კოკარნიტი - Cocarnit 3 ამპულა

კოკარნიტი

სავაჭრო დასახელება

კოკარნიტი, Cocarnit

წამლის ფორმა

საინექციო ხსნარის მოსამზადებელი ლიოფილიზატი.

აღწერილობა: ვარდისფერი ლიოფილიზებული ფხვნილი.

გამხსნელი: გამჭვირვალე უფერო ხსნარი.

შემადგენლობა

1 ფლაკონი ლიოფილიზატით შეიცავს

აქტიური ნივთიერებები: კოკარბოქსილაზას ქლორიდი 50 მგ

ნიკოტინამიდი 20 მგ

დინატრიუმის ადენოზინტრიფოსფატის ტრიჰიდრატი 10 მგ

ციანოკობალამინი 0,5 მგ

დამხმარე ნივთიერებები: გლიცინი, მეთილპარაჰიდროქსიბენზოატი, პროპილპარაჰიდროქსიბენზოატი.

გამხსნელი:0,5% 2მლ ლიდოკაინის ჰიდროქლორიდის ხსნარი.

ასევე, იხილეთ:> ადენიტ ფორტე 3ამპულა+ 3გამხსნელი

პრეპარატის ათქკოდიА11JC

ფარმაკოთერაპიული ჯგუფი

ვიტამინები. ვიტამინების სხვა კომბინირებული პრეპარატები. ვიტამინები კომბინაციაში სხვადასხვა ნივთიერებებთან.

ფარმაკოლოგიური თვისებები

ფარმაკოდინამიკა

პრეპარატი წარმოადგენს მეტაბოლური ნივთიერებებისა და ვიტამინების რაციონალურად შერჩეულ კომპლექსს.

ნიკოტინამიდი - ვიტამინ РР-ს ერთ-ერთი ფორმაა, მონაწილეობს უჯრედში მიმდინარე ჟანგვა-აღდგენით პროცესებში, აუმჯობესებს ნახშირწყლოვან და აზოტოვან ცვლას. კოკარბოქსილაზა - კოფერმენტია, რომელიც ორგანიზმში წარმოიქმნება გარედან მიწოდებული თიამინისგან (ვიტამინი В₁). მნიშვნელოვან როლს ასრულებს ნახშირწყლოვან ცვლაში, შედის ფერმენტ კოკარბოქსილაზას შემადგენლობაში, რომელიც ახდენს α-კეტომჟავების კარბოქსილირებისა და დეკარბოქსილირების კატალიზებას. მეორადად ხელს უწყობს ნუკლეინის მჟავების, ცილებისა და ლიპიდების სინთეზს. ორგანიზმში ამცირებს რძემჟავის და პიროყურძენმჟავის დონეს, ხელს უწყობს გლუკოზის ათვისებას. აუმჯობესებს ნერვული ქსოვილის ტროფიკას.

ციანოკობალამინი (ვიტამინი В₁₂) ორგანიზმში გარდაიქმნება აქტიურ ფორმად (ადენოზილკობალამინი ან კობამამიდი), რომელსაც მაღალი ბიოლოგიური აქტივობა გააჩნია. ზრდის ცილის სინთეზს ორგანიზმში და ხელს უწყობს მის დაგროვებას. ააქტიურებს ნახშირწყლებისა და ლიპიდების ცვლას. აქვეითებს ქოლესტერინის დონეს სისხლში, აფერხებს ღვიძლის ცხიმოვან ინფილტრაციას. აუცილებელია სისხლმბადი ორგანოების ნორმალური ფუნქციონირებისთვის, ხელს უწყობს ერითროციტებში სულფჰიდრილური ჯგუფების შემცველი ნაერთების დაგროვებას, რითაც ამაღლებს მათ მდგრადობას ჰემოლიზისადმი. ზრდის ქსოვილების რეგენერაციის უნარს. დადებით მოქმედებას ახდენს ღვიძლისა და ნერვული სისტემის ფუნქციაზე.

