ერიუსი - Aerius 5მგ 10 ტაბლეტი

ერიუსი (AERIUS®)

გარსით დაფარული აბები 5 მგ

ფურცელ-ჩანართი

(პაციენტებისთვის)

ვიდრე პრეპარატის მიღებას დაიწყებთ, ყურადღებით წაიკითხეთ ფურცელ-ჩანართი!

შეინახეთ ფურცელ-ჩანართი, შესაძლოა მისი გადაკითხვა დაგჭირდეთ.

თუ დამატებითი შეკითხვები გაგიჩნდებათ, გთხოვთ, საკონსულტაციოდ მიმართოთ თქვენს ექიმს. 

ეს პრეპარატი განკუთვნილია უშუალოდ თქვენთვის, ამიტომ ნუ გადასცემთ მას სხვა პირებს. ამან შესაძლოა მათ ჯანმრთელობას ზიანი მიაყენოს მაშინაც კი, თუ მათი დაავადების სიმპტომები თქვენი სიმპტომების მსგავსია. 

სავაჭრო დასახელება

ერიუსი, 5 მგ, გარსით დაფარული აბები

არაპატენტირებული საერთაშორისო დასახელება

დესლორატადინი

დახასიათება

მრგვალი, ღია ცისფერი აბები. ერთი მხრიდან აბებს აქვს მცირე ჩაღრმავება ცენტრში, მეორე მხრიდან გლუვია. 

შემადგენლობა 

1 აბი შეიცავს

მოქმედი ნივთიერება: 5 მგ დესლორატადინს.

დამხმარე ნივთიერებები: კალციუმის ჰიდროფოსფატის დიჰიდრატი, მიკროკრისტალური ცელულოზა, სიმინდის სახამებელი, ტალკი. 

გარსი: Opadry II Blue 32B10817 (ლაქტოზას მონოჰიდრატი, ჰიპრომელოზა, ტიტანის დიოქსიდი, მაკროგოლი, FD&C №2/ინდიგოკარმინი ალუმინის ლაქი, კარნაუბის ცვილი. 

სამკურნალწამლო ფორმა

გარსით დაფარული აბები.

ფარმაკოთერაპიული ჯგუფი

სისტემური გამოყენების ანტიჰისტამინური საშუალებები. ათქ კოდი: R06AX27.

ასევე, იხილეთ: >Eslotin - ესლოტინი 5მგ 10 ტაბლეტი

ფარმაკოლოგიური ჯგუფი

ფარმაკოდინამიკა:

დესლორატადინი – არასედაციური ხანგრძლივი მოქმედების ანტიჰისტამინური პრეპარატი, რომელსაც გააჩნია სელექციური ანტაგონისტური მოქმედება პერიფერიულ Н1- ჰისტამინურ რეცეპტორებზე. პერორალური მიღების შემდგომ დესლორატადინი სელექციურად ბლოკავს პერიფერიულ Н1–ჰისტამინურ რეცეპტორებს, ვინაიდან ნივთიერება ჰემატოენცეფალურ ბარიერს იქით არ აღწევს.  

in vitro კვლევებმა აჩვენა, რომ დესლორატადინი ახდენს ანტიალერგიულ მოქმედებას, ამასთან, თრგუნავს ადამიანის პოხიერი უჯრედებიდან/ბაზოფილებიდან ანთების საწინააღმდეგო ციტოკინების გამოთავისუფლებას IL-4, IL-6, IL-8 და IL-13 -ის ჩათვლით, აგრეთვე ახდენს ენდოთელურ უჯრედებში P- სელექტინის ადჰეზიის მოლეკულების ექსპრესიის ინჰიბირებას. ამ მონაცემთა კლინიკური მნიშვნელობა უცნობია. 

