ინტესტალი - Intestal 262.5მგ 21 ტაბლეტი

ინტესტალის ტაბლეტი

ბისმუტის სუბსალიცილატი

გთხოვთ, ყურადღებით წაიკითხოთ ეს ინსტრუქცია, სანამ დაიწყებთ ამ პრეპარატის მიღებას, რადგან ის შეიცავს თქვენთვის მნიშვნელოვან ინფორმაციას. 

გამოიყენეთ ეს მედიკამენტი ზუსტად ისე, როგორც მითითებულია ამ ფურცელ-ჩანართში ან როგორც გირჩიათ თქვენმა ექიმმა ან ფარმაცევტმა.

· შეინახეთ ეს ფურცელ-ჩანართი. შეიძლება დაგჭირდეთ ხელახლა წაკითხვა.

· თუ თქვენ გაქვთ დამატებითი შეკითხვები, მიმართეთ თქვენს ფარმაცევტს.

· თუ რაიმე გვერდითი მოვლენა შენიშნეთ, მიმართეთ ექიმს ან ფარმაცევტს. ეს მოიცავს ნებისმიერ შესაძლო გვერდით მოვლენას, რომელიც არ არის ჩამოთვლილი ამ ფურცელ-ჩანართში. იხილეთ მე-4 ნაწილი.

· აუცილებლად მიმართეთ ექიმს, თუ თავს უკეთ არ გრძნობთ ან თუ 2 დღის შემდეგ გრძნობთ გაუარესებას.

რა შედის ამ ფურცელ-ჩანართში:

1. რა არის ინტესტალის ტაბლეტი და რისთვის გამოიყენება

2. რა უნდა იცოდეთ ინტესტალის ტაბლეტის მიღებამდე

3. როგორ მივიღოთ ინტესტალის ტაბლეტი

4. შესაძლო გვერდითი მოვლენები

5. როგორ შევინახოთ ინტესტალის ტაბლეტი

6. შეფუთვის შიგთავსი და სხვა ინფორმაცია

1. რა არის ინტესტალის ტაბლეტი და რისთვის გამოიყენება

ინტესტალის ტაბლეტის აქტიური ნივთიერება არის ბისმუტის სუბსალიცილატი, რომელიც რეკომენდებულია გასტრიტის, გულძმარვის, გულისრევისა და დიარეის სიმპტომური მკურნალობისთვის.

გარდა ამისა, მას აქვს ანტიბაქტერიული ეფექტი ბაქტერია Helicobacter pylori-ს წინააღმდეგ, რომელმაც შეიძლება გამოიწვიოს ლორწოვანი გარსის ანთება და პეპტიური წყლული.

წყლულის სამუდამოდ განკურნებისთვის აუცილებელია ბაქტერიების განადგურება. ინტესტალის ტაბლეტები ხელს უწყობს Helicobacter pylori ბაქტერიით გამოწვეული ინფექციების აღმოფხვრას ან შემცირებას.

ექიმმა შეიძლება დანიშნოს სხვა მედიკამენტები ინტესტალის ტაბლეტებთან ერთად Helicobacter pylori-ის გასანადგურებლად.

ბისმუტის სუბსალიცილატის ფორმით არსებული ბისმუტი ორგანიზმში ძალიან მცირე რაოდენობით შეიწოვება, მაშინ როდესაც სალიცილატი მნიშვნელოვნად შეიწოვება.

გასტრიტის, გულძმარვის, გულისრევისა და დიარეის სიმპტომური მკურნალობისთვის მიმართეთ ექიმს, თუ სიმპტომები არ გაუმჯობესდა ან პირიქით გაუარესდა 2 დღის განმავლობაში.

2. რა უნდა იცოდეთ ინტესტალის ტაბლეტის მიღებამდე

არ მიიღოთ ინსტალატის ტაბლეტი:

· თუ გაქვთ ალერგია ბისმუტის სუბსალიცილატზე ან ამ პრეპარატის რომელიმე სხვა ინგრედიენტზე (ჩამოთვლილია მე-6 ნაწილში),

· თუ ანამნეზში გქონიათ სალიცილატებით ან სხვა ნებისმიერი არასტეროიდული ანთების საწინააღმდეგო და ტკივილგამაყუჩებელი პრეპარატით გამოწვეული ასთმური რეაქციები,

· თუ გაწუხებთ კუჭ-ნაწლავის წყლული,

· თუ გაქვთ სისხლდენის მომატებული რისკი,

· თუ გაწუხებთ თირკმლის მძიმე უკმარისობა,

· თუ გაწუხებთ ღვიძლის მძიმე უკმარისობა,

· თუ გაწუხებთ გულის მძიმე უკმარისობა,

· თუ მკურნალობთ მეტოტრექსატით -  15 მგ/კვირაში  ან უფრო მაღალი დოზით,

· თუ ხართ ორსულობის ბოლო ტრიმესტრში,

· 12 წლამდე ასაკის ბავშვი.

