Novacetrin - ნოვაცეტრინი 10მგ 20 ტაბლეტი

პრეპარატის გამოყენებამდე ყურადღებით წაიკითხეთ გამოყენების ინსტრუქცია
- შეინახეთ ეს დანართი ფურცელი, შესაძლოა დაგჭირდეთ მისი ხელმეორედ წაკითხვა.
- დამატებითი კითხვების შემთხვევაში, გთხოვთ მიმართოთ ფარმაცევტს.
- ეს პრეპარატი დაგენიშნათ თქვენ. არ გადასცეთ ის სხვა პირებს. ამან შესაძლოა ზიანი მოუტანოს მათ იმ შემთხვევაშიც კი, თუ მათი სიმპტომები გავს თქვენსას.
- იმ შემთხვევაში, თუ სიმპტომები გაუარესდა ან არ გაუმჯობესდა 3 დღის შემდეგ, მიმართეთ ექიმს.
- თუ რომელიმე გვერდითი მოვლენა გახდება სერიოზული, ან შეამჩნევთ ისეთ გვერდით მოვლენებს, რომლებიც არ არის აღწერილი ამ დანართ ფურცელში, გთხოვთ მიმართოთ თქვენს ექიმს ან ფარმაცევტს.

ამ დანართ ფურცელში:
1. რა არის ნოვაცეტრინი და რისთვის გამოიყენება
2. ნოვაცეტრინის გამოყენებამდე
3. როგორ გამოვიყენოთ ნოვაცეტრინი
4. შესაძლო გვერდითი ეფექტები
5. ნოვაცეტრინის შენახვის პირობები
6. დამატებითი ინფორმაცია

1. რა არის ნოვაცეტრინი და რისთვის გამოიყენება
ცეტირიზინის დიჰიდროქლორიდი არის ნოვაცეტრინის აქტიური ინგრედიენტი. ნოვაცეტრინი არის ანტიალერგიული პრეპარატი.
მოზრდილებში, 6 წლის და მეტი ასაკის ბავშვებში ნოვაცეტრინის ტაბლეტები ნაჩვენებია:
- თივის ცხელების (სეზონური ალერგიული რინიტი) და ალერგიის სიმპტომების მოსახსნელად, როგორიცაა ალერგია მტვერზე ან შინაურ ცხოველებზე (ყოველწლიური ალერგიული რინიტი), როგორიცაა ცემინება, ქავილი, ცხვირიდან გამონადენი და ცხვირის შეგუბება, წყლიანი და წითელი თვალები.
- კანის შეშუპების, სიწითლისა და ქავილის მოსახსნელად (ქრონიკული იდიოპათიური ჭინჭრის ციება, რომელიც ასევე ცნობილია, როგორც ქრონიკული ჭინჭრის გამონაყარი).
მოზრდილებში, 2 წლის და მეტი ასაკის ბავშვებში ნოვაცეტრინის პერორალური წვეთები ნაჩვენებია:
- თივის ცხელების (სეზონური ალერგიული რინიტი) და ალერგიის სიმპტომების მოსახსნელად, როგორიცაა ალერგია მტვერზე ან შინაურ ცხოველებზე (ყოველწლიური ალერგიული რინიტი), როგორიცაა ცემინება, ქავილი, ცხვირიდან გამონადენი და ცხვირის შეგუბება, წყლიანი და წითელი თვალები.
- კანის შეშუპების, სიწითლისა და ქავილის მოსახსნელად (ქრონიკული იდიოპათიური ჭინჭრის ციება, რომელიც ასევე ცნობილია, როგორც ქრონიკული ჭინჭრის გამონაყარი).

