კლოზაპოლი - Klozapol 100მგ 50 ტაბლეტი

კლოზაპოლი 100 მგ ტაბლეტები
კლოზაპინი

ამ პრეპარატის გამოყენებამდე ყურადღებით გაეცანით წინამდებარე ინსტრუქციას, რადგან ის შეიცავს თქვენთვის მნიშვნელოვან ინფორმაციას.

· შეინახეთ ეს ფურცელ-ჩანართი. თქვენ შესაძლოა დაგჭირდეთ მისი ხელახლა წაკითხვა.

· დამატებითი შეკითხვების შემთხვევაში მიმართეთ თქვენს ექიმს ან ფარმაცევტს.

· ეს პრეპარატი გამოწერილია მხოლოდ თქვენთვის. არ გადასცეთ ის სხვა პირებს. მან შესაძლოა ზიანი მიაყენოს მათ იმ შემთხვევაშიც კი, თუ მათ გააჩნიათ დაავადების იგივე ნიშნები.

· ნებისმიერი გვერდითი მოვლენის განვითარების შემთხვევაში მიმართეთ თქვენს ექიმს ან ფარმაცევტს. ეს ეხება ნებისმიერ შესაძლო გვერდით მოვლენას, რომელიც არ არის ჩამოთვლილი ამ ფურცელ-ჩანართში. იხ. პარაგრაფი  4.

რა შეიცავს ეს ინსტრუქცია?

1.რა არის კლოზაპოლი და რისთვის გამოიყენება
2.რა უნდა იცოდეთ კლოზაპოლის მიღებამდე
3.როგორ მიიღოთ კლოზაპოლი
4.შესაძლო გვერდითი ეფექტები
5.როგორ შევინახოთ კლოზაპოლი
6.შეფუთვის შიგთავსი და სხვა ინფორმაცია

1. რა არის კლოზაპოლი და რისთვის გამოიყენება?

კლოზაპოლის აქტიური ნივთიერებაა კლოზაპინი, რომელიც მიეკუთვნება ნეიროლეპტიკების (პრეპარატები, რომლებიც გამოიყენება სპეციფიური ფსიქიური დარღვევების სამკურნალოდ, მაგალითად როგორიც არის ფსიქოზი) ჯგუფს.

კლოზაპოლი გამოიყენება შიზოფრენიით დაავადებულ იმ პირებში, ვისთვისაც სხვა პრეპარატებით მკურნალობამ შედეგი არ გამოიღო. 

შიზოფრენია არის ფსიქიკური დაავადება, რომელიც გავლენას ახდენს იმაზე, თუ როგორ ფიქრობთ, გრძნობთ და იქცევით. თქვენ უნდა გამოიყენოთ ეს პრეპარატი მხოლოდ იმ შემთხვევაში, თუ მანამდე სცადეთ სულ მცირე ორი სხვა პრეპარატი (მათ შორის ერთ-ერთი ატიპიური ანტიფსიქოზური საშუალება) შიზოფრენიის სამკურნალოდ და ამ პრეპარატებმა არ იმოქმედა, ან გამოიწვია მძიმე გვერდითი ეფექტები, რომელთა მკურნალობა შეუძლებელია.

კლოზაპოლი გამოიყენება პარკინსონის დაავადებასთან დაკავშირებული ფიქრების, ემოციების და ქცევის მძიმე დარღვევების სამკურნალოდ იმ პირებში, ვისთვისაც სხვა პრეპარატებით მკურნალობას შედეგი არ ქონია.

2. რა უნდა იცოდეთ კლოზაპოლის მიღებამდე?

არ მიიღოთ კლოზაპოლი:

-   თუ გაქვთ ალერგია კლოზაპინის ან ამ პრეპარატის სხვა კომპონენტების მიმართ (ჩამოთვლილია მე-6 პუნქტში),

-   თუ არ შეგიძლიათ რეგულარულად სისხლის ანალიზების გაკეთება,

-   თუ ოდესმე თქვენთვის უთქვამთ, რომ გაქვთ თეთრი უჯრედების დაბალი რაოდენობა (ლეიკოპენია ან აგრანულოციტოზი), განსაკუთრებით თუ ეს გამოწვეული იყო მედიკამენტებით. აღნიშნული არ ეხება იმ მდგომარეობას, როდესაც თქვენი სისხლის თეთრი უჯრედების დაბალი მაჩვენებელი გამოწვეულია ქიმიოთერაპიით,

-   თუ შეწყვეტილი გაქვთ კლოზაპოლით მკურნალობა ძლიერი გვერდითი ეფექტების გამო (მაგ., აგრანულოციტოზი ან გულის პრობლემები),

-   თუ იყენებთ ან იყენებდით ხანგრძლივი მოქმედების ანტიფსიქოზურ დეპო-ინექციებს,

-   თუ გაქვთ ან ოდესმე გქონიათ ძვლის ტვინის დაავადება, 

-   თუ გაქვთ არაკონტროლირებადი ეპილეფსია (კრუნჩხვები ან სხვა ტიპის გულყრები).

-   თუ გაქვთ ალკოჰოლით ან პრეპარატებით (მაგ., ნარკოტიკები) გამოწვეული მწვავე ფსიქიკური დაავადება,

-   თუ გაქვთ ცნობიერების დაბინდვა ან ძლიერი ძილიანობა,

-   თუ გაქვთ სისხლის მიმოქცევის კოლაფსი, რომელიც შეიძლება განვითარდეს ძლიერი შოკის შედეგად,

-   თუ გაქვთ თირკმლის მძიმე დაავადება,

-   თუ გაქვთ გულის კუნთის ანთება (მიოკარდიტი),

-   თუ გაქვთ გულის ნებისმიერი სხვა მძიმე პათოლოგია,

-   თუ გაქვთ ღვიძლის დაავადების სიმპტომები, როგორიც არის სიყვითლე (კანის და თვალების გაყვითლება, შეუძლოდ ყოფნა და მადის დაქვეითება),

-   თუ გაქვთ ღვიძლის ნებისმიერი სხვა მძიმე დაავადება,

-   თუ გაქვთ პარალიზური ილეუსი (თქვენი ნაწლავები არ ფუნქციონირებს სათანადოდ და გაქვთ ძლიერი ყაბზობა),

-   თუ იყენებთ ისეთ პრეპარატებს, რომლებიც აფერხებენ ძვლის ტვინის სათანადო ფუნქციონირებას,

-   თუ იყენებთ ისეთ პრეპარატებს, რომლებიც ამცირებენ სისხლის თეთრი უჯრედების რაოდენობას.

თუ რომელიმე ზემოთ ჩამოთვლილი თქვენ გეხებათ, აცნობეთ ამის შესახებ თქვენს ექიმს და არ მიიღოთ კლოზაპოლი.
კლოზაპოლის გამოყენება აკრძალულია ცნობიერება დაკარგულ ან კომაში მყოფ პირებში.

გაფრთხილებები და სიფრთხილის ზომები

კლოზაპოლის მიღებამდე გაესაუბრეთ თქვენს ექიმს ან ფარმაცევტს.

