Optamycin - ოფთამიცინი 0.3% თვალის წვეთები 5მლ

მოქმედი ნივთიერება: 1 მლ ხსნარი შეიცავს 3 მგ ტობრამიცინს.

დამხმარე ნივთიერებები: ბენზალკონიუმის ქლორიდი, ტილოქსაპოლი, ნატრიუმის ქლორიდი, უწყლო ნატრიუმის სულფატი, ბორის მჟავა, ნატრიუმის ჰიდროქსიდი, გოგირდის მჟავა, საინექციო წყალი.

რას წარმოადგენს ოფთამიცინი და რისთვის გამოყენება
ოფთამიცინი გამოიყენება თვალის/თვალების და მის გარშემო ზედაპირული ბაქტერიული ინფექციების სამკურნალოდ.

ოფთამიცინი მიეკუთვნება სამკურნალო საშუალებების ჯგუფს, სახელწოდებით ინფექციის საწინააღმდეგო საშუალებები. ინფექციის საწინააღმდეგო საშუალებების ჯგუფი შეიცავს ანტიბიოტიკს (ტობრამიცინი ამ პროდუქტში), რომელიც აქტიურია მიკროორგანიზმების დიდი ნაწილის მიმართ, რომლებიც აინფიცირებს და იწვევს თვალის/თვალების დაავადებებს.

ოფთამიცინი არის გამჭვირვალე უფერო ხსნარი. ხსნარში არ უნდა აღინიშნებოდეს ნაწილაკები.

შეფუთვის მასალის სახით გამოიყენება 5 მლ გაუმჭვირვალე თეთრი, დაბალი სიმკვრივის პოლიეთილენის ფლაკონი საწვეთურით, დახურული თეთრი პოლიპროპილენის ხრახნიანი თავსახურით.

ოფთამიცინის გამოყენებამდე
არ გამოიყენოთ ოფთამიცინი:
• თუ გაქვთ ალერგია (ჰიპერმგრძნობელობა) ტობრამიცინის ან მოცემული პრეპარატის ნებისმიერი სხვა კომპონენტის მიმართ.

დაიცავით სიფრთხილის განსაკუთრებული ზომები ოფთამიცინთან დაკავშირებით
• თვალის ქუთუთოს ქავილის, თვალის შეშუპების ან სიწითლის შემთხვევაში შეწყვიტეთ მკურნალობა და კონსულტაციისთვის მიმართეთ თქვენს ექიმს.
• ზოგ პაციენტში შეიძლება ადგილი ჰქონდეს მგრძნობელობას ადგილობრივად შეყვანილი ამინოგლიკოზიდების (ანტიბიოტიკების) მიმართ. ასევე, შეიძლება ადგილი ჰქონდეს ჯვარედინ მგრძნობელობას ამინოგლიკოზიდების ჯგუფის სხვა ანტიბიოტიკების მიმართ. მძიმე ალერგიული რეაქციების განვითარების შემთხვევაში შეწყვიტეთ მკურნალობა.
• აცნობეთ თქვენს ექიმს, თუ მკურნალობთ სხვა ანტიბიოტიკებით.
• სისტემურ ამინოგლიკოზიდურ ანტიბიოტიკებთან ერთდროულად მიღებისას პროდუქტის დაგროვების გამო შეიძლება აღინიშნოს მოწამვლის სიმპტომები.
• როგორც ნებისმიერი ანტიბიოტიკის შემთხვევაში, ხანგრძლივმა გამოყენებამ შეიძლება გამოიწვიოს არამგრძნობიარე ორგანიზმების (ორგანიზმები, რომლებიც ავითარებენ რეზისტენტობას პრეპარატის მიმართ), მათ შორის სოკოების, ჭარბი ზრდა. სუპერინფექციის განვითარების შემთხვევაში (ინფექციით დასუსტებულ ორგანიზმში დამატებითი ინფექციის განვითარება), საჭიროა შესაბამისი თერაპიის დაწყება.
• თვალის ინფექციების მკურნალობის პერიოდში კონტაქტური ლინზების ტარება რეკომენდებული არ არის. არ გამოიყენოთ კონტაქტური ლინზები ამ პროდუქტის მკურნალობის პერიოდში.
• ოფთამიცინი შეიცავს ბენზალკონიუმის ქლორიდს, დამცავი საშუალების სახით, რომელმაც შეიძლება გამოიწვიოს თვალის გაღიზიანება, ასევე ცნობილია, რომ იწვევს რბილი კონტაქტური ლინზების ფერის შეცვლას. ოფთამიცინის ჩაწვეთებამდე მოიხსენით კონტაქტური ლინზები და ჩაისვით ის თვალში 15 წუთის შემდეგ.
• გამოიყენეთ პრეპარატი ექიმის მიერ დანიშნული ხანგრძლივობით.
• დაავადების სიმპტომების გაუარესების ან ხელახლა განვითარების შემთხვევაში კონსულტაციისთვის მიმართეთ თქვენს ექიმს.
• სხვა პრეპარატების გამოყენების შემთხვევაში, იხილეთ პარაგრაფი ~სხვა პრეპარატები და ოფთამიცინი~

