ატლანტმა მხრები გაშალა

ანოტაცია

ალისა როზენბაუმი 1905 წლის 2 იანვარს დაიბადა სანკტ-პეტერბურგში წარმატებული ებრაელი ფარმაცევტის ოჯახში, თუმცა 1917 წლის ოქტომბრის რევოლუციის შემდეგ როზენბაუმებს ქონება ჩამოართვეს. 1921-24 წლებში ის სოციალურ პედაგოგიკას სწავლობდა პეტროგრადის უნივერსიტეტში. კომუნისტური რეჟიმის იმ პირველ წლებში როზენბაუმებს, როგორც „ბურჟუაზიულ ელემენტებს“ ყველანაირად ავიწროვებდნენ და ოჯახი ლამის შიმშილობდა. 1926 წელს ალისამ აშშ-ს ვიზა მიიღო და ემიგრირება მოახერხა. თავდაპირველად ჩიკაგოში ცხოვრობდა, შემდეგ კი ჰოლივუდში დაფუძნდა, სადაც სხვადასხვა წვრილ-წვრილი სამუშაოებით გაჰქონდა თავი. 1930-იან წლებში ალისა როზენბაუმმა - აინ რენდმა - დაწერა რამოდენიმე კინოსცენარი და თავისი პირველი რომანი „ჩვენ ცოცხლები“, რომელშიც საბჭოეთის პირველი წლების რეალობა ასახა. რომანი აშშ-ში წარუმატებელი გამოდგა, თუმცა ევროპული გამოცემები კარგად იყიდებოდა და მუსოლინის იტალიაში მწერლის ნებართვის გარეშე ორი კონოფილმიც კი გადაიღეს. 1943 წელს გამოიცა რომანი „პირველწყარო“, რომელმაც აინ რენდს წარმატება და ფინანსური კეთილდღეობა მოუტანა. მომდევნო წლებში მწერალი ჩართული იყო პოლიტიკურ ცხოვრებაში, მონაწილეობდა სხვადასხვა ანტიკომუნისტურ აქტივობებებში და წერდა თავისი ცხოვრების მთავარ ლიტერატურულ ნაშრომს – „ატლანტმა მხრები გაშალა“. წიგნი 1957 წელს გამოიცა და უზარმაზარი წარმატება მოიპოვა. მომდევნო წლებში აინ რენდი ქმნიდა არამხატვრულ ნაწარმოებებს, რომლებშიც ფორმალური სახე მისცა ობიექტივიზმის ფილოსოფიას, რომელიც უკვე ჩამოაყალიბა თავის მხატვრულ ნაწარმოებებში. აინ რენდის რომანების გმირები თავად ცხოვრობენ ობიქტივიზმის იდეებით და თავადვე აყალიბებენ მის ძირითად პოსტულატებს. ანტიკომუნიზმი აინ რენდის პოლიტიკური ფილოსოფიის ერთ-ერთი ქვაკუთხედია. სწორედ ამიტომაც იკრძალებოდა უმკაცრესად აინ რენდის წიგნები საბჭოთა რეჟიმის დროს - ყველაზე ინტელექტუალ დისიდენტებსაც კი არაფერი სმენოდათ მათ შესახებ მაშინ, როდესაც დანარჩენ მსოფლიოში ისინი მილიონობით იყიდებოდა. ერთ-ერთი გამოკითხვის მიხედვით ”ატლანტმა მხრები გაშალა"" მეორე ადგილზე გავიდა იმ წიგნებს შორის, რომელთაც ამერიკელების პირად ცხოვრებაზე გადამწყვეტი გავლენა მოახდინეს. მხოლოდ ბიბლიას ჩამორჩა. აინ რენდის იდეებმა ძლიერი გავლენა იქონიეს მემარჯვენე პოლიტიკურ პარტიებზე და, განსაკუთრებით, ლებერტარიანელებზე. ბევრი მსხვილი კორპორაციის ტოპ–მენეჯერი რომანს „ატლანტმა მხრები გაშალა“ თავის სამაგიდო წიგნად ასახელებს. ყველაზე დიდი გავლენა მწერალმა მთელ მსოფლიოში ჩვეულებრივ ადამიანებზე მოახდინა, რომელთაც ირწმუნეს საკუთარი თავის, განავითარეს თავიანთი უნარები და საუკეთესო შედეგებს მიაღწიეს.