ბენევრონი - Benevron B 3მლ 5 ცალი ამპულა

ბენევრონი B
სავაჭრო დასახელება

ბენევრონი B, Benevron B

წამლის ფორმა

საინექციო ხსნარი.

აღწერილობა: მუქი-წითელი ან მოყავისფრო ფერის გამჭვირვალე ხსნარი.

შემადგენლობა

პრეპარატის 1 ამპულა შეიცავს

აქტიური ნივთიერებები:

ვიტამინი B₁(თიამინის ჰიდროქლორიდი) 250 მგ

ვიტამინი B ₂ (რიბოფლავინი, რიბოფლავინის ნატრიუმის ფოსფატის ფორმით) 4 მგ

ვიტამინი B₆(პირიდოქსინის ჰიდროქლორიდი) 250 მგ

ვიტამინი B ₁₂ (ციანოკობალამინი) 1500 მკგ

დამხმარე ნივთიერებები: ბენზილის სპირტი, მონოთიოგლიცეროლი, ნატრიუმის ჰიდროკარბონატი, დინატრიუმის ედეტატი, საინექციო წყალი.

ბენევრონი ტაბლეტირებული ფორმით იხილეთ აქ: >Benevron BF - ბენევრონი BF 20 ტაბლეტი

პრეპარატის ათქ კოდიA11EA

ფარმაკოთერაპიული ჯგუფი

B ჯგუფის ვიტამინების კომპლექსი.

ფარმაკოლოგიური თვისებები

ფარმაკოდინამიკა

ბენევრონი Bარის კომბინირებული პრეპარატი, რომლის მოქმედება განპირობებულია მის შემადგენლობაში შემავალი კომპონენტების თვისებებით.

ვიტამინი B₁(თიამინის ჰიდროქლორიდი) ღვიძლში ფოსფორილირების პროცესების შედეგად გარდაიქმნება კოკარბოქსილაზად, რომელიც წარმოადგენს მრავალი ფერმენტული რეაქციის კოფერმენტს. ვიტამინი B ₁ მნიშვნელოვან როლს თამაშობს ნახშირწყლოვან, ცილოვან და ცხიმოვან ცვლაში, ასევე სინაფსებში ნერვული აგზნების გატარების პროცესებში, აუმჯობესებს მიოკარდიოციტების მეტაბოლიზმს და კუმშვით ფუნქციას ანემიური მიოკარდიოდისტროფიის დროს.

ვიტამინი B₂(რიბოფლავინი) წარმოადგენს უჯრედული სუნთქვის და მხედველობითი აღქმის პროცესების ყველაზე მნიშვნელოვან კატალიზატორს. რიბოფლავინი არეგულირებს ჟანგვა-აღდგენით პროცესებს, მონაწილეობს წყალბადის იონების გადატანაში, ქსოვილოვან სუნთქვაში, ნახშირწყლოვან, ცილოვან და ცხიმოვან ცვლაში, მხედველობის ორგანოს ნორმალური ფუნქციის შენარჩუნებაში, ჰემოგლობინისა და ერითროპოეტინის სინთეზში.

ვიტამინი B₆(პირიდოქსინის ჰიდროქლორიდი) აუმჯობესებს ორგანიზმის მიერ უჯერი ცხიმოვანი მჟავების მოხმარებას, დადებით გავლენას ახდენს ნერვული სისტემის, ღვიძლის ფუნქციებზე, სისხლწარმოქმნაზე. პირიდოქსინი ხელს უწყობს გოგირდის შემცველი ამინომჟავა ტაურინის სინთეზს (მეთიონინიდან და ცისტეინიდან), რომელიც ახდენს ნერვ-კუნთოვანი გამტარობის, კუნთების კუმშვადობის ნორმალიზებას, აფერხებს კრუნჩხვების განვითარებას. მონაწილეობს ტრიპტოფანის, მეთიონინის, ცისტეინის, გლუტამინის და სხვა ამინომჟავების ცვლაში. მნიშვნელოვან როლს თამაშობს ჰისტამინის ცვლაში. ხელს უწყობს ლიპიდური ცვლის ნორმალიზებას. პირიდოქსინის ნაკლებობა იწვევს ანემიას, დერმატიტს და კრუნჩხვებს.

