მინოვივაქსი - Minovivax 5% 100მლ სპრეი

მინოვივაქსი 5%, 50 მგ/მლ, კანზე გამოსაყენებელი ხსნარი

Minoxidilum

ამ პრეპარატის გამოყენების დაწყებამდე ყურადღებით წაიკითხეთ ეს ინსტრუქცია მთლიანად, რადგან იგი თქვენთვის მნიშვნელოვან ინფორმაციას შეიცავს.

−   შეინახეთ ეს ინსტრუქცია. შეიძლება დაგჭირდეთ მისი ხელახლა წაკითხვა.

−   დამატებითი კითხვების შემთხვევაში, მიმართეთ ექიმს ან ფარმაცევტს.

−   ეს პრეპარატი დაგენიშნათ მხოლოდ თქვენ. არ გადასცეთ ის სხვებს. მან შეიძლება ზიანი მიაყენოს მათ, მაშინაც კი, თუ მათი დაავადების ნიშნები იგივეა რაც თქვენი.

−   ნებისმიერი გვერდითი ეფექტის განვითარების შემთვევაში, მიმართეთ ექიმს ან ფარმაცევტს. ეს მოიცავს ყველა შესაძლო გვერდით ეფექტს, რომელიც არ არის ჩამოთვლილი ამ ინსტრუქციაში. იხილეთ პუნქტი 4.

ინსტრუქციის შინაარსი

1.     რას წარმოადგენს მინოვივაქსი 5% და რისთვის გამოიყენება

2.     რა უნდა იცოდეთ მინოვივაქსი 5%-ის გამოყენებამდე

3.     როგორ გამოიყენება მინოვივაქსი 5%

4.     შესაძლო გვერდითი ეფექტები

5.     როგორ ინახება მინოვივაქსი 5%

6.     შეფუთვის შემადგენლობა და სხვა ინფორმაცია

 

1. რას წარმოადგენს მინოვივაქსი 5% და რისთვის გამოიყენება

მინოვივაქსი 5%-ის აქტიური ნივთიერება არის მინოქსიდილი.

მინოქსიდილი აფართოებს პერიფერიულ სისხლძარღვებს, მაგრამ არ არის ცნობილი ზუსტი მექანიზმი, რომლითაც მინოქსიდილი ასტიმულირებს თმის ზრდას.

მინოვივაქსი 5% ნაჩვენებია ანდროგენული ალოპეციის (თმის ცვენა) სამკურნალოდ მამაკაცებში და ქალებში.

მინოვივაქსი 5% არის კანზე გამოსაყენებელი ხსნარი, რომელიც განკუთვნილია გარეგანი გამოყენებისათვის და მისი დატანა უნდა მოხდეს მხოლოდ თავის კანზე.

თმის შესამჩნევი ზრდის მისაღწევად შეიძლება აუცილებელი გახდეს მინოვივაქსი 5%-ის მინიმუმ 4 თვის განმავლობაში ან უფრო  ხანგრძლივად გამოყენება.

მკურნალობის შედეგები ძირითადად დამოკიდებულია სისტემატურ გამოყენებაზე და პაციენტის ინდივიდუალურ მახასიათებლებზე.

პრეპარატის მაქსიმალური ეფექტი მიიღწევა დაახლოებით 12 თვის განმავლობაში რეგულარული გამოყენების შემდეგ.

თუ 12 დღის შემდეგ თავს ვერ გრძნობთ უკეთ ან თავს უფრო ცუდად გრძნობთ, უნდა გაესაუბროთ ექიმს.

ასევე, იხილეთ: >Minovivax - მინოვივაქსი 2% 100მლ ხსნარი

2. რა უნდა იცოდეთ მინოვივაქსი 5%-ის გამოყენებამდე

არ გამოიყენოთ მინოვივაქსი 5%:

თუ ხართ ალერგიული (ჰიპერმგრძნობიარე) ამ პრეპარატის აქტიური ნივთიერების ან  რომელიმე სხვა ინგრედიენტის მიმართ (ჩამოთვლილია მე-6 პუნქტში).

მინოვივაქსი 5% არ არის ნაჩვენები ბუდობრივი ალოპეციის სამკურნალოდ (უეცარი ან აუხსნელი თმის ცვენა).

