დადება (შეერთება), რადგანაც არსებობს ნაწლავის პერფორაციის რისკი პერიტონიტით.

-  თუ თქვენ გაქვთ ინფექცია, რადგანაც ამან შეიძლება შეამციროს თქვენი ორგანიზმის დაცვა და გამოიწვიოს ახალი ინფექციები ან გაააქტიუროს არსებული; კორტიკოსტეროიდებით მკურნალობამ ასევე შეიძლება შენიღბოს ინფექციის ნიშნები, რაც გაართულებს არსებული ან განვითარებადი ინფექციის დიაგნოსტიკას.

-  მძიმე ინფექციების დროს პაიდოკორტი უნდა იქნას გამოყენებული მხოლოდ ინფექციის მკურნალობასთან ერთად. ზოგიერთი ტიპის ინფექციას არ უნდა ემკურნალოს კორტიკოსტეროიდებით (იხ. „არ მიიღოთ პაიდოკორტი"), რადგანაც ამან შეიძლება გააუარესოს ისინი და გახადოს სიცოცხლისათვის საშიში.

-  თუ გაქვთ ჰიპოთირეოზი (ქვეაქტიური ფარისებრი ჯირკვალი) ან ციროზი (ღვიძლის დაავადება), რადგანაც ამ ორივე შემთხვევაში პაიდოკორტის  (გლუკოკორტიკოიდების) ეფექტები შეიძლება გაიზარდოს.

-  თუ თქვენ ხართ სტრესულ სიტუაციაში (როგორიცაა ტრავმა ან ოპერაცია), შეიძლება დაგჭირდეთ დოზის გაზრდა.

-  თუ გაქვთ არ გადაგიტანიათ ჩუტყვავილა ან წითელა, მაქსიმალურად ეცადეთ თავი აარიდოთ კონტაქტს ამ ინფექციების მქონე ადამიანებთან. თუ თქვენ გქონდათ კონტაქტი ამ ინფექციებთან პაიდოკორტით მკურნალობის პერიოდში, დაუყოვნებლივ მიმართეთ ექიმს.

-  თუ იღებთ პაიდოკორტს, თქვენი ვაქცინაცია  რეკომენდებული არ არის.

-  თუ გქონიათ დადებითი ტუბერკულინის ტესტი (ტესტი ტუბერკულოზის დაავადებაზე) უნდა აცნობოთ თქვენს ექიმს.

-  თუ გაქვთ მიასთენია გრავისი, განსაკუთრებით თუ გჭირდებათ გლუკოკორტიკოიდების მაღალი დოზებით მკურნალობა, თქვენი ექიმი დაიწყებს მკურნალობას პაიდოკორტის დაბალი დოზით და შემდეგ თანდათან გაზრდის მას.

-  ხანგრძლივი პერიოდის განმავლობაში, მაღალი დოზებით მკურნალობისას მნიშვნელოვანია კალიუმის ადეკვატური მიღება და ნატრიუმის შეზღუდული მიღება და სისხლში კალიუმის დონის ტესტირება.

-  თუ მკურნალობა დიდხანს გაგრძელდება, ექიმი რეგულარულად ჩაგიტარებთ მონიტორინგს  თვალისმხრივი გართულებების  პრევენციისათვის (როგორიცაა კატარაქტა და თვალშიდა წნევის მომატება).

-  დაუკავშირდით თქვენს ექიმს, თუ გაქვთ მხედველობის დაბინდვა ან მხედველობის სხვა დარღვევები.

-  თუ გაქვთ მძიმე დიაბეტი (სისხლში ძალიან მაღალი შაქარი), ან გულის შეგუბებითი უკმარისობა (თქვენი გული ვერ ტუმბავს საკმარის სისხლს), ან მძიმე ჰიპერტენზია (ძალიან მაღალი არტერიული წნევა), თქვენი ექიმი ჩაგიტარებთ რეგულარულ მონიტორინგს.

