ლ-თიროქსინი - L-thyroxin 25მკგ 100 ტაბლეტი

L-თიროქსინი  25 ბერლინ-ჰემი ტაბლეტები, 25 მიკროგრამი

ლევოთიროქსინ-ნატრიუმი

მოცემული ჩანართის შინაარსი
1.     რას წარმოადგენს პრეპარატი L-თიროქსინი 25 ბერლინ-ჰემი და  რისთვის გამოიყენება

2.     რა უნდა იცოდეთ პრეპარატ L-თიროქსინი 25 ბერლინ-ჰემის მიღებამდე

3.     როგორ მიიღება პრეპარატი L-თიროქსინი 25 ბერლინ-ჰემი

4.     შესაძლო გვერდითი მოქმედება

5.     პრეპარატ L-თიროქსინი 25 ბერლინ-ჰემის შენახვის პირობები

6.     შეფუთვის შიგთავსი და დამატებითი ინფორმაცია

1 რას წარმოადგენს პრეპარატი L-თიროქსინი 25 ბერლინ-ჰემი და რისთვის გამოიყენება

L-თიროქსინი 25 ბერლინ-ჰემი არის პრეპარატი, რომელიც მოქმედი ნივთიერების სახით შეიცავს ფარისებრი ჯირკვლის ჰორმონს ლევოთიროქსინს. მას გააჩნია იგივე მოქმედება, რაც ბუნებრივ ჰორმონს.

L-თიროქსინი 25 ბერლინ-ჰემი მიიღება ფარისებრი ჯირკვლის არარსებული ჰორმონის ჩასანაცვლებლად ან/და ფარისებრ ჯირკვალზე დატვირთვის შესამცირებლად.

მეტი ინფორმაციისთვის იხილეთ ბლოგი: >ლ-თიროქსინი — როდის მიიღება მედიკამენტი და როგორია მისი მოქმედება?

L-თიროქსინი 25 ბერლინ-ჰემი გამოიყენება:

· არარსებული ჰორმონის ჩასანაცვლებლად (ჩანაცვლებითი თერაპია) ფარისებრი ჯირკვლის დაავადებების ნებისმიერი ფორმის დროს, როდესაც დაქვეითებულია მისი ფუნქცია;

·    ჩიყვის (ფარისებრი ჯირკვლის გადიდება) რეციდივის პროფილაქტიკისთვის ჩიყვის რეზექციის შემდეგ ფარისებრი ჯირკვლის ნორმალური ფუნქციის დროს;

·    კეთილთვისებიანი ჩიყვის მკურნალობისთვის ფარისებრი ჯირკვლის ნორმალური ფუნქციის დროს;

· თანმხლები თერაპიის სახით ფარისებრი ჯირკვლის მომატებული ფუნქციის თირეოსტატული პრეპარატებით (ფარისებრი ჯირკვლის მომატებული ფუნქციის დამთრგუნველი პრეპარატები) მკურნალობის დროს, ნივთიერებათა ცვლის ნორმალური მდგომარეობის მიღწევის შემდეგ;

· ფარისებრი ჯირკვლის ავთვისებიანი სიმსივნის დროს, ძირითადად სიმსივნის რეციდივის დათრგუნვისთვის ოპერაციის შემდეგ და ფარისებრი ჯირკვლის არარსებული ჰორმონის ჩანაცვლებისთვის.

L-თიროქსინი 25 ბერლინ-ჰემის გამოყენება ნაჩვენებია ყველა ასაკობრივ ჯგუფში.

ასევე, იხილეთ: >L-Thyroxin - ლ-თიროქსინი 50მკგ. 50 ტაბლეტი

2 რა უნდა იცოდეთ პრეპარატ L-თიროქსინი 25 ბერლინ-ჰემის მიღებამდე

არ მიიღოთ პრეპარატი L-თიროქსინი 25 ბერლინ-ჰემი

-    თუ გაქვთ ალერგია ლევოთიროქსინ-ნატრიუმის ან ამ პრეპარატის ნებისმიერი სხვა კომპონენტის მიმართ (მითითებულია მე-6 პარაგრაფში).

-    თუ  გაქვთ  ნებისმიერი  შემდეგი  დაავადება  ან  ადგილი  აქვს  ნებისმიერ  შემდეგ მდგომარეობას:

o ფარისებრი ჯირკვლის არანამკურნალები მომატებული ფუნქცია;

o არანამკურნალები ადრენოკორტიკალური უკმარისობა;

o ჰიპოფიზის  არანამკურნალები  უკმარისობა, თუ აღნიშნულმა  გამოიწვია ადრენოკორტიკალური უკმარისობა, რომელიც საჭიროებს მკურნალობას;

o მიოკარდიუმის ახლახანს გადატანილი ინფარქტი;

o გულის კუნთის მწვავე ანთება (მიოკარდიტი);

o გულის კედლის ყველა შრის მწვავე ანთება (პანკარდიტი).

ორსულობის და ფარისებრი ჯირკვლის მომატებული ფუნქციის სამკურნალო საშუალებების (ე.წ. „თირეოსტატული პრეპარატები“) ერთდროულად მიღების შემთხვევაში L-თიროქსინი 25 ბერლინ-ჰემის მიღება არ შეიძლება (ასევე, იხ. პარაგრაფი

„ორსულობა, ძუძუთი კვება და შვილოსნობის ფუნქცია“).

დარღვევების გამოკვლევა
პრეპარატ L-თიროქსინი 25 ბერლინ-ჰემის მიღების დაწყებამდე აუცილებელია გამოირიცხოს შემდეგი დაავადებების ან მდგომარეობების არსებობა ან ჩატარდეს შესაბამისი მკურნალობა:

·    გულის კორონარული დაავადება.

·   ტკივილი გულის არეში და მოჭერის შეგრძნება გულ-მკერდის არეში (სტენოკარდია).

·    მომატებული არტერიული წნევა.

·   ჰიპოფიზის ან/და თირკმელზედა ჯირკვლის ქერქის უკმარისობა.

· ფარისებრ ჯირკვალში ისეთი უბნების არსებობა, რომლებიც უკონტროლოდ გამოიმუშავებენ ფარისებრი ჯირკვლის ჰორმონს (ფარისებრი ჯირკვლის ფუნქციური ავტონომია).

გაფრთხილება და სიფრთხილის ზომები
პრეპარატ L-თიროქსინი 25 ბერლინ-ჰემის მიღების წინ კონსულტაციისთვის მიმართეთ თქვენს ექიმს ან ფარმაცევტს.