მინოვივაქსი 5%-ის გამოყენება არ უნდა მოხდეს:

•  ციტოსტატიკური (სიმსივნის-საწინააღმდეგო) მკურნალობის დროს

•  თუ თმის ცვენა გამოწვეულია არასწორი დიეტით

•  თუ თმის ცვენა გამოწვეულია ჰორმონალური კონტრაცეპტივების გამოყენების შეწყვეტით

•  დაზიანებულ თავის კანზე (მაგ., დამწვრობის, დაწყლულების შედეგად ან ნაწიბუროვანი ქსოვილის არსებობის დროს)

•  თუ თმის ცვენა გამოწვეული იყო თმის არასათანადო მოვლით (მაგ., თმის ძალიან ძლიერად შეკვრა).

თუ პაციენტი არ არის დარწმუნებული რა არის თმის ცვენის მიზეზი, უნდა მიმართოს ექიმს.

გაფრთხილებები და სიფრთხილის ზომები

მინოვივაქსი 5%-ის გამოყენებამდე გაესაუბრეთ ექიმს ან ფარმაცევტს.

თქვენი თავის კანი უნდა იყოს ჯანმრთელი, ნორმალური და დაუზიანებელი.

მინოქსიდილის გამოყენება არ უნდა მოხდეს თავის კანის გაღიზიანების, ტკივილის და ანთების არსებობის შემთხვევაში.

თუ გაქვთ გულის დაავადება, ანუ იშემია, არითმია, გულის შეგუბებითი უკმარისობა ან გულის სარქვლის დაავადება, პოტენციურად შესაძლო სისტემური გვერდითი ეფექტების გამო მინოვივაქსი 5%-ით მკურნალობის დაწყებამდე უნდა მიმართოთ ექიმს.

ჰიპოტენზიის, გულმკერდის ტკივილის, გახშირებული გულისცემის, გონების დაკარგვის, თავბრუსხვევის, წონაში მატების, კიდურების შეშუპების და თავის კანის მუდმივი სიწითლის ან გაღიზიანების, ასევე სხვა უჩვეულო გვერდითი ეფექტების განვითარების შემთხვევაში, მინოვივაქსი 5%-ის გამოყენება უნდა შეწყვიტოთ და მიმართოთ ექიმს.

მძიმე გვერდითი ეფექტების განვითარების შემთხვევაში (იხილეთ პუნქტი 4), შეწყვიტეთ მინოვივაქსი 5%-ის გამოყენება.

მინოვივაქსი 5% განკუთვილია მხოლოდ სკალპზე აპლიკაციისთვის.

არ უნდა მოხდეს მინოვივაქსი 5%-ის დატანა სხეულის სხვა ნაწილებზე. თავის კანის გარდა სხეულის სხვა ნაწილებზე მინოქსიდილის გამოყენების შემთხვევაში, ამ ადგილებში შეიძლება მოხდეს თმის ჭარბი ზრდა.

არ გამოიყენოთ მინოვივაქსი 5% სხვა ადგილობრივი გამოყენებისათვის განკუთვნილ პრეპარატებთად ერთად.

მინოქსიდილის უფრო ხშირი გამოყენება არ აუმჯობესებს მკურნალობის ეფექტებს.

დატანის დროს უნდა მოერიდოთ პრეპარატის ჩასუნთქვას.

არ გადაყლაპოთ პრეპარატი.

მინოქსიდილის გამოყენებამ შეიძლება გამოიწვიოს ფერის ან თმის ტექსტურის  შეცვლა.

მინოქსიდილის დატანის შემდეგ (თავის კანის გაშრობამდე), რბილ ქსოვილებთან ან ტანსაცმელ ნივთებთან, მაგალითად, ბალიშებთან ან თავსაბურავებთან კონტაქტის დროს, მათი ფერი (გაუფერულება) შეიძლება შეიცვალოს.

თუ მინოვივაქსი 5%-ს იყენებთ საღამოს, მნიშვნელოვანია, რომ ეს პრეპარატი თავის კანზე დაიტანოთ დასაძინებლად დაწოლამდე მინიმუმ 2 საათით ადრე (ეს განსაკუთრებით ეხება ქალებს). ეს მინიმუმამდე შეამცირებს ქალებში სახეზე არასასურველი თმის რისკს.

