ნებილეტი - Nebilet 5მგ 90 ტაბლეტი

5მგ ტაბლეტები

ნებივოლოლი

მოცემული სამკურნალო საშუალების გამოყენების დაწყებამდე ყურადღებით წაიკითხეთ სრული ჩანართი, რადგან ის შეიცავს თქვენთვის მნიშვნელოვან ინფორმაციას.

- შეინახეთ მოცემული ჩანართი. შეიძლება, კვლავ დაგჭირდეთ მისი გადაკითხვა.

- თუ დამატებითი კითხვები გაგიჩნდათ, მიმართეთ თქვენს ექიმს ან ფარმაცევტს.

- მოცემული სამკურნალო საშუალება გამოწერილია მხოლოდ თქვენთვის. არ გადასცეთ ის სხვა პირებს. ეს შესაძლოა, საზიანო აღმოჩნდეს მათთვის იმ შემთხვევაშიც კი, თუ მათი დაავადების ნიშნები თქვენსას ემთხვევა.

რომელიმე გვერდითი მოქმედების გამოვლენის შემთხვევაში მიმართეთ მკურნალ ექიმს ან ფარმაცევტს. ეს ეხება ნებისმიერ შესაძლო გვერდით მოქმედებას, მათ შორის ისეთებს, რომლებიც არ არის აღნიშნული მოცემულ ჩანართში. იხ. პარაგრაფი 4 .

წინამდებარე ჩანართის შინაარსი

1. რას წარმოადგენს პრეპარატი ნებილეტი და რისთვის გამოიყენება

2. რა უნდა იცოდეთ პრეპარატ ნებილეტის მიღებამდე

3. როგორ უნდა მიიღოთ პრეპარატი ნებილეტი

4. შესაძლო გვერდითი მოქმედება

5. პრეპარატ ნებილეტის შენახვის პირობები

6. შეფუთვის შიგთავსი და დამატებითი ინფორმაცია

1.რას წარმოადგენს პრეპარატი ნებილეტი და რისთვის გამოიყენება

პრეპარატი ნებილეტი შეიცავს ნებივოლოლს – გულ-სისხლძარღვთა დაავადებების სამკურნალო საშუალებას, რომელიც მიეკუთვნება სელექციურ ბეტა-ადრენობლოკერების ჯგუფს (ე.ი. არჩევითად მოქმედებს გულ-სისხლძარღვთა სისტემაზე). ის ხელს უშლის გულის რიტმის მომატებას და აკონტროლებს გულის, როგორც ტუმბოს, ფუნქციას. პრეპარატის ზემოქმედებით ასევე ხდება სისხლძარღვების გაფართოება, რაც ხელს უწყობს არტერიული წნევის დაქვეითებას.

მოცემული პრეპარატი გამოიყენება მომატებული არტერიული წნევის (არტერიული ჰიპერტენზიის) სამკურნალოდ.

პრეპარატი ნებილეტი ასევე გამოიყენება, როგორც დამატება მსუბუქი და საშუალო სიმძიმის გულის ქრონიკული უკმარისობის სხვა მეთოდებით მკურნალობაზე 70 წლის და უფროსი ასაკის პაციენტებში.

პრეპარატ ნებილეტის გამოყენება ასევე შეიძლება გულის სტაბილური კორონარული დაავადების სამკურნალოდ, რომელსაც თან ახლავს კლინიკური სიმპტომები – მდგომარეობა, რომელსაც ახასიათებს გულ-მკერდის არეში ტკივილის ან დისკომფორტის ეპიზოდები და რომლებიც ხშირად გამოწვეულია ფიზიკური ვარჯიშით, ემოციებით ან სხვა სტრესული მდგომარეობებით; აღნიშნული სიმპტომები ვლინდება გულში სისხლის მიწოდების შემცირების ან სრულად შეწყვეტის შემთხვევაში.