ამ ნაწილში მოყვანილი უსაფრთხოების ზომები ძალიან მნიშვნელოვანია. თქვენ უნდა შეასრულოთ ისინი, რათა მინიმუმამდე დაიყვანოთ სიცოცხლისთვის საშიში სერიოზული გვერდითი ეფექტების რისკი. 

კლოზაპოლით მკურნალობის დაწყებამდე აცნობეთ თქვენს ექიმს, თუ გაწუხებთ ან ოდესმე გქონდათ:

-   სისხლის თრომბები ან თრომბი ოჯახურ ანამნეზში, რადგან მსგავსი პრეპარატები დაკავშირებულია სისხლის თრომბის წარმოქმნასთან,

-   თვალშიდა წნევის მომატება (გლაუკომა),

-   დიაბეტი. სისხლში შაქრის დონის მომატება (ზოგჯერ საგრძნობლად) დაფიქსირდა პაციენტებში შაქრიანი დიაბეტის ანამნეზით ან მის გარეშე (იხ. ნაწილი 4),

-   პროსტატის პრობლემები ან შარდვის გაძნელება,

-   გულის, თირკმელების ან ღვიძლის ნებისმიერი დაავადება,

-   ქრონიკული ყაბზობა ან თუ იღებთ ყაბზობის გამომწვევ პრეპარატებს (როგორიცაა ანტიქოლინერგულები),

-   გალაქტოზას აუტანლობა, ლაქტაზას სრული დეფიციტი ან გლუკოზა-გალაქტოზას მალაბსორბცია,

-   კონტროლირებადი ეპილეფსია,

-   მსხვილი ნაწლავის დაავადებები,

-   თუ ოდესმე გაგიკეთებიათ მუცლის ღრუს ქირურგიული ოპერაცია,

-   თუ გქონიათ გულის დაავადება ან ოჯახურ ანამნეზში გულის გამტარობის დარღვევა, რომელსაც ეწოდება "QT ინტერვალის გახანგრძლივება",

-   თუ თქვენ ხართ ინსულტის რისკის ქვეშ, მაგალითად, თუ გაქვთ მაღალი წნევა, გულ-სისხლძარღვთა პრობლემები ან თავის ტვინში სისხლძარღვების პრობლემები.

დაუყოვნებლივ აცნობეთ თქვენს ექიმს კლოზაპოლის შემდეგი ტაბლეტის მიღებამდე:

-   თუ გაქვთ გაციების ნიშნები, გრიპის მსგავსი სიმპტომები, ცხელება, ყელის ტკივილი ან ნებისმიერი სხვა ინფექცია. თქვენ საჭიროა სასწრაფოდ ჩაიტაროთ სისხლის ანალიზი, იმ შემთხვევაში, თუ თქვენი სიმპტომები დაკავშირებულია თქვენს პრეპარატთან.

-   თუ გაქვთ სხეულის ტემპერატურის უეცარი სწრაფი მატება, კუნთების რიგიდობა, რამაც შეიძლება გამოიწვიოს გონების დაკარგვა (ავთვისებიანი ნეიროლეფსიური სინდრომი), ვინაიდან თქვენ შეიძლება გქონდეთ სერიოზული გვერდითი მოვლენა, რომელიც საჭიროებს გადაუდებელ მკურნალობას.

-   თუ გაქვთ სწრაფი და არარეგულარული გულისცემა, თუნდაც მოსვენების დროს, პალპიტაცია, სუნთქვის პრობლემები, გულმკერდის ტკივილი ან აუხსნელი დაღლილობა. თქვენმა ექიმმა უნდა შეამოწმოს თქვენი გული და საჭიროების შემთხვევაში დაუყოვნებლივ გაგიშვათ კარდიოლოგთან.

-   თუ გაქვთ გულისრევა, ღებინება და/ან მადის დაკარგვა. თქვენმა ექიმმა უნდა შეამოწმოს თქვენი ღვიძლი.

-   თუ გაქვთ ყაბზობა, მუცლის ტკივილი, მუცლის მტკივნეულობა, ცხელება, შებერილობა და/ან სისხლიანი ფაღარათი. თქვენი ექიმი ჩაგიტარებთ გამოკვლევებს. 

სამედიცინო შემოწმება და სისხლის ანალიზები

კლოზაპოლის მიღებამდე, თქვენი ექიმი გამოგკითხავთ სამედიცინო ისტორიას და გააკეთებს სისხლის ანალიზს, რათა დარწმუნდეს, რომ თქვენი სისხლის თეთრი უჯრედების რაოდენობა ნორმაშია. ამის გარკვევა მნიშვნელოვანია, რადგან თქვენს ორგანიზმს ჭირდება სისხლის თეთრი უჯრედები ინფექციებთან საბრძოლველად.

საჭიროა დარწმუნდეთ იმაში, რომ რეგულარულად იტარებთ სისხლის ანალიზს მკურნალობის დაწყებამდე, მკურნალობის დროს და კლოზაპოლით მკურნალობის შეწყვეტის შემდეგ.

-   თქვენი ექიმი გეტყვით ზუსტად, როდის და სად გაიკეთოთ ანალიზები. კლოზაპოლით მკურნალობის დაწყება შეგიძლიათ მხოლოდ იმ შემთხვევაში, თუ თქვენი სისხლის თეთრი უჯრედების რაოდენობა ნორმაშია.

-   კლოზაპოლმა შეიძლება გამოიწვიოს სისხლში თეთრი უჯრედების რაოდენობის სერიოზული შემცირება (აგრანულოციტოზი). მხოლოდ რეგულარული სისხლის ანალიზით შეუძლია გაიგოს ექიმმა, გაქვთ თუ არა აგრანულოციტოზის განვითარების რისკი.

-   მკურნალობის პირველი 18 კვირის განმავლობაში საჭიროა სისხლის ანალიზის ჩატარება კვირაში ერთხელ. ამის შემდეგ, ანალიზის ჩატარება საჭიროა თვეში ერთხელ მაინც.

-   თუ სისხლის თეთრი უჯრედების რაოდენობა შემცირდა, დაუყოვნებლივ უნდა შეწყვიტოთ კლოზაპოლით მკურნალობა. შემდეგ თქვენი სისხლის თეთრი უჯრედები უნდა დაუბრუნდეს ნორმას.

-   კლოზაპოლით მკურნალობის დასრულებიდან კიდევ 4 კვირის განმავლობაში დაგჭირდებათ სისხლის ანალიზის ჩატარება.

თქვენი ექიმი ასევე ჩაგიტარებთ ფიზიკურ გამოკვლევას მკურნალობის დაწყებამდე. თქვენმა ექიმმა შეიძლება ჩაგიტაროთ ელექტროკარდიოგრაფიული (ეკგ) გამოკვლევა თქვენი გულის შესამოწმებლად, მაგრამ მხოლოდ იმ შემთხვევაში, თუ ეს თქვენთვის აუცილებელია, ან თუ გაქვთ რაიმე განსაკუთრებული ჩივილები. 

