დეპ - Dep-1 თვალის წვეთი 30მგ+14მგ/მლ 10მლ

დეპ-1
სამკურნალო ფორმა
თვალის წვეთები.
აღწერილობა: გამჭვირვალე უფერო ხსნარი.

შემადგენლობა

პრეპარატის 1 მლ შეიცავს
აქტიური ნივთიერებები: დექსპანთენოლი 30 მგ, პოლივინილის სპირტი 14 მგ.
დამხმარე ნივთიერებები: კალიუმის დიჰიდროფოსფატი, დიკალიუმის ფოსფატი, ბენზალკონიუმის ქლორიდი, საინექციო წყალი.

ასევე, იხილეთ: >Dexar - დექსარი თვალის წვეთები 10მლ

პრეპარატის ათქ კოდი შ01XA20 

ფარმაკოთერაპიული ჯგუფი

ოფთალმოლოგიაში გამოსაყენებელი საშუალებები. სხვა ოფთალმოლოგიური საშუალებები. ცრემლის ხელოვნური შემცვლელები და სხვა ნეიტრალური პრეპარატები. 

ფარმაკოლოგიური თვისებები

ფარმაკოდინამიკა

დექსპანთენოლი (პანთენოლი) არის პანთოტენის მჟავას (ვიტამინი B5) წინამორბედი. დექსპანთენოლი ორგანიზმში მეტაბოლიზდება პანთოტენის მჟავად. პანთოტენის მჟავა წარმოადგენს კოენზიმ  A-ს კომპონენტს, რომელიც აცეტილ-კოენზიმ A-ს სახით შეუცვლელია ცხიმების, ნახშირწყლებისა და  სხვადასხვა ამინომჟავების მეტაბოლიზმში.  ყველა ორგანოში, რომელშიც ხდება ინტენსიური მეტაბოლიზმი, კოენზიმ A-ს კონცენტრაცია მაღალია; მისი მაქსიმალური კონცენტრაცია აღმოჩენილია კანში. ვინაიდან ეპითელიუმის და ღრმა ქსოვილების დაზიანებისას აღინიშნება კოენზიმ A-ს ლოკალური დეფიციტი, დექსპანთენოლის ადგილობრივი გამოყენება განსაკუთრებით ეფექტურია მისი კარგი შეღწევადობის გამო. დექსპანთენოლი გრანულაციის მასტიმულირებელი, ანთების საწინააღმდეგო, რეეპითელიზაციის, ქავილის საწინააღმდეგო მოქმედების გამო, უზრუნველყოფს თვალის არაბაქტერიული ანთების სწრაფ აღმოფხვრას. 
პოლივინილის სპირტს გააჩნია ადჰეზიის თვისება რქოვანასთან მიმართებაში და ზრდის თვალის წვეთების სიბლანტეს, რის შედეგადაც იზრდება თვალის ზედაპირზე ზემოქმედების დრო.
ფარმაკოკინეტიკა

პრეპარატის აქტიური ნივთიერებები ახდენენ მოქმედებას უშუალოდ რქოვანის ზედაპირზე, ამიტომ ფარმაკოკინეტიკური თვისებების დადგენა შეუძლებელია. 

გამოყენების ჩვენებები

•   რქოვანასა და კონიუნქტივას სიმშრალის სიმპტომური მკურნალობა ცრემლის სეკრეციის დაქვეითების გამო, რომელიც განპირობებულია ადგილობრივი ან სისტემური დაავადებებით, ასევე ქუთუთოების არასრული დახურვით;
•    თვალის ზედაპირის დატენიანება მყარი კონტაქტური ლინზების ტარებისას.

გამოყენების წესი და დოზირება 

მხოლოდ ადგილობრივი გამოყენებისათვის ოფთალმოლოგიაში. 

მოზრდილებში დეპ-1-ს აწვეთებენ თითო წვეთს 6-ჯერ დღე-ღამეში კონიუნქტივალურ პარკში. მძიმე შემთხვევებში თვალის წვეთების გამოყენება შესაძლებელია ყოველ 1 საათში ერთხელ. 

მკურნალობის კურსის ხანგრძლივობა დამოკიდებულია კლინიკურ სურათზე და ინდივიდუალურად დგინდება. ჩვეულებრივ, ხელოვნური ცრემლის პრეპარატების გამოყენება შესაძლებელია

მთელი ცხოვრების განმავლობაში, გარდა იმ შემთხვევებისა, როდესაც შესაბამისი სიმპტომები დროებითია და დაკავშირებულია ძირითად დაავადებასთან ან მედიკამენტურ მკურნალობაზე რეაქციასთან. 

ყოველი გამოყენების შემდეგ ფლაკონს დაახურეთ სახურავი. არ არის რეკომენდებული საწვეთურის წვერით თვალებთან ან სხვა ზედაპირთან შეხება. 

რამდენიმე ოფთალმოლოგიური პრეპარატის ერთდროული გამოყენებისას აუცილებელია ინსტილაციებს შორის 15 წუთიანი ინტერვალის დაცვა, თვალის მალამოები გამოიყენება ბოლოს. 
პედიატრიული პოპულაცია

პრეპარატის გამოყენების უსაფრთხოება და ეფექტურობა ბავშვებსა და მოზარდებში დადგენილი არ არის. შესაბამისი კვლევები არ ჩატარებულა.