ასევე, იხილეთ: >Nebilet - ნებილეტი 5მგ 28 ტაბლეტი

2.რა უნდა იცოდეთ პრეპარატ ნებილეტის მიღებამდე

არ მიიღოთ პრეპარატი ნებილეტი

• თუ გაქვთ ალერგია ნებივოლოლის ან ამ პრეპარატის ნებისმიერი სხვა კომპონენტის მიმართ (ჩამოთვლილია პარაგრაფში 6)
• თუ გაქვთ ჩამოთვლილი დარღვევებიდან ერთ-ერთი ან რამდენიმე:

- დაქვეითებული არტერიული წნევა

- კიდურებში სისხლის მიმოქცევის გამოხატული დარღვევა

- ძალიან იშვიათი პულსი (წუთში 60-ზე ნაკლები);

- გულის რიტმის ზოგიერთი სხვა სერიოზული დარღვევა (მაგალითად, II და III ხარისხის ატრიოვენტრიკულური ბლოკადა, გულის გამტარობის დარღვევები)

- გულის ახლად გამოვლენილი ან დამძიმებული უკმარისობა, გულის მწვავე უკმარისობის ფონზე სისხლძარღვთა უკმარისობის მკურნალობა ინტრავენური პრეპარატებით, რომლებიც აუმჯობესებს გულის მუშაობას

- ასთმა ან მსტვინავი სუნთქვა (ამჟამად ან წარსულში)

- არანამკურნალები ფეოქრომოციტომა - სიმსივნე თირკმელების ზედა ნაწილზე (თირკმელზედა ჯირკვლის სიმსივნე)

- ღვიძლის ფუნქციის დარღვევა

- ნივთიერებათა ცვლის დარღვევა (მეტაბოლური აციდოზი), მაგალითად, დიაბეტური კეტოაციდოზი.

მეტი ინფორმაციისთვის იხილეთ ბლოგი: >ნებილეტი და გულ-სისხლძარღვთა დაავადებები — გამოყენება, ეფექტიანობა და უსაფრთხოება

გაფრთხილება და სიფრთხილის ზომები

პრეპარატ ნებილეტის მიღების წინ კონსულტაციისთვის მიმართეთ მკურნალ ექიმს ან ფარმაცევტს:

აცნობეთ მკურნალ ექიმს, თუ გაქვთ ან განვითარდა ქვემოთ ჩამოთვლილი დარღვევებიდან ერთ-ერთი:

- გულის შეკუმშვათა სიხშირის გამოხატული შემცირება;

- ტკივილი გულ-მკერდის არეში, გამოწვეული კორონარული არტერიების მოულოდნელად განვითარებული სპაზმით (პრინცმეტალის სტენოკარდია);

- გულის არანამკურნალები ქრონიკული უკმარისობა;

- გულის I ხარისხის ბლოკადა (გულის გამტარობის უმნიშვნელო დარღვევა, რომელიც გავლენას ახდენს გულის რიტმზე);

- სისხლის მიმოქცევის დარღვევა კიდურებში, მაგალითად, რეინოს დაავადება ან სინდრომი, კრუნჩხვის დროს ტკივილისმაგვარი ტკივილი სიარულისას;

- სუნთქვის ხანგრძლივი გაძნელება;

- შაქრიანი დიაბეტი: პრეპარატი არ მოქმედებს სისხლში შაქრის შემცველობაზე, თუმცა შეუძლია სისხლში შაქრის შემცველობის შემცირების (მაგალითად, გულისცემის შეგრძნება, გახშირებული გულისცემა) ნიშნების შენიღბვა;

- ფარისებრი ჯირკვლის გაძლიერებული ფუნქცია: პრეპარატს შეუძლია ამ მდგომარეობით გამოწვეული ზედმეტად გაძლიერებული გულისცემის ნიშნების შენიღბვა;

- ალერგია: პრეპარატს შეუძლია მტვერზე ან სხვა ნივთიერებებზე თქვენი რეაქციის გაძლიერება, რომლებზეც გაქვთ ალერგია;

- ფსორიაზი (კანის დაავადება, რომელიც ვლინდება აქერცლილი ვარდისფერი უბნების წარმოქმნით), ან თუ წარსულში გქონდათ ფსორიაზი;

- ქირურგიული ოპერაციის ჩატარების წინ ანესთეზიამდე ყოველთვის აცნობეთ ანესთეზიოლოგს, რომ იღებთ პრეპარატ ნებილეტს.