გაფრთხილებები და უსაფრთხოების ზომები

ინტესტალის ტაბლეტების მიღებამდე გაესაუბრეთ თქვენ ექიმს და ფარმაცევტს. 

სიფრთხილეა რეკომენდებული:

· თუ ხართ ორსულობის პირველ და მეორე ტრიმესტრში;

· თუ ხართ ლაქტაციის პერიოდში;

· თუ გაქვთ ანთების საწინააღმდეგო და ანტირევმატული პრეპარატების მიმართ მომატებული მგრძნობელობა;

· თუ იღებთ ანტიკოაგულანტებს (როგორიცაა კუმარინის წარმოებულები, ჰეპარინი, დაბალი დოზის ჰეპარინის გარდა);

· თუ იღებთ პერორალურ სისხლში შაქრის დონის დამწევ პრეპარატებს, ტეტრაციკლინის შემცველ ანტიბიოტიკებს, ან პოდაგრის საკურნალო პრეპარატებს;

· თუ გაქვთ თირკმლის უკმარისობა ან გულ-სისხლძარღვთა დაავადება, რადგან სალიცილატმა შეიძლება კიდევ უფრო გაზარდოს თირკმლის დაზიანების ან თირკმლის მწვავე უკმარისობის რისკი;

· თუ ანამნეზში გაქვთ კუჭ-ნაწლავის წყლული, მათ შორის ქრონიკული ან მორეციდივე წყლულები, ან კუჭ-ნაწლავიდან სისხლდენის შემთხვევა;

· თუ გაწუხებთ ასთმა, თივის ცხელება, ცხვირის პოლიპები, გაქვთ ფილტვების ქრონიკული ობსტრუქციული დაავადება ან გქონიათ მედიკამენტებზე სხვა ალერგიული რეაქციები, როგორიცაა გამონაყარი, ქავილი, ჭინჭრის ციება, რადგან მგრძნობიარე პაციენტებში სალიცილატებმა შეიძლება გამოიწვიოს ბრონქული სპაზმი და ასთმის შეტევა ან სხვა ჰიპერმგრძნობელობის რეაქცია;

· თუ გაქვთ დაზიანებული ღვიძლი;

· თუ გაქვთ, მწვავე გლუკოზა-6-ფოსფატ დეჰიდროგენაზას (G6PD) დეფიციტი, რადგან ასეთ შემთხვევებში სალიცილატმა შეიძლება გამოიწვიოს სისხლის წითელი უჯრედების დაშლა (ჰემოლიზი) ან ჰემოლიზური ანემია. ჰემოლიზის რისკის ზრდა შესაძლებელია დამოკიდებული იყოს შემდეგ ფაქტორებზე: მაღალი დოზა, ცხელება, მწვავე ინფექცია;

· თუ ხართ დასუსტებული ან ხანდაზმული და დიარეის გამო დაკარგეთ დიდი რაოდენობით სითხე და ელექტროლიტები.

ინტესტალის ტაბლეტის გამოყენება გასტრიტის, გულძმარვის, გულისრევისა და დიარეის სიმპტომური მკურნალობისთვის არ შეიძლება, თუ სიმპტომები მძიმეა ან 2 დღეზე მეტ ხანს გრძელდება, სანამ ექიმი არ ჩათვლის საჭიროდ.

რეკომენდებულზე მაღალმა დოზებმა ან მიღების ხანგრძლივმა პერიოდმა შეიძლება გაზარდოს გვერდითი რეაქციების განვითარების რისკი (განსაკუთრებით ბისმუტის შემცველობის გამო).

ინტესტალის ტაბლეტებმა შეიძლება გამოიწვიოს სისხლდენის გაძლიერება ქირურგიული პროცედურების ჩატარების დროს და მის შემდგომ პერიოდში (მათ შორის მცირე პროცედურებისას, როგორიცაა კბილის ამოღება).

