მილდიანი, მუკუზანი, საფერავი, წითელი მშრალი ღვინო, 2018 წ.

დახასიათება

მილდიანის წითელი მშრალი ღვინო მუკუზანი საფერავისგანაა დაყენებული კახეთში, ტრადიციულადაა ფერმენტირებული ქვევრში და მუხის კასრშია დაძველებული. სასმელს ღრმა, ელვარე წითელი შეფერილობა და კომპლექსური, მდიდარი, რთული არომატი აქვს ალუბლის, ბროწეულისა და მაყვლის ელემენტებით, ასევე იგრძნობთ მუხაში დაძველებისთვის დამახასიათებელ შავი პილპილის, მწარე შოკოლადისა და თამბაქოს ნაზ ნოტებს. სასმელს ნაზი, ხავერდოვანი, დაბალანსებული, საშუალოზე მაღალი მჟავიანობის მქონე გემო აქვს. ძალიან უხდება ლორს, მწვადს, მოხარშულ საქონლის ხორცსა და ყველს. სერვირებისთვის რეკომენდებული ტემპერატურა 15-17 გრადუსია.

ბრენდის ისტორია

„საოჯახო მეღვინეობა მილდიანის“ ისტორია 1991 წელს იწყება, როდესაც ენთუზიაზმითა და მეღვინეობისადმი სიყვარულით სავსე ოთხი ძმა აფუძნებს კომპანიას, რომელიც მიუხედავად უამრავი დაბრკოლებისა დღემდე იზრდება და ვითარდება. ყველაფერი მეღვინეობისადმი განსაკუთრებული სიყვარულით დაიწყო. პირველ ხანებში, ქვეყანაში არსებული ღვინის მარაგების შესყიდვა და ექსპორტი ხდებოდა, რაც მცხეთაში ღვინის ჩამოსასხელი საკუთარი საწარმოს აშენების წინაპირობა გახდა. სულ მალე იქვე აშენდა კერამიკის საამქრო, სადაც მრავაფლეროვანი კერამიკული ღვინის ბოთლები მზადდებოდა. ამ საამქროს მიერ გამოშვებული თიხის ბოთლები, რომლებშიც კომერციალიზაციის მიზნით ღვინო ჩაისხა, პირველი პრეცენდენტი იყო პოსტსაბჭოთა საქართველოში. რამდენიმე წელში, მიზანმიმართული და დაუღალავი შრომის შედეგად, საკუთარი ღვინის საწარმოს მშენებლობასაც ჩაეყარა საფუძველი, რომელიც უმაღლესი ხარისხის იტალიური დანადგარებით აღიჭურვა. ეს საწარმო კახეთში, მეღვინეობის ერთ-ერთ გამორჩეულ ზონაში - წინანდალში მდებარეობს. აქ იწარმოება უმაღლესი ხარისხის ღვინოები და ყურძნისეული წარმოშობის სხვა ალკოჰოლური სასმელები, რომელთაც უამრავი საერთაშორისო ჯილდო და მედალი აქვთ მიღებული წლების განმავლობაში. აღსანიშნავია, რომ მეღვინეობა მილდიანის 2002 წლის მოსავლის საფერავი, პირველი ქართული ღვინო იყო საბჭოთა კავშირის დაშლის შემდეგ, რომელიც 2004 წელს პარიზში, ღვინის საერთაშორისო კონკურსზე _ ,,Vinalies Internationales” ვერცხლის მედლით დაჯილდოვდა. კომპანია მილდიანი მეღვინეობის სხვადასხვა ზონებში საკუთარ ვენახებს ფლობს და სრულად აკონტროლებს ხარისხს პროდუქციის წარმოების ყველა ეტაპზე.