ვიტამინი B ₁₂ (ციანოკობალამინი) მონაწილეობს რიგ ბიოქიმიურ რეაქციებში, რომლებიც უზრუნველყოფს ორგანიზმის ცხოველმყოფელობას – მეთილის ჯგუფების გადატანაში, ნუკლეინის მჟავების, ცილის სინთეზში, ამინომჟავების, ნახშირწყლების, ლიპიდების ცვლაში. აუცილებელია ნორმალური ჰემოპოეზისთვის და ერითროციტების მომწიფებისთვის. ხელს უწყობს სულფჰიდრილური ჯგუფების შემცველი ნაერთების დაგროვებას ერითროციტებში, რაც ზრდის მათ ტოლერანტობას ჰემოლიზის მიმართ. ციანოკობალამინის კოფერმენტული ფორმები – მეთილკობალამინი და ადენოზილკობალამინი – აუცილებელია უჯრედების რეპლიკაციისა და ზრდისათვის. ციანოკობალამინი გავლენას ახდენს ნერვული ქსოვილის მეტაბოლიზმზე (რნმ-ის, დნმ-ის, მიელინის სინთეზი, ცერებროზიდების და ფოსფოლიპიდების ლიპიდური შემადგენლობა), ამცირებს ტკივილის შეგრძნებას, რომელიც დაკავშირებულია მისი პერიფერიული ნაწილის დაზიანებასთან. ამცირებს ქოლესტერინის კონცენტრაციას სისხლში. დადებით გავლენას ახდენს ღვიძლის ფუნქციაზე. ამაღლებს ქსოვილების რეგენერაციის უნარს.

ფარმაკოკინეტიკა

ვიტამინი B ₁(თიამინის ჰიდროქლორიდი) ინტრამუსკულარული შეყვანის შემდეგ სწრაფად აღწევს სისხლში. ღვიძლში განიცდის ფოსფორილირებას. გროვდება ღვიძლში, გულში, ტვინში, თირკმელებში, ელენთაში, მაგრამ მისი მარაგი ორგანიზმში უმნიშვნელოა. გადალახავს პლაცენტარულ ბარიერს და ვლინდება დედის რძეში. გამოიყოფა ნაწლავების ან თირკმელების მეშვეობით.

ვიტამინი B ₂ (რიბოფლავინი) ნაწილდება ყველა ორგანოში და ქსოვილში, დეპონირდება კუნთოვან ქსოვილში, ღვიძლში, ელენთაში, თირკმელებში და მიოკარდიუმში. გადალახავს პლაცენტარულ ბარიერს და აღწევს დედის რძეში. მეტაბოლიზდება ღვიძლში. ნახევარგამოყოფის პერიოდი – 66-84 წთ. გამოიყოფა თირკმელებით, პრაქტიკულად სრულად მეტაბოლიტების სახით, მაღალი დოზებით მიღებისას – ძირითადად უცვლელი სახით. უმნიშვნელო რაოდენობით გამოიყოფა განავალთან ერთად. გამოიყოფა ჰემოდიალიზის დროს, მაგრამ უფრო ნელა, ვიდრე თირკმელებით ექსკრეციისას.

ვიტამინი B ₆ (პირიდოქსინის ჰიდროქლორიდი) მეტაბოლიზდება ღვიძლში ფარმაკოლოგიურად აქტიური მეტაბოლიტების წარმოქმნით (პირიდოქსალფოსფატი და პირიდოქსამინოფოსფატი). კარგად აღწევს ყველა ქსოვილში; გროვდება ძირითადად ღვიძლში, ნაკლებად – კუნთებში და ცენტრალურ ნერვულ სისტემაში. აღწევს პლაცენტაში, გამოიყოფა დედის რძესთან ერთად. ნახევარგამოყოფის პერიოდი – 15-20 დღე. გამოიყოფა თირკმელებით, ასევე ჰემოდიალიზის დროს.