18 წლამდე ასაკის ბავშვები და მოზარდები და 65 წელზე უფროსი ასაკის პაციენტები

უსაფრთხოების და ეფექტურობის შესახებ მონაცემების არარსებობის გამო, არ არის რეკომენდებული მინოვივაქსი 5%-ის გამოყენება 18 წლამდე ასაკის ბავშვებში და მოზარდებში და 65 წელზე უფროსი ასაკის პაციენტებში.

მინოვივაქსი 5% და სხვა პრეპარატები

აცნობეთ თქვენს ექიმს ან ფარმაცევტს თუ იღებთ, ახლახან იღებდით ან აპირებთ, რომ მიიღოთ რომელიმე სხვა პრეპარატები.

არ არის ცნობილი მინოვივაქსი 5%-ის ურთიერთქმედება სხვა პრეპარატებთან.

არ უნდა მოხდეს მინოვივაქსი 5%-ის გამოყენება სხვა ადგილობრივი გამოყენების კანის სამკურნალო საშუალებებთან ერთად, როგორებიც არის ტრეტინოინი და დიტრანოლი, რადგან მათ შეუძლიათ კანის მეშვეობით სისხლში მინოქსიდილის შეღწევის და გვერდითი მოვლენების რისკის გაზრდა.

ანტიჰიპერტენზიული პრეპარატების გამოყენების დროს საჭიროა სიფრთხილე.

ორსულობა და ძუძუთი კვება

თუ ხართ ორსულად ან კვებავთ ძუძუთი, ფიქრობთ, რომ შეიძლება იყოთ ორსულად ან აპირებთ ბავშვის გაჩენას, ამ პრეპარატის მიღებამდე რჩევისთვის მიმართეთ ექიმს ან ფარმაცევტს.

მინოვივაქსი 5%-ის გამოყენება არ უნდა მოხდეს ორსულობის და ძუძუთი კვების დროს.

ავტომობილის მართვა და მექანიზმების გამოყენება

მინოვივაქსი 5% გავლენას არ ახდენს ავტომობილის მართვის და მექანიზმების გამოყენების უნარზე.

მინოვივაქსი 5% შეიცავს პროპილენგლიკოლს

პროპილენგლიკოლმა შეიძლება გამოიწვიოს კანის გაღიზიანება.

მინოვივაქსი 5% შეიცავს ალკოჰოლს (ეთანოლს), მგრძნობიარე ზედაპირებთან (თვალებთან, ლორწოვან გარსებთან, დაზიანებულ კანთან) შემთხვევით კონტაქტის შემთხვევაში, მას შეუძლია წვის შეგრძნების და (ან) გაღიზიანების გამოწვევა. ასეთ შემთხვევებში, უნდა მოხდეს დაზიანებული ადგილის საფუძვლიანად დაბანა უხვი რაოდენობით ონკანის გამდინარე წყლით. წვის შეგრძნების და (ან) გაღიზიანების გახანგრძლივების შემთხვევაში კონსულტაციისთვის მიმართეთ ექიმს.

3. როგორ გამოიყენება მინოვივაქსი 5%

ეს პრეპარატი ყოველთვის გამოიყენეთ ზუსტად ისე, როგორც აღწერილია ამ ინსტრუქციაში ან ექიმის ან ფარმაცევტის მითითებების შესაბამისად. თუ არ ხართ დარწმუნებული, გადაამოწმეთ ექიმთან ან ფარმაცევტთან.

დოზირების რეჟიმი

1 მლ მინოვივაქსი 5%-ის დატანა უნდა მოხდეს თავის კანზე, დღეში ორჯერ (დილით და საღამოს).

არ გადააჭარბოთ 2 მლ დღიურ დოზას, დაზიანებული ზონის ზომის მიუხედავად.

მინოვივაქსი 5% განკუთვნილია მხოლოდ თავის კანზე ადგილობრივად დასატანად (გარეგანი გამოყენებისათვის).