თუ გაქვთ თირკმელების მხრივ მძიმე დარღვევები, უარი თქვით გულის უკმარისობის სამკურნალოდ პრეპარატ ნებილეტის მიღებაზე და მიმართეთ მკურნალ ექიმს.

გულის ქრონიკული უკმარისობის მკურნალობის დასაწყისში აუცილებელია გამოცდილ ექიმთან რეგულარული ვიზიტები მდგომარეობის კონტროლისათვის (იხ. პარაგრაფი 3).

ამ პრეპარატით მკურნალობის უეცარი შეწყვეტა არ შეიძლება თქვენი ექიმის ზუსტი მითითებებისა და შეფასების გარეშე (იხ. პარაგრაფი 3).

ბავშვები და მოზარდები

ბავშვებსა და მოზარდებში პროდუქტის გამოყენების შესახებ მონაცემების არარსებობის გამო ამ ასაკობრივ ჯგუფში ნებილეტის გამოყენება რეკომენდებული არ არის.

სხვა სამკურნალო საშუალებები და პრეპარატი ნებილეტი

თუ იღებთ, ახლო წარსულში იღებდით ან გეგმავთ რომელიმე სხვა სამკურნალო საშუალების მიღებას, აცნობეთ ამის შესახებ მკურნალ ექიმს ან ფარმაცევტს.

აუცილებლად აცნობეთ თქვენს ექიმს, თუ პრეპარატ ნებილეტთან ერთად დამატებით იღებთ ან გიკეთდებად ქვემოთ ჩამოთვლილი სამკურნალო საშუალებები:

- არტერიული წნევის საკონტროლო ან გულის დაავადებების სამკურნალო პრეპარატები (როგორიცაა ამიოდარონი, ამლოდიპინი, ციბენზოლინი, კლონიდინი, დიგოქსინი, დილთიაზემი, დიზოპირამიდი, დოფეტილიდი, ფელოდიპინი, ფლეკანიდი, გუანფაცინი, ჰიდროქინიდინი, იბუტილიდი, ლაციდიპინი, ლიდოკაინი, მექსილეტინი, მეთილდოპა, მოქსონიდინი, ნიკარდიპინი, ნიფედიპინი, ნიმოდიპინი, ნიტრენდიპინი, პროპაფენონი, ქინიდინი, რილმენიდინი, სოტალოლი, ვერაპამილი).

- სედაციური საშუალებები და ფსიქოზების (ფსიქიკური დარღვევების) სამკურნალო პრეპარატები, მაგალითად, ბარბიტურატები (რომლებიც ასევე გამოიყენება ეპილეფსიის სამკურნალოდ), ფენოთიაზინი (რომელიც ასევე გამოიყენება გულისრევისა და ღებინების მოსახსნელად) და თიორიდაზინი.

- დეპრესიის სამკურნალო პრეპარატები, მაგალითად, ამიტრიპტილინი, პაროქსეტინი, ფლუოქსიტინი.

- საანესთეზიო საშუალებები, რომლებიც გამოიყენება ქირურგიული ოპერაციების დროს.

- ასთმის, ცხვირის გაჭედვის მოსახსნელი საშუალებები ან თვალის გარკვეული დაავადებების, როგორიცაა გლაუკომა (მომატებული თვალშიდა წნევა) სამკურნალო ან გუგის გამაფართოვებელი (გამადიდებელი) პრეპარატები.

- ბაკლოფენი (ანტისპასტიური მიორელაქსანტი), ამიფოსტინი (დამცველობითი მოქმედების მქონე საშუალება, რომელიც გამოიყენება კიბოს მკურნალობის დროს).

ნებივოლოლთან ერთად გამოყენებისას ყველა ამ პრეპარატს შეუძლია გავლენა მოახდინოს არტერიულ წნევაზე ან/და გულის მუშაობაზე.