მრავალჯერადი დოზების კლინიკურ კვლევებში დესლორატადინის ყოველდღიურად მიღებას 20მგ-ზე ნაკლები დოზით 14 დღის განმავლობაში გულ-სისხლძარღვთა სისტემის მხრივ სტატისტიკურად ან კლინიკურად მნიშვნელოვანი რაიმე ცვლილებები არ ახლდა. კლინიკურ-ფარმაკოლოგიური კვლევისას 10 დღის განმავლობაში 45მგ სადღეღამისო დოზით (თერაპიულ დოზაზე 9-ჯერ მაღალი) პრეპარატ ერიუსის მიღებას QTc-ინტერვალის გახანგრძლივება არ გამოუწვევია. 

კეტოკონაზოლთან და ერითრომიცინთან ურთიერთქმედების შესწავლის კვლევებში დესლორატადინის კონცენტრაციის კლინიკურად მნიშვნელოვანი ცვლილებები პლაზმაში არ გამოვლინდა. 

ერიუსი ჰეტამოენცეფალურ ბარიერს იქით არ აღწევს. კონტროლირებად კლინიკურ კვლევებში რეკომენდებული 5მგ დოზის მიღებისას ძილიანობის სიხშირე პლაცებოს ჯგუფის ანალოგიურ მაჩვენებელს არ აღემატებოდა.  კლინიკური კვლევების მიმდინარეობისას  7,5მგ-მდე დოზის ერიუსის მიღება ფსიქომოტორულ ფუნქციაზე გავლენას არ ახდენს. 

ერთჯერადი დოზის კვლევისას უფროსებში 5მგ დესლორატადინი გავლენას არ ახდენდა ფრენის რეჟიმში სტანდარტული შრომისუნარიანობის პარამეტრზე, ამასთან, არ იწვევდა სუბიექტური ძილიანობის გაძლიერებას და არ აუარესებდა ფრენის დავალებების შესრულების უნარს.

კლინიკურ-ფარმაკოლოგიურ კვლევებში დესლორატადინი არ აძლიერებდა ალკოჰოლის ისეთ ეფექტებს, როგორიცაა ფსიქომოტორული ფუნქციის დარღვევა და ძილიანობა. ფსიქომოტორული ტესტების შედეგები არსებითად არ განსხვავდებოდა პაციენტებში, რომლებიც იღებდნენ დესლორატადინს და პლაცებოს ცალკე ან ალკოჰოლთან ერთად.  

>ალერგიული რინიტის მქონე პაციენტებში ერიუსი ეფექტური იყო ისეთი სიმპტომების შესამსუბუქებლად, როგორიცაა ცემინება, გამონადენი ცხვირიდან და ქავილი, აგრეთვე თვალების ქავილი და სიწითლე, ცრემლდენა, სასის ქავილი. ერიუსი ეფექტურად აკონტროლებს სიმპტომებს 24 საათის განმავლობაში. ერიუსის აბების ეფექტურობა ერთმნიშვნელოვნად დემონსტრირებული არ ყოფილა 12-17 წლამდე ასაკის მოზარდების კვლევებში. 

გარდა რინიტის დადგენილი კლასიფიკაციისა (სეზონური და წლიური), ალერგიული რინიტი შეიძლება გაიყოს ინტერმისიულად და პერსისტიულად სიმპტომების შენარჩუნების ხანგრძლივობის მიხედვით. ინტერმისიული რინიტისას სიმპტომები შეინიშნება კვირაში 4 დღეზე ნაკლები დროის განმავლობაში ან წელიწადში 4 კვირაზე ნაკლებ დროში. პერსისტიული რინიტისას - 4 დღეზე მეტი კვირაში ან 4 კვირაზე მეტი წელიწადში.  

რინოკონიუქტივით დაავადებულთა ცხოვრების ხარისხის გამოკითხვის დაჯამებული ქულების შედეგებით ერიუსი საკმაოდ ეფექტურად ამსუბუქებდა სეზონური ალერგიული რინიტის მქონე პაციენტების მდგომარეობას. მეტი გაუმჯობესება აღინიშნა სიმპტომების არსებობით შეზღუდული ყოველდღიური საქმიანობის და პრაქტიკული პრობლემების არეში.  