არ დაიტანოთ სხეულის სხვა ადგილებში, გარდა თავის კანისა.

მინოვივაქსი 5%-ის ადგილობრივად გამოყენებამდე უნდა მოხდეს თმის და თავის კანის საფუძვლიანად გაშრობა.

გამოყენების წესი:

მინოვივაქსი 5%-ის გამოყენების მეთოდი დამოკიდებულია გამოყენებული დისპენსერის ტიპზე.

1)    სპრეის ტუმბო-ხსნარის თავის კანის უფრო დიდ უბნებზე დასატანად

− მოხსენით ბოთლის დამცავი თავსახური.

− სპრეის ტუმბო მიმართეთ დაზიანებული კანის ზედაპირისაკენ.

− დააჭირეთ სპრეის ტუმბოს 6 ჯერ, რომ მიიღოთ 1 მლ ხსნარი.

− დაიტანეთ ხსნარი დაზიანებული კანის მიდამოს შუა ნაწილზე და გაანაწილეთ თითის წვერებით, დარწმუნდით, რომ პრეპარატი თანაბრად არის დატანილი.

− დასრულების შემდეგ დაახურეთ დამცავი თავსახური.

2) აპლიკატორი - ხსნარის დასატანად თავის კანის მცირე ნაწილზე ან თმით დაფარულ ადგილებზე.

უფრო ლოკალიზებულად დასატანად (თავის კანის მცირე ნაწილები ან თმის ქვეშ) გამოიყენეთ შეფუთვის თანმხლები აპლიკატორი.

− სპრეის ტუმბო შეცვალეთ შეფუთვის თანმხლები აპლიკატორით.

− აპლიკატორი მიმართეთ დაზიანებული კანის ზედაპირისაკენ.

− დააჭირეთ სპრეის ტუმბოს 6 ჯერ, რომ მიიღოთ 1 მლ ხსნარი.

− გაანაწილეთ ხსნარი თითის წვერებით, დარწმუნდით, რომ პრეპარატი თანაბრად არის დატანილი.

ყოველი გამოყენების შემდეგ საგულდაგულოდ დაიბანეთ ხელები.

თუ მინოვივაქსი 5%-ს იყენებთ საღამოს, მნიშვნელოვანია, რომ ეს პრეპარატი თავის კანზე დაიტანოთ დასაძინებლად დაწოლამდე მინიმუმ 2 საათით ადრე (ეს განსაკუთრებით ეხება ქალებს). ეს მინიმუმამდე შეამცირებს ქალებში სახეზე არასასურველი თმის რისკს.

პრეპარატის შემთხვევით კონტაქტმა თვალებთან, ლორწოვან გარსებთან ან დაზიანებულ კანთან შეიძლება გამოიწვიოს წვის შეგრძნება და (ან) გაღიზიანება. ასეთ შემთხვევებში, უნდა მოხდეს დაზიანებული ადგილის საფუძვლიანად დაბანა უხვი რაოდენობით ონკანის გამდინარე წყლით. წვის შეგრძნების და (ან) გაღიზიანების გახანგრძლივების შემთხვევაში კონსულტაციისთვის მიმართეთ ექიმს.

სპრეის ტუმბოს და აპლიკატორის გაწმენდა

მოხსენით სპრეის თავის ან აპლიკატორის ზედა ნაწილი და პროდუქტის ნარჩენების გასასუფთავებლად და დაბინძურების თავიდან ასაცილებლად ყოველი გამოყენების შემდეგ გარეცხეთ სპირტით.

მკურნალობის ხანგრძლივობა

პრეპარატის სასურველი ეფექტის მისაღწევად მნიშვნელოვანია, რომ არ შეწყვიტოთ მინოვივაქსი 5%-ის დღეში ორჯერ რეკომენდებული დოზით რეგულარული გამოყენება.

ჩატარებული კვლევები აჩვენებენ, რომ თმის შესამჩნევი ზრდისთვის შეიძლება საჭირო გახდეს ამ პრეპარატით 4 თვის ან უფრო მეტი ხნის განმავლობაში მკურნალობა. მკურნალობის შეწყვეტამ შეიძლება გამოიწვიოს საწყის მდგომარეობაში დაბრუნება 3-4 თვის განმავლობაში.