- კუჭის მომატებული მჟავიანობის ან წყლულის სამკურნალო პრეპარატები (ანტაციდური პრეპარატები): პრეპარატ ნებილეტის მიღება უნდა მოხდეს საკვების მიღების დროს, ხოლო ანტაციდური პრეპარატის – საკვების მიღებათა შორის.

პრეპარატ ნებილეტის მიღება საკვებთან და სასმელებთან ერთად

იხილეთ პარაგრაფი 3.

ორსულობა და ძუძუთი კვება

ორსულობის დროს პრეპარატ ნებილეტისმიღება არ შეიძლება, გარდა აუცილებელი საჭიროებისა.

პრეპარატის მიღება ძუძუთი კვების პერიოდში არ შეიძლება.

თუ ხართ ორსულად ან ბავშვს ძუძუთი კვებავთ, ფიქრობთ, რომ ხართ ორსულად, ან გეგმავთ ორსულობას, მოცემული პრეპარატის მიღების წინ კონსულტაციისთვის მიმართეთ მკურნალ ექიმს ან ფარმაცევტს.

სატრანსპორტო საშუალებების მართვა და მექანიზმებთან მუშაობა

მოცემულ პრეპარატს შეუძლია გამოიწვიოს თავბრუსხვევა ან სისუსტე. ამ შემთხვევაში თავი შეიკავეთ სატრანსპორტო საშუალებების მართვისგან ან მექანიზმებთან მუშაობისგან.

პრეპარატი ნებილეტი შეიცავს ლაქტოზას

მოცემული პრეპარატი შეიცავს ლაქტოზას. შაქრის რომელიმე სახეობის მიმართ აუტანლობის არსებობის შემთხვევაში მოცემული პრეპარატის გამოყენებამდე კონსულტაციისთვის მიმართეთ მკურნალ ექიმს.

ამ სამკურნალო საშუალების ერთი ტაბლეტი შეიცავს 1 მმოლზე (23 მგ) ნაკლებ ნატრიუმს, ე.ი. შეიძლება ჩავთვალოთ, რომ პრაქტიკულად „არ შეიცავს ნატრიუმს“.

3.როგორ უნდა მიიღოთ პრეპარატი ნებილეტი

მოცემული პრეპარატი ყოველთვის მიიღება მკურნალი ექიმის რეკომენდაციების ზუსტად დაცვით. რაიმე საკითხზე ეჭვის არსებობის შემთხვევაში კონსულტაციისთვის მიმართეთ მკურნალ ექიმს ან ფარმაცევტს.

ნებილეტის მიღება შეიძლება ჭამამდე, ჭამის დროს ან ჭამის შემდეგ, მისი მიღება ასევე შესაძლებელია საკვების მიღებისგან დამოუკიდებლად. ტაბლეტების მიღება უკეთესია წყლის მიყოლებით.

მომატებული არტერიული წნევის (არტერიული ჰიპერტენზიის) მკურნალობა

- ჩვეულებრივი დოზა შეადგენს 1 ტაბლეტს დღე-ღამეში. ტაბლეტის მიღება სასურველია დღე-ღამის ერთსა და იმავე დროს.

- ხანდაზმული პაციენტებისათვის და პაციენტებისათვის თირკმელების დაავადებებით საწყისი დოზა, ჩვეულებრივ, შეადგენს ½ (ნახევარ) ტაბლეტს დღე-ღამეში.

- არტერიული წნევის დაქვეითების ეფექტი ვლინდება მკურნალობის დაწყებიდან 1-2 კვირაში. ზოგჯერ ოპტიმალური ეფექტი მიიღწევა მხოლოდ 4 კვირაში.

გულის ქრონიკული უკმარისობის მკურნალობა

- მკურნალობის დაწყება საჭიროა გამოცდილი ექიმის მეთვალყურეობით.