საჭიროა  სიფრთხილის  განსაკუთრებული  ზომების დაცვა  პრეპარატ  L-თიროქსინი  25 ბერლინ-ჰემის მიღებისას შემდეგ შემთხვევებში:
 · თუ გადატანილი გაქვთ გულის შეტევა (მიოკარდიუმის ინფარქტი) ან გაქვთ გულის კორონარული დაავადება, გულის კუნთის სისუსტე, გულის რიტმის დარღვევები (ტაქიკარდია), გულის კუნთის ანთება გამწვავების გარეშე ან ფარისებრი ჯირკვლის ფუნქციის ხანგრძლივად მიმდინარე დაქვეითება. ამ შემთხვევაში თავიდან უნდა აიცილოთ სისხლში ჰორმონების ძალიან მაღალი დონე. ამიტომ, საჭიროა ფარისებრი ჯირკვლის ჰორმონების დონის უფრო ხშირი კონტროლი. პრეპარატ L-თიროქსინი 25 ბერლინ-ჰემის მიღებასთან დაკავშირებით ფარისებრი ჯირკვლის მომატებული ფუნქციის უმნიშვნელო ნიშნების  გამოვლენისას მიმართეთ თქვენს  ექიმს  (იხ. პარაგრაფი 4 „შესაძლო გვერდითი მოქმედება“).

· თუ თირკმელზედა ჯირკვლის ფუნქცია დასუსტებულია (თირკმელზედა ჯირკვლის უკმარისობა).

· თუ ფარისებრი ჯირკვლის ფუნქციის უკმარისობა გამოწვეულია ჰიპოფიზის დაავადებით. შესაძლოა, ეს მდგომარეობა მიმდინარეობს თირკმელზედა ჯირკვლის ქერქის უკმარისობის თანხლებით, რომელიც თქვენმა ექიმმა უნდა მოაწესრიგოს ფარისებრი ჯირკვლის ჰორმონებით მკურნალობის დაწყებამდე (თერაპია ჰიდროკორტიზონით). შესაბამისი მკურნალობის გარეშე შეიძლება განვითარდეს თირკმელზედა ჯირკვლის ქერქის მწვავე უკმარისობა (ადისონური კრიზი).

· თუ არსებობს ეჭვი ფარისებრ ჯირკვალში ისეთი უბნების არსებობაზე, რომლებიც უკონტროლოდ გამოიმუშავებენ ფარისებრი ჯირკვლის ჰორმონს. მკურნალობის დაწყებამდე უნდა ჩაატაროთ ფარისებრი ჯირკვლის ფუნქციის დამატებითი გამოკვლევა.

· ქალებში მენოპაუზის დაწყების შემდეგ,  როდესაც  მომატებულია  ძვლოვანი ქსოვილის დაკარგვის რისკი (ოსტეოპოროზი). თქვენმა ექიმმა ხშირად უნდა შეამოწმოს ფარისებრი ჯირკვლის ფუნქცია, იმისათვის, რომ თავიდან აიცილოთ ფარისებრი ჯირკვლის ჰორმონის დონის მომატება, ასევე, უმცირესი ეფექტიანი დოზის გამოყენების შესაძლებლობის უზრუნველსაყოფად.

· თუ გაქვთ შაქრიანი დიაბეტი. დეტალური ინფორმაცია იხილეთ პარაგრაფში „სხვა სამკურნალო საშუალებები და პრეპარატი L-თიროქსინი 25 ბერლინ-ჰემი“.

· თუ იღებთ სისხლის შედედების საწინააღმდეგო გარკვეულ სამკურნალო საშუალებებს (მაგალითად, დიკუმაროლი) ან პრეპარატებს, რომლებიც მოქმედებენ ფარისებრ ჯირკვალზე (მაგალითად, ამიოდარონი, თიროზინკინაზას ინჰიბიტორები

[კიბოს სამკურნალო პრეპარატები], სალიცილატები და ფუროსემიდი მაღალი დოზებით). დეტალური ინფორმაცია იხილეთ პარაგრაფში „სხვა სამკურნალო საშუალებები და პრეპარატი L-თიროქსინი 25 ბერლინ-ჰემი“.

· თუ თქვენ, მაგალითად, გიტარდებათ დიალიზი, და იღებთ ისეთ სამკურნალო საშუალებას, როგორიცაა სეველამერი, სისხლში ფოსფატების ძალიან მაღალი დონის გამო, თქვენმა ექიმმა შესაძლოა განიხილოს სისხლის გარკვეული პარამეტრებზე დაკვირვების საკითხი ლევოთიროქსინის ეფექტიანობის შეფასების მიზნით (ასევე, იხ. პარაგრაფი „სხვა სამკურნალო საშუალებები და პრეპარატი L-თიროქსინი 25 ბერლინ-ჰემი“).

· თუ წარსულში გქონდათ ეპილეფსია, ამ შემთხვევაში არსებობს კრუნჩხვითი შეტევების განვითარების მომატებული რისკი.

· თუ განვითარდა ალერგიული რეაქცია (იხ. პარაგრაფი 4 „შესაძლო გვერდითი მოქმედება“). დაუყოვნებლივ დაუკავშირდით თქვენს ექიმს ან სხვა სამედიცინო მუშაკს, ან მიმართეთ უახლოესი საავადმყოფოს გადაუდებელი დახმარების განყოფილებას.

· თუ გიტარდებათ ლაბორატორიული გამოკვლევები  ფარისებრი  ჯირკვლის ჰორმონის დონის კონტროლის მიზნით, უნდა აცნობოთ თქვენს ექიმს ან/და ლაბორატორიის თანამშრომელს, რომ იღებთ ან ახლახანს იღებდით ბიოტინს (ასევე ცნობილი, როგორც ვიტამინი H, ვიტამინი B7 ან ვიტამინი B8). ბიოტინს შეუძლია გავლენა მოახდინოს თქვენი ლაბორატორიული ანალიზების შედეგებზე. ანალიზის შესაბამისად, ბიოტინის გავლენა შეიძლება გამოიხატებოდეს მისი შედეგების ცრუდ მომატებით ან ცრუდ შემცირებით. თქვენმა ექიმმა შეიძლება მოგიხსნათ ბიოტინი ლაბორატორიული გამოკვლევების ჩატარების წინ. ასევე გაითვალისწინეთ, რომ სხვა პრეპარატები, მაგალითად პოლივიტამინები ან საკვები დანამატები, რომლებიც შეიძლება მიიღოთ თმის, კანისა და ფრჩხილების მდგომარეობის გასაუმჯობესებლად, ასევე შეიძლება შეიცავდეს ბიოტინს. ეს შეიძლება გავლენას ახდენდეს ლაბორატორიული გამოკვლევების შედეგებზე. აცნობეთ თქვენს ექიმს ან/და ლაბორატორიის თანამშრომელს, თუ იღებთ ასეთ პრეპარატებს (იხ. ინფორმაცია პარაგრაფში „სხვა სამკურნალო საშუალებები და პრეპარატი L- თიროქსინი 25 ბერლინ-ჰემი“).