თუ თქვენ გაქვთ ღვიძლის დაავადება, თქვენ რეგულარულად ჩაგიტარდებათ ღვიძლის ფუნქციური ტესტები, ვიდრე განაგრძობთ კლოზაპოლის მიღებას.

თუ გაწუხებთ სისხლში შაქრის მაღალი დონე (დიაბეტი), თქვენმა ექიმმა შეიძლება რეგულარულად შეამოწმოს თქვენი შაქრის დონე სისხლში.

კლოზაპოლმა შეიძლება გამოიწვიოს სისხლში ლიპიდების ცვლილება. კლოზაპოლმა შეიძლება გამოიწვიოს წონის მომატება. თქვენმა ექიმმა შეიძლება გააკონტროლოს თქვენი წონა და სისხლში ლიპიდების დონე.

თუ თქვენ უკვე გაწუხებთ ან კლოზაპოლი იწვევს თავბრუსხვევას ან სისუსტეს, ფრთხილად იყავით მჯდომიარე ან მწოლიარე პოზიციიდან ადგომისას, რადგან ამან შეიძლება გაზარდოს დაცემის შესაძლებლობა.

თუ თქვენ უნდა ჩაგიტარდეთ ოპერაცია, ან თუ ნებისმიერი მიზეზით ვერ ახერხებთ დიდი ხნის განმავლობაში სიარულს, განიხილეთ ექიმთან ის ფაქტი, რომ ღებულობთ კლოზაპოლს. თქვენ შეიძლება გქონდეთ თრომბოზის (ვენებში სისხლის შედედების) რისკი.

16 წლამდე ასაკის ბავშვები და მოზარდები

თუ თქვენ ხართ 16 წლამდე ასაკის პირი, არ უნდა გამოიყენოთ კლოზაპოლი, რადგან არ არსებობს საკმარისი ინფორმაცია ამ ასაკობრივ ჯგუფში მისი გამოყენების შესახებ.

ხანდაზმული პაციენტები (60 წლის და უფროსი ასაკის)

ხანდაზმულ პაციენტებს (60 წელზე მეტი ასაკის) შეიძლება ჰქონდეთ შემდეგი გვერდითი მოვლენები კლოზაპოლით მკურნალობის დროს: სისუსტე ან თავბრუსხვევა მდგომარეობის შეცვლის შემდეგ, თავბრუსხვევა, გულისცემის აჩქარება, შარდვის გაძნელება და ყაბზობა.

აცნობეთ თქვენს ექიმს ან ფარმაცევტს, თუ გაწუხებთ მდგომარეობა, რომელსაც ეწოდება დემენცია.

სხვა პრეპარატები და კლოზაპოლი

აცნობეთ თქვენს ექიმს ან ფარმაცევტს, თუ იღებთ, ცოტა ხნის წინ იღებდით ან შესაძლოა მიიღოთ ნებისმიერი სხვა პრეპარატი (რეცეპტის გარეშე გასაცემი ან მცენარეული პრეპარატების ჩათვლით). თქვენ შეიძლება დაგჭირდეთ თქვენი პრეპარატის სხვა დოზით მიღება ან სხვა პრეპარატების მიღება.

ნუ მიიღებთ კლოზაპოლს იმ პრეპარატებთან ერთად, რომლებიც აჩერებენ ძვლის ტვინის სწორ მუშაობას და/ან ამცირებენ ორგანიზმის მიერ წარმოქმნილი სისხლის უჯრედების რაოდენობას, როგორიცაა:

-  კარბამაზეპინი, პრეპარატი, რომელიც გამოიყენება ეპილეფსიისთვის.

-  ზოგიერთი ანტიბიოტიკი: ქლორამფენიკოლი, სულფონამიდები, როგორიცაა კო-ტრიმოქსაზოლი.

-  ზოგიერთი ტკივილგამაყუჩებელი: პირაზოლონის ჯგუფის ტკივილგამაყუჩებლები, როგორიცაა ფენილბუტაზონი ან მეტამიზოლი.

-  პენიცილამინი, პრეპარატი, რომელიც გამოიყენება სახსრების რევმატიული ანთების სამკურნალოდ.

-  ციტოტოქსიური საშუალებები, პრეპარატები, რომლებიც გამოიყენება ქიმიოთერაპიაში.

-  ანტიფსიქოზური საშუალებების ხანგრძლივი მოქმედების დეპო ინექციები.

ეს პრეპარატები ზრდიან აგრანულოციტოზის (სისხლის თეთრი უჯრედების ნაკლებობა) განვითარების რისკს.

კლოზაპოლის მიღებამ სხვა პრეპარატებთან ერთად შეიძლება გავლენა მოახდინოს კლოზაპოლის და/ან სხვა პრეპარატების მოქმედებაზე.

აცნობეთ ექიმს, თუ გეგმავთ მიიღოთ, თუ იღებთ (თუნდაც მკურნალობის კურსის დასასრულს) ან თუ ცოტა ხნის წინ შეწყვიტეთ რომელიმე შემდეგი პრეპარატის მიღება:

-   დეპრესიის სამკურნალოდ გამოყენებული პრეპარატები, მაგ. როგორიცაა ლითიუმი, ფლუვოქსამინი, ტრიციკლური ანტიდეპრესანტები, მაო-ს ინჰიბიტორები, ციტალოპრამი, პაროქსეტინი, ფლუოქსეტინი და სერტრალინი.

-   სხვა ანტიფსიქოზური საშუალებები, რომლებიც გამოიყენება ფსიქიკური დაავადებების სამკურნალოდ, როგორიცაა პერაზინი.

-   ბენზოდიაზეპინები და სხვა პრეპარატები, რომლებიც გამოიყენება შფოთვის ან ძილის დარღვევის სამკურნალოდ.

-   ნარკოტიკები და სხვა პრეპარატები, რომლებმაც შეიძლება გავლენა მოახდინონ თქვენს სუნთქვაზე.

-   პრეპარატები, რომლებიც გამოიყენება ეპილეფსიის გასაკონტროლებლად, როგორიცაა ფენიტოინი და ვალპროის მჟავა.

-   პრეპარატები, რომლებიც გამოიყენება მაღალი ან დაბალი წნევის სამკურნალოდ, როგორიცაა ადრენალინი და ნორადრენალინი.

-   ვარფარინი, პრეპარატი, რომელიც გამოიყენება სისხლის შედედების თავიდან ასაცილებლად.

-   ანტიჰისტამინები, გაციების ან ალერგიის, მაგ. როგორიცაა თივის ცხელება, სამკურნალო საშუალებები, 

-   ანტიქოლინერგიული საშუალებები, რომლებიც გამოიყენება კუჭის სპაზმების, სპაზმების და მოძრაობის დაავადების სიმპტომების მოსახსნელად.

-   პრეპარატები, რომლებიც გამოიყენება პარკინსონის დაავადების სამკურნალოდ.

-   დიგოქსინი, პრეპარატი, რომელიც გამოიყენება გულის პრობლემების სამკურნალოდ.

-   ზოგიერთი პრეპარატი, რომელიც გამოიყენება კუჭის წყლულის სამკურნალოდ, როგორიცაა ომეპრაზოლი ან ციმეტიდინი.