- მკურნალმა ექიმმა უნდა დაიწყოს მკურნალობა დღე-ღამეში ¼ (მეოთხედი) ტაბლეტის დანიშვნით. 1-2 კვირის შემდეგ დოზა შესაძლოა გაიზარდოს დღე-ღამეში ½ (ნახევარ) ტაბლეტამდე, შემდეგ დღე-ღამეში ერთ და შემდეგ დღე-ღამეში ორ ტაბლეტამდე, სანამ არ იქნება მიღწეული სათანადო დოზა. მკურნალმა ექიმმა უნდა დაგინიშნოთ დოზა, რომელიც ყველაზე მეტად შეესაბამება მკურნალობის თითოეულ კონკრეტულ ეტაპს. მკაცრად უნდა იყოს დაცული ექიმის მითითებები.

- მაქსიმალური რეკომენდებული დოზა შეადგენს 2 ტაბლეტს (10 მგ) დღე-ღამეში.

- პრეპარატის პირველი მიღების შემდეგ მკურნალობის დასაწყისში და პრეპარატის მიღებისას დოზის ყოველი გაზრდის შემდეგ თქვენ უნდა იმყოფებოდეთ ექიმის მეთვალყურეობის ქვეშ 2 საათის განმავლობაში.

- საჭიროების შემთხვევაში, ექიმს შეუძლია დოზის შემცირება.

- მკურნალობის უეცარი შეწყვეტა არ შეიძლება, ვინაიდან ამან შესაძლოა გამოიწვიოს გულის უკმარისობის გაღრმავება.

- თირკმელების მხრივ სერიოზული დარღვევების მქონე პაციენტებისთვის ამ პრეპარატის მიღება არ შეიძლება.

- პრეპარატი მიიღება დღე-ღამეში ერთხელ, სასურველია დღის ერთსა და იმავე დროს.

სიმპტომების თანხლებით მიმდინარე გულის სტაბილური კორონარული დაავადების მკურნალობა

- მკურნალობის დაწყება და მისი შემდგომი მონიტორინგი უნდა განხორციელდეს გამოცდილი ექიმის მეთვალყურეობით.

- მკურნალმა ექიმმა უნდა დაიწყოს მკურნალობა 1.25 მგ-ით (1/4 ტაბლეტი) დღე-ღამეში. 1-2 კვირის შემდეგ დოზა შესაძლოა გაიზარდოს 2.5 მგ-მდე (1/2 ტაბლეტი) დღე-ღამეში, შემდეგ დღე-ღამეში 5 მგ-მდე (1 ტაბლეტი), ხოლო შემდეგ 10 მგ-მდე (2 ტაბლეტი) დღე-ღამეში, სანამ არ იქნება მიღწეული თქვენთვის შესაფერისი დოზა.

- მაქსიმალური რეკომენდებული დოზა შეადგენს 10 მგ-ს (2 ტაბლეტი დღე-ღამეში).

- არ შეწყვიტოთ უეცრად პრეპარატ ნებილეტის ტაბლეტების მიღება, ვინაიდან ამან შესაძლოა გაზარდოს გულის შეტევის რისკი. დოზის შეცვლა ან მკურნალობის შეწყვეტა უნდა განხორციელდეს მხოლოდ ექიმთან კონსულტაციის შემდეგ.

- თირკმელების მხრივ სერიოზული დარღვევების მქონე პაციენტებმა ეს პრეპარატი არ უნდა მიიღონ.

- ღვიძლის მხრივ სერიოზული დარღვევების მქონე პაციენტებმა ეს პრეპარატი არ უნდა მიიღონ.

თუ ექიმმა დაგინიშნათ დღე-ღამეში ¼ (მეოთხედი) ან ½ (ნახევარი) ტაბლეტი, დაიცავით ქვემოთ მოყვანილი ინსტრუქცია პრეპარატ ნებილეტი 5 მგ, ჯვრის ფორმის გამყოფი ნაჭდევის მქონე ტაბლეტის გაყოფის შესახებ.

• დადეთ ტაბლეტი სწორ მაგარ ზედაპირზე (მაგალითად, მაგიდაზე) ჯვრის ფორმის გამყოფი ნაჭდევით ზევით.
• დააწექით ტაბლეტს გამყოფი ნაჭდევის გასწვრივ ორივე საჩვენებელი თითით (ნახატები 1 და 2).
• ტაბლეტის მეოთხედის მისაღებად იგივე გაიმეორეთ მის ნახევარზე (ნახატები 3 და 4).