ვიტამინი B ₁₂ (ციანოკობალამინი). ინტრამუსკულარული შეყვანის შემგეგ პლაზმური კონცენტრაციის პიკი მიიღწევა 60 წუთში. სისხლში უკავშირდება სპეციფიკურ ცილებს – ტრანსკობალამინებს, რომლებიც ახდენენ მის ტრანსპორტირებას ქსოვილებში. დეპონირდება უპირატესად ღვიძლში. თირკმელების ნორმალური ფუნქციის დროს ციანოკობალამინის 7-10% გამოიყოფა თირკმელებით, დაახლოებით 50% – ფეკალურ მასებთან ერთად; თირკმელების დაქვეითებული ფუნქციის დროს – 0-7% თირკმელებით, 70-100% – ფეკალურ მასებთან ერთად. გადალახავს პლაცენტარულ ბარიერს, აღწევს დედის რძეში.

გამოყენების ჩვენებები

- B₁, B₂, B ₆ და B₁₂ვიტამინების ჰიპო- და ავიტამინოზი;

- ნერვული სისტემის დაავადებების სიმპტომური მკურნალობა, როგორებიც არის პერიფერიული ნევრიტები და პოლინევრიტები, ნევრალგიები, პერიფერიული პარეზები და დამბლები, რადიკულიტები, რეტრობულბარული ნევრიტები, სარტყლისებრი ჰერპესი, ლუმბაგო, პლექსიტები, ნეკნთაშორისი ნევრალგიები, სახის ნერვის პარეზები, სამწვერა და სახის ნერვის ნევრალგია, გვერდითი ამიოტროფული სკლეროზი, ბავშვთა ცერებრალური დამბლა, ცენტრალური და პერიფერიული ნერვული სისტემის ტრავმები;

- ენცეფალოპათია (დიაბეტური, ალკოჰოლური, პოსტტრავმული);

- სხვადასხვა გენეზის ანემიები;

- კუჭ-ნაწლავის ტრაქტის დაავადებები: კუჭის და თორმეტგოჯა ნაწლავის წყლულოვანი დაავადება, ქრონიკული გასტრიტი, ენტეროკოლიტი, ჰეპატიტი, ღვიძლის ციროზი;

- კანის დაავადებები: ეგზემა და ნევროგენული წარმოშობის დერმატოზები, დერმატიტები და ნეიროდერმიტები, ფსორიაზი;

- სახსრების დაავადებები: ართრიტი, ოსტეოართროზი, რევმატიზმი, რევმატოიდული ართრიტი;

- ოფთალმოლოგიური დაავადებები: ჰემერალოპია, კონიუნქტივიტი, კერატიტი, ირიდოციკლიტი, კატარაქტა, რქოვანას წყლული;

- მომატებული ფიზიკური დატვირთვა;

- იზონიაზიდური რიგის ტუბერკულოზის საწინააღმდეგო საშუალებების, ანტიბიოტიკების გვერდითი ეფექტების პროფილაქტიკა და კორექცია.

გამოყენების წესი და დოზები

ხსნარი ინსტრამუსკულარული შეყვანისათვის.

პრეპარატის ბენევრონი B დოზირების რეჟიმსა და გამოყენების ხანგრძლივობას განსაზღვრავს ექიმი.

10 წელზე უფროსი ასაკის ბავშვებში და მოზრდილებში პრეპარატი ინიშნება

ინტრამუსკულარულად - 3 მლ (1 ამპულა) ერთხელ დღეში. საინექციო ხსნარი შეჰყავთ ღრმად კუნთებში.

ექიმის დანიშნულებით პრეპარატის 1 ამპულა შეიძლება გამოყენებულ იქნას 2-3 დღეში ერთხელ.