2. ნოვაცეტრინის მიღებამდე
არ მიიღოთ ნოვაცეტრინი
- თუ გაქვთ თირკმლის მწვავე დაავადება (თირკმლის მწვავე უკმარისობა კრეატინინის კლირენსით 10 მლ/წთ-ზე ნაკლები).
- თუ გაქვთ დადასტურებული ალერგია (მომატებული მგრძნობელობა) ნოვაცეტრინის აქტიური ნივთიერების ან პრეპარატის შემადგენელობაში შემავალი ნებისმიერი სხვა კომპონენტის მიმართ.
- თუ გაქვთ დადასტურებული ალერგია (მომატებული მგრძნობელობა) ჰიდროქსიზინის (სხვა მედიკამენტების მჭიდროდ მონათესავე აქტიური ნივთიერებები) მიმართ.
- თუ გაქვთ დადასტურებული ალერგია (მომატებული მგრძნობელობა) პიპერაზინის ოჯახის პრეპარატებისადმი, როგორიცაა მაგალითად, ბუკლიზინი, ციკლიზინი, მეკლოზინი, ლევოცეტირიზინი.

ნოვაცეტრინის ტაბლეტები არ უნდა მიიღოთ:
- ექიმის მითითების გარეშე თუ გაქვთ ზოგიერთი შაქრის აუტანლობა, (პრეპარატი შეიცავს ლაქტოზას).
გამოიჩინეთ განსაკუთრებული სიფრთხილე ნოვაცეტრინის მიღებისას:
თუ გაქვთ თირკმლის პრობლემები, რჩევისათვის მიმართეთ ექიმს; აუცილებლობისას, შეიძლება უფრო დაბალი დოზის მიღება. ახალი დოზა განისაზღვრება ექიმის მიერ.
თუ გაქვთ ეპილეფსია ან იმყოფებით კრუნჩხვების განვითარების რისკის ქვეშ, რჩევისათვის მიმართეთ ექიმს.
ნოვაცეტრინის მიღება სხვა პრეპარატებთან ერთად:
აცნობეთ ექიმს ან ფარმაცევტს, თუ ამჟამად იღებთ ან ახლო წარსულში იღებდით ნებისმიერ სხვა პრეპარატს, მათ შორის ურეცეპტოდ გასაცემ პრეპარატებს. ცეტირიზინის მოქმედების მექანიზმიდან გამომდინარე, მოსალოდნელი არ არის ურთიერთქმედებები სხვა პრეპარატებთან.
ნოვაცეტრინის მიღება საკვებთან და სასმელთან ერთად:
საკვები მნიშვნელოვან გავლენას არ ახდენს ცეტირიზინის აბსორბციაზე. მნიშვნელოვანი ურთიერთქმედებები ალკოჰოლსა (სისხლში ალკოჰოლის დონე 0.5 ყოველ მილილიტრზე, რაც შეესაბამება ერთ ჭიქა ღვინოს) და ჩვეულებრივი დოზებით მიღებულ ცეტირიზინს შორის არ გამოვლენილა. მიუხედავად ამისა, როგორც ყველა სხვა ანტიჰისტამინის შემთხვევაში, ამ პრეპარატის მიღებისას რეკომენდებულია ალკოჰოლის მოხმარებისაგან თავის შეკავება.
ორსულობა და ლაქტაცია:
ნებისმიერი პრეპარატის მიღებამდე მიმართეთ ექიმს.
როგორც სხვა პრეპარატების შემთხვევაში, ნოვაცეტრინის მიღებას მოერიდეთ ორსულობის პერიოდში. ორსული ქალის მიერ პრეპარატის შემთხვევით მიღება არ იწვევს მავნე ეფექტებს ნაყოფზე. მიუხედავად ამისა, პრეპარატის მიღება უნდა შეწყდეს.
ნოვაცეტრინი არ მიიღოთ ძუძუთი კვების პერიოდში, ვინაიდან ცეტირიზინი გადადის დედის რძეში.
ავტომობილებისა და მექანიზმების მართვა:
კლინიკური გამოკვლევებისას არ გამოვლენილა ყურადღების, რეაქციების სისწრაფისა და მართვის უნარის დაქვეითება ნოვაცეტრინის რეკომენდებული დოზებით მიღების შემდეგ. თუ აპირებთ ავტომობილის ან რაიმე მექანიზმის მართვას, ან სხვა ისეთი სამუშაოს შესრულებას, რომელიც მოითხოვს მომატებულ ყურადღებას, რეკომენდებულ დოზას არ უნდა გადაამეტოთ და გულდასმით დააკვირდეთ პრეპარატზე თქვენს რეაქციას. თუ ხართ მგრძნობიარე, ალკოჰოლის ან სხვა ნერვული დეპრესანტების იმავდროულად მიღებამ შეიძლება დამატებით გავლენა მოახდინოს ყურადღებასა და მართვის უნარზე.
მნიშვნელოვანი ინფორმაცია ნოვაცეტრინის ზოგიერთი ინგრედიენტის შესახებ:
ნოვაცეტრინის ტაბლეტები შეიცავს ლაქტოზას; თუ ექიმმა გითხრათ, რომ გაქვთ ზოგიერთი შაქრის აუტანლობა, ამ პრეპარატის მიღებამდე მიმართეთ ექიმს.
ნოვაცეტრინის პერორალური წვეთები შეიცავს მეთილპარაჰიდროქსიბენზოატს (E218) და პროპილპარაჰიდროქსიბენზოატს (E216), რომლებმაც შეიძლება გამოიწვიოს ალერგიული რეაქციები.