ბავშვები და მოზარდები

ინტესტალის ტაბლეტები არ მისცეთ 12 წლამდე ასაკის ბავშვებს.

12 წელზე მეტი ასაკის ბავშვებში და მოზარდებში ცხელებისას, ინტესტალის ტაბლეტების მიცემა შეიძლება მხოლოდ ექიმის გადაწყვეტილებით და თუ სხვა არცერთი წამალი არ იყო ეფექტური. მუდმივი ღებინების შემთხვევაში, გთხოვთ, დაუყოვნებლივ მიმართოთ სამედიცინო დახმარებას, რადგან ეს შეიძლება იყოს იშვიათი, მაგრამ ძალიან საშიში დაავადების ნიშანი (რეის სინდრომი).

სხვა მედიკამენტები და ინსტესტალის ტაბლეტი

აცნობეთ ექიმს ან ფარმაცევტს, თუ იღებთ, ბოლო დროს იღებდით ან შეიძლება მიიღოთ სხვა მედიკამენტები.

მეტოტრექსატით (გამოიყენება აუტოიმუნური დაავადებების და კიბოს სამკურნალოდ) მკურნალობისას ინტესტალის ტაბლეტების მიღება 15 მგ/კვირაში დოზით  ან მეტით არ შეიძლება.

მოერიდეთ ინტესტალის ტაბლეტებთან ერთად შემდეგი მედიკამენტის მიღებას: 

• სტრეპტოკინაზა (პრეპარატი, რომელიც ინიშნება სისხლის კოლტების დასაშლელად).

ინსტალატის ტაბლეტთან ერთად  შემდეგი მედიკამენტების მიღება მოითხოვს განსაკუთრებულ ყურადღებას:

• მეტოტრექსატი, რომელიც დანიშნულია კვირაში 15 მგ-ზე უფრო ნაკლები დოზით;

• ანტიკოაგულანტები, თრომბის დამშლელი პრეპარატები, ანტითრომბოციტული პრეპარატები;

• სხვა არასტეროიდული ანთების საწინააღმდეგო პრეპარატები;

• სეროტონინის უკუმიტაცების სელექციური ინჰიბიტორები (SSRI), რომლებიც გამოიყენება დეპრესიისა და შფოთვის სამკურნალოდ;

• დიგოქსინი, რომელიც გამოიყენება გულის დაავადებების სამკურნალოდ;

• ლითიუმი, რომელიც გამოიყენება ფსიქიკური დაავადებების სამკურნალოდ;

• ზოგიერთი სედაციური და საძილე საშუალებები: ბარბიტურატები;

• სისხლში შაქრის დონის დამწევი მედიკამენტები, როგორიცაა ინსულინი ან პერორალური ანტიდიაბეტური პრეპარატები;

• შარდმდენები;

•  ანთების საწინააღმდეგო სტეროიდული პრეპარატები;

• ზოგიერთი ანტიჰიპერტენზიული პრეპარატები, აგფ ინჰიბიტორები: მაგალითად, კაპტოპრილი, ენალაპრილი;

• ვალპროის მჟავა, რომელიც გამოიყენება ეპილეფსიის სამკურნალოდ;

• ურიკოზურიული პრეპარატები, რომლებიც გამოიყენება პოდაგრის სამკურნალოდ, მაგალითად: ბენზბრომარონი, პრობენეციდი;

• ტეტრაციკლინები (ანტიბიოტიკის სახეობა). ეს ტაბლეტები უნდა მიიღოთ ინტესტალის ტაბლეტების მიღებამდე რამდენიმე საათით ადრე ან რამდენიმე საათით შემდეგ.

ინტესტალი ტაბლეტების მიღება საკვებთან და სასმელთან ერთად

გასტრიტის, გულძმარვის, გულისრევისა და დიარეის სიმპტომური მკურნალობისთვის, ინტესტალის ტაბლეტების მიღება შესაძლებელია საკვების გარეშე.

Helicobacter pylori ბაქტერიით გამოწვეული ინფექციის სამკურნალოდ, ინტესტალის ტაბლეტები უნდა მიიღოთ უზმოზე (ძირითად კვებამდე ნახევარი საათით ადრე და ძილის წინ).