-   თუ გაქვთ სკლეროდერმია (ასევე უწოდებენ სისტემურ სკლეროზს, აუტოიმუნური დაავადება), რადგანაც ყოველდღიურმა დოზამ  15 მგ ან მეტი შეიძლება გაზარდოს თირკმლის სერიოზული გართულების რისკი, რომელსაც ეწოდება სკლეროდერმიული თირკმლის კრიზი. სკლეროდერმიული თირკმლის კრიზის ნიშნებია მომატებული სისხლის წნევა და შარდის გამოყოფის შემცირება. ექიმმა შეიძლება გირჩიოთ თქვენი სისხლის წნევისა და შარდის რეგულარულად შემოწმება.

-   თუ თქვენ ხართ ხანდაზმული პაციენტი, თქვენი ექიმი ჩაგიტარებთ რეგულარულ მონიტორინგს, განსაკუთრებით თუ თქვენ გჭირდებათ ხანგრძლივი მკურნალობა.

-  კორტიკოსტეროიდებით ხანგრძლივმა მკურნალობამ შეიძლება გამოიწვიოს ოსტეოპოროზი.

-  კორტიკოსტეროიდების მოხსნის სინდრომის რისკის შესამცირებლად მკურნალობა არ უნდა შეწყდეს უეცრად, არამედ უნდა შეწყდეს ნელა. არ შეწყვიტოთ ამ პრეპარატის მიღება ექიმთან წინასწარი გადამოწმების გარეშე.

ბავშვები

პაიდოკორტი უნდა იქნას გამოყენებული ბავშვებში მხოლოდ მნიშვნელოვანი სამედიცინო მიზეზების არსებობისას. ხანგრძლივად გამოყენების შემთხვევაში, მას შეუძლია შეაფერხოს ბავშვის განვითარება. მათმა ექიმმა პეიდოკორტის დანიშვნისას უნდა შეაფასოს ეს სხვა ფაქტორებთან ერთად.

სხვა პრეპარატები და პაიდოკორტი

აცნობეთ თქვენს ექიმს ან ფარმაცევტს, თუ იღებთ, ბოლოდროს ღებულობდით  ან შესაძლოა მიიღოთ  ნებისმიერი სხვა პრეპარატები, არა-რეცეპტურულების ჩათვლით.

მნიშვნელოვანია აცნობოთ თქვენს ექიმს, თუ იღებთ რომელიმე შემდეგ პრეპარატს:

- ამფოტერიცინი B, კლარითრომიცინი ან ერითრომიცინი (ანტიბიოტიკები ინფექციების სამკურნალოდ),

-რიფამპიცინი ან რიფაბუტინი (ანტიბიოტიკები ტუბერკულოზის სამკურნალოდ),

- კარბამაზეპინი, ფენიტოინი, ფენობარბიტალი ან პრიმიდონი ( ეპილეფსიის სამკურნალოდ),

- კეტოკონაზოლი (სოკოვანი ინფექციების სამკურნალოდ),

- თეოფილინი (ასთმისა და სუნთქვის სხვა პრობლემების სამკურნალოდ),

- დილთიაზემი (მაღალი წნევის სამკურნალოდ და სტენოკარდიის კონტროლისთვის),

- ციკლოსპორინი (ტრანსპლანტაციის მოცილების საპრევენციოდ),

- სალიცილატები ან სხვა არასტეროიდული ანთების საწინააღმდეგო პრეპარატები (მაგ. აცეტილსალიცილის მჟავა ან ინდომეტაცინი, ტკივილისა და ანთების საწინააღმდეგოდ),

- ანტიკოაგულანტები (მაგ. სისხლის გასათხირებლად და სისხლის კოლტების პრევენციისათვის),

- არა-კალიუმის დამზოგველი დიურეტიკები (მაგ. ჰიდროქლორთიაზიდი, მაღალი სისხლის წნევის სამკურნალოდ),

- ანტიდოაბეტური პრეპარატები (მაგ. გლიბენკლამიდი, სისხლში შაქრის დასაქვეითებლად),

- ანტიქოლინესტერაზული პრეპარატები (მაგ. ნეოსტიგმინი ან პირიდოსტიგმინი, მიასთენიის გრავის დროს),

- ესტროგენები (ჰორმონალური დარღვევებისთვის), პერორალური კონტრაცეპტივები,

- საგულე გლიკოზიდები (მაგ. დიგოქსინი, გულის პრობლემების სამკურნალოდ),

- იონგამცვლელი პოლიმერები (მაგ. ქოლესტირამინი ან კოლესტიპოლი, ქოლესტერინის სამკურნალოდ),

- ნერვ-კუნთოვანი ბლოკერები (გამოიყენება ანესთეზიაში).