-   ზოგიერთი ანტიბიოტიკი, როგორიცაა ერითრომიცინი და რიფამპიცინი.

-   ზოგიერთი სოკოვანი ინფექციების სამკურნალო პრეპარატი (როგორიცაა კეტოკონაზოლი) ან ვირუსული ინფექციების სამკურნალო პრეპარატი (როგორიცაა პროტეაზას ინჰიბიტორები, რომლებიც გამოიყენება აივ ინფექციების სამკურნალოდ).

-   ატროპინი, პრეპარატი, რომელიც შეიძლება შედიოდეს თვალის წვეთების ან ხველისა და გაციების პრეპარატების შემადგენლობაში.

-   ადრენალინი, პრეპარატი, რომელიც გამოიყენება გადაუდებელ სიტუაციებში.

-   ჰორმონული კონტრაცეპტივები (ჩასახვის საწინააღმდეგო ტაბლეტები).

ეს სია არ არის სრული. თქვენს ექიმს ან ფარმაცევტს აქვს მეტი ინფორმაცია იმ პრეპარატების შესახებ, რომელთა გამოყენებისას კლოზაპოლთან ერთად საჭიროა სიფრთხილე. მათ ასევე ეცოდინებათ, მიეკუთვნება თუ არა ის მედიკამენტები, რომლებსაც თქვენ ღებულობთ, ჩამოთვლილ ჯგუფებს. გაესაუბრეთ მათ.

კლოზაპოლი საკვებთან და ალკოჰოლთან ერთად

ნუ მიიღებთ ალკოჰოლს კლოზაპოლით მკურნალობის დროს.

აცნობეთ ექიმს, თუ ეწევით და რამდენად ხშირად სვამთ კოფეინის შემცველ სასმელებს (ყავა, ჩაი, კოლა). თქვენი მოწევის ან კოფეინის დალევის ჩვევების მოულოდნელმა ცვლილებამ ასევე შეიძლება შეცვალოს კლოზაპოლის ეფექტი.

ორსულობა და ძუძუთი კვება

თუ ხართ ორსულად ან ძუძუთი კვებავთ ბავშვს, ფიქრობთ, რომ შესაძლოა იყოთ ორსულად ან გეგმავთ ბავშვის გაჩენას, ამ პრეპარატის მიღებამდე რჩევისათვის მიმართეთ ექიმს.

თქვენი ექიმი თქვენთან ერთად განიხილავს ორსულობის დროს ამ პრეპარატის გამოყენების სარგებელსა და შესაძლო რისკებს. დაუყოვნებლივ აცნობეთ ექიმს, თუ კლოზაპოლით მკურნალობის დროს დაორსულდებით.  

შემდეგი სიმპტომები შეიძლება გამოვლინდეს იმ დედების ახალშობილებში,რომლებიც იყენებდნენ ანტიფსიქოზურ პრეპარატებს (მაგ. კლოზაპოლი) ბოლო ტრიმესტრში (ორსულობის ბოლო სამი თვე): კანკალი, კუნთების რიგიდობა და/ან სისუსტე, ძილიანობა, აგზნებადობა, სუნთქვის პრობლემები და კვების გაძნელება. თუ თქვენს ბავშვს განუვითარდება რომელიმე ჩამოთვლილი სიმპტომი, შეიძლება დაგჭირდეთ ექიმთან კონსულტაცია.

ზოგიერთ ქალს, რომელიც ღებულობს ფსიქიკური დაავადებების სამკურნალო ზოგიერთ პრეპარატს საერთოდ არა აქვს, ან აქვს არარეგულარული მენსტრუალური ციკლი. თუ გაწუხებთ მსგავსი მდგომარეობა, თქვენი მენსტრუალური ციკლი შეიძლება აღდგეს, თუ თქვენი წამალი შეიცვლება კლოზაპოლით. ეს ნიშნავს იმას, რომ თქვენ უნდა გამოიყენოთ ეფექტური კონტრაცეფცია.

არ კვებოთ ძუძუთი კლოზაპოლით მკურნალობის დროს. კლოზაპინი, კლოზაპოლის აქტიური ნივთიერება, შეიძლება გადავიდეს თქვენს რძეში და იმოქმედოს თქვენს ბავშვზე.

სატრანსპორტო საშუალებების მართვა და მექანიზმებთან მუშაობა

კლოზაპოლმა შეიძლება გამოიწვიოს დაღლილობა, ძილიანობა და კრუნჩხვები, განსაკუთრებით მკურნალობის დასაწყისში. ამ სიმპტომების არსებობისას დაუშვებელია სატრანსპორტო საშუალებების მართვა და მექანიზმებთან მუშაობა

კლოზაპოლი შეიცავს ლაქტოზას და ნატრიუმს.

თითო ტაბლეტი შეიცავს 18 მგ ლაქტოზას. თუ თქვენმა ექიმმა გითხრათ, რომ გაქვთ ზოგიერთი შაქრის აუტანლობა, ამ სამკურნალო პრეპარატის მიღებამდე მიმართეთ ექიმს.

ეს პრეპარატი შეიცავს 1 მმოლ-ზე ნაკლებ ნატრიუმს (23 მგ) თითო დოზაზე, ანუ ითვლება, რომ არის არსებითად "ნატრიუმისგან თავისუფალი".

3. როგორ მივიღოთ კლოზაპოლი

ყოველთვის მიიღეთ ეს წამალი ზუსტად ისე, როგორც ექიმმა დაგინიშნათ. თუ რამეში არ ხართ დარწმუნებული, მიმართეთ თქვენს ექიმს ან ფარმაცევტს.

დაბალი წნევის, კრუნჩხვების და ძილიანობის რისკის შესამცირებლად, აუცილებელია, რომ ექიმმა თანდათან გაზარდოს დოზა.

ძალიან მნიშვნელოვანია, რომ არ შეცვალოთ დოზა ან არ შეწყვიტოთ კლოზაპოლის მიღება ექიმთან წინასწარი შეთანხმების გარეშე. გააგრძელეთ ტაბლეტების მიღება იმდენი ხნით, რამდენითაც ექიმმა დაგინიშნათ. 

თუ თქვენ ხართ ხანდაზმული (60 წლის ან მეტის), ექიმმა შეიძლება დაიწყოს მკურნალობა უფრო დაბალი დოზით და გაზარდოს ის თანდათანობით, რადგან თქვენ შესაძლოა გაგივითარდეთ ზოგიერთი არასასურველი ეფექტები (იხილეთ ნაწილი 2 „რა უნდა იცოდეთ კლოზაპოლის მიღებამდე“).

თუ თქვენთვის დანიშნული დოზა ვერ მიიღწევა ამ დოზირების ტაბლეტით, სასურველი დოზის მისაღწევად ხელმისაწვდომია ამ პრეპარატის სხვა დოზებიც. 