ჭინჭრის ციების კლასიკური მოდელის სახით, ხდებოდა ქრონიკული იდიოპათიური ჭინჭრის ციების შესწავლა, მათი ძირითადი პათოფიზიოლოგიური მექანიზმების მსგავსების საფუძველზე ეტიოლოგიისა და პრობლემების არარსებობის მიუხედავად, იმ პაციენტთა პროსპექტიული შერჩევისას, რომლებსაც ქრონიკული დაავადებები აქვთ. იმის გამო, რომ ჰისტამინის გამოყოფა წარმოადგენს მიზეზობრივ ფაქტორს ჭინჭრის ციების ყველა სახეობაში, მოსალოდნელია, რომ დესლორატადინი ეფექტური საშუალება იქნება ჭინჭრის ციების სხვა სახეობების სიმპტომების კუპირებაში, მათ შორის ქრონიკული იდიოპათიური ჭინჭრის ციებისას, როგორც მითითებულია კლინიკურ რეკომენდაციებში. 

ქრონიკული იდიოპათიური ჭინჭრის ციების მქონე პაციენტებში ორ პლაცებომაკონტროლირებელ ექვს კვირიან კვლევაში, ერიუსმა ეფექტურად შეამსუბუქა ქავილი და შეამცირა გამონაყარის ზომა და რაოდენობა მკურნალობის პირველივე კურსის დასრულებისას. ყოველ კვლევაში  ეფექტი შენარჩუნებული იყო დოზის მიღებიდან 24 საათის განმავლობაში. ისევე, როგორც ქრონიკული იდიოპათიური ჭინჭრის ციებისას ანტიჰისტამინური პრეპარატების სხვა კვლევებისას, გამოირიცხებოდა იმ პაციენტთა მცირე ნაწილი, რომლებიც რეზისტენტულებად ითვლებოდნენ ანტიჰისტამინური საშუალებების მკურნალობის მიმართ. ქავილის 50%-ით შემცირება აღინიშნებოდა პაციენტების 55%-ში, რომლებიც დესლორატადინით მკურნალობდნენ, პაციენტების იმ 19%-თან შედარებით, რომლებიც იღებდნენ პლაცებოს. პრეპარატ ერიუსით მკურნალობა აგრეთვე მნიშვნელოვნად ამცირებდა დაავადების უარყოფით გავლენას ძილსა და აქტიურობაზე დღის განმავლობაში, რაც განისაზღვრებოდა ოთხქულიანი შკალით, რომელიც გამოიყენება ამ ცვლადების შეფასებისას. 

ფარმაკოკინეტიკა

პლაზმაში დესლორატადინი განისაზღვრება მიღებიდან 30 წუთის შემდეგ. პლაზმაში დესლორატადინის მაქსიმალური კონცეტრაცია საშუალოდ 3 საათის შემდეგ მიიღწევა, ნახევარგამოყოფის პერიოდი საშუალოდ 27 საათს შეადგენს. დესლორატადინის კუმულაციის ხარისხი მისი ნახევარგამოყოფის პერიოდს (დაახლოებით 27 საათი) და მიღების ჯერადობას (დღე-ღამეში ერთხელ) შეესაბამება. დესლორატადინის ბიოშეღწევადობა 5-დან 20-მგ-მდე დიაპაზონში დოზის პროპორციული იყო. 

ფარმაკოკინეტიკის კვლევაში, რომელსაც პაციენტების დემოგრაფიული თავისებურებები შედარებადი იყო ამგვარებთან სეზონური ალერგიული რინიტის მქონე პირთა საერთო პოპულაციაში, გამოკვლეულთა 4% დესლორატადინის უფრო მაღალ კონცენტრაციას აღწევდა. ეს პროცენტი შესაძლოა ვარირებდეს ეთნიკური წარმოშობიდან გამომდინარე. დესლორატადინის მაქსიმალური კონცენტრაცია თითქმის 3-ჯერ მაღალი იყო დაახლოებით 7 საათის შემდეგ ნახევარგამოყოფის საბოლოო ფაზით, რომელიც გრძელდებოდა დაახლოებით 89 საათი. ამ  გამოკვლეულთა უსაფრთხოების პროფილი არ განსხვავდებოდა ამგვარისგან საერთო პოპულაციაში. 