თუ 12 თვის შემდეგ თავს ვერ გრძნობთ უკეთ ან თავს უფრო ცუდად გრძნობთ, მიმართეთ ექიმს.

თუ გამოიყენეთ საჭიროზე უფრო მეტი რაოდენობით მინოვივაქსი 5%

მინოქსიდილის ადგილობრივი გამოყენების შედეგად დოზის გადაჭარბების შემთხვევების შესახებ შეტყობინება არ ყოფილა.

პრეპარატის შემთხვევით გადაყლაპვამ შეიძლება გამოიწვიოს მინოქსიდილის ფარმაკოლოგიურ მოქმედებასთან დაკავშირებული მძიმე სისტემური ეფექტები. ყველაზე ხშირი სიმპტომები მოიცავს ტაქიკარდიას (გულისცემის გახშირება), სითხის შეკავებას, ჰიპოტენზიას და ლეთარგიას.

თუ შეამჩნიეთ მსგავსი სიმპტომები, დაუყოვნებლივ მიმართეთ ექიმს.

თუ დაგავიწყდათ მინოვივაქსი 5%-ის გამოყენება

არ გამოიყენოთ ორმაგი დოზა დავიწყებული დოზის ანაზღაურების მიზნით.

თუ შეწყვეტთ მინოვივაქსი 5%-ის გამოყენებას

თმის ზრდის შესანარჩუნებლად საჭიროა მინივოვაქსი 5%-ის რეკომენდებული დოზით უწყვეტი გამოყენება. მკურნალობის შეწყვეტის შემდეგ აღინიშნებოდა ახალი თმის ზრდის შეჩერება და საწყის მდგომარეობაში დაბრუნება 3-4 თვის განმავლობაში.

ამ პრეპარატის გამოყენების შესახებ დამატებითი კითხვების არსებობის შემთხვევაში, მიმართეთ ექიმს ან ფარმაცევტს.

4. შესაძლო გვერდითი ეფექტები

ყველა სხვა პრეპარატის მსგავსად, ამ პრეპარატმაც შეიძლება გამოიწვიოს გვერდითი ეფექტები, თუმცა ისინი ყველას არ უვითარდება.

თუ შეამჩნიეთ რომელიმე შემდეგი სიმპტომი, დაუყოვნებლივ დაუკავშირდით ექიმს, შეიძლება დაგჭირდეთ სასწრაფო სამედიცინო მკურნალობა:

•  სახის, ტუჩების ან ყელის შეშუპება, რაც ართულებს ყლაპვას ან სუნთქვას. ეს შეიძლება იყოს მწვავე ალერგიული რეაქციის ნიშანი (სიხშირე არ არის ცნობილი, ხელმისაწვდომი მონაცემებით შეფასება შეუძლებელია).

დაფიქსირდა შემდეგი გვერდითი ეფექტები:

ძალიან ხშირი (შეიძლება განვითარდეს 10-დან 1-ზე მეტ ადამიანში)

• თავის ტკივილი.

ხშირი გვერდითი ეფექტები (შეიძლება განვითარდეს 10-დან 1-ზე ნაკლებ ადამიანში):

• ქოშინი

• ქავილი, თმის ჭარბი ზრდა (ქალების შემთხვევაში ასევე სახეზე), დერმატიტი, აკნეს მსგავსი გამონაყარი, გამონაყარი

• პერიფერიული შეშუპება

• წონაში მატება.

არახშირი (შეიძლება განვითარდეს 100-დან 1-ზე ნაკლებ ადამიანში)

•  თავბრუსხვევა

•  გულისრევა.