ზოგიერთმა პრეპარატმა შეიძლება გააძლიეროს პაიდოკორტის ეფექტი. ამიტომ, თქვენი ექიმი ყურადღებით გაგაკონტროლებთ თქვენ, თუ იღებთ ამ სამკურნალო პროდუქტებს (აივ-ის სამკურნალო ზოგიერთი პრეპარატის ჩათვლით, როგორიცაა: რიტონავირი და კობიცისტატი). პაიდოკორტი ამცირებს იმუნურ პასუხს ვაქცინებისა და ტოქსოიდების მიმართ, და ასევე შეუძლია გააძლიეროს მიკრობების რეპლიკაცია ცოცხალ დასუსტებულ ვაქცინებში.

პაიდოკორტი საკვებთან და სასმელთან და ალკოჰოლთან ერთად

პაიდოკორტის სწორად მიღებაში დახმარების მიზნით, მისი მიღებისას ის შეიძლება შეერიოს ცოტა რძეს, გამჭვირვალე სუპს, ფორთოხლის წვენს და ა.შ. (იხილეთ მე- 3 პუნქტი). მოერიდეთ დიდი რაოდენობით გრეიფრუტის წვენის დალევას, რადგანაც ამან შეიძლება ხელი შეუშალოს პაიდოკორტს. მოერიდეთ ალკოჰოლის დალევას პაიდოკორტით მკურნალობის დროს, რათა თავიდან აიცილოთ წყლულები კუჭში ან ნაწლავებში.

ორსულობა და ძუძუთი კვება

თუ ხართ ორსულად ან მეძუძური, ფიქრობთ, რომ შეიძლება იყოთ ორსულად ან გეგმავთ ბავშვის გაჩენას, ამ პრეპარატის მიღებამდე რჩევისთვის მიმართეთ ექიმს ან ფარმაცევტს. პაიდოკორტი არ უნდა იქნას გამოყენებული ორსულობის ან ძუძუთი კვების დროს, გარდა თუ ამას  ექიმი არ  ჩათვლის საჭიროდ. ამიტომ რაც შეიძლება მალე უნდა აცნობოთ ექიმს, თუ დაორსულდებით მკურნალობის პერიოდში.

ავტომობილის მართვა და მექანიზმებთან მუშაობა  

არ მართოთ ავტომობილი და არ გამოიყენოთ ხელსაწყოები ან მექანიზმები პაიდოკორტით მკურნალობის დროს.

მნიშვნელოვანი ინფორმაცია პაიდოკორტის ზოგიერთი ინგრედიენტის შესახებ

სპორტსმენებს უნდა მიწოდოს ინფორმაცია, რომ ეს პრეპარატი შეიცავს პრედნიზოლონის წარმოებულს, რომელმაც შესაძლოა აჩვენოს დადებითი შედეგი ანტიდოპინგურ ტესტში.

პაიდოკორტი შეიცავს თხევად მალტიტოლს (ან ჰიდროგენიზებულ გლუკოზის სიროფს) (E-965), ნატრიუმის მეთილის პარჰიდროქსიბენზოატს (E-219) და ნატრიუმის პროპილ პარაჰიდროქსიბენზოატს (E-217)

ეს პრეპარატი შეიცავს თხევად მალტიტოლს (ან ჰიდროგენიზებულ გლუკოზის სიროფს) (E-965). თუ თქვენმა ექიმმა გითხრათ, რომ თქვენ გაქვთ გარკვეული შაქრების აუტანლობა, ჰკითხეთ მას რჩევა ამ პრეპარატის მიღებამდე.

მას შეუძლია გამოიწვიოს ალერგიული რეაქციები (შესაძლოა დაყოვნებული), რადგანაც შეიცავს ნატრიუმის მეთილის პარაჰიდროქსიბენზოატს (E-219) და ნატრიუმის პროპილ პარაჰიდროქსიბენზოატს (E-217). მწვავე ბრონქული ასთმის ჩვენებისთვის მოზრდილებში და 12-დან 17 წლამდე მოზარდებში, რომლებისთვისაც რეკომენდებული დოზა შეიძლება იყოს მაქსიმუმ 50 მგ/დღეში (შეესაბამება 16,7 მლ/დღეში), ეს პრეპარატი შეიცავს 23,45 მგ ნატრიუმს (სუფრის მარილის ძირითადი კომპონენტი) თითოეულ დოზის ერთეულში. ეს უდრის მოზრდილი ადამიანისთვის მაქსიმალური რეკომენდებული დღიურად მისაღები ნატრიუმის დოზის  1.17%-ს.  