დინატრიუმის ადენოზინტრიფოსფატის ტრიჰიდრატი ადენოზინის წარმოებულია, ასტიმულირებს მეტაბოლურ პროცესებს. გააჩნია ჰიპოტენზიური და ანტიარითმიული მოქმედება. ახდენს სისხლძარღვების გამაფართოვებელ მოქმედებას, მათ შორის კორონარულ არტერიებზე.

ფარმაკოკინეტიკა

მონაცემები პრეპარატის ფარმაკოკინეტიკის შესახებ წარმოდგენილი არ არის.

გამოყენების ჩვენებები

- ნევრიტები, ნეიროპათიები (შაქრიანი დიაბეტის, ინფექციური დაავადებების, პერნიციოზული ანემიის და სხვ. დროს);

- სხვადასხვა წარმოშობის ნევრალგიები;

- მიალგია, იშიალგია;

- ლუმბაგო, რადიკულიტი;

- ბურსიტები, ტენდინიტები;

- გულის იშემიური დაავადება, მიოკარდიტები, კარდიომიოპათიები.

გამოყენების წესი და დოზები

კოკარნიტი შეიყვანება კუნთში 1-2 ფლაკონი ერთხელ დღე-ღამეში.

მკურნალობის ხანგრძლივობა და განმეორებითი კურსების ჩატარება დამოკიდებულია დაავადების ხასიათსა და სიმძიმეზე.

საინექციო ხსნარი მზადდება ლიოფილიზატის შემცველი ერთი ფლაკონი შიგთავსის განზავებით 2 მლ გამხსნელში, უშუალოდ გამოყენების წინ.

პაციენტთა განსაკუთრებული ჯგუფები

ღვიძლისა და თირკმელების ფუნქციის დარღვევები

ღვიძლისა და თირკმლის უკმარისობის მქონე პაციენტებში დოზის კორექცია საჭირო არ არის.

ბავშვები

ბავშვებში პრეპარატის გამოყენების შესახებ ინფორმაცია არ არსებობს.

ხანდაზმული პაციენტები

65 წელზე უფროს პაციენტებში დოზის კორექცია საჭირო არ არის.

უკუჩვენებები

- ჰიპერმგრძნობელობა პრეპარატის ნებისმიერი კომპონენტის მიმართ;

- მიოკარდიუმის ინფარქტის მწვავე პერიოდი;

- ჰიპერკოაგულაცია (მათ შორის მწვავე თრომბოზების დროს), ერითრემია, ერითროციტოზი, არტერიული ჰიპერტონიის მძიმე ფორმები, არტერიული ჰიპოტონია, ფილტვების ანთებითი დაავადებები, გულის მძიმე უკმარისობა, ფსორიაზი, გამტარობის მძიმე დარღვევები, გულის მწვავე უკმარისობა.

გამხსნელის სახით ლიდოკაინის გამოყენებისას აუცილებელია მისი უკუჩვენებების (ჰიპერმგრძნობელობა ამიდური ტიპის საანესთეზიო საშუალებების მიმართ, გულის სრული ბლოკადა, ჰიპოვოლემია) გათვალისწინება.

არასასურველი რეაქციები

არასასურველი რეაქციები, რომელთა შესაძლო კავშირზე კოკარნიტის გამოყენებასთან არსებობს შეტყობინებები, წარმოდგენილია ქვემოთ MedDRA სისტემურ-ორგანული კლასების, უპირატესი ტერმინებისა და სიხშირის მიხედვით.

არასასურველი რეაქციების პარამეტრები განისაზღვრება შემდეგნაირად: ძალიან ხშირად (≥ 1/10); ხშირად (≥ 1/100, მაგრამ < 1/10); არახშირად (≥ 1/1000, მაგრამ < 1/100); იშვიათად (≥ 1/10000, მაგრამ < 1/1000); ძალიან იშვიათად (< 1/10000); სიხშირე უცნობია (არსებული მონაცემებით შეფასება შეუძლებელია).