არასათანადო გამოყენება
პრეპარატი L-თიროქსინი 25 ბერლინ-ჰემი არ უნდა მიიღოთ სხეულის წონის დაკლების მიზნით. სისხლში ფარისებრი ჯირკვლის ჰორმონის ნორმალური დონის შემთხვევაში, ფარისებრი ჯირკვლის ჰორმონების დამატებითი მიღება არ გამოიწვევს წონის კლებას. თქვენი ექიმის განსაკუთრებული მითითების გარეშე ფარისებრი ჯირკვლის ჰორმონების დამატებითი მიღებისას ან დოზის გაზრდისას შეიძლება განვითარდეს სერიოზული ან  სიცოცხლისთვისაც კი საშიში გვერდითი  მოქმედებები, განსაკუთრებით წონის დასაკლებ ზოგიერთ პრეპარატთან კომბინაციაში.

მკურნალობის შეცვლა

ლევოთიროქსინის შემცველი სხვა პრეპარატით სამკურნალო საშუალების შეცვლის საჭიროებისას, შეიძლება განვითარდეს ფარისებრი ჯირკვლის ფუნქციის ბალანსის დარღვევა. პრეპარატის შეცვლასთან დაკავშირებით რაიმე კითხვების არსებობისას კონსულტაციისთვის მიმართეთ თქვენს ექიმს. გარდამავალ პერიოდში საჭიროა გულდასმით კონტროლი (კლინიკური და ბიოქიმიური). რომელიმე გვერდითი მოქმედების გამოვლენის შემთხვევაში შეატყობინეთ თქვენს ექიმს, რადგან ამ შემთხვევაში შეიძლება საჭირო გახდეს თქვენს მიერ მიღებული პრეპარატის დოზის გაზრდა ან შემცირება.

ხანდაზმული პირები
ხანდაზმული პირებისთვის საჭიროა პრეპარატის დოზირების სიფრთხილით შერჩევა (განსაკუთრებით გულის დაავადებების არსებობისას) და უფრო ხშირი საექიმო კონტროლი.

ბავშვები და მოზარდები
დაბადებისას სხეულის ძალიან დაბალი წონის მქონე დღენაკლულ ახალშობილებში ლევოთიროქსინით მკურნალობის დასაწყისში საჭიროა არტერიული წნევის რეგულარული კონტროლი, რადგან შეიძლება განვითარდეს არტერიული წნევის სწრაფი დაცემა, რომელიც ცნობილია, როგორც მწვავე სისხლძარღვოვანი უკმარისობა (იხ. პარაგრაფი 4 „შესაძლო გვერდითი მოქმედება“).

სხვა სამკურნალო საშუალებები და პრეპარატი L-თიროქსინი 25 ბერლინ-ჰემი
მიმართეთ თქვენს ექიმს ან ფარმაცევტს, თუ იღებთ, ახლო წარსულში იღებდით, ან გეგმავთ რომელიმე სხვა სამკურნალო საშუალების მიღებას.

L-თიროქსინი 25 ბერლინ-ჰემი გავლენას ახდენს შემდეგი სამკურნალწამლო ნივთიერებების ან პრეპარატების ჯგუფების მოქმედებაზე:
· დიაბეტის საწინააღმდეგო პრეპარატები (სისხლში შაქრის დონის დამწევი პრეპარატები) - როგორიცაა მეტფორმინი, გლიმეპირიდი, გლიბენკლამიდი და ინსულინი):

თუ გაქვთ შაქრიანი დიაბეტი, საჭიროა სისხლში შაქრის დონის რეგულარული კონტროლი, ძირითადად, ფარისებრი ჯირკვლის ჰორმონებით მკურნალობის დასაწყისში და მკურნალობის დასრულებისას. შეიძლება საჭირო იყოს თქვენი ექიმის მიერ სისხლში შაქრის დონის დამწევი პრეპარატების დოზის კორექცია, რადგან ლევოთიროქსინს შეუძლია შეამციროს ამ პრეპარატების ეფექტი.

· კუმარინის წარმოებულები (სისხლის შედედების საწინააღმდეგო სამკურნალო საშუალებები):
პრეპარატ L-თიროქსინი 25 ბერლინ-ჰემისა და კუმარინის წარმოებულების (მაგალითად, დიკუმაროლის) ერთდროულად მიღებისას საჭიროა სისხლის შედედების მაჩვენებლების რეგულარული კონტროლი. შეიძლება საჭირო გახდეს

თქვენი ექიმის მიერ სისხლის შედედების საწინააღმდეგო პრეპარატების დოზის შემცირება, რადგან ლევოთიროქსინს შეუძლია გააძლიეროს მათი მოქმედება.

პრეპარატ  L-თიროქსინი  25  ბერლინ-ჰემის  მოქმედებაზე  გავლენას  ახდენს  შემდეგი პრეპარატები:
 ·    იონმიმოცვლითი ფისები:

სისხლში ლიპიდების დონის დამაქვეითებელი პრეპარატები (მაგალითად, კოლესტირამინი, კოლესტიპოლი) ან  სისხლში კალიუმის კონცენტრაციის დამაქვეითებელი პრეპარატები (პოლისტირენის სულფონის მჟავას კალციუმისა და ნატრიუმის მარილები) უნდა მიიღოთ პრეპარატ L-თიროქსინი 25 ბერლინ-ჰემის მიღებიდან 4-5 საათის შემდეგ. ეს სამკურნალო საშუალებები თრგუნავს ლევოთიროქსინის შეწოვას ნაწლავიდან, და შესაბამისად, ამცირებს მის ეფექტიანობას.

·    პროტონული ტუმბოს ინჰიბიტორები:
პროტონული ტუმბოს ინჰიბიტორები (როგორიცაა ომეპრაზოლი, ეზომეპრაზოლი, პანტოპრაზოლი, რაბეპრაზოლი და ლანსოპრაზოლი) გამოიყენება კუჭში მჟავას გამომუშავების შესამცირებლად, რამაც შეიძლება შეამციროს ლევოთიროქსინის შეწოვა ნაწლავიდან, და შესაბამისად,  შეამციროს მისი ეფექტიანობა.  თუ იღებთ ლევოთიროქსინს პროტონული ტუმბოს ინჰიბიტორებთან ერთად, თქვენმა ექიმმა უნდა გააკონტროლოს ფარისებრი ჯირკვლის ფუნქცია და შეიძლება საჭირო გახდეს პრეპარატ L-თიროქსინი 25 ბერლინ-ჰემის დოზის კორექტირება.

·    სეველამერი და ლანტანის კარბონატი:
სეველამერს და ლანტანის კარბონატს (სისხლში ფოსფატების დონის დამწევი პრეპარატები დიალიზზე მყოფი პაციენტებისათვის) შეუძლია დააქვეითოს ლევოთიროქსინის შეწოვა და ეფექტიანობა.  თქვენმა ექიმმა უფრო ხშირად უნდა შეამოწმოს ფარისებრი ჯირკვლის ფუნქცია (ასევე, იხ. პარაგრაფი „გაფრთხილება და სიფრთხილის ზომები“).