ნახატი 1 და 2. პრეპარატ ნებილეტის ჯვრის ფორმის გამყოფი ნაჭდევის მქონე ტაბლეტის მარტივად გაყოფა ორ ნაწილად.

ნახატი 3 და 4. პრეპარატ ნებილეტი 5 მგ-ის, ჯვრის ფორმის გამყოფი ნაჭდევის მქონე ნახევარი ტაბლეტის მარტივად გაყოფა მეოთხედებად.

- მკურნალმა ექიმმა შეიძლება მიიღოს გადაწყვეტილება პრეპარატ ნებილეტის და სხვა სამკურნალო საშუალებების კომბინირების შესახებ თქვენი დაავადების სამკურნალოდ.

- ბავშვებსა და მოზარდებში პრეპარატი არ გამოიყენოთ.

თუ მიიღეთ პრეპარატ ნებილეტის საჭიროზე მეტი დოზა

თუ შემთხვევით მიიღეთ ამ პრეპარატის საჭიროზე მეტი დოზა, დაუყოვნებლივ მიმართეთ მკურნალ ექიმს ან ფარმაცევტს. პრეპარატ ნებილეტის დოზის გადაჭარბებისას ყველაზე ხშირ სიმპტომებს და ნიშნებს წარმოადგენს გულისცემის გამოხატული შენელება (ბრადიკარდია), დაბალი არტერიული წნევა შესაძლო გონების დაკარგვით (ჰიპოტენზია), ჰაერის უკმარისობის შეგრძნება, როგორც ბრონქული ასთმის დროს (ბრონქოსპაზმი), და გულის მწვავე უკმარისობა.

ექიმის მოსვლამდე შეიძლება აქტივირებული ნახშირის (რომელიც იყიდება აფთიაქებში) მიღება.

თუ დაგავიწყდათ პრეპარატ ნებილეტის მიღება

თუ დაგავიწყდათ ნებილეტის დოზის დროულად მიღება და გაგახსენდათ ცოტათი მოგვიანებით, მიიღეთ პრეპარატი ჩვეულებრივი დოზით. თუმცა, თუ გაგახსენდათ საკმაოდ გვიან (მაგალითად, დანიშნული დროიდან რამდენიმე საათის შემდეგ), როდესაც მოახლოებულია შემდეგი მიღების დრო, უნდა გამოტოვოთ დავიწყებული დოზა და მიიღოთ პრეპარატის ნორმალური დოზა ჩვეულებრივ დროს. არ მიიღოთ პრეპარატის ორმაგი დოზა. შემდეგში მოერიდეთ მიღების დროის ხელახალ გამოტოვებას.

თუ შეწყვიტეთ პრეპარატ ნებილეტის მიღება

პრეპარატ ნებილეტით მკურნალობის შეწყვეტის წინ აუცილებლად გაიარეთ კონსულტაცია მკურნალ ექიმთან, მიუხედავად იმისა, თუ რა მიზნით იღებთ მას: მომატებული არტერიული წნევის თუ გულის ქრონიკული უკმარისობის სამკურნალოდ.

პრეპარატ ნებილეტით მკურნალობის უეცარი შეწყვეტა არ შეიძლება, ვინაიდან ამან შეიძლება დროებით გამოიწვიოს გულის უკმარისობის გაღრმავება. თუ აუცილებელია პრეპარატ ნებილეტით მკურნალობის შეწყვეტა, რომელსაც გულის ქრონიკული უკმარისობის სამკურნალოდ იღებდით, მაშინ სადღეღამისო დოზა თანდათანობით უნდა შეამციროთ, ერთკვირიანი ინტერვალით დოზის განახევრებით.

ამ პრეპარატის გამოყენების შესახებ დამატებითი კითხვების არსებობის შემთხვევაში მიმართეთ მკურნალ ექიმს ან ფარმაცევტს.

4.შესაძლო გვერდითი მოქმედება

როგორც ყველა სამკურნალო საშუალებას, მოცემულმა პრეპარატმაც შეიძლება გამოიწვიოს გვერდითი მოქმედება, თუმცა ის არ ვლინდება ყველა პაციენტში.