მძიმე ალერგიული და ანთებითი რეაქციების ჩვენებისთვის, სადაც საწყისი დოზა იქნება 60 მგ/ დღეში (შესაბამისად 20 მლ/დღეში), ეს პრეპარატი შეიცავს 28,08 მგ ნატრიუმს (სუფრის მარილის ძირითადი კომპონენტი) თითოეულ დოზის ერთეულში. ეს უდრის მოზრდილი ადამიანისთვის მაქსიმალური რეკომენდებული დღიურად მისაღები ნატრიუმის დოზის  1.40%-ს.

ყველა სხვა ჩვენებისთვის ეს პრეპარატი შეიცავს 23 მგ-ზე ნაკლებ ნატრიუმს (1 მმოლ) ერთეულ დოზაზე; სხვა სიტყვებით რომ ვთქვათ, არსებითად "ნატრიუმის გარეშეა".

3. როგორ მიიღება პაიდოკორტი

ყოველთვის მიიღეთ ეს პრეპარატი ისე, როგორც გითხრათ თქვენმა ექიმმა ან ფარმაცევტმა. გადაამოწმეთ თქვენს ექიმთან ან ფარმაცევტთან თუ რაიმეი არა ხართ დარწმუნებული.

დოზა დამოკიდებულია დაავადების ტიპსა და სიმძიმეზე, და ასევე პაციენტის ინდივიდუალურ პასუხზე. ზოგადად, რეკომენდებული დოზაა 1 მგ პრედნიზოლონი (შეესაბამება 0,35 მლ ხსნარს) კგ სხეულის წონაზე დღეში. ეს რაოდენობა უნდა დაიყოს 2 დოზად დღეში, ყოველ 12 საათში ერთხელ მისაღებად.

რეკომენდებული დოზები და მკურნალობის ხანგრძლივობა მოცემულია ქვემოთ, როგორც სახელმღვანელო სხვადასხვა ჩვე4ნებებისათვის.

მწვავე ბრონქული ასთმა:

40-50 მგ/დღეში (შეესაბამება 13,4-16,7 მლ/დღეში) მინიმუმ 5 დღის განმავლობაში.

ალერგიული და ანთებითი დარღვევები:

დაიწყეთ მკურნალობა პრედნიზოლონის დღიური დოზით 10-20 მგ/დღეში (შეესაბამება 3,5-6,7 მლ/დღეში), სასურველია მიღება დილით საუზმის შემდეგ. ეს დოზა შეიძლება შემცირდეს რამდენიმე დღის შემდეგ, მაგრამ შეიძლება საჭირო გახდეს მისი გაგრძელება კვირების ან თვეების განმავლობაში.

შემანარჩუნებელი დოზაა 2,5-15 მგ/დღეში (შეესაბამება 0,84-5,0 მლ/დღეში).

თქვენმა ექიმმა შეიძლება გირჩიოთ უფრო მაღალი დოზები თქვენი დარღვევის სიმძიმის მიხედვით.

რევმატოიდული ორთრიტი:

7,5-10 მგ/დღეში, ანუ 2,5-3,4 მლ/დღეში.

გამოყენება ბავშვებში

მწვავე ბრონქული ასთმა:

1 თვიდან 11 წლამდე ასაკის ბავშვებში:

1-2 მგ/კგ/დღეში (შეესაბამება 0,35-0,67 მლ/კგ/დღეში), მაქსიმუმ 40 მგ/დღეში (შეესაბამება 13,4 მლ/დღეში) 3 დღის განმავლობაში. საჭიროების შემთხვევაში მკურნალობა შეიძლება გახანგრძლივდეს.

12-დან 17 წლამდე ასაკის მოზარდები:

მოზრდილების ანალოგიური დოზა.