·    ნაღვლის მჟავების შემაკავშირებელი საშუალებები:
კოლესეველამი (სისხლში ქოლესტერინის კონცენტრაციის დამაქვეითებელი პრეპარატი) იკავშირებს ლევოთიროქსინს და შესაბამისად ამცირებს ლევოთიროქსინის შეწოვას ნაწლავიდან. ამიტომ, პრეპარატი L-თიროქსინი 25 ბერლინ-ჰემი მიიღეთ კოლესეველამის მიღებამდე 4 საათით ადრე.

·    კუჭის   წვენის   მჟავას   შემაკავშირებელი   ალუმინის   შემცველი სამკურნალო საშუალებები, რკინისა და კალციუმის შემცველი პრეპარატები:
L-თიროქსინი 25 ბერლინ-ჰემის მიღება საჭიროა კუჭის წვენის მჟავას შემაკავშირებელი ალუმინის შემცველი სამკურნალო საშუალებების (ანტაციდები, სუკრალფატი), ასევე, რკინის ან კალციუმის შემცველი პრეპარატების მიღებამდე არანაკლებ ორი საათით ადრე. ეს პრეპარატები  თრგუნავს  ლევოთიროქსინის შეწოვას ნაწლავიდან, და შესაბამისად ამცირებს მის ეფექტიანობას.

·    პროპილთიოურაცილი,  გლუკოკორტიკოიდები, ბეტა-ადრენობლოკერები (განსაკუთრებით, პროპრანოლოლი):
პროპილთიოურაცილი (ფარისებრი ჯირკვლის მომატებული ფუნქციის სამკურნალო საშუალება), გლუკოკორტიკოიდები  (თირკმელზედა  ჯირკვლის ქერქის ჰორმონები, „კორტიზონი“) და ბეტა-ადრენობლოკერები (გულის შეკუმშვათა სიხშირის შესამცირებელი და არტერიული წნევის დამწევი პრეპარატები) თრგუნავს ლევოთიროქსინის გადასვლას მის უფრო აქტიურ ფორმაში - ლიოთირონინში, და ამ გზით მათ შეუძლია შეამციროს პრეპარატ L-თიროქსინი 25 ბერლინ-ჰემის ეფექტიანობა.

·    ამიოდარონი, იოდის შემცველი კონტრასტული საშუალებები:
ამიოდარონს (გულის რიტმის დარღვევების სამკურნალო პრეპარატი) და იოდის შემცველ კონტრასტულ საშუალებებს (განსაზღვრული პრეპარატები რენტგენოლოგიური დიაგნოსტიკისთვის), იოდის მაღალი შემცველობის გამო, შეუძლია გამოიწვიოს ფარისებრი ჯირკვლის აქტივობის როგორც მომატება, ასევე დაქვეითება. განსაკუთრებით საყურადღებოა კვანძოვანი ჩიყვი შესაძლო დაუდგენელი უბნებით ფარისებრ ჯირკვალში, რომლებიც უკონტროლოდ გამოყოფენ ფარისებრი ჯირკვლის ჰორმონებს (ფუნქციური ავტონომია). ამიოდარონი თრგუნავს ლევოთიროქსინის გადასვლის პროცესს უფრო აქტიურ ფორმაში - ლიოთირონინში, და ამ გზით შეიძლება გავლენა მოახდინოს პრეპარატ L- თიროქსინი 25 ბერლინ-ჰემის მოქმედებაზე. საჭიროების შემთხვევაში, თქვენმა ექიმმა შესაბამისად უნდა შეცვალოს პრეპარატ L-თიროქსინი 25 ბერლინ-ჰემის დოზა.

·    შემდეგ  სამკურნალო  საშუალებებს  შეუძლია   გავლენა  იქონიოს   პრეპარატ L- თიროქსინი 25 ბერლინ-ჰემის მოქმედებაზე:
o სალიცილატები,  განსაკუთრებით  დღე-ღამეში  2  გ-ზე  მეტი  დოზით  (სიცხის დამწევი და ტკივილგამაყუჩებელი პრეპარატები);

o დიკუმაროლი  (სისხლძარღვებში სისხლის  კოლტების  წარმოქმნის შემაფერხებელი პრეპარატი);

o ფუროსემიდი (შარდმდენი საშუალება) მაღალი დოზებით (250 მგ);

o კლოფიბრატი (სისხლის ლიპიდების მომატებული დონის დამწევი საშუალება).

·    ჩასახვის  საწინააღმდეგო  სამკურნალო  საშუალებები  ან  პრეპარატები,  რომლებიც გამოიყენება ჩანაცვლებითი ჰორმონალური თერაპიისთვის:
ლევოთიროქსინის მოთხოვნილება შეიძლება გაიზარდოს ესტროგენების შემცველი ჩასახვის საწინააღმდეგო ჰორმონალური პრეპარატების („აბები“) მიღებისას ან ჰორმონჩანაცვლებითი თერაპიის დროს მენოპაუზის  დადგომის  შემდგომ პერიოდში.

·    სერტრალინი, ქლოროკინი/პროგუანილი:
სერტრალინი (დეპრესიის სამკურნალო პრეპარატი) და ქლოროკინი/პროგუანილი (მალარიისა და რევმატული დაავადებების სამკურნალო საშუალებები) ამცირებს ლევოთიროქსინის ეფექტიანობას.

·    რიფამპიცინი,    კარბამაზეპინი,    ფენიტოინი,    ბარბიტურატები, პრეპარატები, რომლებიც შეიცავს კრაზანას:
რიფამპიცინს (ანტიბიოტიკი), კარბამაზეპინს (გამოიყენება კრუნჩხვითი შეტევების სამკურნალოდ), ფენიტოინს (გამოიყენება კრუნჩხვითი შეტევების და გულის რიტმის დარღვევების სამკურნალოდ), ბარბიტურატებს (გამოიყენება კრუნჩხვითი შეტევების სამკურნალოდ, ანესთეზიისთვის; გარკვეული საძილე საშუალებები) და პრეპარატებს, რომლებიც შეიცავს კრაზანას (მცენარეული სამკურნალო საშუალება), შეუძლია შეასუსტოს ლევოთიროქსინის მოქმედება.

·    პროტეაზას   ინჰიბიტორები   (აივ-ინფექციის   ან/და   ქრონიკული C  ჰეპატიტის სამკურნალო პრეპარატები):
ლევოთიროქსინისა და პროტეაზას ინჰიბიტორების (ლოპინავირი, რიტონავირი) ერთდროულად მიღებისას თქვენმა ექიმმა უნდა განახორციელოს დაავადების სიმპტომების მკაცრი დაკვირვება და გააკონტროლოს ფარისებრი ჯირკვლის ფუნქცია. ლოპინავირის/რიტონავირის ერთდროულად მიღებისას შესაძლებელია ლევოთიროქსინის მოქმედების შემცირება.