უცნობი (ხელმისაწვდომი მონაცემების საფუძველზე დადგენა შეუძლებელია)

• ანგიოშეშუპება (მათ შორის ტუჩების და ენის შეშუპება, პირის ღრუს და ყელის შეშუპება, ლორწოვანი გარსის შეშუპება პირში და ყელში), ჰიპერმგრძნობელობა (მათ შორის: სახის შეშუპება, მულტიფორმული ერითემა, ქავილი, ყელის დაჭიმულობა), ალერგიული კონტაქტური დერმატიტი

•  თვალის გაღიზიანება

•  ტაქიკარდია (გულისცემის გახშირება), პალპიტაციები

•  ჰიპოტენზია

•  ღებინება

•   დისკომფორტი დატანის ადგილას, ყურების და სახის ჩათვლით (მათ შორის კანის გაღიზიანება და სიწითლე, ქავილი, ტკივილი, შეშუპება, კანის სიმშრალე, ერითემა), კანის აქერცვლა, დერმატიტი, ბუშტუკები, სისხლდენა და დაწყლულება, ზოგჯერ ძლიერი, თმის დროებითი ცვენა, თმის ფერის შეცვლა და თმის სტრუქტურის შეცვლა

•  ტკივილი გულმკერდის არეში.

ზოგიერთმა პაციენტმა მინოქსიდილით მკურნალობის დასაწყისში შენიშნა თმის ცვენის მომატება. თმის ცვენის დროებით გაძლიერებული პროცესი ყველაზე ხშირად აღინიშნება მინოქსიდილის გამოყენების დაწყებიდან 2-6 კვირის განმავლობაში და თავისით ქრება რამდენიმე კვირაში.

თუ ეს მდგომარეობა ყოველგვარი გაუმჯობესების გარეშე ორ კვირაზე უფრო დიდი ხანი გრძელდება, შეწყვიტეთ პრეპარატის გამოყენება და კონსულტაცია გაირეთ ექიმთან.

გვერდითი ეფექტების შეტყობინება

ნებისმიერი გვერდითი ეფექტის განვითარების შემთვევაში, მიმართეთ ექიმს ან ფარმაცევტს. ეს მოიცავს ყველა შესაძლო გვერდით ეფექტს, რომელიც არ არის ჩამოთვლილი ამ ინსტრუქციაში.

გვერდითი რეაქციების შესახებ ასევე შეიძლება შეატყობინოთ სავაჭრო ლიცენზიის მფლობელს.

გვერდითი ეფექტების შესახებ შეტყობინებით თქვენ დაგვეხმარებით ამ პრეპარატის უსაფრთხოების შესახებ უფრო მეტი ინფორმაციის შეგროვებაში.

5. როგორ ინახება მინოვივაქსი 5%

ეს პრეპარატი შეინახეთ ბავშვებისათვის შეუმჩნეველ და მიუწვდომელ ადგილას.

არ შეინახოთ 25°C-ზე მაღალ ტემპერატურაზე.

ბოთლი შეინახეთ მჭიდროდ დახურული.

ვარგისობის ვადა პირველი გახსნის შემდეგ: 12 თვე.

არ გამოიყენოთ მინოვივაქსი 5% ვარგისობის ვადის გასვლის შემდეგ, რომელიც მითითებულია გარეთა მუყაოს კოლოფზე ან ბოთლზე, „EXP“ - ის შემდეგ. ვარგისობის ვადის თარიღი აღნიშნავს მითითებული თვის ბოლო დღეს.

არ გადააგდოთ პრეპარატები გამდინარე წყლების ან საყოფაცხოვრებო ნარჩენების საშუალებით. ჰკითხეთ ფარმაცევტს როგორ უნდა გადააგდოთ პრეპარატები, რომლებსაც აღარ იყენებთ. ეს ზომები ხელს შეუწყობს გარემოს დაცვას.

6.  შეფუთვის შემადგენლობა და სხვა ინფორმაცია

რას შეიცავს მინოვივაქსი 5%

-     აქტიური ნივთიერება არის მინოქსიდილი (1 მლ კანზე გამოსაყენებელი ხსნარი შეიცავს 50 მგ მინოქსიდილს).

-     სხვა ინგრედიენტებია: პროპილენგლიკოლი, ეთანოლი 96%.

როგორ გამოიყურება მინოვივაქსი 5% და რას შეიცავს შეფუთვა

გამჭვირვალე, უფეროდან ღია ვარდისფერ ფერამდე, ერთგვაროვანი ხსნარი.

შეფუთვა: 100 მლ ხსნარის შემცველი ბოთლი სპრეის ტუმბოთი, თანდართული აპლიკატორით, მუყაოს კოლოფში