ალერგიული და ანთებითი დარღვევები:

1 თვეზე უფროსი ასაკის ბავშვები:

რეკომენდებული დოზაა 0,1-2 მგ/კგ/დღეში (შეესაბამება 0,035-0,67 მლ/კგ/დღეში) დაყოფილი დოზებით 1-დან 4-ჯერამდე დღეში.

გამოყენების მეთოდი

პერორალურად.

თუ მიიღეთ საჭიროზე მეტი პაიდოკორტი

დოზის გადაჭარბების ან შემთხვევითი მიღების შემთხვევაში დაუყოვნებლივ დაუკავშირდით თქვენს ექიმს ან ფარმაცევტს ან დარეკეთ ტოქსიკოლოგიის საინფორმაციო სამსახურში  მიუთითეთ პრეპარატი და მიღებული რაოდენობა.

დოზის გადაჭარბების გამო დაფიქსირებული სიმპტომებია: შფოთვა, დეპრესია, გონებრივი აბნევა, კუჭ-ნაწლავის სპაზმი ან სისხლდენა, ჰიპერგლიკემია (სისხლში შაქრის რაოდენობის მატება), ჰიპერტენზია სისხლის ნევა) და შეშუპება.

თუ დაგავიწყდათ პაიდოკორტის მიღება

არ მიიღოთ ორმაგი დოზა გამოტოვებული დოზის შესავსებად. უბრალოდ გააგრძელეთ პაიდოკორტის მიღება ისევე, როგორც მანამდე.

თუ შეწყვეტთ პაიდოკორტის მიღებას

არ შეწყვიტოთ ამ პრეპარატის მიღება ექიმთან წინასწარი გასაუბრების გარეშე.

არსებითია, რომ მკურნალობა არ შეწყდეს უეცრად. ამიტომ დოზები თანდათან უნდა შემცირდეს. თქვენი ექიმი გეტყვით, თუ როგორ უნდა გააკეთოთ ეს, რადგანაც კორტიკოსტეროიდის სწრაფმა მოხსნამ ხანგრძლივი მკურნალობის შემდეგ შეიძლება გამოიწვიოს სერიოზული გართულებები. თუ თქვენ გაქვთ რაიმე დამატებითი შეკითხვები ამ პრეპარატის გამოყენებასთან დაკავშირებით, მიმართეთ თქვენს ექიმს ან ფარმაცევტს.

4. შესაძლო გვერდითი ეფექტებიყველა პრეპარატის მსგავსად, ამ პრეპარატსაც შეუძლია გამოიწვიოს გვერდითი მოვლენები, თუმცა ყველას არ განუვითარდება ისინი.

კლასიფიკაციისთვის გამოყენებულია სიხშირის შემდეგი განსაზღვრებები: ხშირი (შეიძლება განუვითარდეს 10-დან 1-მდე ადამიანს), არა-ხშირი (შეიძლება განუვითარდეს 100-დან 1-მდე ადამიანს), იშვიათი (შეიძლება განუვითარდეს 1000-დან 1-მდე ადამიანს), ძალიან იშვიათი (შეიძლება განუვითარდეს ახდენს 10000-დან 1-მდე ადამიანს), უცნობია (შეფასება შეუძლებელია არსებული მონაცემების საფუძველზე).

ენდოკრინული დარღვევები:

ხშირი: ცხიმის პათოლოგიური განაწილება (როგორიცაა სიმსუქნე მუცელზე, მთვარისებრი სახე, ცხიმის დაგროვება ხერხემლის არხში ან გულმკერდში, რომელიც შექცევადია), სისხლში შაქრის მომატება.

არახშირი: წონის მომატება, დიაბეტი, სისხლში ცხიმის რაოდენობის ცვლილება (როგორიცაა ქოლესტერინი ან ტრიგლიცერიდები), არარეგულარული მენსტრუცია, თმის ზრდა.

იშვიათად: იმპოტენცია, თირკმელზედა ჯირკვლის ქერქში ჰორმონების გამომუშავების პრობლემები, ბავშვებში ზრდის შეფერხება, ცილოვანი მეტაბოლიზმის მომატება (თან ერთვის სისხლში შარდოვანას დონის მომატება).