·    თიროზინკინაზას ინჰიბიტორები (კიბოს სამკურნალო პრეპარატები): ლევოთიროქსინისა და თიროზინკინაზას ინჰიბიტორების (მაგალითად, იმატინიბი, სუნიტინიბი, სორაფენიბი, მოტესანიბი) ერთდროულად მიღებისას თქვენმა ექიმმა უნდა  განახორციელოს  დაავადების ნიშნების  მკაცრი დაკვირვება  და გააკონტროლოს  ფარისებრი  ჯირკვლის  ფუნქცია. ლევოთიროქსინის  ეფექტიანობა შეიძლება შემცირდეს; აუცილებლობის შემთხვევაში თქვენი ექიმი დააკორექტირებს ლევოთიროქსინის დოზას.

·    სემაგლუტიდი:
ლევოთიროქსინის სემაგლუტიდთან (დიაბეტის საწინააღმდეგო სამკურნალო საშუალება) ერთდროულად მიღებამ შესაძლოა გავლენა იქონიოს ლევოთიროქსინის დონეზე და თქვენმა ექიმმა შეიძლება გააკონტროლოს ფარისებრი ჯირკვლის ჰორმონების დონე და დააკორექტიროს პრეპარატ L-თიროქსინი 25 ბერლინ-ჰემის დოზა.

·    ორლისტატი:

ორლისტატს (გამოიყენება სიმსუქნის სამკურნალოდ) შეუძლია შეამციროს ლევოთიროქსინის შეწოვა.

·    ბიოტინი (ასევე ცნობილი, როგორც ვიტამინი H, ვიტამინი B7 ან ვიტამინი B8): ფარისებრი ჯირკვლის ჰორმონების დონის კონტროლის მიზნით ლაბორატორიული გამოკვლევების ჩატარებისას, უნდა აცნობოთ თქვენს ექიმს ან/და ლაბორატორიის თანამშრომელს,  თუ  იღებთ  ან  ახლო  წარსულში  იღებდით  ბიოტინს.  ბიოტინმა შეიძლება გავლენა მოახდინოს თქვენი ლაბორატორიული ანალიზების შედეგებზე (იხ. პარაგრაფი „გაფრთხილება და სიფრთხილის ზომები“).

პრეპარატ L-თიროქსინი 25 ბერლინ-ჰემის მიღება საკვებთან და სასმელთან ერთად

რეკომენდებული არ არის L-თიროქსინი 25  ბერლინ-ჰემის მიღება საკვებთან და სასმელთან ერთად, განსაკუთრებით კალციუმით მდიდართან (მაგალითად, რძე და რძის პროდუქტები), რადგან აღნიშნულმა შეიძლება მნიშვნელოვნად შეამციროს ლევოთიროქსინის შეწოვა.

სოიოს შემცველი პროდუქტების მოხმარებისას თქვენმა ექიმმა უფრო ხშირად უნდა აკონტროლოს სისხლში ფარისებრი ჯირკვლის ჰორმონების დონე. ასეთი დიეტის დაცვის დროს და დიეტის დასრულებისას თქვენი ექიმი სავარაუდოდ განახორციელებს პრეპარატ L-თიროქსინი 25 ბერლინ-ჰემის დოზის კორექტირებას (შეიძლება საჭირო იყოს უჩვეულოდ მაღალი დოზები), რადგან სოიოს შემცველ პროდუქტებს შეუძლია დაარღვიოს ლევოთიროქსინის შეწოვა ნაწლავიდან, და შესაბამისად შეამციროს მისი ეფექტიანობა.

არ მიიღოთ L-თიროქსინი 25 ბერლინ-ჰემი ყავასთან ერთად, რადგან ეს შეიძლება იწვევდეს ნაწლავში ლევოთიროქსინის შეწოვის დაქვეითებას და შესაბამისად მისი ეფექტის შემცირებას. პრეპარატ L-თიროქსინი 25 ბერლინ-ჰემის მიღების შემდეგ ყავის დალევა შეიძლება სულ  მცირე ნახევარი საათი-ერთი  საათის შემდეგ. ლევოთიროქსინით მკურნალობისას პაციენტებისთვის რეკომენდებული არ არის ყავის მიღების ჩვევის შეცვლა მკურნალი ექიმის მიერ ჩატარებული შემოწმებისა და ლევოთიროქსინის დონის კონტროლის გარეშე.

ორსულობა, ძუძუთი კვება და შვილოსნობის ფუნქცია
თუ ხართ ორსულად ან ბავშვს ძუძუთი კვებავთ, ფიქრობთ, რომ ხართ ორსულად, ან გეგმავთ ორსულობას, მოცემული პრეპარატის მიღებამდე კონსულტაციისთვის მიმართეთ თქვენს ექიმს ან ფარმაცევტს.

ორსულობისა და ძუძუთი კვების დროს ფარისებრი ჯირკვლის ჰორმონებით სწორი მკურნალობა განსაკუთრებით მნიშვნელოვანია დედისა და მომავალი ბავშვის ჯანმრთელობისთვის. ამიტომ, საჭიროა მისი უწყვეტად გაგრძელება მკურნალი ექიმის დაკვირვების ქვეშ. ორსულობის დროს პრეპარატის ფართოდ გამოყენების მიუხედავად, ორსულობის მიმდინარეობაზე და ნაყოფის ან ახალშობილის ჯანმრთელობაზე ლევოთიროქსინის არასასურველი ზემოქმედება ამ დრომდე გამოვლენილი არ არის.

ფარისებრი ჯირკვლის ფუნქციის კონტროლი  საჭიროა როგორც ორსულობის დროს, ასევე მის შემდეგ. ორსულობისას სისხლში ესტროგენის (ქალის სასქესო ჰორმონი) მომატებული დონის გამო შეიძლება გაიზარდოს ფარისებრი ჯირკვლის ჰორმონზე მოთხოვნილება, რაც შეიძლება საჭიროებდეს თქვენი ექიმის მიერ დოზის კორექტირებას.

ორსულობის დროს არ შეიძლება L-თიროქსინი 25 ბერლინ-ჰემის მიღება ფარისებრი ჯირკვლის მომატებული ფუნქციის სამკურნალო პრეპარატებთან (თირეოსტატული) ერთად, რადგან ეს იწვევს თირეოსტატულების უფრო მაღალი დოზებით მიღების აუცილებლობას. თირეოსტატულებს (ლევოთიროქსინისგან განსხვავებით) შეუძლია პლაცენტის გავლით შეაღწიოს ნაყოფის სისხლში და გამოიწვიოს ნაყოფის ფარისებრი ჯირკვლის   ფუნქციის   დაქვეითება.   ამიტომ,   ორსულობის   პერიოდში   ფარისებრი

ჯირკვლის მომატებული ფუნქციის მკურნალობა უნდა ჩატარდეს თირეოსტატულების მხოლოდ დაბალი დოზებით.

