მაგნიუმის სულფატი - Magnesium sulfate 25% 5მლ N50

მაგნიუმის სულფატი

სავაჭრო დასახელება: მაგნიუმის სულფატი

საერთაშორისო არაპატენტირებული დასახელება: მაგნიუმის სულფატი.

სამკურნალწამლო ფორმა: საინექციო ხსნარი.

შემადგენლობა:

აქტიური ნივთიერება: მაგნიუმის სულფატი - 250,0 გ;

დამხმარე ნივთიერებები: საინექციო წყალი - 1000 მლ-მდე. 

აღწერილობა: 

გამჭვირვალე, უფერო სითხე.

ფარმაკო-თერაპიული ჯგუფი:

პლაზმის შემცველელი და საპერფუზიო ხსნარები, ელექტროლიტური ხსნარები

ათქ კოდი: B05XA05

ფარმაკოლოგიური თვისებები:

პარენტერალური შეყვანისას ავლენს კრუნჩხვის საწინააღმდეგო, ანტიარითმიულ, სისხლძარღვთა გამაფართოებელ (არტერიებზე) ეფექტებს, დამამშვიდებელ მოქმედებას ცენტრალურ ნერვულ სისტემაზე (სედაციური, საძილე ან ნარკოტიკული ეფექტი დოზის შესაბამისად), მაღალი დოზებით დამთრგუნველ (ნერვ-კუნთოვანი გადაცემა), ჰიპოტენზიურ (აქვეითებს არტერიულ წნევას), დიურეზულ (აძლიერებს დიურეზს)  მოქმედებას და თრგუნავს სუნთქვის ცენტრს.

ფარმაკოკინეტიკა

პარენტერალური შეყვანის შემდეგ, პლაზმის ცილებთან კავშირი 25-30% შეადგენს. აღწევს ყველა ორგანოსა და ქსოვილში, გადის ჰემატო-ენცეფალურ და პლაცენტურ ბარიერებს. ძირითადი ნაწილი გამოიყოფა თირკმელებით, ასევე ფეკალურ მასებთან, ნერწყვთან და დედის რძესთან ერთად. 

გამოყენების ჩვენებები:

კრუნჩხვითი სინდრომი ეკლამფსიისა და მძიმე პრეეკლამფსიის დროს, საშვილოსნოს ტეტანია, შარდის შეკავება, ტყვიისმიერი კოლიკა, ჰიპომაგნემია (მათ შორის მხოლოდ პარენტერალურ კვებაზე მყოფ პაციენტებში), ჰიპერტონული კრიზი, ეპილეფსიური სტატუსი, ვერცხლისწყლით, დარიშხანით, ტეტრაეთილტყვიით მოწამვლა (კომპლექსური თერაპიის შემადგენლობაში).

გამოყენების წესი და დოზირება:

პრეეკლამფსია და ეკლამფსია: დოზა შეირჩევა ინდივიდუალურად, კლინიკური მდგომარეობის შესაბამისად. გაჯერების დოზა: 8-16 მლ შეჰყავთ ი/ვ ინფუზიის სახით 5-20 წუთის განმავლობაში. შემანარჩუნებელი დოზა: 4-8 მლ საათში.

საშვილოსნოს ტეტანია: გაჯერების დოზა: 16 მლ შეჰყავთ ი/ვ ინფუზიის სახით 20 წუთის განმავლობაში. შემანარჩუნებელი დოზა - ჯერ 4-8 მლ საათში, შემდეგ 4 მლ საათში (შესაძლებელია ი/ვ წვეთოვანი გზით შეყვანა 24-72 საათის განმავლობაში).

ჰიპომაგნემია: მსუბუქი - სადღეღამისო დოზა - 4-8 მლ ი/მ. აღნიშნული დოზა შეჰყავთ ერთ მომენტად ან 2-3 ჯერზე გადანაწილებით. შეყვანის ადგილები უნდა შეიცვალოს. მძიმე - საწყისი დოზა - 20 მლ ი/ვ (ნელა!). შემდგომი დოზა შეირჩევა სისხლის შრატში მაგნიუმის კონცენტრაციის შესაბამისად.

ჰიპომაგნემიის პროფილაქტიკა მხოლოდ პარენტერალურ კვებაზე მყოფ პაციენტებში: თუ საკვები ხსნარები არ შეიცავს მაგნიუმს, საჭიროა მისი დამატება. სადღეღამისო დოზა შეადგენს 6-16 მლ-ს. ჩვეულებრივ, 1 ლ ხსნარს პარენტერალური კვებისთვის ემატება 1 გ მაგნიუმის სულფატი.

ჰიპერტონული დაავადების ადრეულ სტადიაზე შეჰყავთ 5-10-20 მლ 20% ან 25% მაგნიუმის სულფატის ხსნარი ი/ვ. მკურნალობის კურსი მოიცავს 10-20 ინექციას (ყოველდღიურად).

ჰიპერტონული კრიზი: 8-16 მლ ი/მ ან ი/ვ (ნელა!).