მომატებული არტერიული წნევის სამკურნალოდ პრეპარატ ნებილეტის გამოყენებისას შესაძლოა შემდეგი გვერდითი მოქმედება:

გვერდითი მოქმედება,რომელიც ვლინდება ხშირად(შეიძლება აღენიშნოს 10 ადამიანიდან 1-ს ):

- თავის ტკივილი

- თავბრუსხვევა

- დაღლილობის შეგრძნება

- ქავილის და ჩხვლეტის უჩვეულო შეგრძნება

- დიარეა

- ყაბზობა

- გულისრევა

- ქოშინი

- ხელის მტევნების ან ტერფების შეშუპება.

გვერდითი მოქმედება,რომელიც ვლინდება ზოგჯერ (შეიძლება აღენიშნოს 100 პაციენტიდან 1-ს ):

- გულისცემის შენელება ან სხვა დარღვევები გულის მხრივ

- დაქვეითებული არტერიული წნევა

- კრუნჩხვისმაგვარი ტკივილი ფეხებში სიარულის დროს

- მხედველობის დარღვევა

- იმპოტენცია

- დათრგუნვის შეგრძნება

- საჭმლის მონელების დარღვევები (დისპეფსია), კუჭში ან ნაწლავებში აირების წარმოქმნა, გულისრევა

- გამონაყარი კანზე, ქავილი

- ჰაერის უკმარისობის შეგრძნება (როგორც ასთმის დროს) სასუნთქი გზების კუნთების მოულოდნელი სპაზმის შედეგად (ბრონქოსპაზმი)

- კოშმარული სიზმრები.

გვერდითი მოქმედება, რომელიც ვლინდება ძალიან იშვიათად (შეიძლება აღენიშნოს 10 000პაციენტიდან1-ს ):

- გონების დაკარგვა

- ფსორიაზის გამწვავება (კანის დაავადება, რომელიც ვლინდება აქერცლილი ვარდისფერი ლაქებით).

პრეპარატ ნებილეტის მიღებისას ცალკეულ პაციენტებში, ერთეულ შემთხვევაში გამოვლინდა შემდეგი გვერდითი მოქმედება:

- სისტემური ალერგიული რეაქციები, კანის გენერალიზებული გამონაყარით (მომატებული მგრძნობელობის რეაქციები);

- სწრაფად განვითარებადი შეშუპება, განსაკუთრებით ტუჩების, თვალების ან ენის გარშემო, სუნთქვის შესაძლო მწვავე გაძნელებით (ანგიონევროზული შეშუპება);

- კანზე გამონაყარი, რომელსაც ახასიათებს კანის ზედაპირზე ალერგიული ან არაალერგიული ხასიათის მკრთალი-წითელი ბუშტუკები ქავილით (ჭინჭრის ციება).

გულის ქრონიკული უკმარისობის სამკურნალოდ პრეპარატის გამოყენების კლინიკური კვლევისას აღინიშნა შემდეგი გვერდითი მოქმედება:

გვერდითი მოქმედება, რომელიც ვლინდება ხშირად (შეიძლება აღენიშნოს 10 ადამიანიდან 1-ზემეტს ):

- ნელი გულისცემა;

- თავბრუსხვევა

გვერდითი მოქმედება, რომელიც ვლინდება ხშირად(შეიძლება აღენიშნოს 10 ადამიანიდან1-ს ):

- გულის უკმარისობის გაღრმავება;

- დაქვეითებული არტერიული წნევა (მაგალითად, სისუსტე სწრაფად წამოდგომისას);

- ამ სამკურნალო საშუალების აუტანლობა;

- გულის გამტარობის უმნიშვნელო დარღვევა, რომელიც მოქმედებს გულის რიტმზე (I ხარისხის ატრიოვენტრიკულური ბლოკადა);

- ქვედა კიდურების შეშუპება (მაგალითად, ფეხის კოჭების შეშუპება).

