დიმნა, ჩხავერი, წითელი მშრალი ღვინო, 2022 წ.

დახასიათება

ჩხავერი უნიკალური ქართული საღვინე ყურძნის ჯიშია. ღვინო დამზადებული და დავარგებულია ქვევრში, ტრადიციული ქართული მეთოდით, ლაშა ჩიქვინიძის საოჯახო მარანში 2022 წელს მოწეული მოსავლიდან. ვენახი გაშენებულია ზომიერი სიმჟავის თიხნარ (აყალო) ნიადაგზე, ზღვის დონიდან 180 მეტრის სიმაღლეზე. ვენახი იწამლება ბიო-ორგანული პრეპარატებით. ღვინო დაწმენდილია ბუნებრივი დალექვით. გოგირდი გამოიყენება მხოლოდ კვამლის სახით. ჩამოსხმულია შეზღუდული რაოდენობით.

ბრენდის ისტორია

ღვინო იწარმოება დასავლეთ საქართველოში, ბაღდათის რაიონში, სოფელ დიმში (დიმნა - სოფლის პრეისტორიული დასახელება), იმერულ მარან „დიმნაში“. ლაშა ჩიქვინიძე წარმოადგენს ოჯახის მეხუთე თაობას, რომელიც ეწევა მეღვინეობას. მისი დიდი ბაბუა - მოსე წაქაძე - იყო იმერეთში პირველი კომერციული საოჯახო მარნის მფლობელი, რომელიც ასახულია ნიკო ფიროსმანის ტილოებში. მის მფლობელობაშია 2 ჰექტარზე გაშენებული ვენახი, კერძოდ, 3500 ცოლიკოურის ნერგი, 1000 - ძელშავის, 500 - კრახუნას, 500 - ალექსანდროულის, 500 - ოცხანური საფერეს. მათ შორის 500 ნერგი გაშენებულია ტალავერზე. ასევე, სხვადასხვა ჯიშის სასუფრე ყურძენი - 300 ნერგი. აღნიშნული ვენახი გაშენებულია სხვადასხვა წლებში, ყავისფერ-თიხნარ (აყალო) ნიადაგზე, აღმოსავლეთიდან დასავლეთის მიმართულებით. ღვინო ფერმენტაციასა და დავარგებას გადის ქვევრში, ქვევრიდან ამოღების შემდეგ კი ინახება უჟანგავი ფოლადისა და შუშის ჭურჭელში.