დესლორატადინი პლაზმის ცილებს ზომიერად (83-87%) უკავშირდებოდა. დღეში ერთხელ 5-დან 20მგ დოზით, 14 დღის განმავლობაში დესლორატადინის მიღებისას პრეპარატის კლინიკური მნიშვნელობის მქონე კუმულაციის ნიშნები არ აღინიშნა.  

ფერმენტები, რომელიც უზრუნველყოფს დესლორატადინის მეტაბოლიზმს, ჯერჯერობით დაუდგენელია და ამიტომ არ არის შესაძლებელი სრულად გამოირიცხოს ურთიერთქმედება სხვა სამკურნალწამლო საშუალებებთან. 

ჩატარებული in vivo და in vitro კვლევებით დადგინდა, რომ დესლორატადინი არ თრგუნავს CYP3A4 ან CYP2D6 მოქმედებას და არ არის არც სუბსტრატი, არც P-გლიკოპროტეიდის ინჰიბიტორი.

7,5მგ დოზით დესლორატადინის ერთჯერადი მიღებისას ჩატარებულ კვლევაში დადგინდა, რომ საკვები  (ცხიმიანი მაღალკალორიული საუზმე)ან გრეიპფრუტის წვენი დესლორატადინის გადანაწილებაზე არ მოქმედებს.

პაციენტები თირკმლის ფუნქციის დარღვევით

დესლორატადინის ფარმაკოკინეტიკა შედარებულ იქნა პაციენტებში ქრონიკული თირკმლის უკმარისობით და ჯანმრთელ პირებს შორის, ერთ კვლევაში ერთჯერადი დოზით და ერთ კვლევაში მრავალჯერადი დოზით. ერთჯერადი დოზის კვლევისას დესლორატადინის გავლენა იყო დაახლოებით 2 და 2,5-ჯერ უფრო მეტი პაციენტებში მსუბუქი/სუსტად და მძიმედ გამოხატული თირკმლის ქრონიკული უკმარისობით ,ვიდრე ჯანმრთელ ადამიანებში. მრავალჯერადი დოზის კვლევებისას სტაციონალური მდგომარეობა დგებოდა 11 დღის შემდეგ და ჯანმრთელ ადამიანთან შედარებით დესლორატადინის მოქმედება იყო 1,5-ჯერ უფრო მაღალი იმ პაციენტებთან შედარებით, რომელთაც ჰქონდათ მსუბუქი და სუსტად გამოხატული თირკმლის ქრონიკული უკმარისობა, ხოლო 2,5-ჯერ მეტი იმ პაციენტებთან შედარებით, რომელთაც ჰქონდათ თირკმლის ქრონიკული უკმარისობის მძიმე ფორმა. ორივე კვლევაში დესლორატადინისა და 3 ჰიდროქსიდესლორატადინის ზემოქმედების ცვლილება (AUC და Cmax) არ იყო კლინიკურად მნიშვნელოვანი. 

გამოყენების ჩვენებები

ალერგიული რინიტების სიმპტომების შესამსუბუქებლად, როგორიცაა თვალების ქავილი და სიწითლე, ცრემლდენა, ცემინება, ქავილი და ცხვირიდან გამონადენი, სასის ქავილი. 

ჭინჭრის ციებასთან დაკავშირებული სიმპტომების შესამსუბუქებლად, როგორიცაა ქავილი და გამონაყარი. 

მიღების წესი და დოზები

ალერგიულ რინიტთან (მათ შორის ინტერმისიული და პერსისტიული სიმპტომების) და ჭინჭრის ციებასთან დაკავშირებული სიმპტომების შემსუბუქებისთვის. ერიუსს იღებენ საკვების მიღებისგან დამოუკიდებლად:

ზრდასრულები და 12-წლიდან ბავშვები: იღებენ 1 აბს დღე-ღამეში ერთხელ.