შიზოფრენიის მკურნალობა

რეკომენდებული საწყისი დოზაა 12,5 მგ (25 მგ ტაბლეტის ნახევარი) ერთჯერ ან ორჯერ პირველ დღეს, შემდეგ 25 მგ ერთჯერ ან ორჯერ მეორე დღეს. ტაბლეტი გადაყლაპეთ წყლის მიყოლებით. თუ კარგად აიტანთ, თქვენი ექიმი თანდათან გაზრდის დოზას 25-50 მგ-იანი საფეხურებით, ეტაპობრივად, მომდევნო 2-3 კვირის განმავლობაში, სანამ არ მიაღწევს 300 მგ დღიურ დოზამდე. ამის შემდეგ, საჭიროების შემთხვევაში, დღიური დოზა შეიძლება გაიზარდოს 50-დან 100 მგ-იანი საფეხურებით ყოველ 3-4 დღეში ან, სასურველია, ყოველკვირეული ინტერვალით. 

ეფექტური დღიური დოზა ჩვეულებრივ შეადგენს 200 მგ-დან 450 მგ-ს, დაყოფილს რამდენიმე ერთჯერად დოზად დღეში. ზოგიერთ ადამიანს შეიძლება დასჭირდეს მეტიც. დასაშვებია დღეში 900 მგ-მდე დოზა. გვერდითი ეფექტების მომატება (განსაკუთრებით კრუნჩხვები) შესაძლებელია 450 მგ-ზე მეტი დღიური დოზის შემთხვევაში. ყოველთვის მიიღეთ თქვენთვის შესაფერისი ყველაზე დაბალი ეფექტური დოზა. ადამიანების უმეტესობა მათი დოზის ერთ ნაწილს დილით ღებულობს და ნაწილს საღამოს. თქვენი ექიმი გეტყვით ზუსტად, თუ როგორ გაყოთ დღიური დოზა. თუ თქვენი დღიური დოზაა მხოლოდ 200 მგ, მაშინ შეგიძლიათ ერთჯერადი დოზის მიღება საღამოს. თუ გარკვეული პერიოდის განმავლობაში კლოზაპოლით მკურნალობას ქონდა წარმატებული შედეგები, თქვენს ექიმს შეუძლია სცადოს დოზის შემცირება. საჭიროა მიიღოთ კლოზაპოლი მინიმუმ 6 თვის განმავლობაში.

მძიმე ფიქრების, ემოციური და ქცევითი დარღვევების მკურნალობა პარკინსონის დაავადების მქონე პაციენტებში

რეკომენდებული საწყისი დოზაა 12,5 მგ (25 მგ ტაბლეტის ნახევარი) საღამოს. ტაბლეტი გადაყლაპეთ წყლის მიყოლებით. ამის შემდეგ, თქვენი ექიმი თანდათან გაზრდის დოზას 12,5 მგ-იანი საფეხურებით, არაუმეტეს კვირაში ორი საფეხურით, მაქსიმალურ დოზამდე - 50 მგ-მდე მეორე კვირის ბოლოსთვის. დოზის ზრდა უნდა შეწყდეს ან გადაიდოს, თუ გრძნობთ სისუსტეს, თავბრუსხვევას ან დაბნეულობას. ასეთი სიმპტომების თავიდან აცილების მიზნით, არტერიული წნევის გაზომვა უნდა მოხდეს მკურნალობის პირველი კვირების განმავლობაში.

ეფექტური დღიური დოზა ჩვეულებრივ შეადგენს 25 მგ-დან 37,5 მგ-მდე, მიღებულს საღამოს, როგორც ერთი დოზა. მხოლოდ გამონაკლის შემთხვევებში, შესაძლებელია დღეში 50 მგ-იანი დოზის გადაჭარბება. მაქსიმალური სადღეღამისო დოზაა 100 მგ.

ყოველთვის მიიღეთ თქვენთვის ყველაზე დაბალი ეფექტური დოზა.

კლოზაპოლი 25 მგ ტაბლეტი შეიძლება დაიყოს თანაბარ დოზებად.

თუ თქვენ მიიღეთ საჭიროზე მეტი კლოზაპოლი

თუ თქვენ მიიღეთ მეტი კლოზაპოლი, ვიდრე საჭიროა, ან თუ ვინმე სხვა მიიღებს თქვენს ტაბლეტს, დაუყოვნებლივ მიმართეთ ექიმს ან გამოიძახეთ სასწრაფო სამედიცინო დახმარება.

დოზის გადაჭარბების სიმპტომებია: ძილიანობა, დაღლილობა, ენერგიის ნაკლებობა, უგონო მდგომარეობა, კომა, დაბნეულობა (დეზორიენტაცია), ჰალუცინაციები, აგზნება, არათანმიმდევრული მეტყველება, კიდურების დაჭიმვა, ხელების კანკალი, გულყრები (კრუნჩხვები), ნერწყვის წარმოქმნის მომატება, მიდრიაზი (თვალის შავი ნაწილის გაფართოება), მხედველობის დაბინდვა, სისხლის არტერიული წნევის დაქვეითება, კოლაფსი, სწრაფი ან არარეგულარული პულსი, ზედაპირული ან გაძნელებული სუნთქვა (სუნთქვის დათრგუნვა, სუნთქვის უკმარისობა).

თუ დაგავიწყდათ კლოზაპოლის მიღება

თუ დაგავიწყდათ დოზის მიღება, მიიღეთ ის გახსენებისთანავე. თუ მოახლოვებულია შემდეგი დოზის მიღების დრო, გამოტოვეთ დავიწყებული ტაბლეტი და მიიღეთ შემდეგი დოზა საჭირო დროს. არ მიიღოთ ორმაგი დოზა გამოტოვებული დოზის ასანაზღაურებლად. დაუკავშირდით თქვენს ექიმს რაც შეიძლება მალე, თუ თქვენ არ მიგიღიათ კლოზაპოლი 48 საათზე მეტი ხნის განმავლობაში.

თუ შეწყვეტთ კლოზაპოლის მიღებას

არ შეწყვიტოთ კლოზაპოლის მიღება ექიმთან შეთანხმების გარეშე, რადგან შესაძლოა განვითარდეს მოხსნის რეაქციები. ეს რეაქციები მოიცავს ოფლიანობას, თავის ტკივილს, გულისრევას, ღებინებას და დიარეას. თუ თქვენ გაგივითარდათ რომელიმე ეს ნიშანი ან სიმპტომი, დაუყოვნებლივ აცნობეთ თქვენს ექიმს. ამ ნიშნებს შეიძლება მოჰყვეს უფრო სერიოზული გვერდითი ეფექტები, თუ დაუყოვნებლივ არ იმკურნალეთ. თქვენი საწყისი სიმპტომები შეიძლება განახლდეს. რეკომენდებულია დოზის თანდათანობითი შემცირება 12,5 მგ-იანი საფეხურებით 1-2 კვირის განმავლობაში. თქვენი ექიმი მოგცემთ რეკომენდაციას, თუ როგორ შეამციროთ დღიური დოზა. თუ მოულოდნელად მოგიწევთ კლოზაპოლით მკურნალობის შეწყვეტა, თქვენ უნდა ჩაგიტარდეთ შემოწმება ექიმის მიერ.