ალკოჰოლთან ერთდროული მიღება ზრდის ლორწოვანი გარსის დაზიანების და კუჭ-ნაწლავის სისხლდენის რისკს.

ორსულობა და ძუძუთი კვება

თუ ხართ ორსულად ან ძუძუთი კვებავთ ბავშვს, ფიქრობთ, რომ შესაძლოა ორსულად იყოთ ან გეგმავთ ბავშვის გაჩენას, ამ პრეპარატის მიღებამდე ჰკითხეთ რჩევა თქვენ ექიმს ან ფარმაცევტს.

ინტესტალის ტაბლეტების გამოყენება შეიძლება ორსულობის პირველი 6 თვის განმავლობაში, ისიც მხოლოდ აუცილებლობის შემთხვევებში, ექიმის რჩევის შესაბამისად, მისი გამოყენება არ შეიძლება ორსულობის ბოლო 3 თვის განმავლობაში.

მოქმედი ნივთიერების მცირე რაოდენობა გადადის დედის რძეში. ძუძუთი კვების დროს შეიძლება მცირე დოზებით გამოყენება, პერიოდული მკურნალობისთვის. თუ უფრო ხანგრძლივი პერიოდის განმავლობაში საჭიროა უფრო მაღალი დოზების მიღება, ძუძუთი კვება უნდა შეწყდეს.

არსებობს მონაცემები, რომ სალიცილატების მოქმედების მექანიზმმა შეიძლება გავლენა მოახდინოს ქალის ნაყოფიერებაზე. ამ ეფექტის შექცევა შესაძლებელია მკურნალობის შეწყვეტით.

მანქანის მართვა და მექანიზმების მართვა

ინტესტალის ტაბლეტების გამოყენებისას მანქანის მართვაზე ან მექანიზმებთან მუშაობაზე ზეგავლენას არ ახდენს.

3. როგორ მივიღოთ ინტესტალის ტაბლეტი

ყოველთვის მიიღეთ ეს წამალი ზუსტად ისე, როგორც ექიმმა ან ფარმაცევტმა გირჩიათ. თუ არ ხართ დარწმუნებული, მიმართეთ ექიმს ან ფარმაცევტს.

გასტრიტი, გულისრევა და დიარეის სიმპრტომური მკურნალობისას:

12 წლიდან ბავშვები, მოზარდები და მოზრდილები:

წამლის ერთჯერადი დოზაა 2 ტაბლეტი.

ერთჯერადი დოზის გამეორება შესაძლებელია საჭიროებისამებრ, ყოველ ½ - 1 საათში.

24 საათის განმავლობაში მიიღეთ მაქსიმუმ 16 ტაბლეტი.

არ გადააჭარბოთ რეკომენდებულ დოზას.

გამოყენება ბავშვებში

ინტესტალის ტაბლეტში სალიცილატის შემცველობასთან დაკავშირებული რეის სინდრომის რისკის გამო, ამ წამალის დანიშვნა არ ხდება 12 წლამდე ასაკის ბავშვებში.

მიღების გზა

პერორალური 

ინტესტალის ტაბლეტების მიღება შესაძლებელია საკვების გარეშე გასტრიტის, გულძმარვის, გულისრევისა და დიარეის სიმპტომური მკურნალობისას.

Helicobacter pylori-ს ბაქტერიის აღმოფხვრა

მოზრდილები

-  4´1 ტაბლეტი დღეში, როცა კუჭი ცარიელია (ნახევარი საათით ადრე ძირითად კვებამდე და საღამოს ძილის წინ);

ან

-  2´2 ტაბლეტი დღეში, როცა კუჭი ცარიელია  (ნახევარი საათით ადრე საუზმემდე და ვახშამამდე ან ძილის წინ).

მკურნალობის მაქსიმალურ ხანგრძლივობან არ უნდა გადააჭარბოს 2 თვეს.

ბისმუტის შემცველი საშუალებებით შემდეგი მკურნალობის დაწყებამდე უნდა გავიდეს სულ მცირე 2 თვე. 

თორმეტგოჯა ნაწლავის ან კუჭის წყლულის მკურნალობის ხანგრძლივობა 4-დან 8 კვირამდე გრძელდება.

H. pylori-ის აღმოსაფხვრელად, კომბინირებული მკურნალობის კომპონენტები და მკურნალობის ხანგრძლივობა (7-14 დღე) უნდა განისაზღვროს ექიმმა, თქვენი წამლის მიმართ ტოლერანტობის გათვალისწინებით. მკურნალობა უნდა ჩატარდეს ადგილობრივი რეზისტენტობის მონაცემებისა და სამკურნალო რეკომენდაციების შესაბამისად.