თუ აღნიშნული სიფრთხილის ზომები თქვენ გეხებათ, ან გეხებოდათ წარსულში, კონსულტაციისთვის მიმართეთ თქვენს ექიმს.

ოფთამიცინის გამოყენება საკვებთან და სასმელთან ერთად
რეკომენდაციის შესაბამისად პროდუქტის გამოყენებისას, საკვებთან და სასმელთან ურთიერთქმედება მოსალოდნელი არ არის.

ორსულობა
მოცემული პრეპარატის გამოყენებამდე კონსულტაციისთვის მიმართეთ თქვენს ექიმს ან ფარმაცევტს.
ოფთამიცინი რეკომენდებული არ არის ორსულობის პერიოდში.

მკურნალობის პერიოდში ორსულობის დადგენის შემთხვევაში, დაუყოვნებლივ მიმართეთ კონსულტაციისთვის თქვენს ექიმს ან ფარმაცევტს.

ძუძუთი კვება
მოცემული პრეპარატის გამოყენებამდე კონსულტაციისთვის მიმართეთ თქვენს ექიმს ან ფარმაცევტს.
ოფთამიცინი რეკომენდებული არ არის ძუძუთი კვების პერიოდში.

სატრანსპორტო საშუალებების მართვა და მექანიზმებთან მუშაობა
ოფთამიცინის ჩაწვეთების შემდეგ შეიძლება განვითარდეს არამკვეთრი მხედველობა ხანმოკლე დროის განმავლობაში. არ მართოთ სატრანსპორტო საშუალებები ან იმუშაოთ მექანიზმებთან მხედველობის აღდგენამდე.

მნიშვნელოვანი ინფორმაცია ოფთამიცინის ზოგიერთი ინგრედიენტის შესახებ
დამცავ საშუალებას (ბენზალკონიუმის ქლორიდი) ოფთამიცინში შეუძლია გამოიწვიოს თვალის გაღიზიანება, ასევე ცნობილია, რომ ის იწვევს რბილი კონტაქტური ლინზების ფერის შეცვლას. თუ ატარებთ კონტაქტურ ლინზებს, ოფთამიცინის ჩაწვეთებამდე მოიხსენით კონტაქტური ლინზები და ჩაისვით ის თვალში სულ მცირე 15 წუთის შემდეგ.

სხვა პრეპარატები და ოფთამიცინი
ამინოგლიკოზიდის (ტობრამიცინის) და ნერვულ სისტემაზე, ყურზე, ან თირკმელებზე ტოქსიკური (დამაზიანებელი) მოქმედების მქონე სხვა სისტემური, პერორალური ან ადგილობრივი გამოყენების საშუალებების ერთდროულად ან/და თანმიმდევრულად გამოყენება შეიძლება იწვევდეს დამატებით ტოქსიურობას, და თუ შესაძლებელია, საჭიროა აღნიშნულის თავიდან აცილება.