თუ თქვენი ექიმი გადაწყვეტს კლოზაპოლით მკურნალობის ხელახლა დაწყებას, ხოლო თქვენს მიერ მიღებული კლოზაპოლის ბოლო დოზა იყო ორი დღის წინ, დაწყება უნდა მოხდეს 12,5 მგ-იანი საწყისი დოზით. 

თუ თქვენ გაქვთ დამატებითი შეკითხვები ამ პრეპარატის გამოყენებასთან დაკავშირებით, მიმართეთ თქვენს ექიმს ან ფარმაცევტს.

4. შესაძლო გვერდითი ეფექტები

ყველა პრეპარატის მსგავსად, ამ პრეპარატსაც შეუძლია გამოიწვიოს გვერდითი ეფექტები, თუმცა ისინი ყველას არ უვითარდება.

ზოგიერთი გვერდითი ეფექტი შეიძლება იყოს სერიოზული და საჭიროებდეს გადაუდებელ სამედიცინო ყურადღებას. კლოზაპოლის შემდეგი დოზის მიღებამდე აცნობეთ თქვენს ექიმს, თუ გაქვთ რომელიმე ქვემოთ ჩამოთვლილი:

ძალიან ხშირი (შეიძლება განუვითარდეს 10-დან 1-ზე მეტ ადამიანს):

-   მძიმე ყაბზობა. თქვენმა ექიმმა უნდა გიმკურნალოთ შემდგომი გართულებების თავიდან აცილების მიზნით.

-   სწრაფი გულისცემა.

ხშირი (შეიძლება განვითარდეს 10-დან 1-ზე ნაკლებ ადამიანში):

-   გაციების, ცხელების, გრიპის მსგავსი სიმპტომების, ყელის ტკივილის ან ნებისმიერი სხვა ინფექციის ნიშნები. სასწრაფოდ საჭიროა სისხლის ანალიზის ჩატარება, რათა შეამოწმოთ არის თუ არა თქვენი სიმპტომები დაკავშირებული თქვენს პრეპარატთან.

-   კრუნჩხვები.

-   უეცარი სისუსტე ან გონების უეცარი დაკარგვა კუნთების სისუსტესთან ერთად (სინკოპე).

არახშირი (შეიძლება განვითარდეს 100-დან 1-ზე ნაკლებ ადამიანში):

-   სხეულის ტემპერატურის უეცარი სწრაფი მატება, კუნთების რიგიდულობა,  რამაც შეიძლება გამოიწვიოს უგონო მდგომარეობა (ავთვისებიანი ნეიროლეფსიური სინდრომი), ვინაიდან თქვენ შეიძლება გქონდეთ სერიოზული გვერდითი ეფექტი, რომელიც სასწრაფოდ საჭიროებს მკურნალობას.

-   თავბრუსხვევა ან გონების დაკარგვა, მჯდომარე ან მწოლიარე პოზიციიდან ადგომისას, რადგან ამან შეიძლება გაზარდოს დაცემის შესაძლებლობა.

იშვიათი (შეიძლება განვითარდეს 1000-დან 1-ზე ნაკლებ ადამიანში):

-   სასუნთქი გზების ინფექციის ან პნევმონიის ნიშნები, როგორიცაა ცხელება, ხველა, სუნთქვის გაძნელება, ხიხინი.

-   ძლიერი წვა, ტკივილი მუცლის ზედა ნაწილში, რომელიც გადადის ზურგში და თან ახლავს გულისრევა და ღებინება პანკრეასის ანთების გამო.

-   სისუსტე და კუნთების სისუსტე არტერიული წნევის მნიშვნელოვანი ვარდნის გამო (ცირკულატორული კოლაფსი).

-   ყლაპვის გაძნელება (რაც შეიძლება გამოიწვიოს საკვების ჩასუნთქვამ).

-   გულისრევა, ღებინება და/ან მადის დაკარგვა. ექიმმა უნდა შეამოწმოს თქვენი ღვიძლი.

-   გასუქების ან სიმსუქნის გაუარესების ნიშნები.

-   ძილის დროს სუნთქვის შეწყვეტა ხვრინვასთან ერთად ან მის გარეშე.

იშვიათი (შეიძლება განვითარდეს 1000-დან 1-ზე ნაკლებ ადამიანში), ან ძალიან იშვიათი (შეიძლება განუვითარდეს 10000-დან 1-ზე ნაკლებ ადამიანს):

-   სწრაფი და არარეგულარული გულისცემა, მაშინაც კი, როცა მოსვენებულ მდგომარეობაში იმყოფებით, პალპიტაცია, სუნთქვის პრობლემები, ტკივილი გულმკერდის არეში ან აუხსნელი დაღლილობა. თქვენმა ექიმმა უნდა შეამოწმოს თქვენი გულის მდგომარეობა და საჭიროების შემთხვევაში დაუყოვნებლივ გაგაგზავნოთ კარდიოლოგთან.

ძალიან იშვიათი (შეიძლება განვითარდეს 10000-დან 1-ზე ნაკლებ ადამიანში):

-   მუდმივად მტკივნეული პენისის ერექცია მამაკაცებში. ამას ეწოდება პრიაპიზმი. თუ თქვენ გაქვთ ერექცია, რომელიც გრძელდება 4 საათზე მეტ ხანს, შესაძლოა საჭირო გახდეს სასწრაფო სამედიცინო დახმარება შემდგომი გართულებების თავიდან ასაცილებლად.

-   სპონტანური სისხლდენა ან სისხლჩაქცევა, რაც შეიძლება იყოს სისხლში თრომბოციტების რაოდენობის შემცირების ნიშნები.

-   სისხლში უკონტროლო გლუკოზის დონით გამოწვეული სიმპტომები (როგორიცაა გულისრევა ან ღებინება, მუცლის ტკივილი, გადაჭარბებული წყურვილი,  ჭარბი შარდვა, დეზორიენტაცია ან დაბნეულობა).

-   მუცლის ტკივილი, სპაზმები, მუცლის შებერვა, ღებინება, ყაბზობა და გაზების გამოყოფის შეუძლებლობა, რაც შეიძლება იყოს ნაწლავის ობსტრუქციის ნიშნები და სიმპტომები.

-   მადის დაკარგვა, მუცლის შებერვა, მუცლის ტკივილი, კანის გაყვითლება, ძლიერი სისუსტე და სისუსტის შეგრძნება. ეს სიმპტომები შეიძლება იყოს იმის ნიშანი, რომ თქვენ გეწყებათ ღვიძლის დაავადების განვითარების პროცესი, რამაც შეიძლება გამოიწვიოს ღვიძლის ფულმინანტური ნეკროზი.

-   გულისრევა, ღებინება, დაღლილობა, წონის დაკლება, რაც შეიძლება იყოს თირკმლის ანთების სიმპტომები.

უცნობი (არსებული მონაცემების საფუძველზე სიხშირის განსაზღვრა შეუძლებელია):

-   მოჭერითი ტკივილი გულმკერდის არეში, გულმკერდის შებოჭილობის შეგრძნება, ზეწოლა ან შეკუმშვა (გულმკერდის ტკივილი შეიძლება გავრცელდეს მარცხენა მკლავზე, ყბაზე, კისერზე და მუცლის ზედა ნაწილში), ქოშინი, ოფლიანობა, სისუსტე, მსუბუქი თავბრუსხვევა, გულისრევა, ღებინება და პალპიტაცია (გულის შეტევის სიმპტომები). სასწრაფოდ უნდა მიმართოთ სასწრაფო სამედიცინო დახმარებას.