თუ მიიღეთ ინტესტალის ტაბლეტის საჭიროზე მეტი დოზა

არ მიიღოთ ერთჯერად დოზაზე მეტი  და არ გადააჭარბოთ მაქსიმალურ დღიურ დოზას (16 ტაბლეტი).

თუ მიიღეთ დანიშნულ დოზაზე მეტი ინტესტალის ტაბლეტები, დაუყოვნებლივ აცნობეთ ექიმს ან მიმართეთ უახლოეს საავადმყოფოს გადაუდებელი დახმარების განყოფილებას. თან იქონიეთ მედიკამენტის კოლოფი, რომ აჩვენოთ ექიმს.

ტვინის დაზიანება იქნა აღწერილი ბისმუტის სუბსალიცილატის დოზის გადაჭარბების შემთხვევაში.

თუ დაგავიწყდათ ინტესტალის ტაბლეტის მიღება

თუ იღებთ ინსტალატის ტაბლეტებს გასტრიტის, გულძმარვის, გულისრევისა და დიარეის სიმპტომური მკურნალობისთვის:

ინტესტალის ტაბლეტების რეგულარული მიღება არ არის საჭირო, მაგრამ უნდა მიიღოთ სიმპტომების განვითარებისთანავე (იხილეთ ზემოთ მოცემული მე-3 პუნქტი „ინტესტალის ტაბლეტების მიღების წესი“).

მიიღეთ დამატებით ერთჯერადად, დოზა, მხოლოდ იმ შემთხვევაში, თუ თქვენი სიმპტომებიდან გამომდინარე ეს საჭიროა.

თუ იღებთ ინტესტალის ტაბლეტებს Helicobacter pylori  ბაქტერიით გამოწვეული ინფექციის სამკურნალოდ:

არ მიიღოთ ორმაგი დოზა გამოტოვებული ტაბლეტის სანაცვლოდ.

თუ დაგავიწყდათ წამლის მიღება, მიიღეთ ის, როგორც კი გაგახსენდებათ, თუ უკვე შემდეგი დოზის მიღების დრო არ არის. ასეთ შემთხვევაში, არ მიიღოთ გამოტოვებული დოზა.

პრეპარატის გამოყენებასთან დაკავშირებული დამატებით შეკითხვების შემთხვევაში მიმართეთ თქვენს ექიმს ან ფარმაცევტს.

4. შესაძლო გვერდითი ეფექტები

ყველა მედიკამენტის მსგავსად, ამ მედიკამენტმაც შეიძლება გამოიწვიოს გვერდითი მოვლენები, თუმცა ისინი ყველას არ უვითარდება.

ძალიან გავრცელებული გვერდითი ეფექტი (ვლინდება 10-დან 1-ზე მეტ პაციენტში): შავი ფერის განავალი.

ხშირი გვერდითი ეფექტი (ვლინდება 10-დან 1-მდე პაციენტში): ენის შავი ფერის შეფერილობა.

იშვიათი გვერდითი ეფექტი (ვლინდება 1000-დან 1-მდე პაციენტში): საჭმლის მონელების პრობლემები, მუცლის ტკივილი, კუჭ-ნაწლავის ანთება, წყლული.

ძალიან იშვიათი გვერდითი ეფექტები (ვლინდება 10000-დან 1 პაციენტში): ჰემოფილია, მძიმე სისხლდენა, კუჭიდან და ნაწლავებიდან სისხლდენა, წყლული, ჰემატომა. კუჭ-ნაწლავის სისხლდენის სიმპტომებია სისხლიანი ღებინება და შავი განავალი. პერიოპერაციული სისხლდენა, ცხვირიდან სისხლდენა, საშარდე და სასქესო სისტემიდან სისხლდენა, ღრძილებიდან სისხლდენა. ხანგრძლივმა სისხლდენამ შეიძლება გამოიწვიოს ანემია.

შეიძლება განვითარდეს მომატებული მგრძნობელობის რეაქციები, როგორიცაა ასთმის შეტევა, კანზე გამონაყარი, შეშუპება, ქავილი, ცხვირის „გაჭედვა“, სურდო და ძალიან მძიმე შემთხვევებში მომატებული მგრძნობელობის რეაქციები შეიძლება განვიტარდეს, რომლებიც გავლენას ახდენს მთელ სხეულზე (ანაფილაქსიური შოკი).

