ასკანელი, მუკუზანი პრემიუმი, საფერავი, წითელი მშრალი ღვინო, 2019 წ.

დახასიათება

ასკანელის წითელი მშრალი ღვინო, მუკუზანი პრემიუმი, საფერავისგანაა დაყენებული. ნარჩევმა ყურძენმა და მუხის კასრში გახანგრძლივებულმა დავარგებამ კიდევ უფრო გააძლიერა კლასიკური მუკუზანის თვისებები, გააღრმავა არომატების მრავალფეროვნება და განსაკუთრებული სიკაშკაშე შემატა ამ დახვეწილ ღვინოს. მუქ ლალისფერ ღვინოში მაყვლის, შავი ქლიავისა და შავი პილპილის კარგად გამოხატულ არომატებს ჰარმონიულად ერწყმის მუხის ნატიფი ტონები. ღვინოს ამშვენებს გამახალისებელი მჟავიანობა, მდიდარი მრგვალი ტანინები, სავსე სხეული და გახანგრძლივებული დაბოლოება.

ბრენდის ისტორია

ლეგენდის თანახმად, სოფელ ასკანაში დგას უძველესი ციხესიმაგრე, რომელსაც დიდი ასაკისა და გამორჩეული გამძლეობის გამო “ასკანიანი ციხე” ეწოდა. ასკანელის სახელის საფუძვლებიც ქართველის მებრძოლი ხასიათის მითოსსა და ისტორიაში მოიპოვება. ანთიმოზ ჩხაიძე ის ადამიანია, ვის სახელსაც ასკანელის მეღვინეობის ტრადიციისთვის საფუძვლის ჩაყრა უკავშირდება. მან ააგო მარანი მეცხრამეტე საუკუნის მიწურულს, სადაც ამზადებდა განსაკუთრებულად სუფთა და არომატულ ღვინოს სხვადასხვა ჯიშის ყურძნისგან. ერთ-ერთი ჯიში, რომელიც ჩხაიძეების გვარმა შემოინახა, სახელგანთქმული ჩხავერია. ამბობენ, ჩხაიძეების გვარიც ამ სახელიდან მოდისო. ბრენდის მიღმა არსებული ადამიანებისთვის, ეს გადმოცემები სიამაყისა და უდიდესი პასუხისმგებლობის საფუძველია. დღეს კომპანია 60 სახეობაზე მეტი დასახელების ღვინოს აწარმოებს, ასევე ასხამს ბრენდის, შუშხუნა ღვინოსა და ჭაჭას. აქვს ქარხნები სამ რეგიონში - კახეთში, გურიასა და თბილისში.