ბავშვები

10 წლამდე ასაკის ბავშვებში პრეპარატის გამოყენების ეფექტურობის და უსაფრთხოების შესახებ მონაცემები არ არსებობს.

უკუჩვენებები

- მომატებული მგრძნობელობა სამკურნალო პრეპარატის ნებისმიერი კომპონენტის მიმართ;

- სამკურნალო პრეპარატის შემადგენლობაში შემავალი რომელიმე ვიტამინის ჰიპერვიტამინოზი.

არასასურველი რეაქციები

არასასურველი რეაქციების სიხშირის პარამეტრები განისაზღვრება შემდეგნაირად: ძალიან ხშირად (≥1/10); ხშირად (≥1/100, მაგრამ <1/10); არახშირად (≥1/1000, მაგრამ <1/100); იშვიათად (≥1/10000, მაგრამ <1/1000); ძალიან იშვიათად (<1/10000); სიხშირე უცნობია (არსებული მონაცემებით შეფასება შეუძლებელია).

შესაძლებელია შემდეგი არასასურველი რეაქციები.

იმუნური სისტემის მხრივ: სიხშირე უცნობია - ჰიპერმგრძნობელობის რეაქციები (მათ შორის, ანაფილაქსია, გამონაყარი, ჭინჭრის ციება).

ნერვული სისტემის მხრივ: სიხშირე უცნობია - პარესთეზია.

სისხლძარღვების მხრივ: სიხშირე უცნობია - ჰიპოტენზია.

ზოგადი დარღვევები და დარღვევები შეყვანის ადგილას: სიხშირე უცნობია - რეაქციები ინექციის ადგილას (მათ შორის ტკივილი და შეშუპება).

სხვა დაფიქსირებული სიმპტომები: ცხელება, შემცივნება, ალები, თავბრუსხვევა, შეუძლოდ ყოფნა, გულისრევა, აკნე და ბულოზური გამონაყარი, ტრემორი. მეგალობლასტური ანემიის სამკურნალოდ პრეპარატის გამოყენების პირველი კვირების განმავლობაში შეიძლება განვითარდეს რეაქტიული თრომბოციტოზი.

შეტყობინებები საეჭვო არასასურველი რეაქციების შესახებ

შეტყობინებები საეჭვო არასასურველი რეაქციების შესახებ სამკურნალო საშუალების რეგისტრაციის შემდეგ მნიშვნელოვანია. თუ პაციენტს გამოუვლინდა სერიოზული არასასურველი რეაქცია სამკურნალო საშუალებაზე ან ახალი არასასურველი რეაქციის აღნიშვნის შემთხვევაში, რომელიც არ არის აღწერილი მოცემულ ნაწილში, გთხოვთ, მოახდინოთ ინფორმირება ფარმაკოზედამხედველობის ეროვნული სისტემის შესაბამისად.

განსაკუთრებული მითითებები

პოტენციურად სერიოზული ალერგიული არასასურველი რეაქციები, როგორიცაა ანაფილაქსიური შოკი, პრეპარატის ბენევრონი B პარენტერალური მიღების დროს ან დაუყოვნებლივ მიღების შემდეგ იშვიათად ვითარდება და ამან ხელი არ უნდა შეუშალოს პრეპარატის ბენევრონი B გამოყენებას პაციენტებში, რომლებიც საჭიროებენ პარენტერალურ შეყვანას, განსაკუთრებით ვერნიკეს ენცეფალოპათიის განვითარების რისკის მქონე პაციენტებში, რომელთაც ესაჭიროებათ თიამინის პარენტერალური მიღება. პრეპარატის ბენევრონი B მიმართ ალერგიული რეაქციის საწყისი გამაფრთხილებელი ნიშნებია ცემინება ან მსუბუქი ფორმის ასთმა, და შემდგომი მკურნალობის ჩატარებისას აუცილებლად გასათვალისწინებელია, რომ ამ პაციენტებში შესაძლებელია ანაფილაქსიური შოკის განვითარება.