-   დაწოლა გულმკერდზე, სიმძიმე, შებოჭილობა, შეკუმშვა, წვის ან დახრჩობის შეგრძნება (სისხლისა და ჟანგბადის არასაკმარისი მიწოდების ნიშნები გულის კუნთში). თქვენს ექიმს დასჭირდება თქვენი გულის მდგომარეობის შემოწმება.

-   არარეგულარული გულისცემის შეგრძნება: გულმკერდის არეში „დარტყმის“, „ჩხვლეტის“ ან გულის „ფრიალის“ შეგრძნება (პალპიტაცია),

-   სწრაფი და არარეგულარული გულისცემა (წინაგულების ფიბრილაცია). ზოგჯერ შეიძლება იყოს გულის პალპიტაცია, სისუსტე, ქოშინი ან გულმკერდის დისკომფორტი. თქვენს ექიმს დასჭირდება თქვენი გულის შემოწმება.

-   დაბალი არტერიული წნევის სიმპტომები, როგორიცაა თავბრუსხვევა, სისუსტე, მხედველობის დაბინდვა, უჩვეულო დაღლილობა, ცივი და წებოვანი კანი ან გულისრევა.

-   ვენებში სისხლის შედედების ნიშნები, განსაკუთრებით ფეხებში (სიმპტომები მოიცავს შეშუპებას, ტკივილს და სიწითლეს ფეხის არეში), რომელიც შეიძლება სისხლძარღვების მეშვეობით გადავიდეს ფილტვებში და გამოიწვიოს გულმკერდის ტკივილი და სუნთქვის გაძნელება.

-   დადასტურებული ან ძლიერ საეჭვო ინფექცია ცხელებასთან ან სხეულის დაბალ ტემპერატურასთან ერთად, არანორმალურად აჩქარებული სუნთქვა, სწრაფი გულისცემა, რეაქციისა და ცნობიერების ცვლილება, არტერიული წნევის დაქვეითება (სეფსისი);

-   პროფუზული ოფლიანობა, თავის ტკივილი, გულისრევა, ღებინება და დიარეა (ქოლინერგული სინდრომის სიმპტომები).

-   შარდის გამოყოფის მკვეთრი დაქვეითება (თირკმლის უკმარისობის ნიშანი).

-   ალერგიული რეაქცია (ძირითადად შეშუპება სახეზე, პირის ღრუსა და ყელზე, აგრეთვე ენაზე, რომელსაც შეიძლება ახლდეს ქავილი და ტკივილი).

-   მადის დაკარგვა, შეშუპებული მუცელი, მუცლის ტკივილი, კანის გაყვითლება, ძლიერი სისუსტე და შეუძლოდ ყოფნა. ეს შეიძლება მიანიშნებდეს შესაძლო, სიცოხლისათვის საშიშ ღვიძლის დაავადებებზე (ღვიძლის უჯრედების, ნაღვლის სადინარის ან ორივეს დაზიანება),

-   ყაბზობა, აბდომინალური ტკივილი, მუცლის მტკივნეულობა, ცხელება, შებერილობა, სისხლიანი დიარეა. ეს შეიძლება მიუთითებდეს მეგაკოლონზე (ნაწლავების გადიდება) ან ნაწლავის ინფარქტზე/იშემიაზე. თქვენმა ექიმმა უნდა გამოიკვლიოს თქვენი მდგომარეობა. 

-   გულმკერდის ან მუცლის არეში მწვავე ტკივილი ქოშინით, ასევე ხველითა და ცხელებით ან მათ გარეშე, რაც გამოწვეულია რამდენიმე სეროზული მემბრანის - პლევრის, პერიკარდიუმის და პერიტონეუმის ერთდროული ანთებით (პოლისეროზიტი).

-   კუნთების სისუსტის მომატება ან ახალი სისუსტის გაჩენა, კუნთების სპაზმები, კუნთების ტკივილი. ეს შეიძლება მიუთითებდეს კუნთების შესაძლო დარღვევაზე (რაბდომიოლიზი). ექიმმა უნდა შეაფასოს თქვენი მდგომარეობა.

სხვა გვერდითი მოვლენები:

ძალიან ხშირი (შეიძლება განუვითარდეს 10-დან 1-ზე მეტ ადამიანში):

ძილიანობა, თავბრუსხვევა, ნერწყვის წარმოქმნის მომატება.

ხშირი (შეიძლება განუვითარდეს 10-დან 1-ზე ნაკლებ ადამიანს):

-   სისხლის თეთრი უჯრედების მაღალი დონე (ლეიკოციტოზი), კონკრეტული ტიპის სისხლის თეთრი უჯრედების მაღალი დონე (ეოზინოფილია),

-   წონის მომატება,

-   ბუნდოვანი ხედვა,

-   თავის ტკივილი, კანკალი, დაჭიმულობა, მოუსვენრობა,

-   კრუნჩხვები, რხევები (მიოკლონუსი), არანორმალური მოძრაობები, მოძრაობის დაწყების შეუძლებლობა, მოუსვენრობა,

-   ცვლილებები ელექტროკარდიოგრაფიულად,

-   მაღალი არტერიული წნევა, სისუსტე ან თავბრუსხვევა პოზიციის შეცვლის შემდეგ,

-   გულისრევა, ღებინება, მადის დაკარგვა პირის სიმშრალე,

-   ღვიძლის ფუნქციური სინჯების მცირე დარღვევები, 

-   შარდის ბუშტის კონტროლის დაკარგვა, შარდის გამოყოფის გაძნელება, 

-   დაღლილობა, ცხელება, მომატებული ოფლიანობა, 

-   მეტყველების დარღვევა (მაგ., დაბნეული მეტყველება).

არახშირი (შეიძლება განუვითარდეს 100-დან 1-ზე ნაკლებ ადამიანს):

-   სისხლის თეთრი უჯრედების ნაკლებობა (აგრანულოციტოზი),

-   მეტყველების დარღვევები (მაგ. ენაბლუობა).

იშვიათი (შეიძლება განუვითარდეს 1000-დან 1-ზე ნაკლებ ადამიანს):

-   სისხლის წითელი უჯრედების დაბალი დონე (ანემია),

-   მოუსვენრობა, აგზნება, დაბნეულობა, კანკალი,

-   არარეგულარული გულისცემა, გულის კუნთის ანთება (მიოკარდიტი) ან გულის კუნთის მემბრანის ანთება (პერიკარდიტი), სითხის დაგროვება გულის ირგვლივ (პერიკარდიული ეფუზია),

-   შაქრის მაღალი დონე სისხლში, შაქრიანი დიაბეტი,

-   სისხლის შედედება ფილტვებში (თრომბოემბოლია),

-   ღვიძლის ანთება (ჰეპატიტი), ღვიძლის დაავადება, რომელიც იწვევს კანის გაყვითლებას/მუქ შარდს/ქავილს (სიყვითლე),

-   სისხლში ფერმენტ კრეატინინფოსფოკინაზას დონის მომატება.