თუ ბავშვს  ძუძუთი კვებავთ, გააგრძელეთ ლევოთიროქსინის  მიღება თქვენი ექიმის რეკომენდაციების შესაბამისად. ლევოთიროქსინის მაღალი დოზებით მკურნალობის შემთხვევაშიც კი დედის რძეში ხვდება ლევოთიროქსინის ძალიან მცირე რაოდენობა, ამიტომ პრეპარატი საფრთხეს არ წარმოადგენს.

ფარისებრი ჯირკვლის ფუნქციის დაქვეითება ან მომატება, სავარაუდოდ, გავლენას ახდენს შვილოსნობის ფუნქციაზე.

ფარისებრი ჯირკვლის ფუნქციის დაქვეითების შემთხვევაში პაციენტების მკურნალობისას პრეპარატ L-თიროქსინი 25 ბერლინ-ჰემის დოზა უნდა შეირჩეს ლაბორატორიული მაჩვენებლების საფუძველზე, რადგან პრეპარატის არასაკმარისი დოზის მიღება არ გამოიწვევს  ფარისებრი ჯირკვლის  დაქვეითებული ფუნქციის გაუმჯობესებას, ხოლო მისი ჭარბი დოზით მიღებამ შეიძლება გამოიწვიოს მისი ფუნქციის მომატება.

სატრანსპორტო საშუალებების მართვა და მექანიზმებთან მუშაობა
სატრანსპორტო საშუალებების მართვისა და მექანიზმებთან მუშაობის უნარზე პრეპარატ L-თიროქსინი 25 ბერლინ-ჰემის ზემოქმედების შესახებ კვლევები არ ჩატარებულა.

პრეპარატი L-თიროქსინი 25 ბერლინ-ჰემი შეიცავს ნატრიუმს
მოცემული სამკურნალო საშუალების ერთი ტაბლეტი შეიცავს 1 მმოლზე (23 მგ) ნაკლებ ნატრიუმს, ესე იგი შეიძლება ჩავთვალოთ, რომ პრაქტიკულად „არ შეიცავს ნატრიუმს“.

3   როგორ მიიღება პრეპარატი L-თიროქსინი 25 ბერლინ-ჰემი

მოცემული პრეპარატი ყოველთვის მიიღეთ თქვენი ექიმის რეკომენდაციების ზუსტად დაცვით. ეჭვის არსებობის შემთხვევაში, რჩევისთვის მიმართეთ თქვენს ექიმს ან ფარმაცევტს.

ინდივიდუალური სადღეღამისო დოზა უნდა განისაზღვროს თქვენი ექიმის მიერ გამოკვლევების შედეგების მიხედვით.

დოზირება
წარმოდგენილია ტაბლეტები მოქმედი ნივთიერების სხვადასხვა შემცველობით (25-150 მიკროგრამი ლევოთიროქსინ-ნატრიუმი) ინდივიდუალური მკურნალობისთვის, შესაბამისად, ჩვეულებრივ საჭიროა დღე-ღამეში ერთი ტაბლეტის მიღება.

არსებული სიმპტომატიკის მიხედვით თქვენმა ექიმმა უნდა იხელმძღვანელოს შემდეგი რეკომენდაციებით:
· მოზრდილებში ფარისებრი ჯირკვლის დაქვეითებული ფუნქციის მკურნალობის დასაწყისში მიიღება 25-50 მკგ ლევოთიროქსინ-ნატრიუმი დღე-ღამეში. ექიმის მითითებით,   2-4   კვირის   ინტერვალით   ლევოთიროქსინ-ნატრიუმის   ამ   დოზის

გაზრდა შეიძლება 25-50 მკგ-ით, ლევოთიროქსინ-ნატრიუმის დღიურ დოზამდე 100- 200 მკგ.

· ჩიყვის რეციდივის პროფილაქტიკისთვის ჩიყვის რეზექციის შემდეგ, ასევე კეთილთვისებიანი ჩიყვის სამკურნალოდ მიიღება 75-200 მკგ ლევოთიროქსინ- ნატრიუმი დღე-ღამეში.

· თანმხლები თერაპიის სახით ფარისებრი ჯირკვლის მომატებული ფუნქციის თირეოსტატული პრეპარატებით მკურნალობის დროს ღებულობენ 50-100 მკგ ლევოთიროქსინ-ნატრიუმს დღე-ღამეში.

· ფარისებრი  ჯირკვლის ავთვისებიანი სიმსივნის დროს, ფარისებრ ჯირკვალზე ქირურგიული ჩარევის შემდეგ მიიღება 150-300 მკგ ლევოთიროქსინ-ნატრიუმი დღე-ღამეში.

ფარისებრი ჯირკვლის ჰორმონის უფრო დაბალი დოზების მიღებაც შეიძლება იყოს საკმარისი.

გამოყენება ბავშვებში
ფარისებრი ჯირკვლის ფუნქციის დაქვეითების (თანდაყოლილი და  შეძენილი ჰიპოთირეოზი) ხანგრძლივი მკურნალობისას შემანარჩუნებელი დოზა დღე-ღამეში ჩვეულებრივ შეადგენს 100-150 მკგ ლევოთიროქსინ-ნატრიუმს სხეულის ზედაპირის ფართობის კვადრატულ მეტრზე.

ახალშობილებისათვის და ჩვილებისათვის ფარისებრი ჯირკვლის ფუნქციის თანდაყოლილი დაქვეითებით ჰორმონების სწრაფი ჩანაცვლება განსაკუთრებით მნიშვნელოვანია მათი ნორმალური გონებრივი და ფიზიკური განვითარებისთვის. ლევოთიროქსინ-ნატრიუმის რეკომენდებული საწყისი დოზა შეადგენს დღე-ღამეში 10- 15 მკგ-ს სხეულის მასის კილოგრამზე პირველი 3 თვის განმავლობაში. შემდეგ ექიმმა უნდა შეარჩიოს სადღეღამისო დოზა ინდივიდუალურად, კლინიკური კვლევების (განსაკუთრებით სისხლში ფარისებრი ჯირკვლის ჰორმონების დონის) შედეგების მიხედვით.

ფარისებრი ჯირკვლის ფუნქციის შეძენილი დაქვეითების მქონე ბავშვებისათვის ლევოთიროქსინ-ნატრიუმის რეკომენდებული საწყისი დოზა შეადგენს 12.5-50 მკგ-ს დღე-ღამეში. ექიმმა უნდა გაზარდოს სადღეღამისო დოზა თანდათანობით: ყოველ 2-4 კვირაში დოზის მიღწევამდე, რომელიც საჭიროა სრული მოცულობით ჩანაცვლებითი თერაპიისთვის. ამასთან, ექიმისთვის განსაკუთრებული მნიშვნელობა აქვს სისხლში ფარისებრი ჯირკვლის ჰორმონების დონეს.