ადგილობრივ (ზედაპირულ) კორტიკოსტეროიდებს (სტეროიდულ საცხებს), ოფთამიცინთან კომბინაციაში გამოყენებისას, შეუძლია შენიღბოს ბაქტერიული, სოკოვანი ან ვირუსული ინფექციების კლინიკური ნიშნები და შეიძლება დათრგუნოს ჰიპერმგრძნობელობის რეაქციები.

აცნობეთ თქვენს ექიმს ან ფარმაცევტს, თუ იღებთ ან ახლო წარსულში იღებდით ნებისმიერ სხვა სამკურნალო საშუალებას, ურეცეპტოდ გაცემული პრეპარატების ჩათვლით.

როგორ უნდა გამოიყენოთ ოფთამიცინი
მითითებები სწორად გამოყენებასთან და დოზირებასთან/მიღების სიხშირესთან დაკავშირებით
ყოველთვის გამოიყენეთ ოფთამიცინი თქვენი ექიმის მითითებების ზუსტად დაცვით. რაიმე საკითხზე ეჭვის არსებობის შემთხვევაში კონსულტაციისთვის მიმართეთ თქვენს ექიმს ან ფარმაცევს.
მსუბუქი და ზომიერი ინფექციების შემთხვევაში ჩვეულებრივი დოზა შეადგენს ერთ ან ორ წვეთს თვალ(ებ)ში ყოველ 4 საათში.
მძიმე ინფექციების შემთხვევაში ჩვეულებრივი დოზა შეადგენს ერთ ან ორ წვეთს ყოველ საათში, მდგომარეობის გაუმჯობესებამდე. შემდგომში, გამოყენების სიხშირე მცირდება შეწყვეტამდე.
მკურნალობის სტანდარტული ხანგრძლივობა შეადგენს 7-10 დღეს. მკურნალობის ხანგრძლივობას განსაზღვრავს თქვენი ექიმი.

გამოყენების წესი და მეთოდი
გამოიყენეთ ოფთამიცინი მხოლოდ თვალში.
• აიღეთ ოფთამიცინის ფლაკონი და სარკე.
• დაიბანეთ ხელები.
• მოხსენით თავსახური ფლაკონს.
• მოხსნეთ თავსახურის ქვეშ არსებული რგოლი.
• დაახურეთ თავსახური რგოლის გარეშე. პლასტმასის წკირი თავსახურის შიგნით ხვრეტს ფლაკონს.

• დაიჭირეთ ფლაკონი, თავით ქვემოთ, ცერა და დანარჩენ თითებს შორის.
• გადაწიეთ თავი უკან. დაიჭირეთ თვალის ქვედა ქუთუთო სუფთა თითით, ისე რომ თვალის ქუთუთოსა და თვალს შორის იყოს სივრცე. წვეთი უნდა მოხვდეს ამ სივრცეში.
• მიიტანეთ ფლაკონის წვერი თვალთან ახლოს. თუ დაგეხმარებათ, განახორციელეთ ეს მოქმედება სარკის წინ.
• არ შეეხოთ თვალს, თვალის ქუთუთოს, გარშემო არსებულ უბნებს ან სხვა ზედაპირს საწვეთურით. აღნიშნულმა შეიძლება დააინფიციროს წვეთები.
• ფრთხილად დააჭირეთ ფლაკონის ძირს ერთი წვეთი ოფთამიცინის გამოსაყოფად.
• ოფთამიცინის გამოყენების შემდეგ, გაუშვით თვალის ქუთუთოს, დახუჭეთ თვალი და დააჭირეთ საჩვენებელი თითი თვალის კუთხეში ცხვირის მიმართულებით. ეს დაგეხმარებათ თავიდან აიცილოთ პრეპარატის მოხვედრა თვალის სადინრიდან ორგანიზმის სხვა ნაწილებში.
• თუ წვეთებს ორივე თვალში იყენებთ, გაიმეორეთ იგივე ეტაპები მეორე თვალში ჩაწვეთებისას.
• გამოყენებისთანავე მჭიდროდ დაახურეთ თავსახური ფლაკონს.
• სხვა ფლაკონის გახსნამდე ბოლომდე გამოიყენეთ ფლაკონი.
• თუ ხსნარი არ ჩაეწვეთა თვალში, კიდევ გაიმეორეთ.