ტყვიისმიერი კოლიკა ან შარდის მწვავე შეკავება: 2 მლ ი/მ ან ი/ვ.

ეპილეფსიური სტატუსი, ვერცხლისწყლით, დარიშხანით ან ტეტრაეთილტყვიით მოწამვლა: 2-4 მლ ი/ვ.

მაგნიუმის სულფატის განმეორებითი ინექციის წინ აუცილებელია მუხლის რეფლექსის შემოწმება. რეფლექსის გაქრობის შემთხვევაში პრეპარატის შეყვანა დაუშვებელია!

მაგნიუმის სულფატის მაქსიმალური სადღეღამისო დოზა თირკმლის ნორმალური ფუნქციის მქონე მოზრდილ პაციენტებში შეადგენს 160 მლ-ს. თირკმლის ფუნქციის მძიმე დარღვევის შემთხვევაში დოზა არ უნდა აღემატებოდეს 80 მლ 48 საათის განმავლობაში.

შენიშვნა:

მაგნიუმის სულფატის დოზები გრამებში - ხსნარის შესაბამისი რაოდენობა: 1 გ - 4 მლ (25%), 2 გ - 8 მლ (25%), 3 გ - 12 მლ (25%), 10 გ - 40 მლ (25%) 15 გ - 60 მლ (25%), 20 გ - 80 მლ (25%), 30 გ - 120 მლ (25%), 40 გ - 160 მლ (25%).

მაგნიუმის სულფატის ხსნარი ამპულებში ზავდება საინექციო ხსნარებში: 0,9% ნატრიუმის ქლორიდი ან 5% გლუკოზა (დექსტროზა).

გვერდითი მოვლენები:

ჰიპერმგრძნობელობის რეაქცია წერტილოვანი გამონაყარის სახით კანზე. ჰიპერმაგნემიის სიმპტომებია: გულისრევა, ღებინება, სისუსტე, ბრადიკარდია, დიპლოპია, სისხლის მოულოდნელი მოდინება სახისკენ, თავის ტკივილი, არტერიული წნევის დაქვეითება, ქოშინი, გაურკვეველი მეტყველება, კანის საფარველის ჰიპერემია, წყურვილი, ძილიანობა, გონების დაბინდვა, ჰიპოტენზია, ჰიპოთერმია, კუნთოვანი ტონუსის დაქვეითება, მყესოვანი რეფლექსების შესუსტება, სუნთქვის სიხშირის შემცირება, გულისცემის სიხშირის დაქვეითება და არითმია, PQ ინტერვალის გახანგრძლივება და QRS კომპლექსის გაფართოება ეკგ-ზე (2,5-5 მმოლ/ლ), გულის გაჩერება, პოლიურია, საშვილოსნოს ატონია, ჰიპერჰიდროზი, შფოთვა, გამოხატული სედაციური ეფექტი.

უკუჩვენებები:

·       ატრიოვენტრიკულური ბლოკადა; გულის კუნთის დაზიანება; გამოხატული ბრადიკარდია; თირკმლის უკმარისობა (კრეატინინის კლირენსი < 20 მლ/წთ); ჰიპოტენზია, კალციუმის დეფიციტთან და სუნთქვის ცენტრის დათრგუნვასთან დაკავშირებული მდგომარეობები; მომატებული მგრძნობელობა პრეპარატის მიმართ.

·       არ არის რეკომენდებული 25% ხსნარის ი/მ შეყვანა ბავშვებში.

·       არ არის რეკომენდებული პრეპარატის შეყვანა მშობიარობამდე ბოლო 2 საათის განმავლობაში (გარდა იმ შემთხვევებისა, როცა სხვა საშუალებებით შეუძლებელია კრუნჩხვების შეწყვეტა). 

ურთიერთქმედება მედიკამენტებთან:

ერთდროული შეყვანის შემთხვევაში, პრეპარატი აძლიერებს სედაციური, ნარკოტიკული საშუალებების, ანალგეტიკების, მიორელაქსანტების ეფექტს, ასუსტებს კალციუმის მარილების მოქმედებას. ნიფედიპინთან (კორინფარი, ადალატი, ნიფეკარდი და სხვა) კომბინაციამ შესაძლოა გამოიწვიოს მძიმე ჰიპოტენზია და ნერვ-კუნთოვანი გამტარებლობის ბლოკირება.

მაგნიუმის სულფატით თერაპიის დროს გენტამიცინის მიღების ფონზე აღწერილ იქნა სუნთქვის გაჩერების შემთხვევები სისხლის პლაზმაში მაგნიუმის მომატებული კონცენტრაციის მქონე ძუძუთა ასაკის ბავშვებში. ამცირებს ორალური ანტიკოაგულანტების (მათ შორის კუმარინის ან ინდანდიონის წარმოებულების), საგულე გლიკოზიდების, ფენოთიაზინების (განსაკუთრებით ქლორპრომაზინის) ეფექტურობას, აქვეითებს ციპროფლოქსაცინის, ეტიდრონის მჟავას აბსორბციას, ასუსტებს სტრეპტომიცინისა და ტობრამიცინის მოქმედებას.