იმუნური სისტემის მხრივ: სიხშირე უცნობია - ჰიპერმგრძნობელობის რეაქციები (ანაფილაქსიური შოკის ჩათვლით). პრეპარატის კომპონენტების მიმართ ჰიპერმგრძნობელობაზე ეჭვის მქონე პაციენტებში პრეპარატის შეყვანამდე რეკომენდებულია კანის სინჯის ჩატარება.

გულის მხრივ: სიხშირე უცნობია - გულის შეგუბებითი უკმარისობა მკურნალობის დასაწყისში, პალპიტაციები.

სისხლძარღვების მხრივ: სიხშირე უცნობია - პერიფერიული სისხლძარღვების თრომბოზი, წამოხურებები, ჰიპოტენზია.

სასუნთქი სისტემის, გულ-მკერდისა და შუასაყრის ორგანოთა მხრივ: სიხშირე უცნობია - ფილტვების შეშუპება მკურნალობის დასაწყისში, ქოშინი.

კეთილთვისებიანი, ავთვისებიანი და დაუზუსტებელი ახალწარმონაქმნები (კისტებისა და პოლიპების ჩათვლით): სიხშირე უცნობია - ჭეშმარიტი პოლიციტემია.

ნერვული სისტემის მხრივ: სიხშირე უცნობია - თავბრუსხვევა.

კუჭ-ნაწლავის ტრაქტის მხრივ: სიხშირე უცნობია - დიარეა (მსუბუქი ფორმის, ტრანზიტორული), ღებინება, დისკომფორტი ეპიგასტრალურ არეში.

კანისა და კანქვეშა ქსოვილების მხრივ: სიხშირე უცნობია - ქავილი, გამონაყარი (ტრანზიტორული), ალერგიული დერმატიტი, ჭინჭრის ციება, ანგიონევროზული შეშუპება, ჰიპერჰიდროზი.

თირკმელებისა და საშარდე გზების მხრივ: სიხშირე უცნობია - პოლიურია.

ზოგადი დარღვევები და დარღვევები შეყვანის ადგილას: სიხშირე უცნობია - ასთენია, შეუძლოდ ყოფნა, ჰიპერთერმია, შემცივნება, რეაქციები შეყვანის ადგილას, შეყვანის ადგილას ტკივილისა და შეყვანის ადგილას ნეკროზის ჩათვლით.

მითითებული ან სხვა არასასურველი რეაქციების წარმოქმნის შემთხვევაში აუცილებელია ექიმთან მიმართვა.

შეტყობინებები საეჭვო არასასურველი რეაქციების შესახებ

სამკურნალწამლო საშუალების რეგისტრაციის შემდეგ შეტყობინებები საეჭვო არასასურველი რეაქციების შესახებ მნიშვნელოვანია. თუ პაციენტს გამოუვლინდა სერიოზული არასასურველი რეაქცია სამკურნალწამლო საშუალებაზე ან ახალი არასასურველი რეაქციის აღნიშვნის შემთხვევაში, რომელიც ამ ნაწილში აღწერილი არ არის, გთხოვთ, მოახდინოთ ინფორმირება ფარმაკოზედამხედველობის ეროვნული სისტემის შესაბამისად.

განსაკუთრებული მითითებები

მომზადებული ხსნარის ფერი უნდა იყოს მოწითალო-ვარდისფერი.

ხსნარი არ გამოიყენოთ, თუ ფერი შეიცვალა.

ხსნარი განკუთვნილია მხოლოდ კუნთში შესაყვანად! გამხსნელის სახით ლიდოკაინის გამოყენებისას პრეპარატი შეიყვანება მხოლოდ კუნთში!

გამხსნელის სახით ლიდოკაინის გამოყენებამდე აუცილებელია მისი უკუჩვენებების, განსაკუთრებული მითითებებისა და მისი გამოყენების შესახებ გაფრთხილებების შესწავლა. პრეპარატის ვენაში შეყვანა არ შეიძლება!

ხსნარის გამოყენება უნდა მოხდეს მისი მომზადებისთანავე!