ხანდაზმული პაციენტები, გულის კორონარული დაავადების მქონე პაციენტები და ფარისებრი ჯირკვლის დაქვეითებული ფუნქციის მქონე პაციენტები
ხანდაზმულ პაციენტებში, გულის კორონარული დაავადების  მქონე პაციენტებსა და ფარისებრი ჯირკვლის ფუნქციის მძიმე ან ხანგრძლივი დაქვეითების მქონე პაციენტებში ფარისებრი ჯირკვლის ჰორმონებით მკურნალობის დაწყება საჭიროა განსაკუთრებული სიფრთხილით (დაბალი საწყისი დოზა, რომელიც უნდა გაიზარდოს თანდათანობით, დროის დიდი ინტერვალებით; ამასთან, საჭიროა ფარისებრი ჯირკვლის ჰორმონების დონის ხშირი კონტროლი).

პაციენტები სხეულის დაბალი წონით და პაციენტები დიდი ზომის კვანძოვანი ჩიყვით

კლინიკური გამოცდილება გვიჩვენებს, რომ სხეულის დაბალი წონის და დიდი ზომის კვანძოვანი ჩიყვის მქონე  პაციენტების  მკურნალობისას პრეპარატის დაბალი დოზაც ოპტიმალურია.

გამოყენების წესი

პრეპარატის სრული სადღეღამისო დოზა მიიღება დილით, დიდი რაოდენობით სითხესთან ერთად (თუ შესაძლებელია, ჭიქა წყლის მიყოლებით); პრეპარატის მიღება საჭიროა უზმოზე, საუზმემდე არანაკლებ ნახევარი საათით ადრე. მოქმედი ნივთიერების მიღება უკეთესია უზმოზე, ვიდრე ჭამის წინ ან ჭამის შემდეგ.

ბავშვებს პრეპარატის სრული სადღეღამისო დოზა უნდა მისცეთ საკვების პირველ მიღებამდე არანაკლებ ნახევარი საათით ადრე. ასევე, შეგიძლიათ ტაბლეტი გახსნათ მცირე რაოდენობის წყალში (10-15 მლ) და მისცეთ ჩვილს მიღებული სუსპენზია (ყოველ მიღებაზე მზადდება ახალი!) დამატებითი რაოდენობის სითხესთან ერთად (5-10 მლ).

მიღების ხანგრძლივობა
ფარისებრი ჯირკვლის ფუნქციის დაქვეითების დროს და ფარისებრი  ჯირკვლის ავთვისებიანი სიმსივნის დროს ფარისებრ ჯირკვალზე ქირურგიული ჩარევის შემდეგ L- თიროქსინი 25 ბერლინ-ჰემი ჩვეულებრივ მიიღება მთელი ცხოვრების განმავლობაში. კეთილთვისებიანი ჩიყვის დროს და ჩიყვის რეციდივის პროფილაქტიკისთვის: რამდენიმე თვიდან ან წლიდან მთელი ცხოვრების განმავლობაში. თანმხლები თერაპიის სახით ფარისებრი ჯირკვლის მომატებული ფუნქციის მკურნალობის დროს პრეპარატი L-თიროქსინი 25 ბერლინ-ჰემი მიიღება თირეოსტატული პრეპარატებით (ფარისებრი ჯირკვლის მომატებული ფუნქციის დამთრგუნველი სამკურნალო საშუალებები) მკურნალობის მთელი პერიოდის განმავლობაში. კეთილთვისებიანი ჩიყვის სამკურნალოდ ფარისებრი ჯირკვლის ნორმალური ფუნქციის დროს მკურნალობის საჭირო პერიოდია 6 თვიდან 2 წლამდე. თუ პრეპარატ L-თიროქსინი 25 ბერლინ-ჰემით მკურნალობისას არ იქნა მიღებული სასურველი შედეგი ამ დროის განმავლობაში, თქვენმა ექიმმა საჭიროა განიხილოს მკურნალობის სხვა მეთოდის გამოყენების შესაძლებლობა.

თუ მიიღეთ L-თიროქსინი 25 ბერლინ-ჰემის საჭიროზე მეტი დოზა
დოზის გადაჭარბების ნიშნები აღწერილია მე-4 პარაგრაფში „შესაძლო გვერდითი მოქმედება“. ასეთი დარღვევების გამოვლენის შემთხვევაში მიმართეთ თქვენს ექიმს.

თუ დაგავიწყდათ L-თიროქსინი 25 ბერლინ-ჰემის დოზის მიღება
პრეპარატის ძალიან დაბალი დოზის მიღებისას ან დოზის მიღების გამოტოვების შემთხვევაში, არ მიიღოთ ორმაგი დოზა გამოტოვებულის საკომპენსაციოდ, დაიცავით პრეპარატის მიღების დადგენილი პერიოდულობა.

თუ შეწყვიტეთ პრეპარატ L-თიროქსინი 25 ბერლინ-ჰემის მიღება
იმისათვის, რომ მკურნალობა იყოს წარმატებული, პრეპარატ L-თიროქსინი 25 ბერლინ- ჰემის მიღება საჭიროა რეგულარულად ექიმის მიერ დანიშნული დოზირებით. არ შეიძლება პრეპარატ L-თიროქსინი 25 ბერლინ-ჰემით მკურნალობის რეჟიმის დამოუკიდებლად შეცვლა, შეწყვეტა ან ვადამდე დასრულება, რადგან ამ შემთხვევაში არსებულმა დარღვევებმა შეიძლება კვლავ იჩინოს თავი.

მოცემული პრეპარატის გამოყენების   შესახებ   დამატებითი კითხვების   არსებობის შემთხვევაში მიმართეთ თქვენს ექიმს ან ფარმაცევტს.

4 შესაძლო გვერდითი მოქმედება

როგორც ყველა სამკურნალო საშუალებას, მოცემულ პრეპარატსაც შეუძლია გამოიწვიოს გვერდითი მოქმედება, თუმცა ის არ ვლინდება ყველა პაციენტში.

მომატებული  მგრძნობელობა  მოქმედი  ნივთიერების  ან  პრეპარატ  L-თიროქსინი  25 ბერლინ-ჰემის სხვა კომპონენტების მიმართ
ლევოთიროქსინის ან პრეპარატ L-თიროქსინი 25 ბერლინ-ჰემის ნებისმიერი კომპონენტის მიმართ მომატებული მგრძნობელობის შემთხვევაში შეიძლება გამოვლინდეს ალერგიული რეაქციები კანის და სასუნთქი სისტემის მხრივ (პრეპარატის მიღებისთანავე ან მიღებიდან რამდენიმე დღის განმავლობაში), რომლებიც შესაძლოა საფრთხეს წარმოადგენდეს სიცოცხლისთვის. სიმპტომები შეიძლება ითვალისწინებდეს გამონაყარს, ქავილს, გაძნელებულ სუნთქვას, ქოშინს, სახის, ტუჩების, ყელის ან ენის შეშუპებას. დაუყოვნებლივ დაუკავშირდით თქვენს ექიმს ან სხვა სამედიცინო მუშაკს, ან მიმართეთ უახლოესი საავადმყოფოს გადაუდებელი დახმარების განყოფილებას.