მაგნიუმის სულფატის ჰიპერდოზირების შემთხვევაში იყენებენ კალციუმის პრეპარატებს: კალციუმის ქლორიდს ან კალციუმის გლუკონატს.

პრეპარატი ფარმაკოლოგიურად შეუთავსებელია (ქმნის ნალექს): ჩA2+ პრეპარატებთან, ეთანოლთან (მაღალი კონცენტრაციით), კარბონატებთან, ჰიდროკარბონატებთან და ტუტე მეტალების ფოსფატებთან, დარიშხანის მჟავას მარილებთან, ბარიუმთან, სტრონციუმთან, კლინდამიცინის ფოსფატთან, ჰიდროკორტიზონთან, ნატრიუმის სუქცინატთან, პოლიმიქსინ B სულფატთან, პროკაინის ჰიდროქლორიდთან, სალიცილატებთან და ტარტრატებთან.

განსაკუთრებული მითითებები:

საჭიროა პრეპარატის სიფრთხილით გამოყენება, რომ არ შეიქმნას ტოქსიკური კონცენტრაცია, რაც სუნთქვის ცენტრის დამბლას გამოიწვევს.

ფრთხილად, ჩვეულებრივ, შემცირებული დოზებით გამოიყენება პაციენტებში, რომლებსაც დარღვეული აქვთ თირკმელების ფუნქცია, კერძოთ ხანდაზმულ პაციენტებში.

მაგნიუმის სულფატის გამოყენების დროს შესაძლოა აღინიშნოს რადიოლოგიური კვლევის შედეგების დამახინჯება, რომლებიც ტარდება ტახნეციუმით.

სიფრთხილით გამოიყენება გულის ბლოკადის, მიოკარდიუმის დაზიანების, სასუნთქი ორგანოების პათოლოგიების, მწვავე ანთებითი დაავადებების, კუჭ-ნაწლავის ტრაქტის დაავადებების, ორსულობის დროს.

შესაძლოა გამოყენებულ იქნას ეპილეფსიური სტატუსის კუპირების მიზნით (კომპლექსური თერაპიის შემადგენლობაში).

დაუშვებელია ვადაგასული პრეპარატის გამოყენება. ინახება ბავშვებისთვის მიუწვდომელ ადგილას.

გამოყენება ორსულობისა და ლაქტაციის პერიოდში:

ორსულობისა და ლაქტაციის (ძუძუთი კვების) პერიოდში გამოიყენება ფრთხილად, მხოლოდ მკაცრი ჩვენებით, იმ შემთხვევაში, თუ სარგებელი დედისათვის აღემატება პოტენციურ რისკს ნაყოფისთვის ან ჩვილისთვის.

ლაქტაციის პერიოდში გამოყენების აუცილებლობის შემთხვევაში ძუძუთი კვება უნდა შეწყდეს.

გავლენა სატრანსპორტო საშუალებების მართვაზე:

პრეპარატი ხასიათდება სედაციური ეფექტით, ამიტომ აუცილებელია პაციენტების გაფრთხილება, რომ თავი შეიკავონ პოტენციურად სახიფათო ქმედებებისა და ავტომობილის მართვისგან.

ჰიპერდოზირება:

ჰიპერდოზირების შემთხვევაში აღინიშნება ჰიპერმაგნემია, რომლის სიმპტომები აღწერილია გვერდით ეფექტებში. სუნთქვის გაჩერების აღმოფხვრა შესაძლებელია 5-10 მლ 10% კალციუმის ქლორიდის ხსნარის შეყვანით, ჟანგბადის ან კარბოგენის ინჰალაციით, ხელოვნურ სუნთქვაზე გადაყვანით. თუ თირკმლის ფუნქცია ნორმის ფარგლებშია, ი/ვ წვეთოვნად შეჰყავთ ფიზიოლოგიური ხსნარი და ტარდება ფორსირებული დიურეზი მანიტოლით. თირკმლის ფუნქციის დარღვევის ან მძიმე ჰიპერმაგნემიის მქონე პაციენტებში საჭიროა ჰემოდიალიზი.

გამოშვების ფორმა:

5 მლ ან 10 მლ შუშის ამპულები, ან 5 მლ პოლიპროპილენის, ან სამედიცინო პოლიეთილენის ამპულები. 5 ან 10 ამპულა კონტურულუჯრედოვან შეფუთვაში. 1 ან 2 კონტურულუჯრედოვანი შეფუთვა გამოყენების ინსტრუქციასთან ერთად კოლოფში, ან 10, 20, 40, ან 50 ამპულა ბლოკების სახით გამოყენების ინსტრუქციასთან ერთად კოლოფში.

შენახვის პირობები:

ინახება მშრალ, სინათლისაგან დაცულ ადგილას, არა უმეტეს 25˚C ტემპერატურის პირობებში.

ვარგისობის ვადა:

3 წელი. 

გაცემის წესი:

ფარმაცევტული პროდუქტის ჯგუფი - II , გაიცემა ფორმა №3 რეცეპტით