გულის და სისხლძარღვოვანი დარღვევები

ხშირი: ნატრიუმის და წყლის შეკავება, კალიუმის გაზრდილი გამოყოფა და სისხლში კალიუმის დაბალი დონე. გულის შეგუბებითი უკმარისობის მქონე პაციენტებში (გული ვერ ტუმბავს საკმარის სისხლს), შეიძლება გაიზარდოს სითხის დაგროვება ფილტვებში და მათ შეიძლება განუვითარდეთ ჰიპერტენზია (მაღალი წნევა). სისხლძარღვების ალერგიული ანთება, თავის ქალასშიდა წნევის მომატება მხედველობის ნერვის ანთებასთან ერთად.

უცნობია: გულისცემის შენელება

კანისა და კანქვეშა ქსოვილის დარღვევები

ხშირი: კანის ცვლილებები (ატროფია, სტრიები, აკნე, სისხლჩაქცევები, მოწითალო ლაქები). იშვიათი: კანზე გამონაყარი.

თირკმელებისა და შარდის მხრივი დარღვევები

უცნობია: სკლეროდერმიული თირკმლის კრიზი პაციენტებში, რომლებსაც უკვე აქვთ სკლეროდერმია (ავტოიმუნური დარღვევა). სკლეროდერმიული თირკმლის კრიზის ნიშნებია მაღალი წნევა და შარდის გამოყოფის შემცირება.

დარღვევები სისხლისა და ლიმფური სისტემის მხრივ

ხშირი: ჭრილობების ნელი შეხორცება. ლეიკოციტების დონის მომატება მკურნალობის დასაწყისში, თუმცა ეს ქრება დროთა განმავლობაში. თრომბოციტების რაოდენობის მომატება და თრომბოზის რისკი.

ძვალ-კუნთოვანი და შემაერთებელი ქსოვილის მხრივი დარღვევები

ხშირი: ოსტეოპოროზი (მინერალების დაკარგვა ძვლებში). მძიმე შემთხვევებში მოტეხილობების რისკით.

იშვიათი: კუნთების სისუსტე, რომელიც ჩვეულებრივ შექცევადია, თუმცა მიასთენია გრავისის მქონე პაციენტებში შეიძლება მოხდეს კუნთების სისუსტის შექცევადი გაუარესება, რაც შეიძლება გადაიზარდოს მიასთენიურ კრიზში  (სუნთქვის მძიმე პრობლემები).

ძალიან იშვიათი: ბარძაყის ან მხრის ძვლის ქსოვილის ნეკროზი, მყესის გაწყვეტა (განსაკუთრებით ადამიანებში, რომლებსაც მანამდე აღენიშნებოდათ მყესების დაზიანებებუ, დიაბეტი ან სისხლში შარდმჟავას მაღალი დონე). მაღალი დოზებით და ხანგრძლივი დროის განმავლობაში მკურნალობისას შეიძლება მოხდეს კუნთების ცვლილებები (როგორიცაა კუნთების მასის დაკარგვა).

კუჭ-ნაწლავის მხრივი დარღვევები

იშვიათი: კუჭის ან თორმეტგოჯა ნაწლავის წყლული, პანკრეატიტით (პანკრეასის ანთება), პერიტონიტით (კუჭ-ნაწლავის მძიმე ინფექცია) ან მუცელში დისკომფორტით.

თვალის მხრივი დარღვევები

იშვიათი: თვალის დეფექტები, როგორიცაა ბროლის შემღვრევა, თვალშიდა წნევის მომატება (გლაუკომა), ბროლში დანისლული ან შემღვრეული  უბნების არსებობა (კატარაქტა).

უცნობია: ბუნდოვანი მხედველობა.

იმუნური სისტემის დარღვევები

არახშირი: ორგანიზმის დამცავი უნარის დაქვეითება და ინფექციის რისკის გაზრდა. თუ გაწუხებთ ისეთი ვირუსით გამოწვეული დაავადება, როგორიცაა ჩუტყვავილა, მარტივი ჰერპესი ან ჰერპეს ზოსტერი, თქვენი მდგომარეობა შეიძლება გაუარესდეს, ზოგჯერ ჯანმრთელობისთვის სერიოზული რისკით.

ნერვული სისტემის დარღვევები

იშვიათი: კრუნჩხვები, თავის ტკივილი, ვერტიგო და ძილის დარღვევები.