ინტერმისიული ალერგიული რინიტის თერაპია (სიმპტომების არსებობა კვირაში 4 დღეზე ან წელიწადში 4 კვირაზე ნაკლები ხნით) აუცილებელია ჩატარდეს ანამნეზის მონაცემების გათვალისწინებით, უნდა შეწყდეს სიმპტომების გაქრობის შემდეგ და განახლდეს სიმპტომების ხელახალი გაჩენისას. პერსისტიული ალერგიული რინიტის (სიმპტომების არსებობა კვირაში 4 დღეზე ან წელიწადში 4 კვირაზე მეტი ხნის განმავლობაში) აუცილებელია მკურნალობის გაგრძელება ალერგენთან კონტაქტის მთელი პერიოდის განმავლობაში. 

ბავშვები

12 წლამდე ბავშვებში პრეპარატის უსაფრთხოება და ეფექტურობა დადგენილი არ არის. არ არსებობს მონაცემები. 

12-17 წლამდე მოზარდებისთვის დელსორატადინის მიღების კლინიკური გამოცდილება შეზღუდულია 

ხანდაზმული პაციენტები

ხანდაზმულ პაციენტებში უსაფრთხოება და ეფექტურობა არ არის დადგენილი 

პაციენტები თირკმლის უკმარისობით

სიფრთხილით უნდა იქნეს მიღებული პაციენტებში თირკმლის მძიმე ფორმის  უკმარისობის დროს.

პაციენტები ღვიძლის ფუნქციის მოშლით

არ არსებობს მონაცემები პაციენტებზე ღვიძლის ფუნქციის დარღვევებით პრეპარატის გამოყენების შესახებ.

თუ თქვენ დაგავიწყდათ პრეპარატის დროულად მიღება, მიიღეთ გამოტოვებული დოზა რაც შეიძლება სწრაფად, შემდეგ განაგრძეთ ერიუსის მიღება ჩვეულ დროს. არ მიიღოთ ერიუსის ორმაგი დოზა გამოტოვებული დოზის კომპენსაციისთვის. 

გვერდითი მოქმედებები

როგორც ყველა პრეპარატს, ასევე, ერიუსსაც შეუძლია გამოიწვიოს გვერდითი ეფექტები, თუმცა ყველა ადამიანი მას შეიძლება ვერ გრძნობდეს.

ერიუსის გამოყენებისას ძალიან იშვიათად გამოვლინდა მძიმე ალერგიული რეაქციები (სუნთქვის გაძნელება, სტვენა სუნთქვისას, ქავილი, ჭინჭრის ციება და შეშუპება). ამ რეაქციების გამოვლენისთანავე აუცილებელია სამკურნალო საშუალების მიღების შეწყვეტა და ექიმთან მიმართვა.

გვერდითი ეფექტები, რომლებიც გამოვლინდა კლინიკური კვლევებისას უფროსებში, დაახლოებით ჰგავდა იმ არასასურველ მოვლენებს, რომელიც გამოვლინდა პლაცებოს მიღებისას.

თუმცა, დაღლილობა, პირის სიმშრალე და თავის ტკივილი უფრო ხშირად ვლინდებოდა, ვიდრე პლაცებოს მიღებისას. თავის ტკივილი, მოზარდებშიც გამოვლინდა, როგორც ყველაზე ხშირი გვერდითი ეფექტი. 

პრეპარატ ერიუსის კლინიკური კვლევების შედეგად დადგინდა ყველაზე ხშირად გამოვლენილი გვერდითი ეფექტები: ხშირად (10-დან 1 ადამიანზე მეტი): დაღლილობა, პირის სიმშრალე, თავის ტკივილი.

