ასკანელი, ხვანჭკარა, კუპაჟი, წითელი ნახევრადტკბილი ღვინო, 2021 წ.

დახასიათება

ასკანელის წითელი ნახევრადტკბილი ღვინო, ხვანჭკარა, ორი სახეობის ყურძნისგან, ალექსანდროულისა და მუჯურეთულისგანაა დაყენებული. ბუნებრივი ზომიერი სიტკბოს შესანარჩუნებლად ალკოჰოლურ დუღილს ტემპერატურის დაწევით ვწყვეტთ. მუქ ლალისფერ ღვინოს ამშვენებს კარგად გამოხატული შავი ხილისა და ტკბილი სუნელების არომატები, ზომიერზე მაღალი მჟავიანობა, მწიფე ტანინები, საშუალო სხეული, ზომიერი ალკოჰოლი, სასიამოვნო გაწონასწორებული სიტკბო და გახანგრძლივებული დაბოლოება.

ბრენდის ისტორია

ლეგენდის თანახმად, სოფელ ასკანაში დგას უძველესი ციხესიმაგრე, რომელსაც დიდი ასაკისა და გამორჩეული გამძლეობის გამო “ასკანიანი ციხე” ეწოდა. ასკანელის სახელის საფუძვლებიც ქართველის მებრძოლი ხასიათის მითოსსა და ისტორიაში მოიპოვება. ანთიმოზ ჩხაიძე ის ადამიანია, ვის სახელსაც ასკანელის მეღვინეობის ტრადიციისთვის საფუძვლის ჩაყრა უკავშირდება. მან ააგო მარანი მეცხრამეტე საუკუნის მიწურულს, სადაც ამზადებდა განსაკუთრებულად სუფთა და არომატულ ღვინოს სხვადასხვა ჯიშის ყურძნისგან. ერთ-ერთი ჯიში, რომელიც ჩხაიძეების გვარმა შემოინახა, სახელგანთქმული ჩხავერია. ამბობენ, ჩხაიძეების გვარიც ამ სახელიდან მოდისო. ბრენდის მიღმა არსებული ადამიანებისთვის, ეს გადმოცემები სიამაყისა და უდიდესი პასუხისმგებლობის საფუძველია. დღეს კომპანია 60 სახეობაზე მეტი დასახელების ღვინოს აწარმოებს, ასევე ასხამს ბრენდის, შუშხუნა ღვინოსა და ჭაჭას. აქვს ქარხნები სამ რეგიონში - კახეთში, გურიასა და თბილისში.