უკუჩვენებები

ჰიპერმგრძნობელობა აქტიური ნივთიერებების ან პრეპარატის რომელიმე დამხმარე კომპონენტის მიმართ.

გვერდითი რეაქციები 

გვერდითი რეაქციების სიხშირის პარამეტრები განისაზღვრება შემდეგნაირად: ძალიან ხშირად (≥ 1/10); ხშირად (≥1/100, მაგრამ <1/10); არახშირად (≥ 1/1000, მაგრამ <1/100); იშვიათად (≥1/10000, მაგრამ <1/1000); ძალიან იშვიათად (<1/10000); სიხშირე უცნობია (ვერ შეფასდება არსებული მონაცემების მიხედვით).
მხედველობის ორგანოს მხრივ: იშვიათად - ჰიპერმგრძნობელობის რეაქციები, მათ შორის წვა, ტკივილი თვალებში, მომატებული ცრემლდენა.
პაციენტებში რქოვანას გამოხატული დეფექტებით, ფოსფატის შემცველი თვალის წვეთებით მკურნალობის დროს, ძალიან იშვიათად დაფიქსირდა რქოვანას კალციფიკაციის შემთხვევები. 
შეტყობინებები საეჭვო არასასურველი რეაქციის შესახებ 
შეტყობინებები საეჭვო გვერდითი რეაქციების შესახებ სამკურნალო საშუალების რეგისტრაციის შემდეგ ძალიან მნიშვნელოვანია. თუ პაციენტს გამოუვლინდა სერიოზული გვერდითი რეაქცია სამკურნალო საშუალებაზე ან ახალი გვერდითი რეაქციის აღნიშვნის შემთხვევაში, რომელიც აღწერილი არ არის ამ ნაწილში, გთხოვთ მოახდინოთ ინფორმირება ფარმაკოზედამხედველობის ეროვნული სისტემის შესაბამისად.  

განსაკუთრებული მითითებები

დეპ-1 შეიცავს ბენზალკონიუმის ქლორიდს, რამაც შეიძლება გამოიწვიოს თვალის გაღიზიანება და რბილი (ჰიდროფილური) კონტაქტური ლინზების ფერის შეცვლა. თავი აარდიეთ პრეპარატის შეხებას რბილ კონტაქტურ ლინზებთან. კონტაქტური ლინზების გამოყენებისას ამოიღეთ ისინი თვალის წვეთების გამოყენებამდე და გაიკეთეთ ინსტილაციიდან 15 წუთის შემდეგ. 

გავლენა ავტოტრანსპორტის ტარების და მექანიზმების მართვის უნარზე
დეპ-1 თვალის წვეთების ინსტილაციისთანავე შესაძლებელია მხედველობის ხანმოკლე გაუარესება, რაც უმნიშვნელო გავლენას ახდენს ავტოტრანსპორტის და მექანიზმების მართვის უნარზე. 

გამოყენება ორსულობის და ლაქტაციის დროს

ორსულ/მეძუძურ ქალებში დექსპანთენოლის და პოლივინილის სპირტის გამოყენების შესახებ კლინიკური მონაცემები არ არსებობს.
ცხოველებზე ჩატარებულ კვლევებში არ გამოვლენილა პირდაპირი ან არაპირდაპირი მავნე ზემოქმედება ორსულობაზე, ემბრიონის/ნაყოფის განვითარებაზე, მშობიარობაზე ან პოსტნატალურ განვითარებაზე. 
ორსულობისა და ლაქტაციის პერიოდში პრეპარატის გამოყენება შესაძლებელია მკურნალ ექიმთან კონსულტაციის შემდეგ.

ურთიერთქმედება სხვა სამკურნალო საშუალებებთან

პრეპარატის მედიკამენტური ურთიერთქმედებების სპეციალური კვლევები არ ჩატარებულა. 
პოლივინილის სპირტმა შეიძლება კომპლექსები წარმოქმნას ადრენალინთან, ოქსიტეტრაციკლინთან, სკოპოლამინთან.

ჭარბი დოზირება

ჭარბი დოზირების შემთხვევები არ დარეგისტრირებულა.

გამოშვების ფორმა

თვალის წვეთები, 10 მლ-იან პლასტმასის ფლაკონში საწვეთური-საცობით და ხრახნიანი დამცავი თავსახურით, რომელიც აღჭურვილია დამცავი რგოლით. 
1 ფლაკონი სამედიცინო გამოყენების ინსტრუქციასთან ერთად მუყაოს კოლოფში.

შენახვის პირობები

ინახება სინათლისაგან დაცულ ადგილას არაუმეტეს 25°C ტემპერატურაზე.
ინახება ბავშვებისთვის მიუწვდომელ ადგილას!
ფლაკონის გახსნის შემდეგ პრეპარატის გამოყენება შეიძლება 6 კვირის განმავლობაში. 

ვარგისიანობის ვადა
3 წელი წარმოების თარიღიდან.
არ გამოიყენოთ ვარგისიანობის ვადის გასვლის შემდეგ.

აფთიაქიდან გაცემის პირობები
ფარმაცევტული პროდუქტის ჯგუფი III, გაიცემა რეცეფტის გარეშე.