3. როგორ მიიღება ნოვაცეტრინი
როგორ და როდის უნდა მიიღოთ ნოვაცეტრინი:
ისარგებლეთ წარმოდგენილი ინსტრუქციით, თუ ექიმი არ მოგცემთ განსხვავებულ მითითებებს.
დაიცავით ეს მითითებები, წინააღმდეგ შემთხვევაში, ნოვაცეტრინს არ ექნება სრული ეფექტი.
ტაბლეტები უნდა გადაიყლაპოს ჭიქა სითხის მიყოლებით.

მოზრდილები და მოზარდები 12 წლის ზემოთ:
10 მგ დღეში ერთხელ ერთი ტაბლეტის სახით.
10 მგ დღეში ერთხელ 20 პერორალური წვეთის სახით.

6-12 წლის ასაკის ბავშვები:
5 მგ დღეში ორჯერ ნახევარი ტაბლეტის სახით.
5 მგ დღეში ორჯერ 10 პერორალური წვეთის სახით.

2-6 წლის ასაკის ბავშვები:
2.5 მგ დღეში ორჯერ 5 პერორალური წვეთის სახით.

თირკმლის პრობლემების მქონე პაციენტები:
თირკმლის ზომიერი უკმარისობის მქონე პაციენტებისათვის რეკომენდებულია 5 მგ-ს მიღება დღეში ერთჯერ ნახევარი ტაბლეტის სახით ან 10 პერორალური წვეთი.
თუ გრძნობთ, რომ ნოვაცეტრინის მოქმედება ძალიან სუსტი ან ძლიერია, კონსულტაციისათვის მიმართეთ ექიმს.

თუ მიიღეთ საჭიროზე მეტი რაოდენობის ნოვაცეტრინი:
თუ ფიქრობთ, რომ მიიღეთ ნოვაცეტრინის ჭარბი დოზა, აცნობეთ ექიმს ამის შესახებ.
ამის შემდეგ ექიმი გადაწყვეტს, თუ რა ზომები მიიღოს.
ჭარბი დოზის მიღების შემდეგ ქვემოთ ჩამოთვლილი გვერდითი ეფექტები შეიძლება განვითარდეს მომატებული ინტენსივობით.
აღინიშნა ისეთი გვერდითი ეფექტები, როგორიცაა გონების არევა, დიარეა, თავბრუსხვევა, დაღლილობა, თავის ტკივილი, გუგების გაფართოება, ქავილი, მოუსვენრობა, სედაცია, ძილიანობა, სტუპორი, უჩვეულოდ სწრაფი გულისცემის სიხშირე, ტრემორი და შარდის შეკავება.
თუ დაგავიწყდათ ნოვაცეტრინის მიღება:
თუ დაგავიწყდათ ნოვაცეტრინის მიღება, მიიღეთ ის, როგორც კი გაგახსენდებათ, თუმცა შემდეგი დოზის მიღებამდე უნდა გავიდეს 24 საათი. გამოტოვებული დოზის კომპენსირებისათვის არ მიიღოთ ორმაგი დოზა.
თუ შეწყვიტეთ ნოვაცეტრინის მიღება:
თუ გაქვთ რაიმე დამატებითი შეკითხვა ამ პრეპარატთან დაკავშირებით, მიმართეთ ექიმს ან ფარმაცევტს.
მკურნალობის ხანგრძლივობა განისაზღვრება ექიმის მიერ.