ფსიქიატრიული დარღვევები

იშვიათი: ფსიქიატრიული დარღვევების განვითარება ან გაუარესება (ეიფორია, განწყობის ცვალებადობა, პიროვნული ცვლილებები, მძიმე დეპრესია, ფსიქოზი).

თუ პაიდოკორტი შეწყდება  სწრაფად (არა თანდათანობით) მკურნალობის ხანგრძლივი პერიოდის შემდეგ, შეიძლება განვითარდეს კუნთების ტკივილი, სახსრების ტკივილი, სუნთქვის პრობლემები, ანორექსია, გულისრევა, ღებინება, ცხელება, დაბალი სისხლის წნევა და სისხლში შაქრის დაბალი დონე.

გვერდითი ეფექტების შესახებ შეტყობინება:

თუ თქვენ განგივითარდებათ რაიმე გვერდითი ეფექტები, მიმართეთ თქვენს ექიმს ან ფარმაცევტს. ეს მოიცავს ნებისმიერ შესაძლო გვერდით ეფექტს, რომელიც არ არის ჩამოთვლილი ამ გამოყენების ინსტრუქციაში.

გვერდითი ეფექტების შეტყობინებით თქვენ შეგიძლიათ დაეხმაროთ ამ პრეპარატის უსაფრთხოების შესახებ მეტი ინფორმაციის მოწოდებაში.

5. როგორ ინახება პაიდოკორტი

 შეინახეთ ეს პრეპარატი ბავშვებისთვის მიუწვდომელ და ფარულ ადგილას.

შეინახეთ 25°C-ზე დაბალ ტემპერატურაზე. შეინახეთ ორიგინალურ შეფუთვაში. არ გაყინოთ. ბოთლის გახსნის შემდეგ გამოიყენეთ 2 თვის ფარგლებში.

 არ გამოიყენოთ ეს პრეპარატი ვარგისიანობის ვადის გასვლის შემდეგ, რომელიც მითითებულია ბოთლზე წარწერა "EXP"-ის შემდეგ. ვარგისიანობის ვადა ეხება მითითებული თვის ბოლო დღეს.

არ გადააგდოთ არავითარი მედიკამენტები კანალიზაციაში ან საყოფაცხოვრებო ნაგავში. განათავსეთ კონტეინერები და მედიკამენტები, რომლებიც არ გჭირდებათ, აფთიაქში SIGRE პუნქტში. თუ არა ხართ რაიმეში დარწმუნებული, ჰკითხეთ თქვენს ფარმაცევტს, თუ როგორ გადააგდოთ მედიკამენტები, რომლებსაც აღარ იყენებთ. ეს ზომები ხელს შეუწყობს გარემოს დაცვას.

6. შეფუთვის შემცველობა და სხვა ინფორმაცია

რას შეიცავს პაიდოკორტი

აქტიური ნივთიერებაა პრედნიზოლონი. პერორალური ხსნარის ყოველი მლ შეიცავს 3 მგ პრედნიზოლონს (ნატრიუმის ფოსფატის სახით).

სხვა ინგრედიენტებია (დამხმარე ნივთიერებები): ნატრიუმის მეთილის პარაჰიდროქსიბენზოატი (E-219), ნატრიუმის პროპილ პარაჰიდროქსიბენზოატი (E-217), დინატრიუმის ედეტატი, ნატრიუმის საქარინი, ნატრიუმის ჰიდროგენფოსფატის დიჰიდრატი, ნატრიუმის დიჰიდროგენფოსფატის დიჰიდრატი, თხევადი მალტიტოლი (E-965), მარწყვის არომატიზატორი 90044-33 და დისტილირებული წყალი.

როგორ გამოიყურება პაიდოკორტი და შეფუთვის შემცველობა

პაიდოკორტი არის გამჭვირვალე, უფერო ან ოდნავ მოყვითალო ხსნარი. გამოდის ქარვისფერ PET (პოლიეთილენ ტერეფტალატის) ბოთლში, რომელიც შეიცავს 50 მლ ან 125 მლ-ს და შეიცავს 5 მლ დოზირების შპრიცს. 50 მლ ბოთლები წარმოდგენილია 20 ერთეულის შემცველ კლინიკურ კონტეინერში.