უფროსები

ერიუსის პოსტრეგისტრაციული გამოყენებისას გამოვლინდა შემდეგი გვერდითი ეფექტები: ძალიან იშვიათად (არაუმეტეს 1 კაცზე 10 000-იდან): მძიმე ალერგიული რეაქციები, გამონაყარი, გაძლიერებული ან არარეგულირებადი გულისცემა, გახშირებული გულისცემა, მუცლის ტკივილი, გულისრევა, ღებინება, საჭმლის მომნელებელი ტრაქტის დარღვევა, დიარეა, თავბრუსხვევა, ძილიანობა, ძილის დარღვევა, კუნთების ტკივილი, ჰალუცინაციები, კრუნჩხვები, გამოხატული შფოთვა, ღვიძლის ანთება, ღვიძლის ფუნქციის ტესტის ანომალური მაჩვენებლები; სიხშირე ცნობილი არ არის (არსებული მონაცემებიდან გამომდინარე, სიხშირის განსაზღვრა შეუძლებელია): უჩვეულო სისუსტე, კანისა და/ან თვალის სიყვითლე, კანის მომატებული მგრძნობელობა მზის მიმართ (მოღრუბლული ამინდის დროსაც) და ულტრაიისფერი გამოსხივების მიმართ (მაგ. სოლარიუმის ვიზიტისას), გულისცემის სიხშირის ცვლილება, არასტანდარტული ქცევა, აგრესია, მომატებული მადა, წონის ზრდა. 

ბავშვები

სიხშირე ცნობილი არ არის: სუსტი გულისცემა, გულისცემის სიხშირის ცვლილება, არასტანდარტული ქცევა, აგრესია.

არასასურველი რეაქციების შესახებ შეტყობინების წარდგენა

ნებისმიერი არასასურველი რეაქციის განვითარებისთანავე სასურველია მიმართოთ ექიმს. ეს რეკომენდაცია ვრცელდება როგორც ზემოთ აღწერილი გვერდითი მოვლენების განვითარებას, ასევე, იმ რეაქციების გამოვლენას, რომელიც არ არის აღწერილი ფურცელ ჩანართში.არასასურველი რეაქციების შესახებ შეტყობინებით, თქვენ გვეხმარებით მივიღოთ მეტი ინფორმაცია პრეპარატის უსაფრთხოების შესახებ.

უკუჩვენებები

მომატებული მგრძნობელობა პრეპარატის ნებისმიერი კომპონენტის ან ლორატადინის მიმართ.

უსაფრთხოების ზომები

12 წლამდე ბავშვებში ერიუსის აბების მიღების ეფექტურობა და უსაფრთხოება გამოკვლეული არ არის (ვინაიდან აბი არ იყოფა, ხოლო აბის დოზა გათვლილია 12 წლის ასაკიდან).

დესლორატადინი სიფრთხილით ინიშნება იმ პაციენტებში, რომლებიც მიდრეკილნი არიან კრუნჩხვებისადმი პირად ან ოჯახის ანამნეზში, ყველაზე მეტად, კი პატარა ბავშვებში, რომლებიც უფრო მიდრეკილნი არიან კრუნჩხვების წარმოქმნისაკენ დესლორატადინით მკურნალობისას. მკურნალ ექიმს შეუძლია მიიღოს გადაწყვეტილება დესლორატადინის მიღების შეწყვეტაზე იმ პაციენტებზე, რომელთაც მკურნალობის პერიოდში აღენიშნებოდა კრუნჩხვები.

აბები შეიცავს ლაქტოზას, ამიტომ პრეპარატის გამოყენება არ შეიძლება იმ პაციენტებში, რომლებსაც ლაქტოზის თანდაყოლილი გადაუტანლობა, ლოპარა ლაქტოზის უკმარისობა ან გლუკოზა-გალაქტოზას მალაბსორბცია ახასიათებს.

ორსულობა და ლაქტაცია

თუ თქვენ აპირებთ დაორსულებას, ან უკვე ხართ ორსულად (ან ფიქრობთ, რომ ხართ ორსულად) ან ძუძუთი კვებავთ ბავშვს, კონსულტაცია გაიარეთ მკურნალ ექიმთან ან ფარმაცევტთან ერიუსის მიღების წინ.