4. შესაძლო გვერდითი ეფექტები
ყველა პრეპარატის მსგავსად, ნოვაცეტრინმაც შეიძლება გამოიწვიოს გვერდითი ეფექტები, თუმცა არა ყველა პაციენტში.
პრეპარატის რეალიზაციაში გაშვების შემდეგ გამოვლინდა შემდეგი გვერდითი ეფექტები. სიხშირე განისაზღვრება შემდეგნაირად: (ხშირი 100-დან 1 პაციენტში – 10-დან 1 პაციენტში, არახშირი: 1000-დან 1-ში – 100-დან ერთში, იშვიათი: 10000-დან 1-ში – 1000-დან ერთში, ძალიან იშვიათი: 10000-დან 1-ზე ნაკლებში).
- დარღვევები სისხლისა და ლიმფური სისტემის მხრივ:
ძალიან იშვიათი: თრომბოციტოპენია (სისხლში თრომბოციტების დაბალი დონეები).
- მთლიანად ორგანიზმის მხრივ:
ხშირი: დაღლილობა
- დარღვევები გულის მხრივ:
იშვიათი: ტაქიკარდია (სწრაფი გულისცემა)
- დარღვევები თვალის მხრივ:
ძალიან იშვიათი: აკომოდაციის დარღვევა, თვალის მიერ ფოკუსირების უნარის დარღვევა, დაბინდული მხედველობა, თვალების არაკონტროლირებადი წრიული მოძრაობა.
- დარღვევები კუჭ-ნაწლავის ტრაქტის მხრივ:
ხშირი: პირის სიმშრალე, გულისრევა, დიარეა; არახშირი: მუცლის ტკივილი
- ზოგადი დარღვევები და მდგომარეობები მიღების ადგილას:
არახშირი ასთენია (სისუსტის გრძნობა), შეუძლოდ ყოფნა, იშვიათად: შეშუპება (შესიება)
- დარღვევები იმუნური სისტემის მხრივ:
იშვიათი: ალერგიული რეაქციები, ზოგჯერ (ძალიან იშვიათად) მწვავე
- ჰეპატობილიარული დარღვევები:
იშვიათი: ღვიძლის ფუნქციის მოშლა
- დარღვევები საჭმლის მონელების მხრივ:
იშვიათი: წონაში მომატება
- დარღვევები ნერვული სისტემის მხრივ:
ხშირი: თავბრუსხვევა, თავის ტკივილი; არახშირი: პარესთეზია, იშვიათი: კრუნჩხვები, მოძრაობის დარღვევები; ძალიან იშვიათი: სინკოპე (გონების დაკარგვა), ტრემორი, გემოს ცვლილება;
- ფსიქიკური დარღვევები:
ხშირი: ძილიანობა; არახშირი: აგზნება; იშვიათი: აგრესია, ცნობიერების დაბინდვა, დეპრესია, ჰალუცინაციები, უძილობა (ძილის გაძნელება); ძალიან იშვიათი: ტიკები (უეცარი განმეორებითი კუნთების მოძრაობები)
- დარღვევები თირკმლისა და საშარდე სისტემის მხრივ:
ძალიან იშვიათი: შარდის გამოყოფის დარღვევა
- დარღვევები სასუნთქი სისტემის მხრივ: ხშირი: ფარინგიტი (ყელის ტკივილი), რინიტი (ცხვირში გაღიზიანება და შესიება)
- დარღვევები კანისა და კანქვეშა ქსოვილის მხრივ: არახშირი: ქავილი, გამონაყარი; იშვიათი: ჭინჭრის ციება (კანის შესიება, სიწითლე და ქავილი); ძალიან იშვიათი: შეშუპება (შესიება), გამონაყარი.
რომელიმე ზემოთ ჩამოთვლილი გვერდითი ეფექტის განვითარებისას, მიმართეთ ექიმს.
ალერგიული (ჰიპერმგრძნობელობის) რეაქციის პირველი ნიშნის გამოვლენისთანავე შეწყვიტეთ ნოვაცეტრინის მიღება და დაუყოვნებლივ დაუკავშირდით ექიმს. ალერგიული (ჰიპერმგრძნობელობის) რეაქციები მოიცავს: სუნთქვის გაძნელებას, სახის, კისრის, ენის ან ყელის შეშუპებას. ექიმი შეაფასებს სიმპტომების სიმწვავეს და მიიღებს გადაწყვეტილებას შემდგომი ზომების შესახებ, აუცილებლობის მიხედვით.
ისეთი გვერდითი ეფექტის განვითარებისას, რომელიც მითითებული არ არის წინამდებარე ფურცელში, მიმართეთ თქვენს ექიმს ან ფარმაცევტს.