პრეპარატის დანიშნული დოზის აუტანლობა, დოზის გადაჭარბება
თუ ცალკეულ შემთხვევებში პრეპარატის განსაზღვრული დოზა ვერ აიტანება პაციენტის მიერ ან განვითარდა დოზის გადაჭარბება, მაშინ, განსაკუთრებით მკურნალობის დასაწყისში დოზის ძალიან სწრაფად გაზრდის შემთხვევაში, შეიძლება განვითარდეს ფარისებრი ჯირკვლის მომატებული ფუნქციისთვის (ჰიპერთირეოზი) დამახასიათებელი ტიპიური ნიშნები:

ძალიან ხშირად: შეიძლება აღენიშნოს 10-დან 1-ზე მეტ ადამიანს

·    გახშირებული გულისცემა

·    უძილობა

·    თავის ტკივილი

ხშირად: შეიძლება აღენიშნოს 10-დან 1 ადამიანს

·    გულისცემის გახშირება (ტაქიკარდია)

·    ნევროზულობა

იშვიათად: შეიძლება აღენიშნოს 1000-დან 1 ადამიანს

·    ქალასშიდა წნევის მომატება (განსაკუთრებით ბავშვებში)

უცნობია: არსებული მონაცემების საფუძველზე შეფასება შეუძლებელია

·     მომატებული მგრძნობელობა

·     გულის რიტმის დარღვევა

·     ტკივილი, გულ-მკერდის არეში მოჭერის შეგრძნებით (სტენოკარდია)

·      კანის ალერგიული რეაქციები (მაგალითად, ანგიონევროზული შეშუპება [სუნთქვის გაძნელება ან სახის, ტუჩების, ყელის ან ენის შეშუპება], გამონაყარი, ჭინჭრის ციება)

·     მოუსვენრობა

·     კუნთების სისუსტე, კუნთების კრუნჩხვა

· ოსტეოპოროზი ლევოთიროქსინის მაღალი დოზების მიღების  ფონზე, განსაკუთრებით ქალებში პოსტმენოპაუზის პერიოდში, ძირითადად ხანგრძლივი მკურნალობის დროს

·      სიცხის  შეგრძნება,  სიცხის  აუტანლობა,  მწვავე  სისხლძარღვოვანი  უკმარისობა სხეულის დაბალი  წონის  მქონე დღენაკლულ  ახალშობილებში  (იხ.  პარაგრაფი  2

„გაფრთხილება და სიფრთხილის ზომები“)

·     მენსტრუალური ციკლის დარღვევა

·     ფაღარათი

·     ღებინება

·     გულისრევა

·     წონის დაკარგვა

·     კანკალი (ტრემორი)

·     მომატებული ოფლიანობა

·     ცხელება

გვერდითი მოქმედებების გამოვლენის შემთხვევაში მიმართეთ თქვენს ექიმს. მან უნდა განსაზღვროს პრეპარატის დღიური დოზის შემცირების ან რამდენიმე დღით ტაბლეტების მიღების შეწყვეტის საკითხი. გვერდითი მოქმედების გაქრობისთანავე მკურნალობა შეიძლება გაგრძელდეს პრეპარატის დოზის სიფრთხილით შერჩევის შემდეგ.

შეტყობინება გვერდითი მოქმედებების შესახებ
რომელიმე გვერდითი მოქმედების გამოვლენის შემთხვევაში აცნობეთ თქვენს ექიმს ან ფარმაცევტს. ეს ასევე ეხება ნებისმიერ შესაძლო გვერდით მოქმედებას, რომელიც არ არის მითითებული ამ ჩანართში. ასევე, შეგიძლიათ გააგზავნოთ შეტყობინება გვერდითი მოქმედების შესახებ უშუალოდ შეტყობინებათა ეროვნული სისტემის საშუალებით. გვერდითი მოქმედებების შესახებ ინფორმაციის გაგზავნით შეგიძლიათ დახმარება მოცემული სამკურნალო საშუალების უსაფრთხოების შესახებ მეტი ინფორმაციის შეგროვებაში.

5 პრეპარატ L-თიროქსინი 25 ბერლინ-ჰემის შენახვის პირობები

მოცემული სამკურნალო საშუალება შეინახეთ ბავშვებისთვის მიუწვდომელ ადგილას.

არ გამოიყენოთ მოცემული პრეპარატი ვარგისობის ვადის გასვლის შემდეგ, რომელიც მითითებულია ბლისტერსა და მუყაოს შეფუთვაზე წარწერა „ვარგისია“-ს შემდეგ. ვარგისობის ვადის გასვლის თარიღი გულისხმობს მითითებული თვის ბოლო დღეს.

ვარგისობის ვადა: 36 თვე.

შეინახეთ არაუმეტეს 30˚C ტემპერატურაზე.

შეინახეთ ორიგინალ ბლისტერში სინათლისგან დაცვის მიზნით.

არ გადააგდოთ სამკურნალო საშუალებები კანალიზაციის მილში ან საყოფაცხოვრებო ნაგავთან ერთად. არასაჭირო პრეპარატების უტილიზაციის საკითხთან დაკავშირებით მიმართეთ ფარმაცევტს. ეს ზომები ხელს უწყობს გარემოს დაცვას.

6  შეფუთვის შიგთავსი და დამატებითი ინფორმაცია პრეპარატ L-თიროქსინი 25 ბერლინ-ჰემის შემადგენლობა

მოქმედი ნივთიერება: ლევოთიროქსინ-ნატრიუმი.

ერთი ტაბლეტი შეიცავს 25 მიკროგრამ ლევოთიროქსინ-ნატრიუმს. სხვა კომპონენტები:

ცისტეინის ჰიდროქლორიდის მონოჰიდრატი (ტაბლეტები ნაწილობრივ შეიცავს ცისტინის სახით), მიკროკრისტალური ცელულოზა, სიმინდის სახამებელი, პრეჟელატინიზებული სახამებელი, მაგნიუმის ოქსიდი მსუბუქი, ტალკი.

პრეპარატ L-თიროქსინი 25 ბერლინ-ჰემის აღწერა და შეფუთვის შიგთავსი
პრეპარატი L-თიროქსინი 25   ბერლინ-ჰემი არის  მრგვალი, ოდნავ  ამოზნექილი, თეთრიდან ჩალისფერამდე ტაბლეტები.

პრეპარატი L-თიროქსინი 25 ბერლინ-ჰემი გამოდის ორიგინალ შეფუთვაში 28, 50 და 100 ტაბლეტით.

შეიძლება, გაყიდვაში ყველა ზომის შეფუთვა არ იყოს წარმოდგენილი.

გაცემის  პირობა
ფარმაცევტული პროდუქტის ჯგუფი II, გაიცემა ფორმა №3 რეცეპტით.