ადეკვატური თერაპიის უზრუნველსაყოფად საჭიროა პაციენტის ჰემატოლოგიური და ნევროლოგიური სტატუსის რეგულარული კონტროლი. მკურნალობის საწყის პერიოდში იყო შეტყობინებები ჰიპოკალიემიის შედეგად განვითარებული გულის არითმიების შესახებ. ამ პერიოდში რეკომენდებულია სისხლის შრატში კალიუმის დონის კონტროლი. უნდა მოხდეს თრომბოციტების რაოდენობის კონტროლი მეგალობლასტური ანემიის თერაპიის პირველი კვირების განმავლობაში რეაქტიული თრომბოციტოზის განვითარების შესაძლო რისკის გამო.

პრეპარატი შეიცავს 60 მგ ბენზილის სპირტს 3 მლ ხსნარში. ბენზილის სპირტმა შეიძლება გამოიწვიოს ალერგიული რეაქციები.

უცნობია ბენზილის სპირტის მინიმალური კონცენტრაცია, რომლის დროსაც შეიძლება განვითარდეს ტოქსიკური ეფექტები.

მაღალი დოზების გამოყენება უნდა მოხდეს სიფრთხილით და მხოლოდ აუცილებლობის შემთხვევაში, განსაკუთრებით პაციენტებში ღვიძლის ან თირკმელების ფუნქციის დარღვევით, დაგროვების და ტოქსიკურობის რისკის გამო (მეტაბოლური აციდოზი).

ვიტამინ B_6-ისჰიპერვიტამინოზი და ტოქსიკურობის რეაქციები (პერიფერიული ნეიროპათია, უნებლიე მოძრაობები) დაფიქსირდა ქრონიკულ ჰემოდიალიზზე მყოფ პაციენტებში, რომლებიც ინტრავენურად იღებდნენ 4 მგ პირიდოქსინის შემცველ მულტივიტამინურ პრეპარატებს, კვირაში სამჯერ.

ანესთეზიის დროს უნდა მოხდეს სიფრთხილის დაცვა და მადეპოლარიზებელი მიორელაქსანტების (დიტილინი და სხვა) კურარეს მსგავსი ეფექტის შესუსტების შესაძლებლობის გათვალისწინება, პრეპარატში თიამინის შემცველობის გამო.

დამხმარე ნივთიერებები

პრეპარატი შეიცავს 1 მმოლზე ნაკლებ (23 მგ) ნატრიუმს 1 ამპულაში ანუ პრაქტიკულად „არ შეიცავს ნატრიუმს“.

ზეგავლენა ავტოტრანსპორტის და მექანიზმების მართვის უნარზე

პრეპარატი გავლენას არ ახდენს ავტოტრანსპორტის და მექანიზმების მართვის უნარზე.

გამოყენება ორსულობის და ლაქტაციის დროს

ორსულობისა და ლაქტაციის პერიოდში პრეპარატის გამოყენება შეიძლება მხოლოდ იმ შემთხვევაში, როდესაც დედისთვის მოსალოდნელი სარგებელი აღემატება პოტენციურ რისკს ნაყოფისათვის ან ძუძუთი კვებაზე მყოფი ბავშვისათვის.

ურთიერთქმედება სხვა სამკურნალო საშუალებებთან

არ უნდა მოხდეს პრეპარატის შერევა სულფიტების შემცველ ხსნარებთან, რადგან მათში ხდება თიამინის დაშლა. არ უნდა მოხდეს პრეპარატის შერევა პენიცილინთან ან სტრეპტომიცინთან (ხდება ანტიბიოტიკის დაშლა თიამინის მოქმედებით), ნიკოტინის მჟავასთან (ხდება თიამინის დაშლა). პრეპარატში თიამინის შემცველობის გამო შეიძლება აღინიშნოს მადეპოლარიზებელი მიორელაქსანტების (დიტილინი და სხვა) კურარეს მსგავსი ეფექტის შესუსტება.