თუ თქვენ ხართ ორსულად ან ძუძუთი კვებავთ ბავშვს, ერიუსის მიღება არ არის რეკომენდებული.

სატრანსპორტო საშუალებების მართვის უნარზე და მექანიზმებთან მუშაობაზე გავლენა რეკომენდებული დოზებით ერიუსი არ მოქმედებს სატრანსპორტო საშუალებების ან სხვა მექანიზების ტარების უნარზე. იმისდამიუხედავად, რომ ადამიანების უმეტეს ნაწილს არ ახასიათებს ძილიანობა, არ არის რეკომენდებული ისეთი საქმიანობით დაკავება, რომელსაც სჭირდება გონებრივი დაძაბვა, მაგ: ტრანსპორტისა და მექანიზმების მართვა, სანამ არ დადგინდება ინდივიდუალური რეაქცია პრეპარატის მიღებისას. 

ურთიერთქმედება სხვა სამკურნალო საშუალებებთან

კლინიკურად გამოკვეთილი ცვლილებები დესლორატადინის  პლაზმურ კონცენტრაციაში არაერთჯერადად მისი გამოყენებისას კეტოკონაზოლთან, ერითრომიცინთან, აზითრომიცინთან, ფლუოქსეტინთან, ციმეტიდინთან არ აღმოჩენილა. სხვა სამკურნალო საშუალებებთან ურთიერთქმედების შესახებ ცნობილი არ არის.

კლინიკურ-ფარმაკოლოგიურ კვლევებში ერიუსის აბების ალკოჰოლთან ერთდროულად მიღება არ აძლიერებდა ალკოჰოლის არასასურველ რეაქციას ფსიქომოტორულ ფუნქციაზე. თუმცა, პოსტმარკეტინგულ პერიოდში ყოფილა შეტყობინება ალკოჰოლის გადაუტანლობისა და ინტოქსიკაციის შესახებ. ამიტომ, რეკომედებულია სიფრთხილის დაცვა ალკოჰოლის პრეპარატთან ერთად მიღების დროს.

ბავშვები

ურთიერთქმედების კვლევა ჩატარებული იყო მხოლოდ უფროსებში.

თუ თქვენ ღებულობთ რაიმე სახის წამალს, კონსულტაცია გაიარეთ ექიმთან პრეპარატის გამოყენების შესაძლებლობის საკითხთან დაკავშირებით.

ზედოზირება

პრეპარატის მიღება ექიმის კონსულტაციით უნდა მოხდეს. შემთხვევითი ზედოზირებისას არ არის მოსალოდნელი სერიოზული არასასურველი მოვლენების განვითარება.

შეიძლება გამოვლინდეს არასასურველი რეაქციები, რომელიც აღწერილია ჩვეულებრივი თერაპიული დოზებით მიღებისას, თუმცა მათი გამოვლენის ხარისხი ზედოზირებისას შეიძლება იყოს უფრო მაღალი.

თუ თქვენ მიიღეთ ერიუს აბების რეკომენდებულ დოზაზე მეტი, აუცილებლად მიმართეთ ექიმს, ფარმაცევტს ან სამედიცინო სფეროს სხვა მუშაკს.

შენახვის პირობები

ინახება არაუმეტეს 30°С ტემპერატურაზე, მშრალ, ბავშვებისთვის მიუწვდომელ ადგილას.  

ვარგისობის ვადა

2 წელი. არ გამოიყენოთ პრეპარატი შეფუთვაზე მითითებული ვარგისობის ვადის გასვლის შემდეგ.  

გაცემის რეჟიმი:

ფარმაცევტული პროდუქტის ჯგუფი - III, გაიცემა რეცეპტის გარეშე

შეფუთვა

10 აბი ბლისტერზე. 1 ბლისტერი ფურცელ-ჩანართთან ერთად მოთავსებულია მუყაოს ყუთში.