სხვადასხვა ასაკობრივი ჯგუფები

გამოყენება ბავშვებში
გამოყენების განსაკუთრებული პირობები არ არის, გამოიყენება ისევე, როგორც მოზრდილებში.

გამოყენება ხანდაზმულებში
ხანდაზმულებში გამოიყენება ისევე, როგორც მოზრდილებში.

გამოყენება განსაკუთრებულ პირობებში
თირკმელების/ღვიძლის უკმარისობა
თირკმელების/ღვიძლის უკმარისობისას ოფთამიცინის მოქმედება ცნობილი არ არის. თუმცა, ამ პროდუქტის ადგილობრივი გამოყენების შემდეგ ტობრამიცინის დაბალი სისტემური აბსორბციის გამო დოზის კორექტირება საჭირო არ არის.
თუ ფიქრობთ, რომ ოფთამიცინის მოქმედება ძალიან ძლიერი ან ძალიან სუსტია, კონსულტაციისთვის მიმართეთ ექიმს ან ფარმაცევტს.

თუ გამოიყენეთ ოფთამიცინის საჭიროზე მეტი დოზა:
გამოიბანეთ თვალები თბილი წყლით. არ ჩაიწვეთოთ მეორე წვეთი, შემდეგი აპლიკაციის დრომდე.

მიმართეთ ექიმს ან ფარმაცევტს, თუ გამოიყენეთ ოფთამიცინის საჭიროზე მეტი დოზა.

თუ დაგავიწყდათ ოფთამიცინის გამოყენება:
გამოიყენეთ ერთჯერადი დოზა, როგორც კი გაგახსენდებათ. თუ უკვე მოახლოვდა შემდეგი აპლიკაციის დრო, არ მიიღოთ გამოტოვებული დოზა; გააგრძელეთ ჩაწვეთება დანიშნული სქემით.

არ მიიღოთ ორმაგი დოზა გამოტოვებულის საკომპენსაციოდ.

შესაძლო მოქმედება ოფთამიცინის გამოყენების შეწყვეტისას:
თქვენი მკურნალობა არ იქნება სათანადო, თუ თქვენ შეწყვიტავთ მკურნალობას რეკომენდებულზე უფრო ადრე.

 შესაძლო გვერდითი მოქმედება
როგორც ყველა სამკურნალო საშუალების შემთხვევაში, გვერდითი მოქმედება შეიძლება აღინიშნოს პაციენტებში, რომლებსაც აქვთ მგრძნობელობა ოფთამიცინის შემადგენელი ნივთიერებების მიმართ.
გვერდითი მოქმედება ჩამოთვლილია ქვემოთ მითითებული კატეგორიების მიხედვით:
ძალიან ხშირად: შეიძლება აღენიშნოს 10 პაციენტიდან სულ მცირე 1-ს.
ხშირად: შეიძლება აღენიშნოს 10 პაციენტიდან 1-ზე ნაკლებს, მაგრამ 100 პაციენტიდან 1-ზე მეტს.
არახშირად: შეიძლება აღენიშნოს 100 პაციენტიდან 1-ზე ნაკლებს, მაგრამ 1.000 პაციენტიდან 1-ზე მეტს.
იშვიათად: შეიძლება აღენიშნოს 1.000 პაციენტიდან 1-ზე ნაკლებს.
ძალიან იშვიათად: შეიძლება აღენიშნოს 10.000 პაციენტიდან 1-ზე ნაკლებს.
უცნობია: არსებული მონაცემების საფუძველზე შეფასება შეუძლებელია.

დაუყოვნებლივ დაუკავშირდით თქვენს ექიმს ან მიმართეთ უახლოესი საავადმყოფოს სასწრაფო განყოფილებას, თუ აღგენიშნებათ ნებისმიერი ქვემოთ მითითებული მდგომარეობა.
• ჰიპერმგრძნობელობის რეაქცია (როგორიცაა, თვალის ქუთუთოების ქავილი ან შეშუპება, თვალების სიწითლე).