პრეპარატში რიბოფლავინის არსებობა ამცირებს დოქსიციკლინის, ტეტრაციკლინის, ოქსიტეტრაციკლინის, ერითრომიცინის და ლინკომიცინის აქტივობას და არის სტრეპტომიცინთან შეუთავსებლობის მიზეზი. ქლორპრომაზინი, იმიპრამინი, ამიტრიპტილინი, ფლავინოკინაზას ბლოკადის ხარჯზე, არღვევს რიბოფლავინის ჩართვას ფლავინადენინმონონუკლეოტიდში და ფლავინადენინდინუკლეოტიდში და ზრდის მის გამოყოფას შარდთან ერთად. ფარისებრი ჯირკვლის ჰორმონები აჩქარებს რიბოფლავინის მეტაბოლიზმს. ვიტამინი B ₂ ამცირებს და ხელს უშლის ქლორამფენიკოლის არასასურველ რეაქციებს (ჰემოპოეზის დარღვევა, მხედველობის ნერვის ნევრიტი).

პრეპარატის შემადგენლობაში შემავალი პირიდოქსინის ჰიდროქლორიდი აძლიერებს შარდმდენების მოქმედებას, ასუსტებს ლევოდოპას აქტივობას. იზონიკოტინის ჰიდრაზიდი, პენიცილამინი, ციკლოსერინი და ესტროგენის შემცველი პერორალური კონტრაცეპტივები ასუსტებს პირიდოქსინის ჰიდროქლორიდის ეფექტს.

ციანოკობალამინის არსებობის გამო, პრეპარატი ფარმაცევტულად შეუთავსებელია ასკორბინის მჟავასთან, მძიმე მეტალების მარილებთან (ციანოკობალამინის ინაქტივაცია). ამინოგლიკოზიდები, სალიცილატები, ეპილეფსიის საწინააღმდეგო სამკურნალო პრეპარატები, კოლხიცინი, კალიუმის პრეპარატები ამცირებს ვიტამინ B_12-ისშეწოვას. ციანოკობალამინი აძლიერებს თიამინით გამოწვეული ალერგიული რეაქციების განვითარებას. ქლორამფენიკოლი ამცირებს ციანოკობალამინის გავლენას ჰემოპოეზზე. არ შეიძლება გამოყენება იმ პრეპარატებთან, რომლებიც ამაღლებს სისხლის შედედების უნარს.

ჭარბი დოზირება

B ჯგუფის ვიტამინების გამოყენებისას დოზის გადაჭარბების შემთხვევები ძალიან იშვიათია, რადგან ისინი წყალში ხსნადია და მათი ჭარბი რაოდენობა გამოიყოფა შარდთან ერთად. დოზის გადაჭარბების ნიშნებს წარმოადგენს: დაბუჟება, ჩხვლეტა ფეხებში, ხელებში ან სხეულის სხვა ნაწილებში, მგრძნობელობის, წონასწორობის და კოორდინაციის დარღვევა. ამ სიმპტომების განვითარების შემთხვევაში აუცილებელია მიმართოთ ექიმს.

მკურნალობა: სიმპტომური.

გამოშვების ფორმა

3 მლ საინექციო ხსნარი ყვითელი მინის ამპულაში.

5 ამპულა კონტურულ უჯრედოვან შეფუთვაში.

1 კონტურულ უჯრედოვანი შეფუთვა გამოყენების ინსტრუქციასთან ერთად მოთავსებულია მუყაოს კოლოფში.

შენახვის პირობები

ინახება სინათლისაგან დაცულ ადგილას არაუმეტეს 25⁰C ტემპერატურაზე.

ინახება ბავშვებისათვის მიუწვდომელ ადგილას!

ვარგისიანობის ვადა

3 წელი წარმოების თარიღიდან.

არ გამოიყენოთ ვარგისიანობის ვადის გასვლის შემდეგ.

გაცემის რეჟიმი:

ფარმაცევტულიპროდუქტის ჯგუფი - III ჯგუფი, გაიცემა რეცეპტის გარეშე