5. როგორ ინახება ნოვაცეტრინი
შეინახეთ ბავშვებისათვის მიუწვდომელ ადგილას.
არ გამოიყენოთ ნოვაცეტრინი კოლოფზე მითითებული ვარგისიანობის ვადის გასვლის შემდეგ.
ეს პრეპარატი არ საჭიროებს რაიმე განსაკუთრებულ შენახვის პირობებს.

6. დამატებითი ინფორმაცია

რას შეიცავს ნოვაცეტრინის ტაბლეტები
- ნოვაცეტრინის ტაბლეტების აქტიური სუბსტანცია არის ცეტირიზინის დიჰიდროქლორიდი. ერთი შემოგარსული ტაბლეტი შეიცავს 10 მგ ცეტირიზინის დიჰიდროქლორიდს.
- სხვა ინგრედიენტებია: ლაქტოზას მონოჰიდრატი, მიკროკრისტალური ცელულოზა, კოლოიდური უწყლო სილიკა, მაგნიუმის სტეარატი.
- სტანდარტული შეფუთვა: ოპადრაი II თეთრი (შემადგენლობა: ჰიპრომელოზა, ტიტანის დიოქსიდი (E171), პოლიდექსტროზა (E1200), ტალკი, მალტოდექსტრინი, საშუალო ჯაჭვის ტრიგლიცერიდები.

რას შეიცავს ნოვაცეტრინის წვეთები
- ნოვაცეტრინის პერორალური წვეთების აქტიური სუბსტანცია არის ცეტირიზინის დიჰიდროქლორიდი, 1 მლ (20 პერორალური წვეთი) შეიცავს 10 მგ ცეტირიზინის დიჰიდროქლორიდს. ერთი ერთჯერადი წვეთი შეიცავს 0.5 მგ ცეტირიზინის დიჰიდროქლორიდს.
- სხვა ინგრედიენტებია: გლიცეროლი, პროპილენ გლიკოლი, საქარინ ნატრიუმი, მეტალ პარაჰიდროქსიბენზოატი, პროპილპარაჰიდროქსიბენზოატი, აცეტილის მჟავა გლაციალი, ნატრიუმის აცეტატ ტრიჰიდრატი, გასუფთავებული წყალი.

ნოვაცეტრინის აღწერა და შეფუთვის შემცველობა:
ნოვაცეტრინის ტაბლეტები: შემოგარსული ტაბლეტები, პვქ/ალუმინის ბლისტერი, კოლოფში 20 ტაბლეტით.
ნოვაცეტრინის პერორალური წვეთები: ქარვისფერი შუშის ბოთლში, 20 მლ, პიპეტით.
სავაჭრო სახელწოდება
ნოვაცეტრინი არის “NOVATOR PHARMA LLP”-ს სავაჭრო ნიშანი, დიდი ბრიტანეთი.

მწარმოებელი:
ნოვაცეტრინის ტაბლეტები:
Doppel Farmaceutici S.r.l. – Via Volturno, 48 – 20089 Quinto de Stampi – Rozzano (MI) - italia
ნოვაცეტრინის პერორალური წვეთები:
Doppel Farmaceutici S.r.l. – Via Martiri delle foibe, 1-29016 Cortemaggiore (PC) - italia