ძალიან იშვიათი (შეიძლება განუვითარდეს 10000-დან 1-ზე ნაკლებ ადამიანს):

-   თრომბოციტების რაოდენობის მომატება სისხლძარღვებში სისხლის შესაძლო შედედების გამო,

-   პირის/ენის და კიდურების არაკონტროლირებადი მოძრაობები, აკვიატებული აზრები და კომპულსიური ქცევები (ობსესიურ-კომპულსიური სიმპტომები),

-   კანის რეაქციები, შეშუპება ყურის წინამდებარედ (სანერწყვე ჯირკვლების გადიდება),

-   სუნთქვის გაძნელება,

-   სისხლში ტრიგლიცერიდების ან ქოლესტეროლის ძალიან მაღალი დონე,

-   გულის კუნთის დაავადება (კარდიომიოპათია), გულისცემის შეწყვეტა (გულის გაჩერება) უეცარი აუხსნელი სიკვდილი.

უცნობი (არსებული მონაცემების საფუძველზესიხშირის განსაზღვრა შეუძლებელია)

· ცვლილებები ტვინის ტალღების ჩვენებაში (ელექტროენცეფალოგრამა/EEG),

· დიარეა, კუჭის დისკომფორტი, გულძმარვა, კუჭის დისკომფორტი ჭამის შემდეგ,

· კუნთების სისუსტე, კუნთების სპაზმი, კუნთების ტკივილი,

· გაჭედილი ცხვირი,

· უნებლიე შარდვა ძილის დროს,

· არტერიული წნევის უეცარი არაკონტროლირებადი მომატება (ფსევდოფეოქრომოციტომა),

· სხეულის უკონტროლო გადახრა ერთ მხარეს (პლევროთოტონუსი),

· ეაკულაციის დარღვევები მამაკაცებში, რომლის დროსაც სპერმა პენისიდან ეაკულაციის ნაცვლად შარდის ბუშტში გადადის (მშრალი ორგაზმი ან რეტროგრადული ეაკულაცია),

· გამონაყარი, მეწამული-წითელი ლაქები (კანის სისხლდენა), ცხელება ან ქავილი სისხლძარღვების ანთების გამო, 

· მსხვილი ნაწლავის ანთება, რომელიც იწვევს დიარეას, მუცლის ტკივილს,

· ცხელება, კანის ფერის შეცვლა, "პეპლის" ფორმის გამონაყარი სახეზე, სახსრების ტკივილი, კუნთების ტკივილი, დაღლილობა და ცხელება (წითელი მგლურა),

· მოუსვენარი ფეხების სინდრომი (ფეხების ან ხელების გამოძრავების დაუძლეველი სურვილი, რომელსაც ჩვეულებრივ თან ახლავს არასასიამოვნო შეგრძნებები დასვენების პერიოდში, განსაკუთრებით საღამოს ან ღამით, რომელიც დროებით იხსნება მოძრაობის შედეგად);

· მკვეთრი ტკივილი გულმკერდის ან მუცლის არეში, ქოშინით, ხველებასთან ერთად ან მის გარეშე, ცხელებით ან მის გარეშე, რაც განპირობებულია რამოდენიმე სეროზული გარსის - პლევრის, პერიკარდიუმის და პერიტონიუმის ერთდროული ანთების გამო (პოლისეროზიტი).

ანტიფსიქოზური პრეპარატებით ნამკურნალებ ხანდაზმულ, დემენციის მქონე  პაციენტებში სიკვდილის რისკის უმნიშვნელო ზრდა დაფიქსირდა არანამკურნალებ პაციენტებთან შედარებით.

შეტყობინება გვერდითი ეფექტების შესახებ

ნებისმიერი გვერდითი ეფექტის განვითარების შემთხვევაში მიმართეთ თქვენს ექიმს ან ფარმაცევტს. აღნიშნული ეხება ისეთ გვერდით მოვლენებსაც, რომლებიც არ არის ჩამოთვლილი ამ ფურცელ-ჩანართში.

გვერდითი მოვლენის შეტყობინებით თქვენ დაეხმარებით პრეპარატის უსაფრთხოების შესახებ ინფორმაციის მიწოდებას.

5. როგორ შეინახოთ კლოზაპოლი

ინახება არაუმეტეს 25*C-ზე დაბალ ტემპერატურაზე.

შეინახეთ ეს პრეპარატი ბავშვებისთვის მიუწვდომელ ადგილას.

ნუ გამოიყენებთ ამ პრეპარატს შეფუთვაზე მითითებული ვარგისობის ვადის გასვლის შემდეგ (EXP).

ვარგისობის ვადა ეხება მითითებული თვის ბოლო დღეს.

არ გადააგდოთ არცერთი პრეპარატი კანალიზაციაში ან საყოფაცხოვრებო ნარჩენებთან ერთად. ჰკითხეთ თქვენს ფარმაცევტს, თუ როგორ გადაყაროთ წამლები, რომლებსაც აღარ იყენებთ. ეს ზომები ხელს შეუწყობს გარემოს დაცვას.

6. შეფუთვის შიგთავსი და სხვა ინფორმაცია

რას შეიცავს კლოზაპოლი

აქტიური ნივთიერებაა კლოზაპინი. თითო ტაბლეტი შეიცავს 25 მგ ან 100 მგ კლოზაპინს.

სხვა ინგრედიენტებია: კარტოფილის სახამებელი, ლაქტოზას მონოჰიდრატი (18 მგ), მიკროკრისტალური ცელულოზა, მაგნიუმის სტეარატი, ჰიდროქსიპროპილ ცელულოზა, ნატრიუმის ლაურილის სულფატი, კოლოიდური უწყლო სილიციუმი.

როგორ გამოიყურება კლოზაპოლი და შეფუთვის შიგთავსი

კლოზაპოლი 25 მგ ტაბლეტები: მოყვითალო კრემისფერი, მოგრძო, ორმხრივამოზნექილი ტაბლეტი გამყოფი ღარით ერთ მხარეს. ტაბლეტი შეიძლება დაიყოს თანაბარ დოზებად.

კლოზაპოლი 100 მგ ტაბლეტები: მოყვითალო კრემისფერი, მრგვალი, ორმხრივამოზნექილი ტაბლეტი.

კლოზაპოლი 25 მგ ტაბლეტები ხელმისაწვდომია შეფუთვაში, რომელიც შეიცავს 50 ტაბლეტს PVC/ალუმინის ფოლგის ბლისტერებში (2 ბლისტერი, თითო 25 ტაბლეტით) შეფუთული მუყაოს კოლოფში.

კლოზაპოლი 100 მგ ტაბლეტები ხელმისაწვდომია შეფუთვაში, რომელიც შეიცავს 50 ტაბლეტს PVC/ალუმინის ფოლგის ბლისტერებში (2 ბლისტერი, თითო 25 ტაბლეტით) შეფუთული მუყაოს კოლოფში.