კოკარნიტი სიფრთხილით უნდა იქნას გამოყენებული პაციენტებში, რომელთა ანამნეზში არის ცნობები წყლულოვანი დაავადების, გასტრიტის, პოდაგრის, სისხლდენების, ღვიძლისა და სანაღვლე გზების დაზიანებების შესახებ.

პრეპარატის ხანგრძლივად გამოყენებისას აუცილებელია სისხლის საერთო ანალიზში ერითროციტების რაოდენობის, შედედების დროის, კოაგულოგრამაში პროთრომბინის ინდექსის, ტრანსამინაზების, ტუტე ფოსფოტაზას, გამა-გლუტამილტრანსპეპტიდაზას, ბილირუბინის, სისხლის შრატში შარდმჟავას დონის, სისხლში თრომბოციტების შემცველობის კონტროლი.

ზეგავლენა ავტოტრანსპორტის ტარებისა და მექანიზმების მართვის უნარზე

ავტოტრანსპორტის ტარებისა და მექანიზმების მართვის უნარზე პრეპარატის ზეგავლენის შესახებ მონაცემები წარმოდგენილი არ არის.

გამოყენება ორსულობისა და ლაქტაციის დროს

ორსულობა

ორსულობის დროს კოკარნიტის გამოყენება უნდა მოხდეს მხოლოდ იმ შემთხვევაში, თუ მოსალოდნელი სარგებელი დედისთვის აღემატება პოტენციურ რისკს ნაყოფისთვის.

ლაქტაცია

პრეპარატით მკურნალობის დროს რეკომენდებულია ლაქტაციის შეწყვეტა.

ურთიერთქმედება სხვა სამკურნალო საშუალებებთან

კოკარბოქსილაზა აძლიერებს საგულე გლიკოზიდების კარდიოტონურ მოქმედებას.

ნიკოტინამიდისა და ეპილეფსიის საწინააღმდეგო საშუალებების, განსაკუთრებით ისეთების, როგორებიცაა კარბამაზეპინი, დიაზეპამი და ნატრიუმის ვალპროატი, ერთად გამოყენებისას შესაძლებელია კრუნჩხვების საწინააღმდეგო მათი ეფექტის პოტენცირება.

შეუთავსებლობა

პრეპარატი არ უნდა იყოს შერეული რომელიმე სამკურნალო პრეპარატებთან. თავსებადობის შესახებ კვლევები არ არის წარმოდგენილი.

ჭარბი დოზირება

ჭარბი დოზირების შემთხვევები არ გამოვლენილა. არ არსებობს მონაცემები ტოქსიურობის შესაძლო განვითარების შესახებ შემთხვევით ვენაში შეყვანის ან პერორალურად მიღების დროს. ტოქსიკურობაზე ეჭვის დროს აუცილებელია მეთვალყურეობა და სიმპტომური მკურნალობა.

გამოშვების ფორმა

საინექციო ხსნარის მოსამზადებელი ლიოფილიზატი მუქი ფერის შუშის ფლაკონში, ბრომბუთილკაუჩუკის საცობით და კომბინირებული ალუმინის flip off ტიპის თავსახურით.

3 ფლაკონი ლიოფილიზატით გამხსნელთან კომპლექტში (3 ამპულა 0,5% 2მლ ლიდოკაინის ჰიდროქლორიდის ხსნარი) კონტურულ უჯრედოვან შეფუთვაში.

1 კონტურული უჯრედოვანი შეფუთვა გამოყენების ინსტრუქციასთან ერთად მუყაოს კოლოფში.

შენახვის პირობები

ინახება სინათლისაგან დაცულ ადგილას არაუმეტეს 25⁰C ტემპერატურაზე.

ინახება ბავშვებისთვის მიუწვდომელ ადგილას!

ვარგისობის ვადა

3 წელი წარმოების თარიღიდან.

არ გამოიყენოთ ვარგისობის ვადის გასვლის შემდეგ.

აფთიაქიდან გაცემის პირობები

ფარმაცევტული პროდუქტის ჯგუფი III, გაიცემა რეცეპტის გარეშე.