აღწერილია, ასევე, თავბრუსხვევა, ტინიტუსი  და ყურებში შუილი, რაც შეიძლება დოზის გადაჭარბების სიმპტომები იყოს.

უცნობი სიხშირის გვერდითი ეფექტები (სიხშირის შეფასება შეუძლებელია არსებული მონაცემებით): ქალასშიდა ჰემორაგია. ქალასშიდა სისხლჩაქცევა დაფიქსირდა ძირითადად პაციენტებში, რომლებსაც აღენიშნებოდათ არანამკურნალევი ჰიპერტენზია ან იყენებდნენ ანტიკოაგულანტების პარალელურად. სისხლის წითელი უჯრედების დარღვევა (ჰემოლიზი) და ჰემოლიზური ანემია დაფიქსირდა პაციენტებში, რომლებსაც აღენიშნებოდათ ენზიმ გლუკოზა-6-ფოსფატ დეჰიდროგენაზას (G6PD) მწვავე დეფიციტი.

ტრანსამინაზების მომატებული დონე (დაფიქსირდა სისხლის ანალიზით).

აღინიშნა თირკმლის ფუნქციის დარღვევა და თირკმლის მწვავე უკმარისობა.

გვერდითი ეფექტების შესახებ შეტყობინება

თუ თქვენ შენიშნეთ რაიმე გვერდითი მოვლენა, მიმართეთ ექიმს ან ფარმაცევტს. ეს მოიცავს ასევე ნებისმიერ შესაძლო გვერდით ეფექტს, რომელიც არ არის მოცემული ამ ფურცელ-ჩანართში. 

გვერდითი მოვლენების შესახებ შეტყობინების გაგზავნით თქვენ ხელს შეუწყობთ ამ მედიკამენტის უსაფრთხოების შესახებ მეტი ინფორმაციის მოპოვებას.

5. როგორ შევინახოთ ინტესტალის ტაბლეტი

ინახება არაუმეტეს  25°C ტემპერატურაზე.

მედიკამენტი შეინახეთ ბავშვებისთვის მიუწვდომელ ადგილას.

არ გამოიყენოთ ეს წამალი ვარგისიანობის ვადის გასვლის შემდეგ, რომელიც მითითებულია კოლოფზე „ვარგისიანობის ვადა“-ს შემდეგ. ვარგისიანობის ვადა ეხება მოცემული თვის ბოლო დღეს.

არ გადააგდოთ მედიკამენტები ჩამდინარე წყლებში ან საყოფაცხოვრებო ნარჩენებში. ჰკითხეთ ფარმაცევტს, თუ როგორ გადაყაროთ გამოუყენებელი მედიკამენტები. ეს ზომები ხელს შეუწყობს გარემოს დაცვას.

6. შეფუთვის შიგთავსი და სხვა ინფორმაცია

რას შეიცავს ინტესტალის ტაბლეტი

- აქტიური ნივთიერებაა ბისმუტის სუბსალიცილატი. თითოეული ტაბლეტი შეიცავს 262.5 მგ ბისმუტის სუბსალიცილატს.

- სხვა დამხმარე ნივთიერებებია: კალციუმის კარბონატი, მიკროკრისტალური ცელულოზა, ნატრიუმის კარბოქსიმეთილის სახამებელი (ტიპი A), პოვიდონი K30, მაგნიუმის სტეარატი, კოლოიდური უწყლო სილიციუმი.

ინტესტალის ტაბლეტის გარეგნული სახე და შეფუთვის შიგთავსი

თეთრი ან თითქმის თეთრი, მრგვალი, ორმხრივად ამოზნექილი ტაბლეტი, ერთ მხარეს ამოტვიფრული "ორი წერტილი და მეოთხედი რკალი" ნიშნით, მეორე მხარე ნიშნის გარეშეა.

შვიდი ტაბლეტი უფერო გამჭვირვალე PVC/PVdC//ალუმინის ბლისტერულ შეფუთვაში. თითოეულ კოლოფში მოთავსებულია სამი ბლისტერი

გაცემის წესი:

ფარმაცევტული პროდუქტის ჯგუფი III, გაიცემა რეცეპტის გარეშე.