მონაცემები გულის სტაბილური იშემიური დაავადების მქონე პაციენტებში გვერდითი მოქმედებების შესახებ მიღებულია კლინიკური კვლევის ანალიზით, რომელიც აღწერილია გულის ქრონიკულ უკმარისობასთან დაკავშირებით. შეიძლება ვივარაუდოთ, რომ ზემოაღნიშნულ გვერდით მოქმედებას შეიძლება, ასევე, ადგილი ჰქონდეს გულის იშემიური დაავადების მქონე პაციენტებში.

შეტყობინება გვერდითი მოქმედების შესახებ

რომელიმე გვერდითი მოქმედების გამოვლენის შემთხვევაში მიმართეთ თქვენს ექიმს, ფარმაცევტს ან მედდას. ეს ეხება ნებისმიერ შესაძლო გვერდით მოქმედებას, მათ შორის ისეთებს, რომლებიც არ არის აღწერილი მოცემულ ჩანართში. გვერდითი მოქმედების შესახებ ინფორმაციის გაგზავნით შეგიძლიათ დახმარება მოცემული სამკურნალო საშუალების უსაფრთხოების შესახებ მეტი ინფორმაციის მიღებაში.

5.პრეპარატ ნებილეტის შენახვის პირობები

მოცემული სამკურნალო საშუალება ინახება ბავშვებისათვის მიუწვდომელ ადგილას.

მოცემული პრეპარატი არ საჭიროებს შენახვის განსაკუთრებულ პირობებს.

მოცემული პრეპარატი არ გამოიყენება ვარგისობის ვადის გასვლის შემდეგ, რომელიც მითითებულია მუყაოს კოლოფის ეტიკეტსა და ბლისტერზე წარწერა „ვარგისია“-ს შემდეგ. ვარგისობის ვადის გასვლის თარიღი გულისხმობს მითითებული თვის ბოლო დღეს.

ვარგისობის ვადა: 3 წელი.

სამკურნალო საშუალებების კანალიზაციის მილში ან საყოფაცხოვრებო ნაგავთან ერთად გადაგდება არ შეიძლება. გამოუყენებელი პრეპარატის უტილიზაციის საკითხთან დაკავშირებით მიმართეთ ფარმაცევტს. ეს ზომები ხელს უწყობს გარემოს დაცვას.

6.შეფუთვის შიგთავსი და დამატებითი ინფორმაცია

პრეპარატ ნებილეტის შემადგენლობა

- პრეპარატის მოქმედი ნივთიერება არის ნებივოლოლი. ერთი ტაბლეტი შეიცავს 5 მგ ნებივოლოლს (ნებივოლოლის ჰიდროქლორიდის სახით): 2.5 მგ d-ნებივოლოლი და 2.5 მგ l-ნებივოლოლი.

- სხვა კომპონენტები: ლაქტოზის მონოჰიდრატი, პოლისორბატი 80 (E433), ჰიპრომელოზა (E464), სიმინდის სახამებელი, კროსკარმელოზას ნატრიუმის მარილი (E468), მიკროკრისტალური ცელულოზა (E460), კოლოიდური უწყლო სილიციუმის დიოქსიდი (E551), მაგნიუმის სტეარატი (E 572).

პრეპარატ ნებილეტის აღწერა და შეფუთვის შიგთავსი

პრეპარატი ნებილეტი გამოდის თითქმის თეთრი ფერის, მრგვალი, ორმხრივამოზნექილი ტაბლეტების სახით ჯვარისმაგვარი გასაყოფი ნაჭდევით ერთ მხარეს, შეფუთვაში 90, 14, 28 ტაბლეტით. ტაბლეტები გამოდის ბლისტერულ შეფუთვაში („პვქ/ალუმინის“ ბლისტერები).

ტაბლეტის გაყოფა შეიძლება ოთხ თანაბარ ნაწილად.

(შესაძლოა, გაყიდვაში ყველა ზომის შეფუთვა არ იყოს წარმოდგენილი).

გაცემის წესი:

ფარმაცევტული პროდუქტის ჯგუფი II, გაიცემა ფორმა №3 რეცეპტით.