ხშირად
• თვალის დისკომფორტი
• თვალის ქავილი
• თვალის ქუთუთოების ქავილი ან შეშუპება
• თვალის სიწითლე

არახშირად
• კერატიტი (რქოვანას ანთება)
• რქოვანას აბრაზია
• თვალის ქუთუთოების გაწითლება
• თვალიდან გამონადენი
• პათოლოგიები თვალის ქუთუთოების მხრივ
• თვალის შეშუპება
• თვალის გაღიზიანება
• თვალის ტკივილი
• მხედველობის დარღვევა
• ჰიპერმგრძნობელობა
• თავის ტკივილი
• გამონაყარი
• დერმატიტი (კანის დაავადების სახეობა)
• წარბებისა და წამწამების ცვენა
• ლეიკოდერმა (კანში მელანინის პიგმენტის ნაკლებობა)
• ქავილი
• კანის სიმშრალე
• არამკვეთრი მხედველობა
• მომატებული ცრემლდენა

უცნობია
• თვალის გაღიზიანება
• თვალში უცხო სხეულის შეგრძნება
• თვალის უჩვეულო მგრძნობელობა
• თვალის ქუთუთოების ქავილი
• წითელი კანი
• თვალის ალერგია
• ჭინჭრის ციება

აცნობეთ თქვენს ექიმს ან ფარმაცევტს, თუ შენიშნავთ ნებისმიერ გვერდით მოქმედებას, რომელიც არ არის მითითებული ამ ჩანართში.

შეტყობინება გვერდითი მოქმედების შესახებ
მიმართეთ თქვენს ექიმს, ფარმაცევტს ან ექთანს, თუ აღენიშნებათ ნებისმიერი გვერდითი მოქმედება, მათ შორის ნებისმიერი შესაძლო გვერდითი მოქმედება, რომელიც არ არის აღწერილი მოცემულ ჩანართში. ასევე, შეგიძლიათ გააგზავნოთ შეტყობინება უშუალოდ თურქეთის ფარმაკოუსაფრთხოების ცენტრში (თÜFAM), საიტზე წწწ.ტიტცკ.გოვ.ტრ გრაფაზე ~შეტყობინება სამკურნალო საშუალებების გვერდითი მოქმედების შესახებ~ დაკლიკებით, ან დარეკოთ გვერდითი მოქმედების შეტყობინების სატელეფონო ნომერზე: +90 800 314 00 08. გვერდითი მოქმედების შესახებ ინფორმაციის გაგზავნით თქვენ შეგიძლიათ დახმარება ამ პრეპარატის უსაფრთხოების შესახებ მეტი ინფორმაციის შეგროვებაში.

ოფთამიცინის შენახვის წესი
შეინახეთ ოფთამიცინი ბავშვებისათვის მიუწვდომელ ადგილზე, ორიგინალ შეფუთვაში.

პრეპარატი შეინახეთ 25ºC-ზე დაბალ ოთახის ტემპერატურაზე.
ფლაკონის გახსნის შემდეგ, მოცემული პროდუქტი უნდა გამოიყენოთ 4 კვირის განმავლობაში (28 დღე).

ამ პერიოდში პროდუქტი უნდა ინახებოდეს 25ºჩ-ზე დაბალ ოთახის ტემპერატურაზე

გამოიყენებთ ვარგისობის ვადის პერიოდში
არ გამოიყენოთ ოფთამიცინი ვარგისობის ვადის გასვლის შემდეგ, რომელიც მითითებულია შეფუთვაზე.

არ გამოიყენოთ ოფთამიცინი, თუ შენიშნავთ პროდუქტის ან/და შეფუთვის რაიმე დაზიანებას.

არ გადააგდოთ სამკურნალო საშუალებები კანალიზაციის მილში ან საყოფაცხოვრებო ნაგავთან ერთად. გამოუყენებელი პრეპარატის უტილიზაციის საკითხთან დაკავშირებით მიმართეთ ფარმაცევტს. აღნიშნული ზომები ხელს შეუწყობს გარემოს დაცვას.

გაცემის წესი:
ფარმაცევტული პროდუქტის ჯგუფი III, გაიცემა რეცეპტის გარეშე.